LISOMO LYA 50
Kunti Wakita Siani Eevi Lupua Lobe Luye Lwali ni Nsaansa?—Seemu ya 2
Baana ni bupe kufuma kuli Yehova. Akebele baviazi basuunge buino bobo bupe. Yehova abapeele baviazi masoke a mulangue a kubakwasia baviinde kusuunga buino baana babo. Masoke akue, alandile kabili kintu kipalile kukita baana eevi lupua luye lwali ni nsaansa.
1. Yehova abalandile baviazi bakite ki?
Yehova atonene baviazi babatone baana babo, ni kuya baikwinda kupisia musita pamo nabo. Kangeko, atonene baviazi babakwasie baana babo tekuti bengile mu maavia. Kabili atonene babombie saana mafunde akue pa kubabeelezia baana. (Tuswalo ni Mafunde 1:8) Abalandile eevi ba baba: “Bakuzie [baana benu] . . . mu mafunde akue Mulopue.” (Some Baefeso 6:4.) Yehova ali watona kine baviazi bakoonka butunguluzi bwakue musita ubali mukukuzia baana. Teezi kutona baviazi babapeele bantu bange babasuungile baana.
2. Yehova abalandile baana bakite ki?
Yehova abalandile eevi baana: “Nakile baviazi benu.” (Some Bakolosai 3:20.) Musita baana lubali bakindika ni kunakila baviazi babo, bali bamusaansamusia Yehova ni baviazi babo. (Tuswalo ni Mafunde 23:22-25) Lwabanga wali mwanike, Yesu waabiikile mufuano waweeme. Anzia kine waali wapuililikile, waali wanakila ni kukindika baviazi bakue musita ubaali bamulanda ka kunti akite.—Luka 2:51, 52.
3. Kunti mwakita siani mu lupua lwenu eevi mumupalame Leeza?
Kine uli muviazi, kakiine utonene baana bobe bamutone Yehova nga viumutonene. We muviazi, kunti wafikilizia siani ozo mupaango? Kupitila kukita keeki kilandile Bibilia: “Upalile kuikonkomena [milandu yakue Yehova] mu baana bobe, ni kuilondolola musita luwikeele mu nsesi yobe, ni musita luuli mukwenda mu nzila.” (Malanguluzi a Mizilo 6:7) “Kukonkomena” kuli na mana ya kusambilizia wabuela-buelasie pa kantu kamonke. Kakiine, umanine nangue lingi upalile kubuela-buelaposie pa kantu kaalia kenka eevi baana bobe bakabe kukalanguluka. Leeli lileembo, lili na mana ya kulanda nangue, lingi upalile kukeba nsita ya kulanda ni baana bobe palwakue Yehova. Kili buino lupua lwa lingi, kwitengelako ni musita wa kusambilila Bibilia bali bonse pamo kila mulungu. Kine te muli na baana, ni mwemue mwakaba kupata mpaalo kine mwakwatako musita wa kusambilila Mulandu Wakue Leeza lwa pamo kila mulungu.
TUKEBE SAANA
Tumone masoke ali kukwasia kila muntu mu lupua eevi aye wali ni nsaansa kabili wasuungilue.
4. Langilila ntono musita luwababeelezia baana bobe
Kubeelezia muana, kunti kwaya kwakolele. Bibilia kunti yakwasia siani? Some Yakobo 1:19, 20, kisia londoluele beebi biipuzio:
-
Baviazi kunti balangilila siani ntono musita ubali mukulanziana ni baana babo?
-
Juu ya ki muviazi kine onvuile kipuki tapalile kumulapizia muana wakue? a
5. Suunga baana bobe
Pa kunti usuunge baana bobe, ni kintu kya mana saana we muviazi ulondolole na kila muana obe palua kulaalana. Muviazi kunti waunvua busoni bwa kulanda ni muana wakue palua kulaalana. Mone VIIDEO, kisia londoluele beebi biipuzio.
-
Juu ya ki kikolele ku baviazi bange kulondolola ni baana babo palua kulaalana?
-
Baviazi bange bali babombia biombo ki eevi balondolole ni baana babo palua kulaalana?
Bibilia yaalandile ntaanzi nangue, kyalo kyakue Sataana kyakatwalilila kukila kubiipa. Some 2 Timoteo 3:1, 13, kisia londoluele keeki kiipuzio:
-
Bantu bange babiipile balondolwelue mu mulongo wa 13, bali babakita ovio ao kubenoona baanike na kubalaala. Pakaako, juu ya ki ni kintu kya mana baviazi basambilizie baana babo palua kulaalana, ni vya kwipususia bo beene ku baalia bali bainoonana?
