Eba, Wakiba Wamanine?
Ni kyotoka kya siani kibanga kyalimo mukulu wa mu buteeko bwa Etiopia musita Filipo lwaamupaleeme?
MU LULIMI lwa kale, mulandu olia ubombiziiwe mu Tafsiri ya Ulimwengu Mupya “tyakala” ao kyotoka, kunti waaluka na mana ya matyakala a namuna inge. (Miil Bat. 8:28, 29, 38) Inzi, kimwenekele nangue mukulu wa mu buteeko bwa Baetiopia abanga wali mu tyakala ao motoka ukata saana kupita myotoka ibanga yabombiiwa ku vita ao mu masindano a mbilo. Tumone kyalengia tulande evio.
Ozo mwalalume waakitile bulendo bwaleepele saana, abanga wali mukulu mu buteeko bwa Baetiopia. Ni “mwalalume abanga wakindeeme mu buteeko bwakue Kandake, likolo mwanakazi wa Baetiopia, kabili olia waali waimaniine bukonto bwakue bonse.” (Miil Bat. 8:27, NWT) Etiopia ya kale ibanga yabiikile mukati kyalo kya Sudan kya enu nsiku pamo ni seemu ya kule saana ya kusini ya kyalo kya Misri ya enu nsiku. Ata sie kine olia mwalalume taabombiizie motoka wenka olia mu bulendo bwakue bonse, kipalile abanga watweme ni bintu bya mana mu bulendo bwakue buleepele. Myotoka imo elia ibanga ya bombiiwa eevi kutwama bantu mu miaka mia ya ku ntendeko, Yesu wasyavyelue, ibanga yavimbililue kabili ibanga yali na mapine ana. “Matyakala ao myotoka ya evio ibanga yali ni fuasi mwa kutwamina bifunda ni bintu binge, ibanga yakwasia bulendo te kunti buye bwakolele, kabili pange ibanga yakwasia bantu baviinde kukita bulendo bwaleepele saana.” Bobo i bulondolozi bwaalandilue palua kitabu kya Miilo ya Batumua.
Olia mwalalume Mwetiopia abanga wasoma musita Filipo lwaamupaleeme. Bulondolozi bwaiza eevi: “Filipo waakundukiile ku tyakala ni kunvua [olia mukulu wa mu buteeko bwa Baetiopia] wali mukubelenga kitabu kyakue kabika Isaya.” (Miil Bat 8:30) Matyakala te aakitilue eevi aye akundukisia. Paantu alia matyakala abanga aenda bukebuke saana, keekio kyaalengiizie olia mwalalume Mwetiopia aviinde kusoma, inzi kabili kyaalengiizie ni Filipo aviinde kumusaanga, ata sie kine abanga wakundukile lwa maulu.
Olia mwalalume Mwetiopia ‘waamwanine Filipo asele ekale nakue mu tyakala.’ (Miil Bat. 8:31) Mu tyakala yaali yabombiiwa mu masindano, wa kwenzia waali waenzia waimeene. Inzi, mu tyakala ya bulendo elia yabombiizie olia mwalalume Mwetiopia, mubanga mwali fuasi ya kwikalamo weene pamo ni Filipo.
Kukoonkana ni milandu yaatungulwilue na mupasi wakue Leeza, elia ili mu lileembo lya Miilo ya Batumua katue ka 8, pamo ni busininkizio bwa kiistoria butuli nabo, mpapulo yeetu yakilanda sie buleenu nangue olia mukulu wa mu buteeko bwa Baetiopia abanga wali mu tyakala ao motoka ukata saana kupita matyakala ao myotoka ibanga yabombiiwa ku vita ao mu masindano a mbilo.