1-2. Ni kintu ki kya kupapia kyakitika mu busiku bwa Pentekoste muaka wa 33 Yesu wasyavyelue?

NI NSIKU ya Saba lukele-keele mu muzi wa Yerusalemu, muaka wa  33 Yesu wasyavyelue, busiku bwa Pentekoste. Basambi mia imo ni makumi abili (120) eevi, bakolonghana ku kiumba kya ku muulu kya nsesi. (Miilo 1:13-15; 2:1) Nsiku iniini ntaanzi ya paapo, Yesu waabalandile basambi basiale ku Yerusalemu eevi bakabe kupata bupe bwibeleele. (Miilo 1:4, 5) Kisia paapo kwaaluka ki?

² “Penka paalia kwaiza nsungu kufuma mu muulu, nga mwela ukata, uli mukutuuta.” Katuuto kaunvuika mu nsesi yonse. Kisia, “Ndimi ili nga mabeebe a mulilo” yamoneka pa muulu mitue ya basambi, ni bonse ‘baizuziiwa mupasi utakatiifu.’ (Miilo 2:2-4) Mu nzila ya kupapia, Yehova wamiina mupasi utakatiifu pa leelio libumba. (Miilo 1:8) Beene i baaluka ba kuanza kubiikua mafuta kupitila mupasi utakatiifu * ni kupeelua kiswapilo kya kuteeka pamo ni Yesu ku muulu.

3. Juu yaki bantu baali ku Pentekoste te baatwisikile nangue baabiikilue mafuta na mupasi utakatiifu?

³ Kabenge ni weewe waali pakati ka basambi baali bakolongheene mu keekio kiumba kya ku muulu bobo busiku, nga te walabilepo ata limo keekio kyakitikile. Kintu kipaleene ni lulimi lwa libeebe lya mulilo nga kyaizile kwikala pa muulu mutue obe kisia watendeka kulanda ndimi ilekenkeene! (Miilo 2:5-12)  Nga te waatendekele kwiipuzia kine wakisaakulua na mupasi utakatiifu ao abe. Eba, bantu bali babiikua mafuta bali bapokelela mukupo wabo mu nzila ya kupapia kabili basaakwilua pa musita umo mu buikazi bwabo? Ata. Twamana siani?

4. Eba, baalia baali babiikua mafuta mu miaka mia (100) ya ku ntendeko baali basaakulua pa musita umo mu buikazi bwabo? Londolola.

⁴ Tulondoluelenke musita muntu lwali wabiikua mufuta. Te Bakristu mia imo ni makumi abili (120) eevi bunkesie i baabiikilue mafuta mu busiku bwa Pentekoste, muaka wa 33 Yesu wasyavyelue. Buenka bobo busiku kisia paapo, bantu bange elufu itatu (3 000) eevi, ni beene bapokeleele mupasi waali walailue. Baabiikilue mafuta musita lubabatiziiziwe. (Miilo 2:37, 38, 41) Inzi miaka yakoonkelepo, te Bakristu bonse babiikilue mafuta baali babiikua mafuta musita wa lubatizio lwabo. Basamaria baabiikilue mafuta musita kampanda kisia lubatizio lwabo. (Miilo 8:14-17) Kabili, kubiikua mafuta kwakue Kornelio ni bantu ba mu nsesi yakue kwali kwaibeleele kakiine. Babiikilue mafuta ntaanzi tebanabatiziiwe.​—Miilo 10:44-48.

