LISOMO LYA 51

Kunti Wamusaansamusia Siani Yehova mu Bulanzi Bobe?

PLAY

Musita Yehova lwaatubumbile, waatupeele bupe bwaweeme saana, i kulanda buviinde bwa kulanda. Eba, ali wapoozako maano ku nzila ituli twabombiziamo bobo bupe? Een, ali wapoozako maano kakiine! (Some Yakobo 1:26.) Kansi, kunti twabombia siani buviinde bwetu bwa kulanda mu nzila ili kumusaansamusia Yehova?

1. Tupalile kubombia siani bupe bwa kulanda?

Bibilia ili yatulanda ‘tukoselezianie ni kukwasiania.’ (1 Batesalonika 5:11) Eba, umanineko ni bantu bakebele kukoseleziiwa? Kunti wakita siani eevi ubakwasie beyunvue buino? Babuile nangue ni bantu ba mana kuli weewe. Paange, kunti wababuilako bintu biweeme bibali bakita beelia bili bya kusaansamusia. Eba, kunti walangulukako lileembo lili kuviinda kukwasia muntu umo eevi uumanine? Kuli maleembo engi a kunti usaakulepo. Kabili languluka nangue, ndandilo yobe ya kintu, kunti yabakwasia saana bantu bange nga eveliasie milandu iwabombia pa kulanda. Pakaako, lyonse uye waikwinda kulanda mu buwaame kabili wafuukile.—Tuswalo ni Mafunde 15:1.

2. Ni bulanzi bwa siani butupalile kutiina?

Bibilia ili yalanda eevi: ‘Tekulande twebo ao bulanzi bubiipile.’ (Some Baefeso 4:29.) I kulanda nangue te tupalile kubombia milandu ibiipile ao isasile ao ya kubula mukinzi elia ili kuviinda kukisia unge. Kabili, tupalile kutiina kulanda bange ovio ni kwambana.—Some Tuswalo ni Mafunde 16:28.

3. Ni kiki kili kutukwasia tulande mu nzila ili kulengia bange beyunvue buino?

Lingi, bintu bituli twalanda bili byalangilila bintu bili ku mutima weetu ao bituli mukutontonkania. (Luka 6:45) Pakaako, tupalile kwibeelezia kutontonkania palua bintu bituli kulanda. Bintu nga evelia bintu bya kisinka, bintu bikindeeme, bintu bilungheeme, ni bya kutasiiziwapo. (Bafilipi 4:8) Eevi kupoozako maano ku bebio bintu, tupalile kusaakula bintu bya kwisaansamusia pamo ni babibuza betu twakengeele. (Tuswalo ni Mafunde 13:20) Kabili, kutontonkania ntaanzi ya kulanda, ni kwene kuli kutukwasia. Mona beelia biuli kulanda vibili kulengia bange beyunvue. Bibilia ili yalanda eevi: “Milandu ili yalandua bila kutontonkania ili ya tunka nga kipanga, inzi lulimi lwa muntu ali ni mulangue luli lwakosia.”—Tuswalo ni Mafunde 12:18.

TUKEBE SAANA

Tumone vya kulanda mu nzila ili kumusaansamusia Yehova ni kukoselezia bange.

4. Toosia bulanzi bobe

Lunge tuli twalanda bintu, kisia musita unge twatendeka kunuuna juu ya beelia bitwalandanga. (Yakobo 3:2) Some Bagalatia 5:22, 23, kisia londoluele beebi biipuzio:

Pakati ka ezio mibeele, kunti wamuloomba Yehova mibeele ki ili kukukwasia kutoosia bulanzi bobe? Ezio mibeele kunti ya kukwasia siani?

Some 1 Bakorinto 15:33, kisia londoluele keeki kiipuzio:

Babibuza bauli wasaakula pamo ni bintu byakwisaansamusia, kunti byalengia bulanzi bobe bwaaluka siani?

Ni biki paange bili kuviinda kusonsezia ndandilo yobe?

Some Kasimika 3:1, 7, kisia londoluele keeki kiipuzio:

Ni musita ki luili kumoneka nangue ni mulangue kutalala ao kupembelela musita uweeme eevi ulande kintu kimo eevi?

5. Landila bange bintu biweeme

Kunti twatiina siani kubakisia bange ao kubalandila bintu bibipile? Mone VIIDEO, kisia londoluele beebi biipuzio.

VIIDEO: “Lande Twebo twa Kukwasia Bange” (4:07)

Mu eezi viideo, juu ya ki ozu lupua waatonene kwalulula nzila yakue ya kulanda palua bantu bange?
Waakitile ki eevi aaluluke?

Some Kasimika 7:16, kisia londoluele keeki kiipuzio:

Tupalile kulanguluka ki kine twatendeka kulandila muntu unge bintu bibiipile?

Some Kasimika 7:21, 22, kisia londoluele keeki kiipuzio:

Kine muntu walanda kintu kibiipile juu yobe, eezi milongo kunti yakukwasia siani eevi te kunti ufiitue?

6. Langilila buwaame musita luuli mukulanda ni bantu ba mu lupua

Yehova atonene tulande ni bantu ba mu lupua lwetu mu buwaame ni mu nzila ya ntono. Mone VIIDEO, kisia londoluele keeki kiipuzio.

VIIDEO: Ntono ni Mukinzi Bili Byakwatania Lupua (3:08)

Ni kiki kyakaba kukukwasia kulanda mu buwaame ni bantu ba lupua lobe?

Some Baefeso 4:31, 32, kisia londoluele keeki kiipuzio:

Ni milandu ya siani ili kulengia lupua lwiunvue buino?

Yehova waalandile milandu yaalangiliile vyaaiunvuile palwakue Yesu, Muana wakue. Some Mateo 17:5, kisia londoluele keeki kiipuzio:

Kunti wamupala siani Yehova kupitila viuli walanziana ni bantu ba lupua lobe?

Kebako fuasi ya kutasia bange

BANGE BALI BALANDA: “Neene ndi nalandasie beelia bili kuiza mu maano. Nsiizi kupoozako maano anzia kine bange te batona bindi kulanda.”

Ni weewe i viuli wakita? Juu ya ki walanda evio?

MU KIFUPI

Bintu bituli twalanda, kunti byakwasia bange ao kubakisia. Tupalile kutontonkania saana palua kintu kya kulanda, musita wa kukilanda, ni vya kukilanda.

Kunti waasuka siani?

Kunti wabombia buviinde bwa kulanda mu nzila ki paleepale eevi kukwasia bange?
Ni bulanzi bwa siani butupalile kutiina?
Ni kiki kili kutukwasia lyonse tuye twabombia bulanzi buweeme ni kuya twakoseleziana mu bulanzi bwetu?

Leeli lisomo twalipua pa nsiku:

Ezianke kukita eevi

Mu onu mulungu, ezia kumutasia muntu umo wa mu lupua lobe ao wa mu kilonghaano juu ya bintu biweeme byali wakita.

Paangako ni kange:

Mupaango obe unge