1-2. (a) Ni musita ki asa utuli twalanguluka muntu weetu ututonene waafuile? (b) Ni kiki kyaatendekeziizie Yesu mu nsita ya busiku ntaanzi ya kufua kwakue?

ANZIA kine kunti papita musita waleepele kisia batonua betu kufua, tuli twasaanguasie twabalangulukile. Tuli twabalanguluka saana kine yafika nsiku ibaafuiliilepo.

² Kila muaka, tuli twasaangua pakati ka mamilioni a bantu mu kyalo kyonse bali bakolonghana eevi kulanguluka lufu lwa muntu umo ututonene saana, i kulanda Yesu Kristu. (1 Pet. 1:8) Tuli twakolonghana juu ya kulanguluka lufu lwa muntu umo waafumiizie bukose bwakue bwaluke kilubula mulandu eevi kutupususia kufuma mu lizaambi ni kulufu. (Mat. 20:28) Kakiine, Yesu waatonene basambi bakue baye balanguluka lufu lwakue. Mu nsita ya busiku ntaanzi ya kufua kwakue, waatendekeziizie kyakulia kya lyungulo, kisia waalandile eevi: “Mukabe mwakita evio vyenka pa kundanguluka.” *​—Luk. 22:19.

3. Tuli kulondoluela ki mu leeli lyasi?

³ Bantu baniini bali basaangua ku Kibukisio kya lufu lwakue Yesu, bali basaangua bali ni kiswapilo kya kuya ku muulu. Inzi, ni mamilioni a bantu bali ni kiswapilo kya kwikala pa kyalo, ni beene bali basaanguako. Mu leeli lyasi tuli kumona juu ya ki bantu ba mu bikundi byonse bibili bali basaangua ku Kibukisio kya kila muaka. Kabili, tuli kumona vituli twanoonkelamo kupitila kusaanguako. Kansi, tumonenke bintu bili byalengia baalia babiikilue mafuta baye basaanguako ku Kibukisio.

4. Juu ya ki baalia babiikilue mafuta i bapalilesie kulia mukate ni kumina divai ku Kibukisio?

⁴ Kila muaka, baalia bantu babiikilue mafuta bali basaangua ku Kibukisio, bali balia mukate ni kumina divai. Juu ya ki beene i bapalile kulia mukate ni kumina divai? Eevi tupate kyasuko, tutoosie beelia byaakitikile mu nsita ya busiku bwa kupeleezia bwikazi bwakue Yesu pa kyalo. Kisia kyakulia kya Pasaka, Yesu waatendekeziizie keelia kili kyakuutua nangue Kyakulia kya Lyungulo Kyakue Mulopue. Waabapeele batumua bakue 11 ba kisinka mukate ni divai, kisia waabalandile balie ni kumina. Yesu waalondoluele naabo palua bipingo bibili, ao kunvuana, i kulanda kipingo kya leenu ni kipingo kya Bukolo. * (Luk. 22:19, 20, 28-30) Bebio bipingo, byaalengiizie babo batumua pamo ni mpendua inge iniini ya bantu bange, bakaaluke bamakolo ni bamakoani ku muulu. (Nfy. 5:10; 14:1) Baaliasie bantu babiikilue mafuta basielepo, * i bapalile kulia mukate ni kumina divai ku Kibukisio.

5. Bakristu babiikilue mafuta bamanine ki palua kiswapilo kyabo kibaapeelue?

⁵ Kintu kinge kili kyabalengia babiikilue mafuta baye bali ni nkulu ya kusaangua ku Kibukisio ni keeki: Kukita evio kuli kwabakwasia kutontonkania palua kiswapilo kyabo. Yehova waabapeele kiswapilo kya kupapia, i kulanda kiswapilo kya kusekelela bukose busiviinda kufua ni kwinooneka ku muulu, kubomba pamo ni Yesu waatuntumuinue, kubomba pamo ni bantu mia ni makumi ana na bana elufu (144 000) kabili kikilile pa byonse, kubomba peepi ni Yehova Leeza! (1 Bakor. 15:51-53; 1 Yoan. 3:2) Babiikilue mafuta bamanine nangue bakupilue kusekelela leelio lisyuko ku muulu. Inzi, pa kunti baketabilue kwingila ku muulu, bapalile kusiala baali ba kisinka mpaka kufua kwabo. (2 Tim. 4:7, 8) Kutontonkania palua kiswapilo kya kuya ku muulu, kuli kwabaleetela nsaansa ikata Bakristu babiikilue mafuta. (Tit. 2:13) Ale palua “mikooko inge”? (Yoan. 10:16) Ni bintu ki paleepale bili byaleengia mikooko inge iye yasaangua ku Kibukisio?

