1. Yehova atupeele buntungua bwa kukita ki?

 YEHOVA atupeele buntungua ao uuru wa kupingula vya kuikala mu buikazi bwetu. Ali watusambilizia vya kukita bupinguzi buweeme kabili ali watukwasia kufikilizia mipaango yeetu ili yamusaansamusia. (Malum. 119:173) Musita utuli twakila kubombia mulangue uli mu Mulandu wakue Leeza, tuli twakila kualuka ni buviinde bwa kukita bupinguzi buweeme.​—Baeb. 5:14.

2. Kunti twasaanga buavia ki kisia kukuata bupinguzi?

² Ata kine twakuata bupinguzi buweeme, paange kunti kyakola kupwililila keelia kitwatendekele kukita. Tumone mifuano paleepale: Lupua umo mulumendo wapanga kusoma Bibilia yonse. Ku muanzo watendekasie buino, kisia, walekela. Nkazi umo wapanga kwaluka painia wa loonse, inzi watualilila kualulula busiku bwa kutendekelapo. Kabungue kamo ka bakote kapingula kutendeka miilo ya kwendela liingi nkondolo mu libumba, inzi miezi iingi yapita bila kukita evio. Eezi aali ipuseene inzi kuli kintu kimo kipaleene. Bonse bakikuata bupinguzi inzi bila kufikilizia beelia bibakipaanga kukita. Bakristu ba mu miaka mia ya ku ntendeko ba mu Korinto ni beene basaangile buavia nga bobo. Tumone bintu bituli kusambilila kuli beene.

3. Bakorinto baapangile kukita ki, inzi ni kiki kyakitikile?

³ Mu muaka wa 55 eevi Yesu wasyavielue, Bakorinto bakuete bupinguzi bwa mana. Bapatile mpunda nangue balupua ba ku Yerusalemu ni ku Yudea bali mu buavia ni bupabi, kabili  baunvuile nangue mabumba aange ali mukulongia nfalanga eevi kubakwasia. Bakorinto baali ni mutima waweeme kabili wa kupeelana, baatonene ni beene kukwasia balupua baali mu buavia. Pakaako, bamwipuziizie mutumua Paulo kine kunti bakwasia siani. Watumine malaizio ku libumba ni kumusaakula Tito emanine miilo ya kulongia. (1 Bakor. 16:1; 2 Bakor. 8:6) Kisia miezi iniini, Paulo wapatile mpunda nangue Bakorinto te balongiizie kabili. Pakaako bupe bwabo bwaandile kufumiiwa pa musita upalile eevi butwalue ku Yerusalemu pamo ni bulongio bwa mabumba aange.​—2 Bakor. 9:4, 5.

4. Nga vilandile 2 Bakorinto 8:7, 10, 11, Paulo wabakinkiziizie Bakorinto bakite ki?

⁴ Bakorinto baakuete bupinguzi bwaweeme ni Paulo wabatasiizie paantu baali ni kiketekelo kikata kabili baali batonene kwaluka bantu bali bapeelana. Inzi, wabakinkiziizie kupwililila kukita keelia kibatendekele. (Soma 2 Bakorinto 8:7, 10, 11.) Aali yabafikiile, yatusambilizia nangue atasie Bakristu bali ni kiketekelo kunti baandua kufikilizia beelia bibapaangile.

5. Ni biipuzio ki bituli kwasuka?

⁵ Nga Bakorinto, kunti twamona kyakolele kufikilizia beelia bitwapaangile kukita. Juu ya ki? Paantu te tupwililikile, kunti twaalulula. Ao paange kunti kwakitika kintu kitusyakiba twaswapiile kukitika kyakilengia kikole kukita nga vitwakiba twapaangile. (Kas. 9:11; Bar. 7:18) Tupalile kukita siani kine twakeba kutoosia bupinguzi butwakitile ni kupingula kine kunti twaalulula? Kabili kunti twasininkizia siani nangue twapua keelia kitwatendekele kukita?

6. Juu ya ki kunti twaalulula bupinguzi bwetu?

⁶ Kuli bupinguzi paleepale bwa mana butusipalile kwalulula ata kaniini. Kwa mufuano, kutwalilila kumubombela Yehova, kusiala twali ba kisinka kuli mulume ao mukazi weetu. (Mat. 16:24; 19:6) Kakiine buunge bupinguzi kunti bwapala kwalulula. Juu ya ki? Paantu aali ili yapilibuka. Ni biki bili kutukwasia kukita bupinguzi bukilile kuwaama?

