1-2. Malaika wabalanda siani banakazi bali ku kilibu kyakue Yesu, ni Yesu muine wabapeela malaizio ki?

LUKILISIE lukele-keele pa kili, nsiku 16, muezi wa Nisani, muaka wa 33. Kikundi kya banakazi bali ni bulanda saana bali bamupupa Leeza, baya ku mankabuli kwaali kwabiikilue mubili wakue Mulopue Yesu Kristu te pasyapitile nsa ikilile pa makumi atatu na sita (36). Lubafika ku mankabuli, bakebele kubombia ku mubili wakue Yesu mafuta anunkila ni tuntu tunge tuli twakolezia. Inzi baapapa kusaanga nangue mu kilibu (kiina) te muli kantu! Malaika wabalanda banakazi nangue Yesu tasyatuntumukile kufuma ku bafuile, kabili wabalanda eevi: ‘Wamitangilila ku Galilaya. Kooko i kumwakaba kumonana nakue.’​—Mat. 28:1-7; Luka 23:56; 24:10.

² Banakazi lubafuma ku mankabuli, Yesu muine wabapalama ni kubapeela malaizio aza: ‘Ale endo mubaane bakwane bakabe kuya ku Galilaya, kooko i kwa kunti tukabe kumonana nabo.’ (Mat. 28:10) Kipalile Yesu ali ni malaizio a mana saana a kubapeela basambi bakue, paantu, kisia kutuntumuka kwakue, kintu kya mambo kyakita ni kubakolonghania ni kubalaizia!

3-4. Juu ya ki kunti twalanda nangue malaizio alandilue mu Mateo 28:19, 20 te apeeluesie batumua? (Mona foto ili ku ntendeko ya kazeeti.)

³ Soma Mateo 28:16-20. Yesu lwaabakolonghaniizie, waalandile palua miilo ya mana saana ipalile kufikiliziiwa na basambi bakue mu musita wa miaka mia (100) ya ku ntendeko​—miilo elia yenka ituli mukukita ni leenu. Yesu waalandile: “Ale, endo mwaye mukite basambi kufuma ku bantu ba ntundu yonse, . . . kubasambilizia kukoonka bintu byonse binakimilaizia.”

 ⁴ Yesu atonene basambi bakue bonse basimikile. Azo malaizio taabapeelesie baalia batumua ba kisinka 11. Ni kiki kyatusininkiziizia evio? Musita Yesu lwaali waleeta azo malaizio ku lupili lwa Galilaya, eba, kwaalisie batumua bakue? Languluka nangue malaika wabalandile eevi banakazi: ‘Mwakaba kumonana nakue [ku Galilaya].’ Kansi, mu ozo musita kipalile banakazi ba kisinka ni beene baalipo. Inzi, te kaakosie. Mutumua Paulo walangilila paswetele nangue Yesu “waamwenue na basambi bange bakilile pa kipendo kya [ao mpendua ya] bantu 500 pa musita umo.” (1 Bakor. 15:6) Baabo bantu baali kupi?

5. Juu ya ki twazumina nangue 1 Bakorinto 15:6 yalandila palua kukolonghana kwa ku Galilaya kulandilue mu Mateo 28?

⁵ Tuli ni nsaambu ya kuzumina nangue mu lileembo lya 1 Bakorinto 15:6, Paulo waali walandila palua kulonghaana kwa ku Galilaya kulondolwelue mu Mateo katue ka 28. Juu ya ki twazumina evio? Kya kuanza, paantu basambi bengi bakue Yesu baali ba ku Galilaya. Pakaako, kuliko kuyasie mu nsesi imo ku Yerusalemu, ku lupili lwa mu Galilaya i kwali nkeende yaali yapalile kukolonghanapo bantu bengi saana. Kya bubili, kisia kutuntumuka, Yesu waatendekelenke kusaakaana na batumua bakue 11 pa bunke mu nsesi ku Yerusalemu. Kabenge Yesu waatonene kubapeelasie batumua miilo ya kusimikila ni kukita basambi, nga waakitile evio mu muzi wa Yerusalemu kuliko kubalanda beene pamo ni banakazi, ni bantu bange baye basaakaane nakue ku Galilaya.​—Luka 24:33, 36.