Eba, wakiba wamanine?
Bakasininkizia Bakue Yehova, bali ni biombo bingi bili byabakwasia baviazi basambilizie baana babo palua kulaalana ni kubasuunga te kuti bakitue ovio na baalia bali balaala baanike. Kwa mufuano, mona:
-
Suunga Baana Bobe (viideo)
-
“Musambilizie Muana obe Palua Kulaalana” (Buuke!, Nim. 5, 2016)
6. Kindika baviazi bobe
Baanike ni bamisepuka kunti balangilila mukinzi ku baviazi babo kupitila ndandilo yabo lubali balanda na baviazi. Mone VIIDEO, kisia londoluele beebi biipuzio.
-
Juu ya ki mwanike ao musepuka apalile kulangilila mukinzi musita lwali mukulanziana ni baviazi bakue?
-
Musepuka, kunti walanda siani ni baviazi bakue walangiliile mukinzi?
Some Tuswalo ni Mafunde 1:8, kisia londoluele keeki kiipuzio:
-
Musepuka kunti wakita siani kine baviazi bakue bamulanda ka kunti akite?
7. Tenge musita wa kusambilila Bibilia mwali pamo
Lupua lwa Bakasininkizia Bakue Yehova, luli lwatengako ni musita umanikile buino kila mulungu eevi lukite lupupo lwa mu lupua. Ni biki bili byakitua mu lupupo lwa mu lupua? Mone VIIDEO, kisia londoluele beebi biipuzio.
-
Bantu ba mu lupua, kunti bakita siani eevi baye bali ni ntantiko ya kila mulungu ya lupupo lwa mu lupua?
-
Muviazi kunti wakita siani eevi lupupo lwa mu lupua lukwasie ni kusaansamusia kila muntu mu lupua?—Mona foto ili ku ntendeko ya leeli lisomo.
-
Mu lupua lwenu, paange ni buavia ki buli kulengia te kuti mukite lupupo lwa mu lupua?
Mu Israeli ya kale, Yehova waalandile lupua luye lwali ni kabeelela ka kulondolola Maleembo. Some Malanguluzi a Mizilo 6:6, 7, kisia londoluele keeki kiipuzio:
-
Kunti wabombia siani leeli lifunde?
Bintu bya kukita mu lupupo lwa mu lupua:
-
Kuteania kulonghaana.
-
Kusoma ni kulondoluela mpunda ili mu Bibilia ili kusaansamusia lupua lwenu.
-
Kine muli ni baana, pakule ao fumie ku mapapie lyasi lya baanike lya kwibeelezia lili mu jw.org.
-
Kine muli ni bamisepuka, londoluele maasi alandiile palua balumendo ni bakaziana ali mu jw.org.
-
Kusaapa musaapo wa bantu ba mu Bibilia pamo ni baana bobe.
-
Kumona viideo ili mu jw.org ni kuilondoluela.
BANGE BALI BALANDA: “Bibilia ikoleele saana ku baanike, te baviinda kunvua.”
-
Weewe, kunti walanda siani?
MU KIFUPI
Yehova atonene baviazi batone, babeelezie ni kubasuunga baana babo. Atonene baana bakindike ni kunakila baviazi babo, ni bantu ba mu lupua bamupupe Leeza bali pamo.
Kunti waasuka siani?
-
Baviazi kunti bakita siani eevi babeelezie ni kusuunga baana babo?
-
Baana kunti bakita ki eevi balangilile nangue babakindikile baviazi babo?
-
Kutengako musita wa kukita lupupo lwa mu lupua lwa kila mulungu, kuli kwaleeta mpaalo ki?
MANAKO NI BINGE
Ni masomo ki ali kukwasia muana obe akabe kuya wali muntu aweeme lwakaba kukula?
“Masomo Sita Apalile Kusambilila Baana” (Buuke!, Nim. 2, 2019)
Mona masoke ali mu Bibilia ali kukwasia baalia bali basuunga baviazi babo bakotele.
“Bibilia Ili Yalanda Siani Palua Kusuunga Baviazi Bakotele?” (Lyasi lili mu Kitente kya Enternete)
Mona mwalalume umo asibanga wamanine vya kukuzia baana vyaalukile baba aweeme.
Mona ba baba vibali kukita eevi kulumia bukibuza bwabo pamo ni baana babo.
a Mu Bibilia, mulandu “kulapizia” uli na mana ya kusambilizia muana, kumutungulula ni kumukwasia aalulule mawazo ao lwendo lwakue lubiipile. Te uli na mana ya kumukita ovio ao kumukitila bila nkumbu.—Tuswalo ni Mafunde 4:1.
