LISOMO LYA 58
Twalilila Kuya Wali wa Kisinka Kuli Yehova
Bakristu ba kisinka bapinguile te kunti balekelele ata kaniini muntu ao kintu kyokyonse kiinoone bukibuza bwabo pamo ni Yehova. Tuli ni kisinka nangue ni weewe, upinguile enka evio. Yehova ali watasia bukisinka bobe. (Some 1 Milandu ya Nsiku 28:9.) Ni aali ki ili kulengia kiye kyakolele kusiala wali wa kisinka kuli weene? Kabili ni kiki kili kukukwasia?
1. Bantu bange kunti babiika siani bukisinka bwetu kuli Yehova mu buezio?
Bantu bange, bali baezia kutulekezia kumubombela Yehova. Babo bantu bali bakita keekio kintu kibiipile, ni baani? Bamo pakati ka baabo bantu, ni baalia baalekeele kumubombela Yehova ni kutendeka kulanda bufi palua kuteania kwakue Leeza. Bali bakita evio paantu bakebele kutiona kiketekelo kyetu. Babo bantu, bali bakuutua babisanguka. Kabili, bantunguluzi bange ba ma diini bali basalangania mpunda ya bufi palwetu eevi kulengia baalia basikengeele balekele kumubombela Yehova. Kubisiana nabo, kusoma bitabu byabo, kwingila mu bitente byabo ao kumona ma viideo abo, kunti kwaleeta buavia. Ku baalia bonse bali baezia kutiona mutima bantu bange eevi balekele kumubombela Yehova, Yesu waalandile eevi: “Baabo bantu balekesie, paantu bali nga mpofu. Kine mpofu walombola mpofu nakue, bonse babili bali kuponena mu kiina.”—Mateo 15:14.
Ale kine muntu umo eevi utumanine wapingula nangue takitonene kabili kuya wali Kasininkizia Wakue Yehova? Kunti twatioka mutima kine mwinetu ao muntu wa mu lupua wakita evio. Paange ozo muntu, kunti watupatikizia tusaakule pa kumutona weene ao Yehova. Tupalile kupingula kutwalilila kuya twali ba kisinka kuli Leeza kuliko muntu unge onse. (Mateo 10:37) Pakaako, tuli twanakila malaizio akue Yehova a kusiampana ao kwenda na bantu nga babo.—Some 1 Bakorinto 5:11.
2. Bupinguzi bwetu kunti bwalangilila siani nangue tuli ba kisinka kuli Yehova ao abe?
Kumutona Yehova, kuli kwatukinkizia tutiine kuya twali ni kintu kyokyonse kipateene ni diini ya bufi. Miilo yetu, ao kubomba mu tubungue ao kintu sie kyokyonse kituli twakita, te kipalile kuya kyapateene ata kaniini ni diini ya bufi. Yehova ali watusoka eevi: “Mwe bantu bane! Fume mu [Babiloni Mukulu].”—Nfyulo 18:2, 4.
TUKEBE SAANA
Tumone vya kunti utiine kulekelela muntu yeyonse atopie bukisinka bobe kuli Yehova. Kabili mona viuli kulangilila nangue uli wa kisinka, kupitila kufuma mu Babiloni Mukulu.
3. Kengela ni bakasambilizia ba bufi
Tupalile kukita ki kine twaunvua mpunda ibiipile palua kuteania kwakue Yehova? Some Tuswalo ni Mafunde 14:15, kisia londoluele keeki kiipuzio:
-
Juu ya ki tuye twakengeele eevi te kunti tuzumine kila kintu kitwaunvua?
Some 2 Yoane 10, kisia londoluele beebi biipuzio:
-
Tupalile kubakitila siani babisanguka?
-
Anzia kine tetwizi kulanziana ni babisanguka twamoneene, tupalile kutiina bintu ki binge eevi te kunti tutwamininue na masambilizio abo?
-
Watontonkania nangue Yehova ali kwiunvua siani kine twatuilizia mpunda ibiipile ili mukulandua palwakue ao palua kuteania kwakue?