5. Nga vilandile 2 Bakorinto 1:21, 22, ni kiki kili kyakitika kine muntu wabiikua mafuta kupitila mupasi utakatiifu?

⁵ Loonu, tumone kili kyakitika musita muntu lwali wabiikua mafuta na mupasi utakatiifu. Ku ntendeko, bange bali babiikua mafuta kunti baandua kwitabila nangue Yehova wakibasaakula. Ni paange kunti batendeka kwiipuzia eevi: ‘Juu ya ki Leeza wansaakula neene?’ Paange bange tebaviinda kutontonkania evio. Ata kine muntu ali kwiunvua siani, mutumua Paulo walondolola vikili kyakitika ku bonse babiikilue mafuta. Walanda eevi: “Kisia kuzumina, mwaabiikilue kalangi * kupitila weene na mupasi utakatiifu waalailue, kalangi kasininkiziizie ntaanzi ka bupyani bwetu.” (Baef. 1:13, 14; bulondolozi buli pensina) Kansi Yehova ali wabombia mupasi wakue utakatiifu eevi kubasininkiziizia paswetele baabo Bakristu nangue wabasaakuile. Mu eezi nzila, mupasi utakatiifu, i “kalangi [kisininkizio ao bulayo buli bwasininkizia]”  kakubasininkiziizia nangue musita waiza, bakaba kwikala loonse ku muulu apana pa kyalo.​—Soma 2 Bakorinto 1:21, 22.

6. Pakunti Mukristu abiikilue mafuta apate kilambu kya kuya ku muulu, apalile kukita ki?

⁶ Kine Mukristu wabiikua mafuta, eba, ali kupata penka paalia kilambu kya kuya ku muulu? Ata. Inzi ali ni kisininkizio nangue asaakwilue kuya ku muulu. Anzia evio, apalile kulanguluka ozu musoko: “Mwe balupua, ikwinde saana eevi mukite mukupo weenu ni kusaakulua kwenu kuye kwali kwa kisinka ku mwe beene, paantu kine mwatwalilila kukita bebio bintu, temukandua ata kaniini.” (2 Pet. 1:10) Kansi, ata kine Mukristu asaakwilue, ao akuutilue kuya ku muulu, wakapata kilambu kyakue kinesie watwalilila kuya waali wa kisinka.​—Baf. 3:12-14; Baeb. 3:1; Nfy. 2:10.

7. Baalia babiikilue mafuta bali bamana siani nangue bakuutilue kuya ku muulu?

⁷ Inzi, muntu ali wamana siani nangue asaakwilue kuya ku muulu? Kyasuko kilisie paswetele mu milandu yakue Paulo ku Baroma “baakuutilue eevi baaluke batakatiifu.” Waabalandile eevi: “Te mwapokeleele mupasi wa buzia uli waleeta kabili muenzo, inzi mwapokeleele mupasi uli wamyalula baana, kupitila mupasi ozo tuli twakuuta na lizui likata: ‘Abba, Baba!’ Mupasi wine uli waleeta busininkizio pamo ni mupasi weetu nangue tuli baana bakue Leeza.” (Bar. 1:7; 8:15, 16) Pakaako, kupitila mupasi wakue utakatiifu, Leeza ali wabasininkiziizia paswetele nangue bakuutilue kuya ku muulu.​—1 Bat. 2:12.

8. Eba, lileembo lya 1 Yoane 2:20, 27 lyalangilila siani nangue Bakristu babiikilue mafuta te bakabiile kusininkiziiziwa na bange nangue bakuutilue?

⁸ Yehova ali wafumia kutwisika konse mu maano ni mu mitima ya baalia bakuutilue kuya ku muulu. (Soma 1 Yoane 2:20, 27.) Kisinka, Bakristu babiikilue mafuta bakabiile kusambiliziiwa na Yehova kupitila kilonghaano nga Bakristu bange bonse. Inzi, te bakabiile muntu abasininkiziizie nangue babiikilue mafuta. Yehova ali wabombia mupasi utakatiifu, maka akue akilile bukata mu myulu ni kyalo kyonse, eevi kubalangilila paswetele nangue babiikilue mafuta!

9. Nga vilandile Baefeso 1:18, kine muntu wabiikua mafuta, ni kiki kili kyaaluluka mu buikazi bwakue?

⁹ Leelo, babombi bengi bakue Leeza kunti bamona kyakolele kumana kili kyakitika ku muntu kine wabiikua mafuta na Leeza. Juu ya ki? Paantu te banabiikue mafuta. Leeza waabumbile bantu eevi bekale pa kyalo apana ku muulu. (Kut. 1:28; Malum. 37:29) Inzi Leeza asaakuile bantu bange eevi bakeekale ku muulu. Kansi, musita lwali wababiika mafuta ali waalulula kakiine kiswapilo kyabo ni kutontonkania kwabo, eevi bapooze maano ku bukose bwa ku muulu.​—Soma Baefeso 1:18.

