LISOMO LYA 30
Bantu ba mu Lupua ni Benoobe Bautonene Baafuile Bakaba Kubuuka Kabili!
Lufu luli lwalengia muntu aloosie saana ni kumuleetela bulanda bukata. I kili kyalengia Bibilia iye yakuuta lufu nangue muluani. (1 Bakorinto 15:26) Mu lisomo lya 27, wakisambilila nangue Yehova wakaba kumufumiapo ozu muluani. Inzi, yakaba siani ku baalia baafuile kale? Mu leeli lisomo, uli kumana kintu kinge kiweeme kilaile Yehova. Ma milioni engi saana a bantu bafuile, wakaba kubabuezia ku bukose eevi bakabe kusekelela buikazi loonse. Yehova, wakaba kubatuntumuna! Eba, bakaba kutuntumunua kakiine? Eba, bakaba kutuntumunua eevi bekale ku muulu ao pa kyalo?
1. Yehova wakaba kukita ki ku bantu ba mu lupua lwetu ao beneetu baafuile?
Yehova ali ni nkulu ao atonene saana kubabuezia ku bukose bantu bafuile. Mwalalume umo wa kiketekelo ali wakuutua Yobu, abanga wali ni kisinka nangue kine wafua, Leeza takaba kumulaba. Waamulandile eevi Leeza: “Wakakuuta ni neene nakakwitaba [nali mu Kilibu].”—Some Yobu 14:13-15.
2. Twamana siani nangue bantu bafuile bakaba kutuntumunua?
Musita Yesu lwabanga pa kyalo, Leeza waamupeele buviinde bwa kutuntumuna bantu bafuile. Yesu waatuntumuine muana umo mwanakazi wa miaka 12, ni muana mwalalume mwina mwanakazi umo afuiliilue na mulume. (Marko 5:41, 42; Luka 7:12-15) Kisia paapo, Lazaro, kibuza wakue Yesu waafuile. Anzia kine Lazaro waali wasyaziikilue kabili pasyapitile nsiku ina, Yesu waamubueziizie ku bukose. Kisia kupepa kuli Leeza, Yesu waazanzwile lizui ao waasamuine wakentele ku kilibu walanda eevi: “Lazaro, fumina panze!” Ni olia “muntu waali wafuile, wafumina panze” wakosele! (Yoane 11:43, 44) Tontonkania ezio nsaansa yaaunvuile bantu ba mu lupua lwakue Lazaro pamo ni benakue!
3. Kuli kiswapilo ki ku bantu ba mu lupua lobe ni benoobe baafuile?
Bibilia ilaile nangue bantu “baakatuntumunua.” (Miilo ya Batumua 24:15) Baalia baatuntumuinue kuli Yesu ozo musita waapitile, lubaali bafuile, te baali baile ku muulu. (Yoane 3:13) Baatuntumuinue ni kubuela kusekelela kabili buikazi bwabo penka paanu pa kyalo. Enka evio, leenusie Yesu wakaba kutuntumuna ma milioni engi saana a bantu eevi bakabe kusekelela buikazi loonse mu kyalo kya paradiso. Yesu waalandile nangue baalia bonse balangulukilue kuli Leeza, bakaba kutuntumunua anzia kine te kuli muntu ata umo alangulukile nangue babo bantu babangako.—Yoane 5:28, 29.
TUKEBE SAANA
Tumone mpunda ili mu Bibilia ili kutukwasia tuye twali ni kisinka nangue Yesu ali ni buviinde bwa kutuntumuna bantu bafuile, kabili nangue wakaba kukita evio. Mona kutuntumuka kwa bantu vikuli kuviinda kukukoselezia ni kukupeela kiswapilo.
4. Yesu waasininkiziizie nangue kunti watuntumuna bantu bafuile
Mana bingi palua beelia byaakitile Yesu kuli kibuza wakue Lazaro. Some Yoane 11:14, 38-44, kisia londoluele beebi biipuzio:
-
Twamana siani nangue Lazaro waali wafuile kakiine?—Mona mulongo wa 39.
-
Kine Lazaro abanga wali ku muulu, eba, weewe watontonkania nangue Yesu nga waamubueziizie ku bukose paanu pa kyalo?
5. Bantu bengi bakaba kutuntumunua!
Some Malumbo 37:29, kisia londoluele keeki kiipuzio:
-
Alia ma milioni engi saana a bantu bakaba kutuntumunua, bakaba kwikala pi?
Yesu wakaba kutuntumuna bantu bengi saana, apanasie baalia bali bamupupa Yehova. Some Miilo ya Batumua 24:15, kisia londoluele keeki kiipuzio:
-
Weewe pa lobe, utonene kumumona uni wabueziiwa ku bukose?
Mona: Yesu kunti wamutuntumuna muntu afuile walengeelue saana nga eveliasie baba vyali wamukensia muana wakue onene
6. Kutuntumuka kwa bantu kunti kwakukoselezia ni kukupeela kiswapilo
Mpunda ili mu Bibilia ilandiile palua kutuntumunua kwa muana mwanakazi mwina Yairo, ili yabateekia mutima ni kubakoselezia baalia bali mukuloosia. Some eezi mpunda ya kisinka ili mu Luka 8:40-42, 49-56.
Ntaanzi Yesu amutuntumune muana mwanakazi mwina Yairo, waamulandile eevi baba wakue: “Te kutiina, ketekelasie.” (Mona mulongo wa 50.) Kiswapilo palua kutuntumunua, kunti kyakukwasia siani . . . .
-
kine wafuilua na muntu uutonene?
-
kine buikazi bobe bwaaluka mu buavia?
Mone VIIDEO, kisia londoluele keeki kiipuzio.
-
Kiswapilo palua kutuntumunua, kyaabakoseleziizie ni kubateekia siani mutima baviazi bakue Phelicity?
BANGE BALI BALANDA: “Tekikakitika bantu bafuile bakatuntumuke.”
-
Weewe pa lobe, watontonkania siani?
-
Kunti wabombia lileembo ki eevi umukwasie muntu amane nangue kutuntumuka kwakabako?
MU KIFUPI
Bibilia ilaile nangue ma milioni engi saana a bantu, bakaba kutuntumunua. Yehova atonene bakabe kubuela kabili kwikala, ni kangeko wamupeele Yesu buviinde bwa kutuntumuna bantu bafuile.
Kunti waasuka siani?
-
Yehova ni Yesu beyunvuile siani palua kutuntumuna bantu bafuile?
-
Ati, baalia bakaba kutuntumunua, bakeekala ku muulu ao pa kyalo? Juu ya ki walanda evio?
-
Ni kiki kyakusininkiziizia nangue batonua bobe baafuile kunti batuntumunua?
MANAKO NI BINGE
Mona bintu bya kukita bili kukukwasia kusipikizia kine wafuilua.
“Ni Biki Bili Kutukwasia Kusipikizia Musita Utwafuilua?” (Buuke!, Nim. 3, 2018)
Eba, mafunde ali mu Bibilia kunti amukwasia kakiine muntu ali mukuloosia?
Ni kiki kili kubakwasia baanike baviinde kusipikizia kine bafuilua na muntu wa mu lupua ao mwinabo?
Eba, kwakaba ni muntu wakatuntumunua eevi kwikala ku muulu? Naani asikaba kutuntumunua?
“Butuntumuko Ni Kiki?” (Lyasi lili mu Kitente kya Enternete)
