1-2. Naani apalile kumukwasia musambi wa Bibilia akite buyantanzi ni kubatiziiwa?

AMY, ali waikala mu kyalo kya Fiji walanda eevi: “Naatonene bintu binaali nasambilila mu lisambililo lyane lya Bibilia. Naainikile nangue naapatile kisinka. Inzi, kupisia nsita pamo ni balupua ni bankazi i kwankwasiizie kukita bupilibuko ni kufikiila kubatiziiwa.” Bintu byaamusaangile Amy byatusambilizia kintu keeki kya mana: Musambi wa Bibilia kunti wakinkiziiwa saana kukita buyantanzi ni kubatiziiwa, kine bange mu kilonghaano bamukwasia.

² Kila kasimika kunti wakwasia kilonghaano kitane. (Baef. 4:16) Leilani, painia ali waikala ku Vanuatu, walanda eevi: “Bali balanda nangue, kila muntu mu muzi ali wakwasia kukuzia muana. Mwene nangue i vikili kyasaangua ni palua miilo ya kukita basambi; lingi mu kilonghaano, ili yaloomba kukwasiana eevi musambi afikiile kwitabila kisinka.” Kya kumwenako, bantu ba mu lupua, babibuza pamo ni balimu, bonse bali bakwasia muana akite buyantanzi ni kufikiila kukula. Bali bamukwasia musita ubali bamukinkizia ni kumusambilizia masomo a mana. Evio vyenka, bakasimika kunti babasoka basambi ba Bibilia, kubakinkizia, ni kubabiikila mufuano uweeme eevi kubakwasia bakite buyantanzi ni kubatiziiwa.​—Tus Maf. 15:22.

3. Wasambilila ki kupitila milandu yakue Ana, Dorin, ni Leilani?

³ Juu ya ki kasimika olia ali watungulula lisambililo lya Bibilia, apalile kusekelela musita bakasimika bange lubali bamukwasia musambi wakue? Mona vyalanda nkazi Ana, painia umo ebeleele ali waikala mu kyalo kya Moldova: “Kili kyasaangua kyaaviizie saana ku muntu umo kufikilizia bintu byonse bikabiile musambi  wa Bibilia musita lwatendeka kukita buyantanzi.” Dorin, painia unge ebeleele wa mu keekio kyenka kyalo walanda eevi: “Lingi, bakasimika bange bali balanda bintu bili byakumia ku mutima wakue musambi, bintu binsinatontonkaniepo ata limo.” Leilani waleeta nsaambu inge ipalile kutukwasia kusekelela musita bange lubali bakwasia. Walanda eevi: “Ntono pamo ni nsaansa ili yalangililua musambi wa Bibilia kunti yamukwasia kwinika vili bantu bakue Yehova.”​—Yoan. 13:35.

4. Tuli kusambilila ki mu leeli lyasi?

⁴ Inzi, paange kunti waiipuzia eevi: ‘Ale, kunti namukwasia siani muntu unsiizi kusambilila nakue akite buyantanzi?’ Kansi, tumone kintu kitupalile kukita musita utwakupua kuya kutungulula lisambililo lya Bibilia, kabili keelia kitupalile kukita musita musambi ozo lwatendeka kwiza ku kulonghaana. Kabili tuli kumona bakote vibali kubakwasia basambi ba Bibilia kukita buyantanzi ni kubatiziiwa.

5. Kine weewe wakupua ku lisambililo lya Bibilia, uli kuya wali ni miilo ki?

⁵ Musita wa kutungulula lisambililo lya Bibilia, kasambilizia i mwine ali ni miilo ya kumukwasia musambi wa Bibilia kunvua Mulandu Wakue Leeza. Kine kasambilizia wakukupa umutwale ku lisambililo, upalile kwimona nangue weewe ulisie wa kumukwasia kasambilizia. (Kas. 4:9, 10) Inzi, kunti wakita ki eevi uviinde kukwasia buino musita wa lisambililo lya Bibilia?