10. ‘Kuvyalua lya bubili’ kuli na mana ki? (Mona ni bulondolozi buli pensina.)

¹⁰ Musita Bakristu lubali babiikua mafuta kupitila mupasi utakatiifu, bali ‘bavyalua lya bubili’ ao ‘bavyalua kufuma ku muulu.’ * Kabili Yesu waalandile nangue kikolele kisinka kulondoluela muntu asinabiikue mafuta kine kili kyaaluka siani musita wa ‘kuvyalua lya bubili,’ ao ‘kuvyalua kupitila mupasi.’​—Yoane 3:3-8; bulondolozi buli pensina.

11. Londolola bupilibuko buli bwaalukako mu kutontonkania musita muntu lwali wabiikua mafuta.

¹¹ Bakristu bali bakita bupilibuko ki mu kutontonkania kwabo musita ubabiikua mafuta?  Ntaanzi Yehova ababiike mafuta Bakristu babo, baali basekelela kiswapilo kya kwikala loonse pa kyalo. Baali bapembeleele kwa nkulu ikata musita Yehova lwali wakafumiapo bubiifi bonse ni kualula kyalo paradiso. Paange baali batontonkania vibakamupokelela muntu wa mu lupua lwabo ao kibuza waabo waafuile. Inzi kisia kubiikua mafuta, baatendekele kutontonkania mu namuna ibeleele. Juu ya ki? Te kulanda nangue baatendekele kutontonkania nangue kiswapilo kya kwikala pa kyalo te kili buino saana. Te kulanda nangue kutioka mutima ao kwema saana i kwabalengiizie bapilibule maano abo. Te baatendekele kwiunvua nangue kwikala loonse pa kyalo kwakaba kwatopiizie. Inzi, Yehova waabombiizie mupasi wakue utakatiifu eevi kupilibula namuna yabo ya kutontonkania ni kiswapilo kyabo kibaali basekelela.

12. Nga vilandile 1 Petro 1:3, 4, Bakristu babiikilue mafuta bali baiunvua siani palua kiswapilo kyabo?

¹² Muntu abiikilue mafuta kunti waiunvua nangue tapalile kupeelua leelio lisyuko likata. Inzi teezi kutwisika ata kaniini nangue Yehova amusaakuile. Mutima wakue uli wasinsimuka kwa nsaansa ni kusekelela musita lwali watontonkania palua kiswapilo kya kuya ku muulu.​—Soma 1 Petro 1:3, 4.

13. Baalia babiikilue mafuta bali bamona siani buikazi bwabo bwa pa kyalo?

¹³ Eba, i kulanda nangue olia abiikilue mafuta ali watona kufua? Mutumua Paulo waasuka keekio kiipuzio. Waapalaniizie mubili wabo wa bumuntu na liema. Waalandile eevi: “Kisinka, fwefue bali mu leeli liema tuli mukulila kwa misa, kabili tuli mukwemiiwa, paantu te tutonene kuvuula leeli liema, inzi tutonene kuvuala leelia linge, eevi bukose bumine keelia kili kyaviinda kufua.” (2 Bakor. 5:4) Baaba Bakristu te bavuumbiiziwe na bukose bwa pa kyalo kabili te batonene kulenga kufua. Inzi, bali basekelela buikazi kabili bali batona kupisia musita kila busiku bamubombela Yehova pamo ni lupua lwabo ni babibuza babo. Anzia beelia bibali bakita, lyonse bali baikala balangulukile kiswapilo kyabo kya bulumba kibali nakio mu musita uli waiza.​—1 Bakor. 15:53; 2 Pet. 1:4; 1 Yoane 3:2, 3; Nfy. 20:6.

