1-2. (a) Ni kiki kili kyatukwasia kutwalilila kusipikizia maavia kila busiku? Londolola. (b) Tuli kulondoluela ki mu leeli lyasi?

 WAEZIIZIE kale kulanguluka buavia buwasaakeene naabo ni kutontonkania eevi, “Manine nangue nga nsyaviindile kusipikizia ku maka aane ne muine?” Beengi pakati ketu baatontonkaniizie kale evio. Paange ni weewe walandile evio kisia kusipikizia buluele bukata ao kufuilua na muntu uutonene. Musita luuli watontonkania palua bobo buavia, uli wainika nangue waaviindile kusipikizia kila busiku , paantusie mupasi wakue Yehova wakupeele “maka akata [ao akilile maka onse].”​—2 Bakor. 4:7-9.

² Ni fwefue tukabiile mupasi utakatiifu utukwasie kusipikizia mibeele ibiipile ili mu keenu kyalo. (1 Yoane 5:19) Kusonseka pakaako, tupalile kuya twali ni maka eevi tuviinde kuluana na “maka a mipasi ibi.” (Baef. 6:12) Mu leeli lyasi, tuli kumona nzila ibili ili yatukwasiiziamo mupasi utakatiifu kusipikizia maavia aza onse. Kabili, tuli kumona kine kunti twakita ki eevi tunonkelemo saana mu mupasi utakatiifu.

3. Yehova ali watukwasia mu nzila ki eevi tusipikizie maavia?

³ Mupasi utakatiifu wakue Yehova uli watukwasia mu kutupeela maka ao buviinde bwa kufikilizia bifulo byetu anzia maavia. Mutumua Paulo waiunvuile kuya waali ni buviinde bwa kutwalilila kumubombela Yehova, anzia maavia akue, paantu waali waswapiile “maka akua Kristu.” (2 Bakor. 12:9) Musita wa lwendo lwakue lwa bubili lwa bumisionere, Paulo tapozelesie musita wakue wingi mu miilo ya kusimikila, inzi wabombele ni miilo ya kumukwasia kimubili. Waaikeele ku Korinto mu nsesi ya ba Akila ni Prisila. Baali batengenezia maema ao mateenti. Mu nsiku kampanda, Paulo watengeneziizie mateenti pamo naabo paantu ni weene abaanga wamanine. (Miil Bat. 18:1-4) Mupasi utakatiifu wamupeele Paulo  maka a kubomba ni kufikilizia miilo yakue yonse ibili: ya kimubili ni ya kusimikila.

4. Nga vyalanda 2 Bakorinto 12:7b-9, Paulo waali ni buavia ki?

⁴ Soma 2 Bakorinto 12:7b-9. Mu leeli lileembo, Paulo wakebele kulanda ki musita lualandile nangue waali ni “munga mu mubili”? Kine watunkua na munga mu mubili, kunti waunvua misa ikata saana. Mu ezio nzila, Paulo abaanga walanda nangue waasaakeene ni buavia bukata bwakue bunke. Walandile nangue, buavia bwakue bwali nga ‘malaika wakue Sataana’ waali watwalilila ‘kumuuma makoofi.’ Paange, te Sataana ni bibanda byakue bamuleteele Paulo maavia abaanga aali nga munga wingiile mu mubili. Inzi, eezi mipasi ibi luyamuene “munga” wakue Paulo, paange yaeziizie kulengia buavia bwakue bukile kubiipa. Keekio, kyaali nga muntu ali mukutunkilila munga. Eba, Paulo wakitile siani?

5. Yehova waasukile siani mapepo akue Paulo?

⁵ Ku ntendeko, Paulo waali wakebele Yehova amufumie “munga.” Walandile eevi: “Lyonse litatu naali namwana Mulopue [Yehova] antunkule.” Kabili, anzia mapepo akue Paulo, munga mu mubili wakue te wafumine. Eba, ni kulanda nangue Yehova taasukile mapepo akue Paulo? Bila, te evio. Waasukile. Yehova tapwisiizie buavia bwakue Paulo, inzi wamupeele maka akusipikizia. Yehova walandile eevi: “Maka ane aliamoneka muli wewe luulimunake.” (2 Bakor. 12:8, 9) Kabili, kupitila kukwasiiwa na Leeza, Paulo wasuungile nsaansa yakue ni mutende wa mukati.​—Baf. 4:4-7.

6. (a) Yehova kunti waasuka siani mapepo etu? (b) Ni bulayo ki buli mu lileembo lili mu leeli lifungu bwakupeela maka?