6. Kine wakupua kuya ku lisambililo lya Bibilia, kunti wabombia siani milandu ili mu Tuswalo ni Mafunde 20:18?

⁶ Iiteanie palua lisambililo lya Bibilia. Kya mambo, mwipuzie kasambilizia akubuileko mpunda iniini palua musambi. (Soma Tuswalo ni Mafunde 20:18.) Kunti wamwipuzia eevi: “Kunti wambuilako bintu biumanine palua musambi obe wa Bibilia? Muli kusambilila mu lyasi lya bunga? Utonene musambi obe asambilile ki mu leeli lyasi? Eba kuli ni kintu kimpalile ao kinsipalile kukita ao kulanda musita wa lisambililo? Kunti namukinkizia siani musambi eevi akite buyantanzi?” Kakiine kasambilizia takubuila bintu bya bunke palua musambi, inzi beelia byali kukubuila kunti byakukwasia. Misionere umo ali wakuutua Joy, ali wababuila ezio mpunda baalia bali baya nakue ku kutungulula lisambililo lyakue lya Bibilia. Walanda eevi: “Ezio mpunda ili yamukwasia olia undi naya nakue amupoozeko maano musambi ni kumona keelia kyapalile kukwasia musita wa kusambilila.”

7. Kine ukupilue kuya ku lisambililo lya Bibilia, juu ya ki upalile kwiteania?

⁷ Kine wakupua kuya ku lisambililo lya Bibilia, kunti kyawaama kine wateania ntaanzi bintu bimuli kuya kusambilila. (Ezr. 7:10) Lupua Dorin, utwazimbulanga ntaanzi walanda eevi: “Ndi natona saana kumona olia utwaya nakue ku kusambilizia waiteaniizie palua bintu bituli kuya kusambilila. Kukita evio kuli kwalengia aviinde kukwasia mu nzila iweeme.” Kukila pakaako, musambi ali kwinika nangue mwe bonse mwiteaniizie buino, kabili keekio kunti  kyamupeela mufuano uweeme wa kukoonka. Anzia kine teuviinda kuteania buino palua leelio lyasi, kunti watwama musita kampanda wa kumana bintu bikata bili mu leelio lyasi.

8. Upalile kukita siani eevi kusininkizia nangue lipepo lyobe lili kukwasia musita wa lisambililo lya Bibilia?

⁸ Lipepo ni seemu ya mana ya lisambililo lya Bibilia. Pakaako, kine kasambilizia wa Bibilia wakulanda ukite lipepo, upalile kutontonkania ntaanzi bintu biuli kuya kulanda mu lipepo. Kine wakita evio, lipepo lyobe lili kukwasia saana. (Malum. 141:2) Hanae, ali waikala mu kyalo kya Japani, akilangulukilesie lipepo lyaakitilue na nkazi umo waaizile pamo ni kasambilizia wakue wa Bibilia. Walanda eevi: “Naainikile nangue waali ni bukibuza bwalumine pamo ni Yehova, ni neene naatonene kwaluka nga weene. Kukila pakaako, naaiunvuile kuya natonenue musita lwaazimbuile liina lyane mu mapepo akue.”

9. Kukoonkana ni lileembo lya Yakobo 1:19, kine watwalana ku lisambililo lya Bibilia, kunti wakita ki eevi uviinde kukwasia?

⁹ Mukwasie kasambilizia musita wa lisambililo. Painia umo ebeleele ali waikala mu kyalo kya Nigeria, walanda eevi: “Olia ali watwilizia buino musita wa lisambililo, i muntu aweeme ali watwalana ku lisambililo. Ozo muntu ali waleeta bulondolozi bwaweeme, inzi, teezi kulanda bingi. Ali wasaangua wainikile nangue kasambilizia i wa kutungulula lisambililo.” Kunti wamana siani musita u upalile kulandapo ni vya kukwasiapo musita wa lisambililo? (Tus Maf. 25:11) Twilizia wapoozeleko maano musita kasambilizia ni musambi lubali mukulanda. (Soma Yakobo 1:19.) Kine wakita evio, uli kumona musita upalile wa kunti ukwasiepo. Anzia evio, upalile kutontonkania ntaanzi ya kulanda. Kwa mufuano, te upalile kulanda bintu bingi saana, kumukatikizia kasambilizia, ao kuleeta bulondolozi bunge bupuseene ni lyasi lili mukusambililua. Inzi, kupitila bulondolozi bobe bufupi, mufuano, ao kiipuzio, kunti wakwasia lyasi likile kunvuika. Nsita inge, kunti walandaposie kakaniini. Inzi, kine wamutasia musambi ni kulangilila nangue uli wamwemena, uli kumukwasia saana ozo musambi akite buyantanzi.