4. Twalilila kuya wali wa kisinka kine lupua ao nkazi wakita lizaambi
Kine twamana nangue muntu umo mu kilonghaano wakikita lizaambi likata, tupalile kukita ki? Mona lifunde limo lyaapeelue Baisraeli ba kale lili mu Muzilo Wakue Leeza. Some Balawi 5:1.
Kukoonkana ni malaizio ali mu ozu mulongo, kine twamana nangue muntu umo eevi wakikita lizaambi likata, tupalile kubabuila bakote bintu bitumanine. Ntaanzi ya kukita evio, kili buino kumukinkizia olia akitile lizaambi, aye amone bakote ni kulapila lizaambi lyakue. Kine weene waandua kukita evio, tuli kusyala twali ba kisinka kuli Yehova ni kuleenga kubabuila bakote keelia kyakikita ozo muntu. Kukita bupinguzi nga bobo kuli kulangilila siani nangue tuli ni ntono ilamatiliile kuli . . .
-
Yehova Leeza?
-
muntu olia wakikita lizaambi?
-
bantu bange mu kilonghaano?
Kine muzumizi nobe ali mu buavia, mukwasie!
5. Fuma mu Babiloni Mukulu
Some Luka 4:8 ni Nfyulo 18:4, 5, kisia asuke beebi biipuzio:
-
Eba, ndi nakwasiako ku bintu bili byakitua na ma diini a bufi?
-
Eba, ndi mu kabungue kaalia kapateene ni diini inge ya bufi?
-
Eba, kuli ni kintu kili kyakitika mu miilo yane kili kyakwasia diini ya bufi?
-
Eba, mu buikazi bwane, kuli ni bintu bimpalile kukitamo bupilibuko eevi kwitenga ni diini ya bufi?
-
Pa beebi biipuzio, kine naasukapo kiipuzio kimo nangue een, mpalile kukita ki eevi nkite bupilibuko?
Mu ezio aali yonse, kwata bupinguzi buli kulengia uye wali ni kampingu kaweeme kabili buli kulangilila nangue uli wa kisinka kuli Yehova.
Kunti wakita siani kine bakulanda ulongieko bulongio buli mukukitua na kanisa?
BANGE BALI BALANDA: “Mpalile kumana beelia bili byalanda babisanguka palua Bakasininkizia Bakue Yehova, kukita evio kuli kunkwasia nsakile kisinka.”
-
Eba, kutontonkania evio ni mulangue? Juu ya ki walanda evio?
MU KIFUPI
Eevi tutwalilile kuya twali ba kisinka kuli Yehova, tupalile kutiina kukita bukibuza ni bantu basili ba kisinka kuli weene. Kabili tupalile kwitenga kakiine ni diini ya bufi.
Kunti waasuka siani?
-
Juu ya ki te tupalile kumona, kusoma, ao kutuilizia mpunda ya babisanguka?
-
Tupalile kubakitila siani baalia bonse basitonene kabili kuya bali Bakasininkizia Bakue Yehova?
-
Kunti twakita siani eevi kunakila musoko wa kufuma mu diini ya bufi?
MANAKO NI BINGE
Mona vya kukita musita bantu bange lubasalangania mpunda ya bufi palua Bakasininkizia Bakue Yehova.
“Eba, Umanine Kisinka kya Ezio Mpunda?” (Lupungu Lwakue Kamwenenena, lwa Muezi wa 08, 2018)
Kunti wainika siani nangue tootu tubungue ao eezi miilo ikwasiizie Babiloni Mukulu?
Babisanguka bange, bali bakita siani eevi kwezia kutopia kiketekelo kyetu?
Mu lyasi lilandile “Naali Namukeba Leeza Kutendekela ku Bwanike Bwane” mona koani umo wa mu kanisa ka Shinto vyaafumine mu kanisa ka bufi.
“Bibilia Ili Yaalulula Buikazi bwa Bantu” (Lupungu Lwakue Kamwenenena, lwa 01/07/2011)