6. Ni kiki kilangiliile nangue malaizio a kukita basambi ali mu Mateo 28:20 ali mukufikiliziiwa leenu, ni bantu bali mukukindika siani azo malaizio?

⁶ Mona nsaambu ya butatu ya mana. Malaizio akue Yesu a kukita basambi te aapeleelesie ku Bakristu ba mu miaka mia (100) ya ku ntendeko. Ale twamana siani? Yesu waapeleziizie malaizio akue ku basambi walanda eevi: ‘Ndi pamo neenu nsiku yonse mpaka ku mpeleezio ya kyalo.’ (Mat. 28:20) Nga vyalandile Yesu, leenu miilo ya kukita basambi ili mukufikiliziiwa kakiine. Tontonkania vikili mukukitika! Kila muaka, bantu mu peepi ni mia itatu elufu (300 000) bali mukwaluka basambi bakue Yesu Kristu ni kubatiziiwa, ni kwaluka Bakasininkizia Bakue Yehova. Keekio ni kyakupapia kakiine!

7. Tuli kulondoluela ki, kabili juu ya ki?

⁷ Bantu bengi bali basambilila Bibilia, bali mukukita buyantanzi ni kufikiila kubatiziiwa. Inzi, bantu bange batuli twasambilila nabo Bibilia kwa mute, bali batiina kwaluka basambi. Bali batona kusambilila, inzi te beezi kukita buyantanzi ni kufikiila kubatiziiwa. Kine uli watungulula ni lisambililo lya Bibilia, tumanine nangue utonene kumukwasia musambi obe kubombia beelia byali mukusambilila ni kufikiila kwaluka musambi wakue Kristu. Leeli lyasi lili kulondoluela vituli kuviinda kukumia ku mutima wakue musambi ni vituli kumukwasia akule kimupasi. Juu ya ki tupalile kulondoluela leeli lyasi? Paantu musita unge kunti kyapala kupingula kine tuli kutwalilila kusambilila ni muntu ao abe.

8. Juu ya ki kunti kyakola kukumia ku mutima wa musambi?

⁸ Yehova atonene bantu bamubombele paantu bamutonene. Kansi, kikata kyetu ni kubakwasia basambi betu bamane nangue Yehova ali wabeemena saana, kila muntu palwakue, kabili nangue abatonene saana. Tukebele kubakwasia bamumone Yehova kuya waali nga “baba wa baalia basili na baba kabili ali wasuunga ba mukanfuilua.” (Malum. 68:5) Musita basambi bobe lubali kumona Leeza vyabatonene, kunti bakumiiwa ku mitima yabo, ni ntono yabo kuli weene ili kukila kukosa. Bange  basambi kunti kyabakolela kumumona Yehova nga baba ali ni ntono, paantu baviazi babo te baali babalangilila ntono. (2 Tim. 3:1, 3) Kine uli mukutungulula lisambililo, tonta palua mibeele iweeme yakue Yehova. Bakwasie basambi bobe bamane nangue Leeza weetu wa ntono atonene bakapate bukose bwa loonse, kabili aleengelesie kubakwasia eevi bakapate bobo bukose. Ni kiki kinge kitupalile kukita?

9-10. Tupalile kubombia bitabu ki musita utuli mkutungulula lisambililo lya Bibilia, kabili juu ya ki tubombie bebio bitabu?