10. Kine wamubuila musambi wa Bibilia bintu byaakusaangile mu buikazi, keekio kunti kyamukwasia siani?

¹⁰ Londolola bintu byaakusaangile mu buikazi bobe. Kine kyapala, kunti wamubuila musambi mu kifupi viwamanine kisinka, viwaanziizie maavia, ao viwaamwene Yehova wakukwasia mu buikazi bobe. (Malum. 78:4, 7) Paange ozo musambi, akabiile saana kutuilizia bulondolozi nga bobo. Kunti bwakosia kiketekelo kyakue musambi ni kumukoselezia akite buyantanzi ni kufikiila kubatiziiwa. Kabili paange kunti bwamukwasia kwanzia maavia akue. (1 Pet. 5:9) Gabriel, ali waikala mu kyalo kya Brazil kabili ni painia, walanguluka kyaamukwasiizie musita lwaali wasambilila Bibilia. Walanda eevi: “Musita unaaunvuile lupua wali mukulondolola maavia aamusaangile, naainikile nangue Yehova ali wamona maavia etu. Kine  weene waaviindile kusipikizia, kansi ni neene kunti naviinda.”

11-12. Kine musambi wa Bibilia watendeka kulonghaana, juu ya ki tupalile kumupokelela twasaansamukile?

¹¹ Pakuti musambi wa Bibilia akite buyantanzi ni kufikiila kubatiziiwa, apalile kuya waiza lyonse ku kulonghaana ni kunoonkelamo. (Baeb. 10:24, 25) Kansi, kasambilizia kunti wamukupa eze alonghaane lya kuanza. Kine waizako, fwe bonse tumukinkizie atwalilile kuya waiza ku Nsesi ya Bukolo. Kunti twamukinkizia siani?

¹² Mupokelele musambi wasaansamukile. (Bar. 15:7) Kine twamukita musambi eyunvue buino musita lwaiza ku kulonghaana, paange ali kutona kutwalilila kuya waiza ku Nsesi ya Bukolo. Mupozie ozo musambi wasaansamukile ni kumulangilila ku bange, inzi, apana kumulengia eyunvue ovio. Te kutontonkania nangue muntu unge i ali kumulanzia, paange kasambilizia wakue tanafike, ao paange ali ni binge byali mukukita mu Nsesi ya Bukolo. Poozako saana maano ku bintu bili mukulanda ozo musambi, kabili langilila nangue uli mukumwemena. Kumupokelela musambi wasaansamukile, kunti kwamukwasia siani? Mona mufuano wakue Dmitrii, wakibatiziiwasie mu buleenu, kabili tasyali mubombi ali wabombela. Musita lwali walanguluka lwaaile ku kulonghaana lya kuanza, walanda eevi: “Lupua umo waamwene napembeele panze pa Nsesi ya Bukolo nalisie ni mwenzo-mwenzo. Waaizile kuntwama ni kungingizia mukati. Bengi baaizile kumpozia. Naapapile saana. Naaunvuile makola saana kumona ezio aali, kabili natonene tuye twalonghaanasie kila busiku. Nsinamonepo kintu nga keekio kyakitika fuasi inge.”

13. Mufuano obe uweeme kunti wamukwasia siani musambi wa Bibilia?

¹³ Uye wali mufuano uweeme. Lwendo lobe luweeme kunti lwamukwasia musambi wa Bibilia asininkizie nangue waakipata kisinka. (Mat. 5:16) Vitalii, painia umo ali wabombela mu kyalo kya Moldova, walanda eevi: “Naamwene vyaali buikazi bwa bantu bange ba mu kilonghaano, kutontonkania kwabo, ni mibeele yabo. Keekio kyaansininkiziizie nangue Bakasininkizia Bakue Yehova kakiine bali mu diini ya kisinka.”