⁶ Eba, nga Paulo, ni weewe wamuloombele kale Yehova akufumie mu buavia? Paange waapepele liingi wapapaata saana kufuma ku mutima palua buavia bobe. Inzi te bwapuile ao paange bwakilile kwavia. Keekio kyakuleeteele masiaka nangue paange Yehova wakusulile? Kine i vikili, languluka mufuano wakue Paulo. Pakuba Yehova waasukile mapepo akue, kisinka Wakaba kwasuka mapepo obe! Paange Yehova tapwisia buavia. Inzi, kupitila mupasi wakue utakatiifu, wakaba kukupeela maka aukebele eevi usipikizie buavia. (Malum. 61:3, 4) Kunti ‘wapozua pansi’ inzi Yehova takaba kukusia.​—2 Bakor. 4:8, 9; Baf. 4:13.

7-8. (a) Mupasi utakatiifu upaleene siani ni mwela? (b) Petro walondolola siani vya bomba mupasi utakatiifu?

⁷ Mupasi utakatiifu uli watukwasia kabili mu nzila ki iinge? Kunti twapalania mupasi utakatiifu ni mwela. Buato kunti bwabombia mwela uli mukupuupa walungikile buino eevi kufika buino ku nkende ipalile, anzia kine lyezi lilimo mwela ukata. Evyo vyenka, mupasi utakatiifu uli watukwasia tutwalilile kumubombela Yehova anzia maavia mpaka tukeengile mu kyalo kya leenu kitwalailue na Leeza.

⁸ Pakuba mutumua Petro waali mulobi, waali wamanine buino palua mwilo wa mu menda. Paange i kyalengele, musita luaali walondoluela palua nzila yabombelamo mupasi utakakatiifu, wabombiizie mulandu ukebele kupalana ni mwilo wa mu menda. Waleembele: “Bukabika te bwaletelue musita uli onse mu kutona kwa bantu, inzi bantu balandile byaafumine kuli Leeza batungulwilue na mupasi utakatiifu.” Mulandu wa kigiriki upilibuile “batungulwilue,” mulandu kwa mulandu ulaangiliile nangue “baalombwelue; baatwelue.”​—2 Pet. 1:21, NWT; Bulondolozi buli pensina.

9. Petro wakebele bantu batontonkanie ki musita lualeembele nangue baali “baalombwelue” na mupasi utakatiifu?

⁹ Petro waakebele kulanda ki musita luabombia mulandu “baalombwelue”? Luka, kaleemba wa Miilo ya Batumua, wabombiizie mulandu upaleene ni ozu wa Kigiriki, eevi kulondoluela palua buato bwaali “bwatintilue” na mwela. (Miil Bat. 27:15, NWT) Kansi musita Petro  lualeembele nangue bakaleemba ba Bibilia baali “balombwelue,” waabombiizie “kimpalania kya mu menda kya kupapia,” nga vyalanda kasambilila umo wa Bibilia. Petro waali walanda nangue nga evelia mwela viuli watinta buato mpaka kufika ku nkende ipalile, mupasi utakatiifu watunguluile bakaleemba ba Bibilia kufikilizia miilo yaabo. Olia kasambilila wa Bibilia walanda kabili eevi: “Bakaleemba ba Bibilia baali nga maato atwekele mataanga.” Yehova wakitile kintu kyaali wakebele kukita. Waaletele “mwela” ao mupasi utakatiifu. Bakaleemba ba Bibilia baabombele miilo ibapeelue bakite. Babombele bapateene kupitila butunguluzi bwa mupasi.

10-11. Eevi tuye twali ni bukisinka nangue mupasi utakatiifu uli mukututungulula, tupalile kukita bintu ki bibili? Leeta mufuano.

¹⁰ Kisinka, musita wa kutungulula bantu na mupasi eevi baleembe bitabu bya Bibilia, wapitile kale. Anzia evio, Yehova atwaliliile kubombia mupasi wakue utakatiifu eevi kubakwasia bantu bakue. Yehova atwaliliile kubomba seemu yakue ya miilo. Kunti twainika siani nangue kisinka mupasi utakatiifu uli mukututungulula? Tupalile kwinika nangue tutwaliliile kubomba seemu yeetu ya miilo. Tuli twakita siani evio?