⁹ Bombia bitabu: “Biblia Inatufundisha Nini? (Bibilia ili Yatusambilizia ki?)” ni kitabu “Namna ya Kubakia Katika Upendo wa Mungu (Kunti Wasiala Siani mu Ntono Yakue Leeza?).” Beebi bitabu biteaniiziwesie eevi kutukwasia tukumie ku mitima ya basambi betu. Kyakumwenako ni keeki, lyasi lya 1 lya kitabu Inatufundisha (Bibilia Yatusambilizia) lili lyaasuka beebi biipuzio: Eba, Leeza atupoozeleko maano?, Leeza ali waiunvua siani musita bantu lubali basaanga maavia?, ni kiipuzio, Kunti waaluka siani kibuza wakue Yehova? Ale palua kitabu Bakia Katika Upendo wa Mungu (Kusiala mu Ntono)? Keeki kitabu kili kumukwasia musambi wa Bibilia  kumana nangue kubombia mafunde a Bibilia kunti kwamukwasia mu buikazi ni kumupalama saana Yehova. Ata kine waasambiliziizie kale basambi bange mu beebi bitabu, teania buino kila lisambililo, kabili uye walangulukile buino bikabiile musambi obe.

¹⁰ Tulande nangue musambi watona mulondolole lyasi lisili mu kitabu kili pakati ka Biombo Byetu Byakusambiliziiziako. Paange kunti wamukinkizia asome keekio kitabu palwakue bunke, eevi utwalilile kutungulula lisambililo mu kitabu kimo pakati ka bitabu biteaniiziwe palua lisambililo lya Bibilia, beelia byazimbuluanga kale.

11. Ni musita ki utupalile kutendeka ni kupeleezia lisambililo na lipepo, kabili kunti twamukwasia siani musambi eevi enike juu ya ki kupepa ni kintu kya mana?

¹¹ Tendeka na lipepo pa kusambilila. Nga vitumanine, kili buino saana kutendeka ni kupeleezia lisambililo na lipepo bila kukokola, lingi mu milungu iniinisie kisia kutendeka lisambililo litwaliliile. Tupalile kumukwasia musambi weetu amane nangue kunti twaunvua Mulandu Wakue Leeza kinesie twakwasiiwa na mupasi wakue Leeza. Pakunti balandile palua lipepo, bakasambilizia ba Bibilia bange bali basoma Yakobo 1:5, ili yalanda eevi: ‘Kine umo pakati kenu wabulua maano, amuloombe Leeza.’ Kisia, kasambilizia wamwipuzia eevi musambi: “Kunti twamuloomba siani Leeza maano?” Musambi kunti wainika nangue tupalile kupepa kuli Leeza.

12. Kunti wabombia siani Malumbo 139:2-4 eevi umukwasie musambi obe akile kuwaamia mapepo akue?

¹² Musambilizie musambi obe vya kupepa. Mubuile nangue Yehova atonene kutuilizia mapepo akue a kufuma ku mutima. Mubuile nangue mu mapepo etu a bunke, kunti twamukakuila Yehova mutima weetu ni kumubuila malanga etu alia atuli kwandua paange kumubuila muntu unge. Kukila pakaako, Yehova amaniine mbeela malanga etu a mukati. (Soma Malumbo 139:2-4.) Kabili kunti twamukinkizia musambi weetu amuloombe Leeza amukwasie kwalulula malanga ni mibeele ibiipile. Kwa mufuano, tulande nangue musambi wa Bibilia ali watona nsikunkulu isipalile kukitua na Bakristu. Amanine nangue ibiipile, inzi kulanda kisinka, watona bintu kampanda bili byasaanguamo. Mukinkizie amubuile Yehova bila kufiika vyali waiunvua ni kumuloomba amukwasie kutona beelia bitonene Leeza.​—Malum. 97:10.

13. (a) Juu ya ki tupalile kuleenga kubakupa basambi betu batendeke kuiza ku kulonghaana? (b) Kunti twakita ki eevi kumukwasia musambi te kunti onvue muenzo lutuli mu Nsesi ya Bukolo?

¹³ Mukupe musambi obe bila kukokola atendeke kuiza ku kulonghaana. Beelia bili kunvua ni kumona musambi obe ku kulonghaana kwa buina Kristu, kunti byamukumia ku mutima ni kumukwasia akite buyantanzi. Mulangisie viideoNi kiki kili kyakitika mu nsesi ya Bukolo ya Bakasininkizia Bakue Yehova? kabili mukupe wasaansamukile eevi mukabe kuya pamo nakue ku kulonghaana. Mulipile buleendo bwa kuya ku kulonghaana kine kyakitika. Kiweeme kuya wakupa ni bakasimika bapusene-puseene baye bakutwala ku lisambililo. Kine wakita evio, musambi obe wakaba kwizibilako ni bange mu kilonghaano, kabili taya waunvuile muenzo musita lwali kuya waali ku kulonghaana.