14. Mufuano obe kunti wakwasia siani muntu unge atwalilile kukita buyantanzi?

¹⁴ Pakuti musambi wa Bibilia abatiziiwe, apalilenke kuya wabombia beelia byali mukusambilila. Kukita evio tekwizi kuya kwalengele lyonse. Inzi, kine musambi wa Bibilia wamona viuli wanoonkelamo mu kubombia mafunde a Bibilia, kunti wakoonka mufuano obe. (1 Bakor. 11:1) Mona mufuano wakue Hanae, olia utwazimbulanga kale. Walanda eevi: “Balupua ni bankazi baali babombia bintu binaali nasambilila nangue i bimpalile kukita. Naamwene vimpalile kuya nakoseleziana, kweleelana, ni kubatona bange. Lyonse baali balanda bintu biweeme palua bantu bange. Naatonene kukoonka mufuano wabo.”

15. Lileembo lya Tuswalo ni Mafunde 27:17 lyatukwasia siani kwinika nsaambu ya kukita bukibuza pamo ni musambi olia ali mukutwalilila kuya waiza ku kulonghaana?

 ¹⁵ Kita bukibuza pamo ni musambi. Musita musambi lwali mukutwalilila kuya waiza ku kulonghaana, ni weewe twalilila kulangilila nangue uli wamwemena. (Baf. 2:4) Wamona siani kine weewe waikwinda kumumana buino? Kunti wamutasia palua bupilibuko bonse buweeme bwaakikita, ni kumwipuzia palua lisambililo lyakue lya Bibilia, lupua lwakue, ao palua miilo yakue, inzi, bila kwingilila bintu byakue bya bunke. Bulondolozi bwa evio, buli kumipalamika. Kine weewe wakita bukibuza pamo ni musambi wa Bibilia, uli kumukwasia akite buyantanzi ni kufikiila kubatiziiwa. (Soma Tuswalo ni Mafunde 27:17.) Loonu Hanae ni painia wa loonse. Lwali walanguluka musita lwaaile ku kulonghaana lya kuanza, walanda eevi: “Paantu naalukile ni babibuza mu kilonghaano, naakilile kwaluka ni amu ya kuya ku kulonghaana, kabili naali nayako anzia kine ntopele. Naasekeleele bukibuza pamo ni benaane ba leenu, ni keekio kyaankwasiizie kulekela bukibuza pamo ni bantu basibanga bamupupa Yehova. Naatonene kumupalama Yehova ni balupua ni bankazi. Kupuako, naapinguile kubatiziiwa.”

16. Ni kintu ki kinge kiuli kuviinda kukita eevi kumukwasia musambi wa Bibilia eyunvue buino kuya wali mu kilonghaano?

¹⁶ Musita musambi lwali mukuya wakita buyantanzi ni kukita bupilibuko, mukwasie emone nangue ni weene ni seemu ya kilonghaano. Kunti wakita evio kupitila kulangilila mibeele ya kupokelela buino baeni. (Baeb. 13:2) Denis, ali wabombela mu kyalo kya Moldova. Lwali walanguluka musita lwabanga wakilisie musambi wa Bibilia, walanda eevi: “Lingi, neene pamo ni mukazi wane twaali twakupua kuya kupisia musita pamo ni balupua. Baali batubuila vibaakwasiiziwe na Yehova. Keekio kyaatukoseleziizie. Ezio nsita yaatukwasiizie kusininkizia nangue ni fwefue kunti twamubombela Yehova, kabili nangue kunti twaaluka ni buikazi buweeme.” Kine musambi wa Bibilia waaluka kasimika, kunti wamukupa muye nakue mu miilo ya kusimikila. Diego, kasimika ali waikala mu Brazil, walanda eevi: “Balupua bengi baali bankupa ngie nabo mu miilo ya kusimikila. Kuya nabo mu kusimikila kwaali kwakilile kuwaama paantu kwaampeele fuasi ya kubamana buino. Lunaali naya nabo, naali nasambilila bingi, kabili naali nakila kwiunvua kuya nali peepi ni Yehova ni Yesu.”

