LISOMO LYA 31

Bukolo Bwakue Leeza Ni Kiki?

PLAY

Mpunda ikata ili mu Bibilia ilandiile palua Bukolo Bwakue Leeza. Yehova wakaba kubombia bobo Bukolo ao Buteeko eevi afikilizie bintu byaali watonene kukita ku kyalo ntangia ku ntendeko. Bukolo Bwakue Leeza ni kiki? Twamana siani nangue bobo Bukolo buli mukuteeka loonu? Kufikiila loonu, tebusyakitilepo ki? Kabili bwakaba kukita ki mu musita uli waiza? Leeli lisomo ni aza masomo abili akoonkelepo, akaba kutupeela byasuko bya bebio biipuzio.

1. Bukolo Bwakue Leeza ni kiki, kabili Likolo naani?

Bukolo Bwakue Leeza ni buteeko buundilue na Yehova. Likolo wa bobo buteeko ni Yesu Kristu, ali mukuteeka wali ku muulu. (Mateo 4:17; Yoane 18:36) Bibilia ili yalanda eevi palwakue Yesu: “Waakeeza kuteeka [wali Likolo] . . . muyayaya.” (Luka 1:32, 33) Paantu Yesu i Likolo wa Bukolo Bwakue Leeza, wakaba kuteeka kila muntu ali pa kyalo.

2. Ni baani bakuteeka pamo ni Yesu?

Yesu takaba kuteekasie ye bunke. Bantu “ba mikoa yonse, ba ndimi yonse, . . . pamo ni ntundu yonse i bakaba bateeka paano pa kyalo” bali pamo ni Yesu. (Nfyulo 5:9, 10) Ni bantu banga bakaba kuteeka pamo ni Kristu? Ntangia Yesu lwaaizile pa kyalo, ma milioni a bantu bali mukwaluka Bakristu. Eba, azo ma milioni onse akaba kuya kuteeka pamo nakue? Bila. Ingasie bantu mia imo ni makumi ana na bana elufu (144 000) bafumine mu azo ma milioni, i bakuya ku muulu eevi bakabe kuteeka pamo ni Yesu. (Some Nfyulo 14:1-4.) Bakristu bange bonse bakasiala pa kyalo, bakaba bekazi ao baraia ba mu bobo Bukolo.—Malumbo 37:29.

3. Juu ya ki Bukolo Bwakue Leeza i bukilile kuwaama kupita ma buteeko a bantu?

Anzia kine bakateeka ba mu kyalo bali baikwinda kukita bintu biweeme, te bali na buviinde bwa kufikilizia kila kintu kibali batona kukita. Kisia musita kampanda, bali bafumiiwapo ni kusaakwilapo bange. Ni babo bakateeka bali basaakulua eevi bapyane baalia balipo, kunti baya bali ni butani ao bila babakwasia bekazi babo. Inzi, Yesu Kateeka wa Bukolo Bwakue Leeza, takafumiiwapo ata limo eevi kusaakwilapo unge. Leeza ‘waaimikile Bukolo busikenoonuapo ata limo.’ (Danieli 2:44) Yesu wakaba kuteeka kyalo kyonse, kabili takaba na kapende ao kitoolela. Ali ni ntono, aweeme, wa nsaambu kabili wakaba kusambilizia bantu baye babakitila bange nga weene mu ntono, buwaame ni nsaambu.—Some Isaya 11:9.

TUKEBE SAANA

Tumone juu ya ki Bukolo Bwakue Leeza i bukilile kuwaama kupita buteeko bwa bantu.

4. Buteeko buli ni maka saana bwakaba kuteeka kyalo kyonse

Yesu Kristu ali ni buviinde bukata sana kupita kila kateeka amanikile mu istoria. Some Mateo 28:18, kisia londoluele keeki kiipuzio:

Buviinde bwa kutungulula bwakue Yesu, bupuseene siani ni bolia buli na bakateeka ba mu kyalo?

Ma buteeko a bantu lingi ali aaluluka, kabili kila kateeka ali wateekasie seemu iniini ya kyalo. Ale, Bukolo Bwakue Leeza? Some Danieli 7:14, kisia londoluele beebi biipuzio:

Watontonkania nangue twakaba kupata mpaalo ki paantu Bukolo Bwakue Leeza ‘tebukenoonua’?
Watontonkania nangue twakaba kupata mpaalo ki paantu Bukolo Bwakue Leeza bwakaba kuteeka kyalo kyonse?

5. Buteeko bwa bantu bupalile kupyanua

Juu ya ki Bukolo Bwakue Leeza bupalile kupyana ao kuteeka pa fuasi ya ma buteeko a bantu? Mone VIIDEO, kisia londoluele keeki kiipuzio.

VIIDEO: Bukolo Bwakue Leeza Ni Kiki?—Seemu (1:41)

Buteeko bwa bantu buli mukulengia mu kyalo mwaaluka ki?

Some Kasimika 8:9, kisia londoluele beebi biipuzio:

Eba, watontonkania nangue Bukolo Bwakue Leeza bupalile kupyana ma buteeko a bantu? Juu ya ki?

6. Bukolo Bwakue Leeza buli ni bakateeka bamanine aali yeetu

Paantu Yesu, Likolo weetu, waaikeele paanu pa kyalo wali muntu, kunti ‘watunvuila nkumbu lwali wamona bunake bwetu.’ (Baebrania 4:15) Bantu mia imo ni makumi ana na bana elufu (144 000) baalia bakaba kuteeka pamo ni Yesu, babiikile mukati balalume ni banakazi ba kisinka bali basaakulua kuli Yehova bafumiiwa mu ‘bantu ba mikowa yonse, ba ndimi yonse, [. . .] pamo ni ntundu yonse.’—Nfyulo 5:9.

Eba, wateekiiwa mutima kumana nangue Yesu pamo ni baalia bakaba kuteeka nakue bamanine vituli twaiunvua ni maavia atuli nao? Juu ya ki?

Yehova ali mukusaakula balalume ni banakazi kufuma mu fuasi paleepale kabili bali ni aali yapusene-puseene eevi bakateeke pamo ni Yesu

7. Bukolo Bwakue Leeza buli ni mizilo ya pa muulu saana kupita mizilo ili mu buteeko bwa bantu

Ma buteeko a bantu ali abiika mizilo elia imwenekele nangue ili kukwasia ni kusuunga bekazi. Bukolo Bwakue Leeza ni bwene, buli ni mizilo ipalile kukoonkua na bekazi bakue. Some 1 Bakorinto 6:9-11, kisia londoluele keeki kiipuzio:

Weewe pa lobe, watontonkania nangue buikazi pa kyalo bwakaaluka siani kine kila muntu wakoonka mizilo yakue Leeza? a
Eba, watontonkania nangue kilisie buino Yehova aye waswapiile bekazi ba mu Bukolo bwakue bakindike ezio mizilo? Juu ya ki?
Ni kiki kilangiliile nangue baalia bantu basili mukunakila ezio mizilo kunti baaluluka?—Mona mulongo wa 11.

Ma buteeko ali abiika mizilo eevi kusuunga ni kukwasia bekazi babo. Bukolo Bwakue Leeza ni bwene, buli ni mizilo ikilile kuwaama ili yasuunga ni kukwasia bekazi ba mu bobo Bukolo

UNGE KUNTI WAIPUZIA: “Bukolo Bwakue Leeza ni kiki?”