¹¹ Tontonkanianke ozu mufuano. Pakunti olia ali mukusoza akwasiiwe na mwela, apalile kukita bintu bibili. Kya mambo, apalile kutuala buato koolia kwapuupila mwela. Kabili, buato tebuviinda kuya ku ntaanzi kine mwine wa buato asiele ku ntala ao ku museenga, kule ni koolia kuli mukupitila mwela. Kya bubili, apalile kuleenga kutweeka ni kukunzulula saana litanga. Ni kisinka nangue, anzia mwela uli mukupuupa, buato bwakue buli kuya ku ntaanzi kinesie litanga lyapuupua na mwela. Enka evio, twakaba kusipikizia mu miilo yakue Yehova kinesie mupasi utakatiifu watukwasia. Eevi tukwasiiwe na mupasi utakatiifu, tupalile kukita bintu bibili. Kya mambo, tupalile kwibiika bila kukokola mu nzila ili ya pitilamo mupasi wakue Leeza kupitila kubomba miilo ili yatungululua na ozo mupasi. Kya bubili, tupalile “kutweka saana litanga lyetu” kwa kwipeela saana mu miilo kukonkana ni buviinde bwetu. (Malum. 119:32) Kine twabombia eezi nzila, mupasi utakatiifu wakaba kutukinkizia kuya ku ntaanzi kupita mu mabiimbi a maavia ni baalia bali batupiinga.  Kabili wakaba kutukwasia kusipikizia ni kooku twali ni kisinka mu lubilo lwetu mpaka tukabe kwingila mu kyalo kya leenu kyakue Leeza.

12. Loonu, tuli kumona ki?

¹² Kufikiila paanu, twalondoluela palua nzila ibili ituli twakwasiiziwamo na mupasi utakatiifu. Mupasi utakatiifu uli watupeela maka kabili uli watukwasia kwimana sinta musita utwasaakaana ni maavia. Mupasi utakatiifu uli watutwala ku ntaanzi kabili uli watukwasia tutwalilile kuya twali mu nzila ya bukose bwa loonse. Loonu, tuli kumona bintu bina bitupalile kukita eevi tunonkelemo saana mu mupasi utakatiifu.

13. Nga vilandile 2 Timoteo 3:16, 17, maleembo kunti atukwasia tukite ki, inzi tupalilenke kukita ki?

¹³ Kya mambo, sambilila Mulandu Wakue Leeza. (Soma 2 Timoteo 3:16, 17 NWT.) Mulandu wa Kigiriki upilibuile “atungulwilue na mupasi wakue Leeza,” mu mulandu kwa mulandu, uli na mana “apuzilwemo na Leeza.” Yehova wabombiizie mupasi wakue utakatiifu eevi “kupuza” ao kubiika matontonkanio akue mu maano a bakaleemba ba Bibilia. Musita utuli twasoma Bibilia ni kutontonkania palua beelia bitwasoma, mafunde akue Leeza ali aingila mu maano ni mu mutima weetu. Azo matontonkanio apuzilue ali atulengia tukite bupilibuko mu buikazi bwetu eevi tumusaansamusie Yehova. (Baeb. 4:12) Eevi tunonkelemo saana mu mupasi utakatiifu, tupalile kwisaakwila musita wa kusambilila Bibilia kwa mute ni kutontonkania saana palua beelia bitwasoma. Kusiali, Mulandu Wakue Leeza wakaba kutukwasia mu byonse bituli twalanda ni kukita.

14. (a) Juu ya ki kunti twalanda nangue “mwela uli wapuupa” ku kulonghaana kwetu kwa bwina Kristu? (b) Kunti twatuilizia siani kulonghaana twali ni “matanga akunzulwilue”?

¹⁴ Kya bubili, kumupupa Leeza lwa pamo. (Malum. 22:22) Mu nzila inge, ku kulonghaana kwetu ni ku nkende kuli “kwapuupila mwela” paantu i kwasaangua mupasi wakue Yehova. (Nfy. 2:29) Juu ya ki kunti twalanda evio? Paantu, musita utwasaakaana ku kulonghaana pamo ni balupua ni bankazi, tuli twaloomba mupasi utakatiifu, tuli twaimba nghiimbo ya Bukolo imaniine Mulandu Wakue Leeza, kabili tuli twatuilizia mafunde kufuma mu Bibilia ali alandua na balupua baasaakwilue na mupasi utakatiifu. Kabili, mupasi utakatiifu uli wabakwasia bankazi kuteania ni kufikilizia seemu yabo. Inzi, eevi tunonkelemo saana mu mupasi utakatiifu, tupalile kuteania byasuko ni kuya kwasuka ku kulonghaana. Kine twakita evio, musita utuli ku kulonghaana, tetukokola kunonkelamo mu mupasi utakatiifu nga evelia maato ali ni “matanga akunzulwilue.”

