KUKITA BASAMBI
LISOMO LYA 10
Kwipeela
Lifunde: ‘Kutona kutwaamitoneesie i kwaalengele kuti tumileetele mpunda iweeme yakue Leeza ni kwipeela fwe beene pa mulandu weenu. Kisinka muli batonua betu ba kiine.’—1 Bat. 2:8.
Yesu Waakitile ki?
1. Mona VIIDEO, ao soma Yoane 3:1, 2. Kisia, asuka biipuzio bili paapa pensina:
-
Ati, paange juu ya ki Nikodemu waatonene kuya kumwendela Yesu musita wa busiku?—Mona Yoane 12:42, 43.
-
Yesu waalangiliile siani nangue waali waipeele kukita basambi?
Mufuano Wakue Yesu Watusambilizia ki?
2. Paantu tubatonene bantu, tupinguile kubakwasia eevi baaluke basambi.
Koonka Mufuano Wakue Yesu
3. Sambilile pa musita ni ku fuasi ili kusaakula musambi obe wa Bibilia. Musambi kunti watona busiku bwa mu mulungu ao nsa ya kusambililapo iye yamanikile buino. Eba, musambi kunti wakila kwiunvua buino, kine mwasambilila mwali ku fuasi kwali wabombela miilo, ku nsesi yakue ao pa fuasi ya bantu bengi? Kine kunti kyakitika, alulula ntantiko yobe eevi ukabe kusambilila nakue pa musita ni ku fuasi itonene saana musambi obe.
4. Sambilile kwa mute. Kine teukaba kuya walipo, te kwanzia mupaango wa kusambilila. Atasie kine teukaba kuya walipo, tontonkania beebi biipuzio:
-
Eba, kunti watungulula lisambililo musita unge mu ozo mulungu?
-
Eba, kunti watungulula lisambililo lyobe kupitila telefone ao kumukuuta ku viideo?
-
Eba, kunti wamulanda kasimika unge akabe kutungulula leelio lisambililo?
5. Pepa Yehova akupeele malanga aweeme. Muloombe Yehova akukwasie eevi te kunti ulekele kusambilila nakue, atasie kine musambi obe takili na mute wa kusambilila ao teezi kuleenga kubombia beelia byali wasambilila. (Baf. 2:13) Paange musambi obe ali ni mibeele ingi iweeme; pepa eevi upoozeko maano ku ezio mibeele.