14. Ni musita ki musambi lwali wakinkiziiwa kukula kimupasi?

¹⁴ Kikata kitukabiile ni kumukwasia musambi wa Bibilia akule kimupasi. (Baef. 4:13) Kine muntu waitabila kusambilila Bibilia pamo neetu, kunti watona kumana lisambililo vilili kumukwasia palwakue bunke. Inzi, musita ntono yakue kuli Yehova luili kuya yakila kutana, kunti watendeka kutontonkania vya kubakwasia bange, atasie baalia bali mbeela mu libumba  ao kilonghaano. (Mat. 22:37-39) Kine kyapala, uye waali ni nkulu ya kumubuila lisyuko lya kukwasia miilo ya Bukolo kupitila nfalanga.

15. Kunti twamukwasia siani musambi wa Bibilia eevi apuisie buino maavia kine wasaakaana nao?

¹⁵ Musambilizie musambi obe vya kukita kine wasaakaana ni maavia. Tulande nangue, musambi obe, kasimika asinabatiziiwe, wakubuila nangue muntu kampanda mu kilonghaano wakimuluvia. Paali pakunti waaluke ku lubali lumo, juu ya ki te kunti umubuile vilandile Maleembo? Musambi kunti wamweleela lupua mu kilonghaano, ao kine wamona nangue taviinda kumweleelasie, musambi kunti waya kumumona olia wakimuluvia watekameene, kabili waali ni ntono ni kuya waali ni mupaango wa ‘kumupata lupua.’ (Palania ni Mateo 18:15.) Mukwasie musambi obe ateanie beelia byali kuya kulanda. Mulangilile vya kubombia aplikasio JW Library^®, ni kitabu Musaada wa Kutafuta Habari kwa Ajili ya Mashahidi wa Yehova, ni kitente kya jw.org^®, eevi kusambilila nzila iweeme ya kukwasia kuluisia buavia nga bobo. Kine musambi wakila kubeeleziiwa ntaanzi tanabatiziiwe, wakaba kukila kukita bukibuza pamo ni bange mu kilonghaano kisia kubatiziiwa.

16. Juu ya ki kiweeme kukupa bakasimika bange bakutwale ku lisambililo lyobe?

¹⁶ Kupa bakasimika bange ba mu kilonghaano ao kangalila wa muputule kine waendela kilonghaano, eevi bakutwale ku lisambililo lyobe. Juu ya ki? Kukila pa beelia bitwalandanga kale, bakasimika bange kunti bamukwasia buino saana musambi mu nzila iusiviinda we muine. Tulande nangue, musambi obe wakikita maka eevi alekele kupeepa, inzi waakyandua miku ingi kulekela. Mukupe Kasininkizia olia waviindile kale kwanzia ezio mibeele, paange olia waeziizie miku ingi waanduasie, eevi akutwale ku leelio lisambililo. Kasimika nobe kunti waya waali ni buviinde bwa kuleeta masoke akwasia alia akebele musambi. Kine wamona nangue paange teuviinda kutungulula lisambililo ni olia lupua abeeleziizie walipo, mu ozo musita, mulande ozo lupua atungulule. Musita luuli wakupa balupua bange baye pamo nobe ku kutungulula lisambililo lya Bibilia, musambi obe kunti wanoonkelamo mu bufundi bwabo. Languluka nangue kitukabiile ni kumukwasia musambi kukosa kimupasi.

17-18. Kine ukebele kwimika lisambililo, upalile kutontonkania palua ki?

