LISOMO LYA 28
Mutasie Yehova ni Yesu Juu ya Beelia Bibaakukitiile
Uli waiunvua siani kine mwinobe wakupeela bupe bwaweeme? Paange, bobo bupe buli bwakulengia usaansamuke saana, kabili uli kutona ukite kintu kya kumulangilila mwinobe nangue watasia palua bobo bupe. Yehova ni Yesu baatupeele bupe bukililepo kuwaama butusinapatepo ata limo: kilubula mulandu. Kunti twalangilila siani nangue tuli twatasia palua bobo bupe?
1. Ni nzila ki imo ituli kulangilila kutasia palua keelia kibaatukitiile kuli Leeza ni Kristu?
Bibilia ilaile nangue “kubalua muntu wamuketekela [Yesu]” kunti waikala loonse. (Yoane 3:16) Tuli twakita siani evio? Kuli na mana ya kulanda nangue te tupalilesie kupeleela pa kumuzumina Yesu, inzi, kuli ni binge bya kukita. Tupalile kabili kulangilila kiketekelo kyetu kupitila bupinguzi butuli twakwata ni bintu bituli twakita. (Yakobo 2:17) Kine twalangilila kiketekelo kupitila beelia bituli twakita ni kulanda, tuli twakosia bukibuza bwetu pamo ni Yesu ni Yehova, Baba wakue.—Some Yoane 14:21.
2. Ni kintu ki kiibeleele kili kutukwasia kulangilila nangue tuli twatasia palua keelia kibaatukitiile kuli Yehova ni Yesu?
Musita wa kyungulo busiku bwa kukiila kufua kwakue, Yesu waababuilile basambi bakue nzila inge ya kulangilila kutasia palua ngeleelo yakue. Waatendekeziizie kintu kimo kiibeleele kili kyakuutua na Bibilia nangue “Kyakulia kya Lyungulo Kyakue Mulopue,” keelia kimanikile kabili mu liina lya Kibukisio kya lufu lwakue Kristu. (1 Bakorinto 11:20) Yesu waatonene batumua, ni Bakristu bonse ba kisinka bakwalukako kisia batumua bakue kufua, baye balanguluka nangue weene waafumiizie bukose bwakue juu yeetu. Pakaako, waalandile eevi: “Ni mwemue mukabe mwakita evio vyenka pakunanguluka.” (Luka 22:19) Kine waya kulonghaanako Kibukisio, uli kulangilila nangue uli mukutasia palua ntono ikata itulangiliilue kuli Yehova ni Yesu.
TUKEBE SAANA
Tumone nzila inge iuli kulangilila nangue uli mukutasia palua ntono ikata ibaatulangiliile kuli Yehova ni Yesu. Tumone juu ya ki Kibukisio kya lufu lwakue Kristu ni kya mana.
3. Kunti twakita ki eevi kulangilila nangue tuli mukutasia?
Tontonkania waponena mu menda wasia kufua, kisia muntu umo wakupususia. Eba, uli kulabasie lubilo-lubilo keekio kintu kibakukitila kuli ozo muntu? Ao uli kukebako bintu bya kukita eevi umulangilile nangue uli mukutasia palua keelia kyaakukitila?
Tuli ni lisyuko lya kupata bukose bwa loonse juu ya buwaame bwakue Yehova. Some 1 Yoane 4:8-10, kisia londoluele beebi biipuzio:
-
Juu ya ki ngeleelo yakue Yesu ni bupe bwibeleele?
-
Uli waiunvua siani palua keelia kyaakukitiile Yehova ni Yesu?
Kunti twakita ki eevi kulangilila nangue tuli mukutasia palua keelia kyatukitiile Yehova ni Yesu? Some 2 Bakorinto 5:15 ni 1 Yoane 4:11; 5:3. Kisia kusoma kila lileembo, londoluele keeki kiipuzio:
-
Nga vyalanda kila lileembo, kunti twakita ki eevi kulangilila nangue tuli twatasia?
4. Tumupale Yesu
Nzila inge ya kulangilila nangue tuli twatasia, ni kupitila kumupala Yesu. Some 1 Petro 2:21, kisia londoluele keeki kiipuzio:
-
Kunti wakita ki eevi kukoonka mu peepi ntanfu yakue Yesu?
Yesu waali watonene Mulandu Wakue Leeza, waali wasimikila mpunda iweeme, kabili waali wabakwasia bantu bange
5. Saanguako ku Kibukisio kya lufu lwakue Kristu
Eevi kumona bintu byaakitikile musita Yesu lwaatendekeziizie Kyakulia kya Lyungulo Kyakue Mulopue kya kuanza, some Luka 22:14, 19, 20. Kisia londoluele beebi biipuzio:
-
Ni biki byaakitikile musita wa Kyakulia kya Lyungulo Kyakue Mulopue?
-
Mukate ni divai bili na mana ki?—Mone mulongo wa 19 ni 20.
Yesu waatonene basambi bakue bakite Kibukisio limo ku muaka pa bwenka bolia busiku bupaleene ni bwaafuiliilepo weene. Pakaako, Bakasininkizia Bakue Yehova bali bakolonghana lwa pamo kila muaka, eevi kulanguluka lufu lwakue Kristu bakita nga mwaalandiile Yesu. Eevi kumana kili kyakitika ku kooko kulonghaana kwa mana, mone VIIDEO. Kisia londoluele keeki kiipuzio.
-
Ni kiki kili kyakitika ku Kibukisio?
Mukate pamo ni divai ni mifuano. Mukate, upalaniizie mubili wakue Yesu upuililikile olia waafumiizie wali ngeleelo juu yeetu. Divai ipalaniizie milopa yakue
BANGE BALI BALANDA: “Kintu sie kya kukita eevi ukapusuke, ni kumuzuminasie Yesu basi.”
-
Weewe, kunti wabombia siani Yoane 3:16 ni Yakobo 2:17 eevi kulangilila nangue kuli ni binge bipalile kukitua?
MU KIFUPI
Tuli twatasia palua keelia kyaakitile Yesu musita utuli twalangilila kiketekelo muli weene, kabili lutuli twaya kulonghaanako Kibukisio kya lufu lwakue.
Kunti waasuka siani?
-
Kumuketekela Yesu kuli na mana ki?
-
Weewe pa lobe, kunti watona kukita ki eevi utasie palua keelia kibaakukitiile kuli Yehova ni Yesu?
-
Juu ya ki ni kintu kya mana saana kuya kulonghaanako Kibukisio kya lufu lwakue Kristu?
MANAKO NI BINGE
Lufu lwakue Kristu luli lwatukinkizia kukita ki?
Mana bingi palua kiketekelo kabili vya kukilangilila.
“Ketekela Bulayo Bwakue Yehova” (Lupungu Lwakue Kamwenenena, lwa Muezi wa 10, 2016)
Mu lyasi lilandile “Nghimwene Naswetele, Nakosele, Kabili Nakumeene,” mona mwanakazi umo vyaakwasiiziwe musita lwaamanine mana ya ngeleelo yaafumiizie Yesu.
“Bibilia Ili Yaalulula Buikazi bwa Bantu” (Lupungu Lwakue Kamwenenena, lwa 01/08/2011)
Mona juu ya ki bantu sie baniini i bali balia mukate ni kumina divai ku Kibukisio.