6. Juu ya ki mikooko inge ili yasaangua ku Kibukisio kila muaka?

⁶ Mikooko inge ili yaya ku Kibukisio, kabili teizi kulia mukate ni kumina divai, inzi ili yasaanguasie yali ni nsaansa ya kuya yali kooko. Mu 1938, baalia bali ni kiswapilo kya kwikala pa kyalo, baakupilue lya kuanza kusaangua ku Kibukisio. Lupungu Lwakue Kamwenenena lwa pa busiku 01 Muezi wa 03, 1938, lwaalandile eevi: “Kipalile saana [mikooko inge] kuya yasaangua ku kulonghaana kooko, ni kumona bintu bili byakitua. . . . Ezio mikooko ni yeene, ipalile kusekelela ezio nsita, kabili i viili yakita.” Mikooko inge, ili yasaangua yali ni nsaansa ya kusaangua kooko yamweneneene, nga evelia vili vyakita baeni bali bakupua kuya kusaangua ku buinga.

7. Juu ya ki mikooko inge ili yasaangua yapembeleele kukoonka lyasi lili lyalandua ku Kibukisio?

⁷ Mikooko inge ni yeene ili yatontonkania palua kiswapilo kyabo. Ili yasaangua yapembeleele lyasi lya Kibukisio, paantu lili lyalandila saana palua bintu byakakitilua bantu ba kisinka mu Buteeko bwa Miaka Elufu bwakue Kristu, bwali wakateeka pamo ni bantu mia ni makumi ana na bana elufu (144 000). Bali pensina butunguluzi bwakue Likolo Yesu Kristu,  baalia bakateeka pamo nakue, bakakwasia kukita kyalo kyaluke paradiso ni kukita baalia bali banakila baaluke bantu bapuililikile. Kakiine ni kintu kya nsaansa saana ku mamilioni a bantu ali asaangua amweneneene ku Kibukisio, musita ubali batontonkania palua kufikiliziiwa kwa bukabika buli mu Bibilia mu musita uli waiza, nga boolia buli mu kitabu kya Isaya 35:5, 6; 65:21-23; ni mu Nfyulo 21:3, 4. Kutontonkania bali mu keekio kyalo kya leenu pamo ni batonua babo, kuli kwakosia kiswapilo kyabo palua musita uli waiza ni kukosia bupinguzi bwabo bwa kutwalilila kumubombela Yehova bila kulekela.​—Mat. 24:13; Bag. 6:9.

8. Ni nsaambu ki inge ili yalengia mikooko inge iye yasaangua ku Kibukisio?

⁸ Mona nsaambu inge ili yalengia mikooko inge iye yasaangua ku Kibukisio. Batonene kubalangilila ntono baalia babiikilue mafuta ni kubakwasia. Mulandu Wakue Leeza, waalandile ntaanzi nangue baalia babiikilue mafuta ni baalia bali ni kiswapilo kya kwikala pa kyalo bakabombela pamo saana. Mu nzila ki? Ale kansi, tulondolueleko mifuano iniini.

9. Bukabika buli mu Zekaria 8:23, bulangiliile nangue mikooko inge ili yaiunvua siani palua baalia babiikilue mafuta?

⁹ Soma Zekaria 8:23. Bobu bukabika bulondoluele vili vyaiunvua mikooko inge palua balupua ni bankazi babiikilue mafuta. Milandu “Muyuda” ni “mwemue bantu” ilangiliilesie kikundi kimo, i kulanda baalia babiikilue mafuta basielepo. (Bar. 2:28, 29) “Bantu likumi kufuma mu ndimi yonse ya ntundu” balangiliile mikooko inge. ‘Bakwete na maka saana,’ i kulanda basiele balamatiliile mu kisinka ku baalia babiikilue mafuta, kabili beyungile pamo naabo mu lupupo luswetele. Kansi, Kibukisio lukili kyakitua mu nsita ya busiku, mikooko inge ili yalangilila nangue ilamatiliile ku baalia babiikilue mafuta kupitila kusaangua ku Kibukisio pamo naabo.