¹⁷ Kine musambi obe wa Bibilia tali mukukita buyantanzi, mu nzila inge upalile kwiipuzia eevi: ‘Eba, mpalile kwimika lisambililo?’ Ntaanzi ya kukwata bupinguzi, upalile kutontonkania palua buviinde bwakue. Ku bantu bamo, kukita buyantanzi kwatwama musita waleepele, inzi bange te beezi kukokola. Iipuzie eevi: ‘Eba, musambi wane ali mukwikwinda kukita buyantanzi bupalile kukoonkana ni aali yakue?’ ‘Eba, wakitendeka “kukoonka,” ao kubombia bintu beelia byali mukusambilila?’ (Mat. 28:20) Musambi kunti wakita buyantanzi bukebuke, inzi apalile kuya waaluluka mu buikazi bwakue.

 ¹⁸ Ale kine muntu waasambiliile mu musita kampanda walangilila kakaniini ao talangiliile nangue kusambilila kuli kwamukwasia? Mona eezi aali: Musambi obe wakipua kitabu Biblia Inatufundisha (Bibilia Yatusambilizia), ao paange watendekele kale kusambilila kitabu Bakia Katika Upendo wa Mungu (Kusiala mu Ntono), inzi tanatendeke kuiza ku kulonghaana ata kumo​—aosie kuiza ku Kibukisio! Kabili lingi ali waanzia lisambililo juu ya nsaambu isili na mana. Mu eezi aali, upalile kulanziana nakue bila kumufiika kantu. *

19. Paange kunti wamulanda ki muntu amwenekele nangue tamwene lisambililo lya Bibilia kuya lyali lya mana, kabili upalile kutontonkania palua ki?

¹⁹ Kunti watendeka kumwipuzia eevi: ‘Ni kiki kiuli wamona nangue kikolele kukita eevi kwaluka Kasininkizia Wakue Yehova?’ Paange musambi kunti waasuka eevi: ‘Ntonene kusambilila Bibilia, inzi nsitonene kwaluka umo wa Bakasininkizia Bakue Yehova!’ Kine ezio i aali yakue kisia kusambilila kwa musita kampanda, kunti kyawaama kulekelasie kusambilila nakue. Mu nzila inge, musambi obe kunti wakubuila lya kuanza kintu kimulengiizie te kunti akite buyantanzi. Kwa mufuano, kunti waiunvua nangue taviinda kusimikila nsesi kwa nsesi. Kumana vyali waiunvua, kunti kwakulengia winike buino vya kumukwasia.

20. Lileembo lya Miilo 13:48 kunti lyatukwasia siani kumona kine kunti twatwalilila ni lisambililo ao abe?

²⁰ Ni kya bulanda paantu basambi bange bali nga Baisraeli ba mu nsiku yakue Ezekieli. Yehova waalandile eevi palwabo kupitila Ezekieli: ‘Mona! Weewe uli kuli beene nga lwimbo lwa ntono ya ba mwalalume ni mwanakazi, lwimbilue na lizui lyaweeme kabili lusaapilue kwa bufundi na kiombo kya miziki kya nkamba. Bakaba kunvua milandu yobe, inzi te kuli muntu wakakita kukoonkana ni milandu ezio.’ (Ezek. 33:32) Paange kunti twamona kyakolele kumulanda muntu nangue twakaba kulekela kusambilila nakue. Anzia evio, “musita usyeleko wakeepa.” (1 Bakor. 7:29) Paali pa kuzeezia musita twatungulula lisambililo lisiizi kukita buyantanzi, tupalile kukeba muntu elangiliile paswetele nangue ali ni ‘aali iweeme ya mutima palua bukose bwa loonse.’​—Soma Miilo 13:48.

21. Zimbula lileembo lya muaka wa 2020, kabili, juu ya ki lipalile?

²¹ Mu 2020, lileembo lya muaka lyakaba kutukwasia kutontonkania vya kwaluka bafundi mu miilo ya kukita basambi. Ibiikile mukati milandu yakue Yesu yaalandile musita lubaali bakolongheene ku lupili lwa mu Galilaya: “Ale, endo mwaye mukite basambi . . . , ni kubabatizia.”​—Mat. 28:19.