7. Tupalile kupepa palua ki, kabili juu ya ki?

⁷ Pepa eevi upate mulangue. Yehova wamutunguluile Yakobo aleembe eevi: ‘Kine umo pakati keenu wabulua maano ao mulangue, amulombe Leeza aliwapeelana maano, pantu Leeza aliwapeela bantu bonse wawamiinue.’ (Yak. 1:5) Mu nzila kampanda fwe bonse ‘tubuliilue maano ao mulangue.’ Kansi, muloombe Yehova akukwasie musita uwakuata bupinguzi ni musita uwakeba kupilibula bupinguzi buwakuete. Yehova wakaba kukukwasia kukuata bupinguzi buweeme.

8. Ni kiki kitupalile kukita ntaanzi ya kukuata bupinguzi?

⁸ Kebulula wapozeleko ni maano. Keba mu Mulandu Wakue Leeza, soma bitabu bifumiiziwe na kuteania kwakue Yehova, kabili loomba masoke ku bantu bauswapiile. (Tus Maf. 20:18) Kukita evio ni kwa mana ntaanzi ya kupingula kwalulula miilo, kukuuka, ao kusaakula mosomo apalile a kukukwasia mu miilo yakue Yehova.

9. Kunti twanonkelamo siani kine fwe beene tuli ba kisinka?

⁹ Tontonkania juu ya ki wakipingula evio. Yehova ali wakeba sababu yakilenga tukite kantu kampanda. (Tus Maf. 16:2) Atonene tuye twali ba kisinka mu bintu byonse. Kansi, musita utwakuata bupinguzi, tupalile kuya twali ba kisinka fwe beene ni ku baange palua sababu yakitulenga kukuata bupinguzi. Kine te tuli ba kisinka kakiine, kunti twaandua kufikilizia bupinguzi bwetu. Kwa mufuano, lupua mulumendo kunti wapaanga kwaluka  painia wa loonse. Inzi, kisia musita, waandua kwenezia nsa iloombelue ku ba painia, kabili takimuene nsaansa ili yafuma mu ezio miilo. Kunti waya wamuene nangue sababu ikata yakimulengia kwaluka painia yakiba ya kumusaansamusia Yehova. Kansi, paange sababu iine yaalisie ya kubasaansamusia baviazi bakue ni bantu baange.

10. Ni kiki kili kyamulenga muntu apilibuke?

¹⁰ Tontonkania palua musambi wa Bibilia wapingula kulekela kupeepa. Ku ntendeko, waviinda kulekela kupeepa mu mulungu umo ao ibili, inzi watendeka kabili kupeepa. Kupuako, waviindile kulekela kupeepa! Kumutona Yehova ni kukeba kumusaansamusia, i byakimukwasia kuluisia mibeele ezio.​—Bakol. 1:10; 3:23.

11. Juu ya ki upalile kuya wali ni mipaango imanikile buino?

¹¹ Mipaango yobe iye yamanikile buino. Kine mipaango yobe imanikile buino kunti kyaleenga kuifikilizia. Kwa mufuano, kunti wapaanga kusoma Bibilia liingi. Inzi, kine ntantiko yobe teimanikile buino, teukaba kufikilizia mupaango obe. * Bakote mu libumba kunti bapaanga kwendela nkondolo liingi, inzi kisia musita kupita, baandua kufikilizia mipaango yabo. Eevi baviinde, bapalile kwiipuzia biipuzio nga beebi: “Eba, twakipaanga buino ntantiko ya balupua ni bankazi batupalile kwendela? Eba, twakipaanga musita umanikile wa kubendela?”

12. Paange kunti twakita ki, kabili juu ya ki?

¹² Mona bintu mu nzila ipalile ao ya kisinka. Te kuli muntu pakati keetu ali ni musita, bunoonsi ao maka a kukita kila kantu konse kaatonene. Kansi, upalile kumona bintu mu nzila ipalile kabili watekameenesie. Kine kyapala, kunti waalulula bupinguzi buwamona nangue teuviinda kufikilizia. (Kas. 3:6) Tulande nangue, wapituluka mu bupinguzi buwakuete, wabwalulula kine kyapala, ni kumona nangue wakaba kubufikilizia. Papa pensina pali nzila isaano (5) ili kukukwasia kupua keelia kiwatendeka.

13. Kunti wapata siani maka aukabiile eevi ufikilizie mipaango yobe?

¹³ Pepa upate maka. Leeza kunti wakupeela “maka a kukita” ni kufikilizia mipaango yobe. (Baf. 2:13, NWT) Kansi muloombe Yehova mupasi wakue utakatiifu ukupeele maka aukebele. Twalilila kupepa anzia kine wamona nangue lipepo lyobe te lyaasukua. Nga vyalandile Yesu: ‘Lomba ni we uli kupeelua [mupasi utakatiifu].’​—Luka 11:9, 13.

