LISOMO LYA 24

Ba Malaika Ni Baani Kabili Bali Babomba Miilo ki?

PLAY

Yehova atonene tumane lupua lwakue luli ku muulu. Loolo lupua lubiikile mukati ba malaika, baalia bali bakuutua “baana bena Leeza.” (Yobu 38:7) Bibilia ili yalanda ki palua ba malaika? Ba malaika bali babomba miilo ki? Eba, ba malaika bonse batwaliliile kuya bali mu lupua lwakue Leeza?

1. Ba malaika ni baani?

Ntaanzi ya kubumba kyalo, Yehova waabumbilenke ba malaika. Ni beene bali nga Leeza, tebeezi kumoneka kabili bekeele ku muulu. (Baebrania 1:14) Kuli ma milioni a ba malaika, kabili kila malaika ali ni aali yakue. (Nfyulo 5:11) Bali “bafikilizia mulandu wakue [Yehova], ni kunakila lizui lyakue.” (Malumbo 103:20) Musita wa kale, lunge Yehova waali watuma ba malaika batwale mpunda ku bantu bakue, kubakwasia ni kubapususia. Ni leenu, ba malaika bali batungulula Bakristu baye ku bantu baalia batonene kumumana Leeza.

2. Sataana pamo ni bibanda byakue ni baani?

Ba malaika bange, te baasiele bali ba kisinka kuli Yehova. Malaika wa kuanza olia waasangukile ao waalukile ntombosi i ‘olia ali wakuutua Kibanda ao Sataana ali wabeepa bekala kyalo bonse.’ (Nfyulo 12:9) Sataana abanga watonene kuteeka bantu. Pakaako waabalengiizie ba Adamu ni Eva, kabili kisia paapo waabalengiizie ni ba malaika bange bandue kumunakila Yehova. Babo ba malaika baasangukile, bali bakuutua bibanda. Yehova waabakumbile ku muulu ni kubapooza pa kyalo, kabili bakaba kwinoonua.—Some Nfyulo 12:9, 12.

3. Sataana pamo ni bibanda bali baezia siani kutuzeezia?

Sataana pamo ni bibanda, bali bazeezia bantu bengi kupitila bintu bya mipasi. Ezio mibeele ya kwezia kulanziana ni mipasi iine ao kupitila bantu, ibiipile. Kwa mufuano, bantu bange bali baya kubeepuzia bantu baalia bali batandulula ntanda, baalia bali balanda ntaanzi bintu byakukitika, banganga, ni baalia bali bakosia na bizimba. Bange bali baitabila kundapua ao kutunzua na miti iliko ni maka a mipasi. Bantu bange bazeziiziwe kupitila kuzumina nangue kunti balanda ni bantu bafuile. Inzi Yehova watusoka eevi: “Tekuiile baalia bali balanziana ni myela ibi, kabili tekukebe masoke ku bantu bali balanda ntaanzi bintu byakaba kukitika.” (Balawi 19:31) Watupeela azo masoke eevi tekuti tuzeeziiwe kuli Sataana pamo ni bibanda. Babo bonse, ni baluani bakue Leeza, kabili batonene kutukitila ovio.

TUKEBE SAANA

Tumone bintu biweeme bili byakita ba malaika, maavia ali afuma mu kulanziana ni mipasi, kabili vya kwisuunga eevi Sataana pamo ni bibanda bakatuzeezia.

4. Ba malaika bali bakwasia bantu bamumane Yehova

Ba malaika te beezi kuya ku masesi a bantu eevi kubasimikila. Inzi, kunti babatungulula babombi bakue Leeza baye ku bantu baalia bakebele kumana kisinka palwakue Leeza. Some Nfyulo 14:6, 7, kisia londoluele beebi biipuzio:

Juu ya ki tupalile kukwasiiwa na ba malaika mu miilo ya kusimikila?
Eba, wakoseleziiwa kumana nangue ba malaika kunti bakutungulula ku bantu baalia batonene kumana kisinka kili mu Bibilia? Juu ya ki?

5. Kaana bintu bya mipasi

Sataana pamo ni bibanda, bonse, ni baluani bakue Yehova. Kabili ni baluani beetu. Some Luka 9:38-42, kisia londoluele keeki kiipuzio:

Bibanda, bili byabakitila siani bantu?

Te tutonene kubipeela fuasi bibanda mu buikazi bwetu. Some Malanguluzi a Mizilo 18:10-12, kisia londoluele beebi biipuzio:

Bibanda bili byakita siani eevi kwezia kututungulula ni kutulanzia? Kabili ni bintu ki bya mipasi bili byakitua na bantu pa fuasi pa wikeele?
Eba, wamona nangue kilisie buino paantu Yehova ali watukaania kukita bintu bya mipasi? Juu ya ki?

Mone VIIDEO, kisia londoluele beebi biipuzio.

VIIDEO: “Mupinge Kibanda” (5:02)

Pa lobe, watontonkania nangue kizele ao mukana ubanga wavuele muana wakue kwa Palesa, ubanga wabiipile? Juu ya ki?
Palesa waali wapalile kukita ki eevi bibanda te kuti bimwemie?

Lyonse, Bakristu ba kisinka bali bapinga bibanda. Some Miilo ya Batumua 19:19 ni 1 Bakorinto 10:21, kisia londoluele keeki kiipuzio:

Juu ya ki kili buino kwinoona kila kintu kiuli nakio keelia kipateene ni bintu bya mipasi?

6. Viinda kuluana ni Sataana pamo ni bibanda byakue

Sataana i ali watungulula bibanda. Inzi ba malaika ba kisinka, bali batungululua na mukulu wa ba malaika, Mikaeli. Leelio ni liina linge lyakue Yesu. Eba, Mikaeli ali ni maka saana? Some Nfyulo 12:7-9, kisia londoluele beebi biipuzio:

Naani alipo saana ni maka? Eba, ni Mikaeli pamo ni ba malaika bakue ao ni Sataana pamo ni bibanda byakue?
Eba, watontonkania nangue basambi bakue Yesu bapalile kunvua mwenzo wakue Sataana pamo ni bibanda byakue?

Kunti waviinda kumuluisia Sataana pamo ni bibanda byakue. Some Yakobo 4:7, kisia londoluele keeki kiipuzio:

• Kunti wakita siani eevi kwisuunga kufuma ku miteo yakue Sataana pamo ni bibanda byakue?

BANGE BALI BALANDA: “Te kibiipile kusaapa misaapo ao kumona ma viideo alangiliile bintu bya mipasi. Kubikita i kubiipile.”

Pa lobe, juu ya ki kutontonkania evio kubiipile?

MU KIFUPI

Ba malaika ba kisinka bali batukwasia. Sataana pamo ni bibanda byakue, ni baluani bakue Yehova kabili bali babombia bintu bya mipasi eevi kuzeezia bantu.