10. Yehova waakitile siani eevi kufikilizia bukabika buli mu Ezekieli 37:15-19, 24, 25?

¹⁰ Soma Ezekieli 37:15-19, 24, 25. Yehova waafikiliziizie bobo bukabika, kupitila kukwasia baalia babiikilue mafuta ni mikooko inge babombele pamo baali mu buumo busiviinda kutioka. Bobo bukabika buzimbuile tumuti tubili. Baalia bali ni kiswapilo kya kuya ku muulu bapalaniizie kamuti “ka Yuda” (mukowa waali wasaakuluamo bamakolo ba Israeli), ni baalia bali ni kiswapilo kya kwikala pa kyalo bapalaniizie kamuti “ka Efraimu.” * Yehova waali wapaangile kukwatania bebio bikundi bibili eevi byaluke “kamuti kamo.” Keekio kilangiliile nangue bali babomba bali mu buumo bali pensina butunguluzi bwakue Likolo wabo umo, Kristu Yesu. Kila muaka, baalia babiikilue mafuta pamo ni mikooko inge, bali bakita Kibukisio, apana bali bikundi bibili byapuseene, inzi bali basaangua bali “kisepe kimo,” bali pensina butunguluzi bwa ‘musuungi walisie umo.’​—Yoan. 10:16.

11. “Mikooko” izimbuilue mu Mateo 25:31-36, 40 ili yabakwasia siani mu nzila ikata balupua bakue Kristu?

¹¹ Soma Mateo 25:31-36, 40. Mu ozu mufuano, “mikooko” ipalaniizie bantu ba nsaambu bekeele mu nsita ya mpela bali ni kiswapilo kya kwikala pa kyalo, i kulanda mikooko inge. Bali babakwasia mu kisinka balupua bakue Kristu basielepo, asa mu miilo ikata saana, i kulanda miilo ya kyalo kyonse ya kusimikila ni kukita basambi.​—Mat. 24:14; 28:19, 20.

12-13. Mikooko inge ili yalangilila nangue ili yabakwasia balupua bakue Kristu mu nzila ki inge?

¹² Kila muaka, mu milungu ili yatangilila Kibukisio, mikooko inge ili yalangilila nangue ili yabakwasia balupua bakue Kristu kupitila kubomba saana mu kampanye ya kyalo kyonse  ya kukupa bantu batonene eevi basaangue ku Kibukisio. (Mona kisanduku kilandile “ Eba, Uli Mukwiteaniizia Mbeela Palua Kipindi kya Kibukisio?”) Kabili, bali bakwasia kukita mipaango ipalile eevi Kibukisio kikitue mu bilonghaano byonse bya mu kyalo, anzia kine mu bilonghaano bingi temwizi kusaangua mwali bantu babiikilue mafuta. Mikooko inge ili yasaangua yasekeleele kukwasia balupua bakue Kristu mu ezio nzila. Mikooko inge ili yaikala yamanine nangue Yesu ali wamona bintu bili byakita mikooko ezio, palua balupua babiikilue mafuta, kabili kilinga evelia ili yamukitila Yesu bintu bebio.​—Mat. 25:37-40.

¹³ Anzia kine kiswapilo kyetu kiye kyali kya kuya ku muulu ao kya kwikala pa kyalo, juu ya ki fwe bonse tuli twaya ku Kibukisio?

14. Yehova ni Yesu balangiliile ntono ikata palwetu mu nzila ki?

¹⁴Tuli twamutasia Yehova ni Yesu palua ntono ibaatulangiliile. Yehova ali watulangilila ntono mu nzila ingi, inzi kuli nzila imo ikilile pa yonse. Leeza weetu, waatulangiliile ntono ikata saana isili na butani kupitila kumutuma Muana wakue wa mana saana eze akyuziiwe ni kufua juu yeetu. (Yoan. 3:16) Kabili, Yesu waalangiliile ntono ikata kupitila kufumia bukose bwakue mukwitonena palwetu. (Yoan. 15:13) Tetuviinda ata kaniini kumulipa Yehova ni Yesu palua ntono ibalangiliile palwetu. Inzi, kunti twalangilila nangue tuli twatasia kupitila bintu bituli twakita mu buikazi bwetu bwa kila busiku. (Bakol. 3:15) Kabili, tuli twasaangua ku Kibukisio eevi kulanguluka ntono yabo palwetu, kabili tuli twakita evio eevi kulangilila nangue tubatonene.

15. Juu ya ki baalia babiikilue mafuta ni mikooko inge bali batasia saana palua kilubula mulandu?

¹⁵Tuli twatasia saana palua bupe bwa kilubula mulandu. (Mat. 20:28) Kilubula mulandu ni kya mana saana ku bantu babiikilue mafuta paantu kili kyalengia kiswapilo kyabo kiweeme saana kyaluke kya kisinka. Paantu bali ni kiketekelo mu ngeleelo yakue Yesu Kristu, Yehova abapundile kuya bali ba nsaambu kabili kuya bali baana bakue. (Bar. 5:1; 8:15-17, 23) Ni mikooko inge ni yeene, ili yatasia palua kilubula mulandu. Paantu bali ni kiketekelo mu ngeleelo yakue Kristu, bemeene sinta ntaanzi yakue Leeza, kunti bamukitila miilo itakatiifu, kabili baswapiile ‘kupita mu lyemo likata.’ (Nfy. 7:13-15) Kusaangua ku Kibukisio kila muaka, kuli pakati ka nzila ili yalangilila nangue baalia babiikilue mafuta pamo ni mikooko inge bali batasia palua kilubula mulandu.

