LISOMO LYA 55
Kwasiako Kilonghaano Kyenu
Mu Kyalo kyonse, babombi bakue Yehova bali ni nsaansa ya kumupupa Weene mu bilonghaano byabo. Bali mukutasia saana juu ya masambilizio ni malaizio abali bapata. Kabili bali ni nkulu saana ya kukita bintu paleepale eevi kukwasia kilonghaano. Eba, ni weewe uli ni nsaansa kabili uli mukutasia paantu uli mu kilonghaano? Eba, uli ni nkulu ya kukwasiako?
1. Kunti wabombia musita ni maka obe mu nzila ki paleepale eevi ukwasie kilonghaano?
Kila muntu, kunti wakwasia kilonghaano. Kwa mufuano, eba, mu kilonghaano kyenu muli ni bantu bakotele ao balemeene? Eba, kunti wabatuama ni kubatwala ku kulonghaana? Ao, eba, kunti wabakwasia mu nzila inge, nga evelia kubakwasia kupata byakulia ao bintu binge bibakabiile ao kubakitila busaka pa nsesi? (Some Yakobo 1:27.) Kabili, kunti twaipeela eevi kukita busaka ni kusuunga Nsesi ya Bukolo ituli twalonghaanamo. Te kuli muntu ali watupatikizia tukite ezio miilo. Kumutona Leeza ni kubatona balupua, i kuli kwalengia ‘twipeele fwe beene mu kwitonena.’—Malumbo 110:3.
Bakasininkizia babatiziiziwe, kunti bakwasia kilonghaano mu nzila ingi. Baalia balupua bafikiliziizie bilandile Bibilia, kunti bakwasia kilonghaano bali babombi bali babombela ao bakote. Balupua ni bankazi, kunti bakwasia saana miilo ya kusimikila kupitila kubomba miilo ya bupainia. Bakasininkizia bange, kunti bakuukila mu kazonga kange muli kilonghaano kikabiile kukwasiiwa mu nzila inge.
2. Kunti twabombia siani nfalanga yeetu ni bintu byetu bya kimubili eevi kukwasia kilonghaano?
Kunti ‘twamulumbania Yehova kupitila bintu [byetu] bikindeeme.’ (Tuswalo ni Mafunde 3:9) Tuli ni nsaansa ya kubombia nfalanga yeetu ni bintu binge bya kimubili bituli nabio eevi kukwasia kilonghaano kyetu ni miilo ya kusimikila ili yakitua mu kyalo kyonse. (Some 2 Bakorinto 9:7.) Bulongio bwetu butuli twafumia, buli bwakwasia ni musita wa masaanzo. Lingi, bantu bengi bali basaakula “kubiika kintu kimo evi pa mbali” eevi bakabe kulongia. (Some 1 Bakorinto 16:2, NWT.) Kunti twalongia nfalanga yeetu kupitila kuibiika mu bisanduku bya bulongio bili mu fuasi mutuli twalonghaanina ao kupitila Enternete pa donate.pr418.com. Yehova atupeele fuasi ya kunti tulangilile nangue tumutonene, kupitila kubombia nfalanga yeetu ao bintu byetu bya kimubili eevi kukwasia kilonghaano.
TUKEBE SAANA
Tumone bintu paleepale bya kunti ukite eevi ukwasie kilonghaano.
3. Kunti twabombia bintu byetu bya kimubili
Yehova pamo ni Yesu, bali babatona baalia bali bapeelana baali ni nsaansa. Kwa mufuano, Yesu waamutasiizie mwanakazi umo mukanfwilua abanga wali ni nfalanga iniini saana, inzi waamupeele Yehova kintu kimo eevi. Some Luka 21:1-4, kisia londoluele beebi biipuzio:
-
Pa kunti tumusaansamusie Yehova musita wa kulongia, eba, tupalile kufumia nfalanga ingi?
-
Yehova ni Yesu, bali baiunvua siani musita utuli twalongia mukwitonena?
Eevi kumona bulongio bwetu vibuli bwabombiiwa, mone VIIDEO. Kisia londoluele keeki kiipuzio.
-
Bulongio, buli bwabombiiwa siani eevi kukwasia bilonghaano bya mu kyalo kyonse?
4. Kunti twaipeela eevi kukwasia
Musita wa kale, babombi bakue Yehova baabombele na mute saana eevi kusuunga fuasi yabo ya kupupilamo. Inzi, kukita evio kubiikile mukati bintu bingi, apanasie kulongia nfalanga. Some 2 Milandu ya Nsiku 34:9-11, kisia londoluele keeki kiipuzio:
-
Kila Mwisraeli, waakitile ki eevi kukwasia kusuunga nsesi yakue Yehova ao fuasi ya kupupilamo?
Eevi kumona Bakasininkizia Bakue Yehova vibali bakoonka ozo mufuano uli mu Bibilia, mone VIIDEO. Kisia londoluele beebi biipuzio.
-
Juu ya ki ni kintu kya mana kuya twaswesia ni kusuunga Nsesi ya Bukolo?
-
Weewe, kunti wakwasia mu nzila ki paleepale?
5. Balupua kunti baikwinda eevi bafikiile kukita bingi mu kilonghaano
Bibilia ili yabakinkizia balalume Bakristu bakite saana maka eevi bakwasie kilonghaano. Eevi kumona mufuano umo, mone VIIDEO. Kisia londoluele keeki kiipuzio.
-
Mu eezi viideo, Ryan waakitile ki eevi afikiile kukwasia saana kilonghaano?
Bibilia ili yalanda mibeele ipalile kuya yali na balupua bakebele kwaluka babombi bali babombela ao bakote. Some 1 Timoteo 3:1-13, kisia londoluele beebi biipuzio:
-
Balupua baalia bakebele kwaluka babombi bali babombela ao bakote, bapalile kuya bali ni mibeele ki?
-
Bantu ba mu lupua lwabo, bapalile kuya bali ni mibeele ki?—Mone mulongo wa 4 ni 11.
-
Kine balupua baikwinda kuya bali ni ezio mibeele, kila muntu mu kilonghaano ali kunoonkelamo siani?
UNGE KUNTI WAIPUZIA: “Bakasininkizia Bakue Yehova bali bapata pi nfalanga ya kubakwasia mu miilo yabo?”
-
Kunti waasuka siani?
MU KIFUPI
Yehova ali watasia saana juu ya musita weetu, maka, ni bintu byetu bya kimubili bituli twaikwinda kubombia eevi kukwasia kilonghaano.
Kunti waasuka siani?
-
Kunti twabombia siani musita weetu ni maka etu eevi kukwasia kilonghaano?
-
Kunti twabombia siani bintu byetu bya kimubili eevi kukwasia kilonghaano?
-
Kunti watona kukwasia kilonghaano mu nzila ki paleepale?
MANAKO NI BINGE
Mona juu ya ki Yehova teezi kuloomba kabili babombi bakue bafumie seemu ya likumi.
“Bibilia Ili Yalanda Siani Palua Kufumia Seemu ya Likumi?” (Lyasi lili mu Kitente kya Enternete)
Bibilia ibapeele miilo fulani balalume babatiziziwe. Inzi, ale kine mwanakazi abatiziziwe akebele abombe ezio miilo, ali kukita siani?
Mona Bakasininkizia paleepale bakinkimeene baalia bepeele saana eevi baye babatwalile bazumizi naabo mpapulo.
Kupusana ni ma diini ange, mona fwefue vituli twapata nfalanga ili yakwasia miilo yeetu.
