Yesu waasaambiliziizie nangue pa kunti muntu aaluke Mukristu, apalile kubatiziiwa. (Some Mateo 28:19, 20, NWT.) Lubatizio lupalile kukitua siani? Kabili muntu apalile kukita ki eevi akabe kubatiziiwa?

1. Lubatizio lupalile kukitua siani?

Mulandu “kubatiziiwa” ufumine mu mulandu umo wa Kigiriki uli na mana ya “kwibizia” mu menda. Musita Yesu lubaamubatiziizie kuli Yoane, baamututubikile mu Mumana wa Yordani, kisia paapo, “waafumine mu menda.” (Marko 1:9, 10) Bakristu ba kisinka ni beene, bali babatiziiwa nga Yesu. Bali baibiziiwa kakiine ao bali batutubikua mu menda.

2. Kine muntu wabatiziiwa, ali walangilila ki?

Kupitila kubatiziiwa, muntu ali walangilila nangue waakipeela ye muine kuli Yehova Leeza. Muntu ali wakita siani eevi epeele kuli Leeza? Ntaanzi ya kubatiziiwa, muntu ali wapepa kuli Yehova waliposie bunke, wamubuila nangue atonene kumubombela Weene loonse. Wamulaya Yehova nangue wakaba kuya wamupupasie weene bunke, kabili nangue kukita kutona kwakue Leeza, i kwakaba kuya kwali kintu kya mana saana mu buikazi bwakue. Ozo muntu, wasaakula ‘kwikaana ye muine ni . . . kutwalilila kukoonka’ masambilizio akue Yesu pamo ni mufuano wakue. (Mateo 16:24, NWT) Kwipeela pamo ni kubatiziiwa kwakue, kwamulengia aaluke ni bukibuza bwa peepi pamo ni Yehova kabili pamo ni bantu baalia bali bamupupa Yehova.

3. Muntu apalile kukita ki ntaanzi ya kubatiziiwa?

Ntaanzi ya kubatiziiwa, upalile kusambilila palwakue Yehova ni kulumia kiketekelo kyobe muli weene. (Some Baebrania 11:6.) Kine wakita evio, wakaba kukila kumutona Yehova, paantu wakaba kukila kumumana kabili kiketekelo kyobe kyakaba kukila kutana. Kupuako, wakaba kutona kusimikila palwakue ni kwikala kukoonkana ni mafunde akue. (2 Timoteo 4:2; 1 Yoane 5:3) Kine muntu ekeele kukoonkana ni ‘mutoneene Mulopue [Yehova] ni kukita lyonse bintu bimuwaamiine,’ wakaba kusaakula kwipeela mu buikazi bwakue kuli Leeza ni kubatiziiwa.​—Bakolosai 1:9, 10. a

 TUKEBE SAANA

4. Kunti twasambililako ku lubatizio lwakue Yesu

Some Mateo 3:13-17, (NWT), eevi mumane bingi palua kubatiziiwa kwakue Yesu. Kisia londoluele beebi biipuzio:

• Eba, Yesu waabatiziiziwe musita lwaali wakili muana muniini?

• Waabatiziiziwe siani? Eba, baamwitililesie menda ku mutue?

Yesu waatendekele kubomba miilo ya mana ibaamupeele kuli Leeza eze akite pa kyalo, musita lwaabatiziiziwe. Some Luka 3:21-23 ni Yoane 6:38, kisia londoluele keeki kiipuzio:

• Kisia Yesu kubatiziiwa, ni miilo ki yabanga wabiikile pa ntaanzi mu buikazi bwakue?

5. Ni weewe, kunti wabatiziiwa

Ku ntendeko, kwipeela pamo ni kubatiziiwa, kunti byamoneka byakolele. Anzia evio, kunti wakita buyantanzi mpaka wafikiila kwiunvua nangue upalile kukita bobo bupinguzi bwa mana. Eevi mumaneko bantu bamo baakitile evio, mone VIIDEO.

Some Yoane 17:3 ni Yakobo 1:5, kisia londoluele keeki kiipuzio:

• Ni kiki kili kumukwasia muntu emone nangue eteaniizie palua kubatiziiwa?

1. Tuli twaipeela kuli Yehova musita utuli twamubuila nangue tutonene kumubombela loonse

2. Musita utuli twabatiziiwa, tuli twalangilila ku bantu nangue twakiipeela kuli Leeza

 6. Musita utuli twabatiziiwa, tuli twaaluka seemu ya lupua lwakue Yehova

Musita utuli twabatiziiwa, tuli twaaluka seemu ya lupua lwa mu kyalo kyonse luli ni buumo. Anzia kine tufumine mu seemu yapuseene kabili twali ni buikazi bwapuseene, fwe bonse tuli ni kiketekelo kimo kabili twikeele twakoonkele mafunde ali mu Bibilia. Some Malumbo 25:14 ni 1 Petro 2:17, kisia londoluele keeki kiipuzio:

• Nga vyalanda azo maleembo, tuli twapatamo ki kine twabatiziiwa?

 MU KIFUPI

Yesu waasaambiliziizie nangue pa kunti muntu aaluke Mukristu, apalile kubatiziiwa. Ntaanzi ya kunti muntu abatiziiwe, apalile kulumia kiketekelo kyakue kuli Yehova, kwikala kukoonkana ni mafunde Akue, kabili ni kwipeela kuli Weene.

Kunti waasuka siani?

• Lubatizio lupalile kukitua siani, kabili juu ya ki ni lwa mana?

• Juu ya ki kwipeela pamo ni kubatiziiwa ni bintu bya mana?

• Ntaanzi ya kwipeela ni kubatiziiwa, muntu apalile kukita ki?