17. Bakote kunti bakwasia siani basambi ba Bibilia?

¹⁷ Pisia musita pamo ni musambi wa Bibilia. Mwe bakote, kine mwabalangilila ntono basambi ba Bibilia ni kubeemena, kunti mwabakwasia bakite buyantanzi ni kubatiziiwa. Eba, kunti walanda ni musambi musita lwaiza ku kulonghaana? Bali kumona nangue uli wabeemena kine walanguluka meena abo, maka-maka kine batendeka kwasukapo musita wa kulonghaana.  Eba, kunti wapaanga musita obe eevi uye waya pamo ni kasimika lwali waya ku kutungulula lisambililo lyakue lya Bibilia? Kine wakita evio, kunti wamukwasia saana musambi bila kumana. Painia umo ali wakuutua Jackie ali waikala mu kyalo kya Nigeria, walanda eevi: “Basambi bengi ba Bibilia bali bapapa kumana nangue lupua utuli nakue musita wa lisambililo, ni mukote. Musambi umo waalandile eevi: ‘Pastere wane nga takitile eevi ata kaniini. Weene ali waendelasie banoonsi kabili ali wakita evio kinesie bamulipa!’” Loonu, ozo musambi ali waya ku kulonghaana.

18. Bakote kunti bafikilizia siani miilo ibapeelue nga vilandile lileembo lya Miilo ya Batumua 20:28?

¹⁸ Beelezia ni kukoselezia bakasambilizia ba Bibilia. Mwe bakote, muli ni miilo ikata ya kukwasia balupua ni bankazi mu kilonghaano eevi baye bali bakasimika ni bakasambilizia baweeme. (Soma Miilo ya Batumua 20:28.) Kine kasimika waunvua busoni bwa kutungulula lisambililo lya Bibilia ntaanzi yobe, muloombe akupeele utungulule. Jackie, olia utwazimbulanga kale, walanda eevi: “Lyonse bakote bali bangipuzia palua basambi bane ba Bibilia. Kine nasaanga maavia mu kutungulula lisambililo, bali bampeela masoke ali akwasia.” Bakote kunti bakita kintu kikata saana kine babakoselezia ni kubakinkizia bakasambilizia batwalilile mu miilo yabo. (1 Bat. 5:11) Jackie walanda kabili eevi: “Ndi naunvua makola musita bakote lubali bankoselezia ni kumbuila nangue bali batasia miilo yane ikata indi nakita. Ezio milandu ili yalengia ngiunvue buino nga evelia menda anueme musita wa lyuza. Milandu yabo iweeme ili yankwasia kwaluka ni nsaansa kabili ngiunvue nangue ndi nakita miilo iweeme musita undi natungulula masambililo a Bibilia.”​—Tus Maf. 25:25.

19. Kila umo weetu kunti waya wali ni nsaansa ya ki?

¹⁹ Anzia kine loonu te tukwete lisambililo lya Bibilia, kunti twakwasia muntu unge akite buyantanzi ni kufikiila kubatiziiwa. Kupitila bulondolozi bwetu buteaniiziwe buino, kunti twamukwasia kasambilizia musita wa lisambililo, inzi, bila kulanda bingi saana. Kunti twakita bukibuza pamo ni basambi musita ubatendeka kwiza ku Nsesi ya Bukolo, kabili kunti twababiikila mufuano uweeme. Bakote ni beene kunti babakoselezia basambi kupitila kupisia musita pamo nabo, kabili kunti babakoselezia bakasambilizia kupitila kubabeelezia ni kubatasia. Kakiine, anzia kine katwakita ni kakaniini, tuli kuya twali saana ni nsaansa kine kaako kantu katwakita, kamukwasia muntu amutone Yehova ni kumubombela!