LISOMO LYA 26
Juu ya ki pa Kyalo Pali Bintu Bibiipile ni Maavia?
Lingi, kine kwaaluka maavia, muntu ali waiipuzia: “Juu ya ki?” Tuli ni nsaansa kakiine kumana nangue Bibilia ili yaasuka keekio kiipuzio!
1. Sataana waakitile siani eevi kuleeta bintu bibiipile pa kyalo?
Sataana Kibanda waalukile ntombosi. Sataana waali watonene kuteeka bantu bonse. Pakaako, waabalengiizie bantu ba kuanza, ba Adamu ni Eva beyunge nakue mu buntombosi. Sataana waakitile evio kupitila kumubeepa Eva. (Kutendeka 3:1-5) Waamulengiizie Eva atontonkanie nangue Yehova amutanine kintu kimo kiweeme saana. Sataana waakebele kulanda nangue, bantu kunti baaluka ni nsaansa kine te bamunakiile Leeza. Sataana waalandile bufi bwa kuanza musita lwaamulandile Eva nangue takaba kufua. Pakaako, Bibilia ili yamukuuta nangue ‘kabeepa ao wa bufi, kabili weene i ntuntuko ao nsulo ya bufi.’—Yoane 8:44.
2. Ba Adamu ni Eva baasaakuile kukita ki?
Yehova waabapeele ba Adamu ni Eva bintu bingi saana. Waabalandile nangue kunti balia ku kila kimuti kili mu busitani, ingasie kimuti kimo i kyaabakaniizie. (Kutendeka 2:15-17) Inzi, baapinguile kulia ku kimuti kibaakaniiziwe. Eva “waatendekele kusaba lizabo ku keekio kimuti ni kulia.” Kisia paapo, Adamu ni weene “waatendekele kulia leelio lizabo.” (Kutendeka 3:6) Bonse babili baandilue kumunakila Leeza. Paantu ba Adamu ni Eva baali bapuililikile, baali ni buviinde bukata bwa kukita kintu kiweeme. Inzi baakeene mukwitonena kumunakila Leeza, baakitile lizaambi kabili baakeene kukoonka butunguluzi bwakue. Bobo bupinguzi bubaakwete, bwaabaleteele buavia bukata.—Kutendeka 3:16-19.
3. Bupinguzi bwaakwete ba Adamu ni Eva bwaatuleteele maavia ki?
Musita ba Adamu ni Eva lubaakitile lizaambi, baalukile basipuililikile. Kabili byaafumiinemo, baalengiizie ni baana babo baaluka basipuililikile. Bibilia ili yalanda eevi palwakue Adamu: ‘Kibalo ao lizaambi lyaaleetelue na muntu umo i lyaaleetele nfua. Ni pakaako, eezi nfua ikumeene mwaya kyalo.’—Baroma 5:12.
Kuli bintu bingi bili byalengia twaluke mu maavia. Musita unge, tuli twaaluka mu maavia juu ya bupinguzi bubiipile butuli twakwata. Lunge, tuli twaaluka mu maavia paantu bantu bange bali bakwata bupinguzi bubiipile. Ni musita unge tuli twaaluka mu maavia juu ya bintu bili byakitika paantu twasaanguanga pa fuasi isipalile kabili mu musita usipalile.—Some Kasimika 9:11.
TUKEBE SAANA
Tumone juu ya ki te Leeza ali waleeta bintu bibiipile ni maavia mu kyalo, kabili vyali waiunvua musita utuli twaaluka mu maavia.
4. Naani ali watuleetela maavia?
Bantu bengi bazumiine nangue Leeza i ali watungulula kyalo kyonse. Eba, ni Leeza kakiine? Mone VIIDEO.
Some Lwimbo lwa Malilo 3:33 ni 1 Yoane 5:19, kisia londoluele keeki kiipuzio:
-
Eba, Leeza i ali watuleetela maavia ni bintu bibiipile?