16. Ni kiki kinge kili kyatulengia tuye twasaangua ku Kibukisio?

¹⁶ Kintu kinge kili kyalengia tuye twaya ku Kibukisio ni paantu tutonene kumunakila Yesu. Anzia kine kiswapilo kyetu kiye kyali kya kuya ku muulu ao kya kwikala pa kyalo, tuli twakoonka malaizio aafumiizie Yesu musita lwaatendekeziizie Kibukisio mu nsita ya busiku. Waalandile eevi: “Kite eevi lyonse lumwandanguluka.”​—1 Bakor. 11:23, 24.

17. Kibukisio kili kyatukwasia siani kukila kumupalama Yehova?

¹⁷Tuli twakila kumupalama Yehova. (Yak. 4:8) Nga vitwasambilila, Kibukisio kili kyatupeela fuasi ya kutontonkania palua kiswapilo kitupeelue na Yehova, ni kutontonkania palua ntono ikata yatulangiliile. (Yer. 29:11; 1 Yoan. 4:8-10) Musita utuli twalangilila kiswapilo kyetu kya kisinka palua musita uli waiza ni palua ntono yakue Leeza isiizi kwandua palwetu, tuli twakila kumutona Yehova ni kukosia bukibuza bwetu pamo nakue.​—Bar. 8:38, 39.

18. Kutontonkania palua mufuano wakue Yesu, kuli kwatukinkizia kukita ki?

 ¹⁸Tuli twasonseziiwa kupala mufuano wakue Yesu. (1 Pet. 2:21) Mu nsiku ili yatangilila Kibukisio, tuli twapooza maano ku mpunda ya Bibilia ili yalondoluela mulungu wa kupeleezia buikazi bwakue Yesu pa Kyalo, kufua kwakue ni kutuntumunua kwakue. Kisia, musita lutuli twakita Kibukisio mu nsita ya lyungulo, lyasi lili lyatulangulusia ntono yakue Yesu palwetu. (Baef. 5:2; 1 Yoan. 3:16) Musita utuli twasoma palua mufuano wa kwipeela wakue Yesu ni kutontonkania saana palua mufuano ozo, tuli twakinkiziiwa ‘kuya twaikeele nga vyali vyaikeele Yesu Kristu.’​—1 Yoan. 2:6.

19. Kunti twasiala siani mu ntono yakue Leeza?

¹⁹Tuli twakila kupingula kusiala twali babibuza bakue Yehova. (Yud. 20, 21) Tuli twasiala twali mu ntono yakue Leeza, kupitila kwikwinda saana kumunakila weene, kuswesia liina lyakue, ni kusaansamusia mutima wakue. (Tus Maf. 27:11; Mat. 6:9; 1 Yoan. 5:3) Kusaangua ku Kibukisio, kuli kwatukinkizia kukila kupingula kwikala kila busiku mu nzila ilangiliile nangue tuli twamulanda Yehova eevi: ‘Ntonene kusiala mu ntono yobe loonse!’

20. Ni nsaambu ki ipalile ili yatulengia tuye twasaangua ku Kibukisio?

²⁰ Anzia kine kiswapilo kyetu ni kya kuya ku muulu, ao kya kwikala pa kyalo, tuli ni nsaambu ipalile ili yatulengia tuye twasaangua ku Kibukisio. Kila muaka pa ezio nsiku musita utuli twakolonghana pamo, tuli twalanguluka lufu lwakue muntu umo ututonene, i kulanda Yesu Kristu. Kikilile pa byonse, tuli twalanguluka ntono ikata saana, i kulanda ntono yaalangiliile Yehova palwetu kupitila kumufumia Muana wakue eevi aaluke kilubula mulandu. Onu muaka, Kibukisio kyakaba kukitua mu nsita ya lyungulo, Nsiku ya Tano pa nsiku 15 Muezi wa 04, 2022. Tumutonene Yehova pamo ni Muana wakue, pakaako, lutwakaba kuya twalanguluka lufu lwakue Yesu, tekuli kintu kyonse kipalile kwaluka kya mana kuliko kusaangua ku Kibukisio.