14. Ni biki bisiizi kusininkizia nangue muntu abiikilue mafuta na mupasi utakatiifu?

¹⁴ Paange uli waiipuzia kine ni weewe ubiikilue mafuta na mupasi utakatiifu ao abe. Kine i evio, tontonkania palua beebi biipuzio: Eba, uli ni nkulu ikata ya kukita kutona kwakue Yehova? Eba, wimwene kuya waali saana ni mute mu miilo ya kusimikila? Eba, uli muntu ali watona saana kusambilila Mulandu Wakue Leeza ni kukeba kumana ‘bintu bikata byakue Leeza’? (1 Bakor. 2:10) Eba, uli wamona nangue Yehova ali wakupeela mpaalo ikata mu miilo ya kusimikila? Uli waiunvua mukati mobe nangue uli ni miilo ya kubakwasia bange basambilile palwakue Yehova? Eba, wakimona busininkizio bulangiliile nangue Yehova wakikukwasia mu nzila ingi imonekele buino mu buikazi bobe? Kine waasuka nangue een ku bebio biipuzio, eba, keekio kilangiliile nangue usaakwilue kuya ku muulu? Ata, te evio. Juu ya ki? Paantu babombi bonse bakue Leeza kunti baiunvua enka evio, ata kine babiikilue mafuta ao abe. Kabili kupitila mupasi wakue utakatiifu, Yehova kunti wapeela kila umo pa babombi bakue buenka bobo buviinde, ibe ali ni kiswapilo kya kuikala pa kyalo ao ku muulu. Pakaako, kine uli mukwiipuzia kine usaakwilue na mupasi utakatiifu ao abe, kwenka kooko kutwisika kunti kwalangilila nangue te ubiikilue mafuta. Baalia basaakwilue na Yehova te beezi kutwisika kine babiikilue mafuta ao abe! Bamanine buino nangue basaakwilue!

15. Twamana siani nangue te bonse baalia baapatile mupasi wakue Leeza i basaakwilue kuya ku muulu?

 ¹⁵ Mu Bibilia, muli mifuano ingi ilangiliile balalume baali ni kiketekelo baapokeleele mupasi utakatiifu; inzi, te baalukile na kiswapilo kya kuya kwikala ku muulu. Daudi waali watungulwilue na mupasi utakatiifu. (1 Sam. 16:13) Mupasi utakatiifu waamukwasiizie kumana bintu bikata palwakue Yehova, kabili waamutunguluile kuleemba seemu paleepale ya Bibilia. (Marko 12:36) Anzia evio, mutumua Petro waalandile nangue Daudi “taaile ku muulu.” (Miilo 2:34) Yoane mubatizi waali “waaizuziiziwe mupasi utakatiifu.” (Luka 1:13-16) Yesu waalandile nangue te kwali muntu mukulu kumupita Yoane, inzi kabili waalandile nangue Yoane taali pa baalia ba kuya mu Bukolo bwa ku muulu. (Mat. 11:10, 11) Yehova waabombiizie mupasi utakatiifu eevi kubapeela buviinde bwa kukita bintu bya kupapia, inzi taabombiizie ozo mupasi eevi kubasaakula bakeekale ku muulu. Eba, keekio kilangiliile nangue baali ni kiketekelo kiniini saana kuliko baalia basaakwilue kuya kuteeka ku muulu? Te evio. Keekio kilangiliilesie nangue Yehova wakaba kubatuntumuna eevi bakeekale mu Paradiso pa kyalo.​—Yoane 5:28, 29; Miilo 24:15.

16. Babombi bengi bakue Leeza leenu bapembeleele kilambu ki?

¹⁶ Babombi bengi bakue Leeza bali pa kyalo leenu, te bali na kiswapilo kya kuya kwikala ku muulu. Bapembeleele ni nkulu ikata kwikala pa kyalo musita ubakateekua na Bukolo Bwakue Leeza, nga evelia vipembeele ba Abrahamu, Sara, Daudi, Yoane mubatizi ni bange balalume ni banakazi ba musita wa kale.​—Baeb. 11:10.

17. Twakaba kwasuka biipuzio ki mu lyasi likoonkelepo?

¹⁷ Eno nsiku, pakati keetu kukilisie ni bantu babiikilue mafuta, ni keekio kunti kyalengia twatendeka kwiipuzia biipuzio. (Nfy. 12:17) Kwa mufuano, bantu babiikilue mafuta bapalile kwimona siani? Kine umo mu libumba lyenu watendeka kulia mukate ni kumina divai ku Kibukisio, upalile kumukitila siani? Eba, ale kine mpendua ya baalia babiikilue mafuta yatwalilila kuvula? Eba, upalile kutendeka kuvulunghana mu maano juu ya ezio mpendua? Twakaba kwasuka bebio biipuzio mu lyasi likoonkelepo.