5. Mona bintu bili mukukitika mu buteeko bwakue Sataana
Some Kutendeka 3:1-6, kisia londoluele beebi biipuzio:
-
Sataana waalandile bufi bwa siani?—Mone mulongo wa 4 ni 5.
-
Sataana waalandile siani eevi alangilile nangue Yehova abatanine bantu kintu kimo eevi kyaweeme?
-
Kukoonkana ni bulanzi bwakue Sataana, pa kunti bantu baye bali ni nsaansa, eba, Yehova apalile kuya wali Kateeka wabo?
Some Kasimika 8:9, kisia londoluele keeki kiipuzio:
-
Paantu te Yehova ali mukuteeka kyalo, ni maavia ki ali mukukitika mu kyalo?
-
Ba Adamu ni Eva, baali bapuililikile kabili baali baikeele mu Paradiso. Inzi, baamutuiliziizie Sataana kabili baamusangukiile Yehova
-
Kisia buntombosi, kyalo kyaakumeenepo lizaambi, maavia, ni lufu
-
Yehova wakaba kupuisia lizaambi, maavia ni lufu. Bantu bakaba kupuililika kabili nga vikyaali ntaanzi, ni kwikala mu Paradiso
6. Yehova ali watwemena mu maavia etu
Eba, Leeza ali watwemena mu maavia etu? Mona bintu byaaleembele Likolo Daudi ni mutumua Petro. Some Malumbo 31:7 ni 1 Petro 5:7, kisia londoluele keeki kiipuzio:
-
Kisia kumana nangue Yehova ali wainika maavia etu ni kuya watwemena, weewe, waiunvua siani?
7. Leeza wakaba kupuisia maavia onse ali na bantu
Some Isaya 65:17 ni Nfyulo 21:3, 4, kisia londoluele keeki kiipuzio:
-
Yehova wakaba kupuisia kwema konse kuli mukulengiiwa na maavia ali na bantu. Juu ya ki kumana kaako kwatuteekia mutima?
Eba, wakiba wamanine?
Musita Sataana lwaalandile bufi bwa kuanza, waamufisiizie Yehova. Waainoonene lulumbi lwakue Yehova, ni kubalengia bantu batontonkanie nangue Yehova ni Kateeka asipalile kabili asili na ntono. Yehova wakaba kulumba ao kuswesia liina lyakue leenusie, musita lwali wakaba kupuisia maavia a bantu. Mu milandu inge, wakaba kulangilila nangue buteeko bwakue i bukililepo kuwaama. Kuswesiiwa kwa liina lyakue Yehova ni kintu kimo kya mana saana.—Mateo 6:9, 10.
BANGE BALI BALANDA: “Leeza i atengele tuye twaema.”
-
Weewe, kunti walanda siani?
MU KIFUPI
Sataana Kibanda pamo ni ba Adamu ni Eva, beene i baalengiizie bintu bibiipile bili mukukitika mu kyalo. Yehova ali watwemena saana mu maavia etu, kabili wakaba kuapuisia leenusie.
Kunti waasuka siani?
-
Sataana Kibanda waamulandile Eva bufi ki?
-
Buntombosi bwaakitile ba Adamu ni Eva, bwaatuleteele maavia ki?
-
Twamana siani nangue Yehova ali watwemena mu maavia etu?
MANAKO NI BINGE
Mona Bibilia viili yaleeta mana ya lizaambi.
Soma eevi umane bingi palua kiipuzio kyaaleetele Sataana Kibanda mu busitani bwa Edeni.
“Juu ya ki Leeza Alekeleele Maavia?” (Lupungu Lwakue Kamwenenena, lwa 01/01/2014)
Toosia umane byasuko bili byateekia mutima ku keeki kiipuzio.
“Juu ya ki Leeza Waalekeleele ma Milioni a Bayuda Baipaiwa?” (Lyasi lili mu Kitente kya Enternete)
Mona beelia byaasambiliile mwalalume umo palua maavia aabanga wamona akitika.