15. Mupasi wakue Leeza uli watukwasia siani mu miilo ya kusimikila?

¹⁵ Kya butatu, simikila. Musita utuli twabombia Bibilia mu miilo ya kusimikila ni kusambilizia, tuli twalekelela mupasi utakatiifu utukwasie mu miilo yeetu ya kusimikila. (Bar. 15:18, 19) Pakunti unonkelemo saana mu mupasi utakatiifu, upalile kuya waali ni mute mu miilo ya kusimikila ni kuya wabombia Bibilia musita onse ukyaviindikana. Nzila imo ya kukukwasia uye waali ni bulondolozi bwaweeme ni bantu mu kusimikila ni kubombia bulondolozi bwa kumwenako bwa miilo ya kusimikila buli mu Utumishi na Maisha ya Mukristo Buku la Mukutano (Libuku lya Kulonghaana kwa Miilo ni Buikazi bwa Mukristu).

16. Ni nzila ki ikilile kuleenga ya kupatilamo mupasi utakatiifu?

¹⁶ Kya buna, pepa kuli Yehova. (Mat. 7:7-11; Luka 11:13) Nzila ikilile kuleenga pa kupata mupasi utakatiifu ni kumuloomba Yehova mu lipepo. Te kuli kintu kili kuviinda kwanzia lipepo lyetu limufikile Yehova aosie kukingilila bupe buweeme bwa mupasi wakue Leeza te kunti butufikile. Mupasi utakatiifu kunti watukwasia atasie kine tuli ku boloko. Sataana taviinda ata kaniini kutwanzia kupokelela mupasi utakatiifu. (Yak. 1:17) Tupalile kupepa siani eevi tunonkelemo saana mu mupasi utakatiifu? Pakunti  twasuke, tusambililenke palua lipepo lya mufuano lili lyasaanguasie mu Nsimiko (Injili) yakue Luka. *

17. Mufuano wakue Yesu ulandilue mu Luka 11:5-9, 13, watusambilizia ki palua lipepo?

¹⁷ Soma Luka 11:5-9, 13 NWT. Mufuano wakue Yesu ulaangiliile vitupalile kuloomba mupasi utakatiifu. Mu ozu mufuano, ozo muntu wapatile keelia kiabanga wakeba “paantu watwaliliile kuloomba wakinkimeene.” Tabanga waali na mwenzo wa kuloomba anzia ibaanga yasiali nyuma busiku bwasyailile. Yesu walandile nangue ozu mufuano wasambilizia ki palua kupepa? Walandile eevi: “Twalilile kuloomba, kabili mwakaba kupeelua; twalilile kukeba, kabili mwakaba kupata; twalilile kukookoosia, kabili mwakaba kwizwilua.” Kansi, ozu mufuano watusambilizia ki? Pakunti tupate mupasi utakatiifu, tupalile kutwalilila kupepa twakinkimeene.

18. Kukonkana ni mufuano wakue Yesu, juu ya ki tuli ni bukisinka nangue Yehova wakaba kutupeela mupasi wakue utakatiifu?

¹⁸ Mufuano wakue Yesu watukwasia kabili kumona juu ya ki Yehova wakaba kutupeela mupasi utakatiifu. Mwalalume wa mu ozu mufuano wakebele kumukitila buino mweni wakue. Waiunvuile nangue apalile kumukwasia kyakulia mweni wakue wamwizilanga musita wa busiku inzi taali wakwete kantu ka kumupeela. Yesu walanda nangue mwalalume waamupeele mweni wakue mukaate paantu waatwaliliile kumuloomba. Yesu waakebele kusambilizia ki? Kine muntu asipwililikile ali wamupeela mu kwitonena mwinakue ali watwalilila kumuloomba, kansi tuli kuya twali ni kisinka nangue Baba weetu, aweeme wa ku muulu, ali wakwasia baalia bali bamuloomba mupasi utakatiifu! Kansi, tuli kuya twali ni kisinka nangue Yehova wakaba kwasuka mapepo etu kine twamuloomba mupasi utakatiifu.​—Malum. 10:17; 66:19.

19. Juu ya ki kunti twaya twali ni bukisinka nangue twakaba kuviinda kusipikizia maavia?

¹⁹ Kunti twaya twali ni bukisinka nangue anzia Sataana takaba kulekela kutuluisia, twakaba kuviinda kusipikizia. Juu ya ki? Paantu mupasi utakatiifu uli watukwasia mu nzila ibili. Ya mambo, uli watupeela maka atukabiile eevi tusipikizie maavia. Kya bubili, mupasi utakatiifu ni maka ali “aizuzia matanga etu,” eevi kutukwasia tutwalilile kumubombela Yehova mpaka tukabe kwingila mu kyalo kya leenu. Kansi, tupingule kutwalilila kunonkelamo saana mu mupasi utakatiifu!