14. Lifunde lili mu Tuswalo ni Mafunde 21:5 kunti lyakukwasia siani kufikilizia mipaango yobe?

¹⁴ Tantika. (Soma Tuswalo ni Mafunde 21:5.) Eevi uviinde kufikilizia mipaango yobe, upalile kupaanga buino ntantiko yobe. Kisia upalile kukita nga vili ntantiko yobe. Enka evio, kine wakuata bupinguzi, paanga nzila yamanikile buino ya kukukwasia kufikilizia bupinguzi ao mupaango obe. Kukasania miilo yobe tuniini-tuniini kunti kwakukwasia utwalilile kuibomba walengeelue. Paulo wabakinkiziizie Bakorinto kuteeka kaniini-kaniini “mu busiku bwa kuanza bwa kila mulungu” eevi bakalongie, inzi te kunti bakatendeke kulongia busiku bwali wakafika. (1 Bakor. 16:2, NWT) Kabili, kukasania miilo tuniini-tuniini kunti kwa kukwasia te kunti utioke mutima.

15. Kisia kupaanga ntantiko ni kiki kitupalile kukita?

¹⁵ Ntantiko iweeme ileembelue kunti ya kukwasia kutendeka kukita miilo iupangile. (1 Bakor. 14:40) Pakaako, kabungue ka  bakote kali kasokua kusaakula mukote umo ali kuleemba bupinguzi bonse buli kukwatua, mukote wa kufikilizia bobo bupinguzi, ni musita upalile kubufikilizia. Bakote bali bakonka aza malaizio bali balengelua kufikilizia mipaango yabo. (1 Bakor. 9:26) Kunti wakita enka evio ni mu miilo iupangile kukita. Kwa mufuano, kunti wapaanga ntantiko ya bintu biutengele kukita kila busiku, ni kuleemba keelia kiwakaba kutendekelapo ku muanzo wa ntantiko. Kukita evio tekukaba kukukwasiasie kupua kukita miilo, inzi kubomba miilo iingi mu musita uniini.

16. Kipalile ukite ki eevi uviinde kufikilizia mipaango yobe, kabili Baroma 12:11 yakwasia siani bulanzi bobo?

¹⁶ Ikwinde eevi ufikilizie. Eevi kukonka ntantiko yobe ni kufikilizia mipaango yobe, ilombele kwikuinda. (Soma Baroma 12:11.) Paulo wamuanine Timoteo ‘akite maka’ weene muine ni ‘kutwalilila’ kuya waali kasambilizia aweeme. Ozu musoko kunti twaubombia ni mu mipaango inge ya kimupasi.​—1 Tim. 4:13, 16.

17. Baefeso 5:15, 16 Kunti yatukwasia siani kufikilizia mipaango yeetu?

¹⁷ Bombia buino musita obe. (Soma Baefeso 5:15, 16.) Saakula musita wa kukita keelia kiwakipaanga kabili te kwalulula musita ozo. Te kupembelela mpaka ukapate musita upwililikile. Teukamonekapo ata limo. (Kas. 11:4) Te kulekelela tuntu tusili twa mana tukupuile musita ni maka obe a kukita bintu bya mana. (Baf. 1:10) Kine kyakitika, saakula musita usilipo tuntu tunge twa kukita twakupuulula miilo yobe. Babuileko ni baange nangue uli ni miilo ya kukita isipalile kuvulunganiiwa. Languluka kuzimia telefone yobe ni kusoma mpunda ibakutumina ao kulanda ni bange ku Enternete musita unge. *

18-19. Ni kiki kili kukukwasia te kunti ulekele kufikilizia bupinguzi buweeme musita uwasaanga kintu kya kukubwezia ku nyuma?

¹⁸ Tontonkania palua bintu byakaba kufuminamo. Bintu byakaba kufuma mu bupinguzi bobe, bili nga kufika koolia kuubukiile. Kine utonene kakiine kufika kuubukiile, uli kutwalililasie kuya ata kine kiloombele walulule nzila eevi ufike ku waaya. Enka evio, kine twatontonkania bintu byakafuma mu bupinguzi bwetu, tetuviinda kulekela lubilo-lubilo musita utwasaanga bintu bya kutuvulungania.​—Bag. 6:9.

¹⁹ Kukuata bupinguzi buweeme ni kubufikilizia kukolele. Inzi Yehova kunti wakupeela maano ni maka aukabiile eevi kufikilizia keelia kiwatendeka.