LYASI LYA KUSAMBILILA LYA 4
LWIMBO 30 (Lwa Kiswahili) Baba Wane, Leeza Wane ni Kibuza Wane
Yehova Ali Wakulangilila Ntono Ilambaleele
“Yehova alambaleele saana mu ntono.”—YAK. 5:11, NWT.
KIKATA KIINE
Ntono yakue Yehova kunti yatulengia siani tukile kumupala ni kwiunvua kuya twasuungilue, twaemeenue, kabili twasaansamusiiziwe?
1. Musita luuli watontonkania palwakue Yehova, weewe uli wamumona kuya wali siani?
EBA, weewe waaeziizie kale kutontonkania Yehova vyali wasaangua? Musita luuli walanda nakue kupitila lipepo, uli watontonkania weene kuya wali siani? Tetuviinda kumumona Yehova, inzi Bibilia ili yamupalania na bintu paleepale. Mu Bibilia, Yehova ali wakuutua nangue “koba ni kisoolelo” kabili nangue weene ni “mulilo uli wazizia.” (Malum. 84:11; Baeb. 12:29) Kaleemba umo wa Bibilia waamulondoluele Yehova kuya wali nga libue lya safiri, nga kyuma kibeekele, kabili nga mukolanvula ubeekele. (Ezek. 1:26-28) Inge pakati ka ezio milandu ilandiile palwakue Yehova, kunti yatupapia saana ao kunti yalengia twimone nangue te tupalile ntanzi yakue.
2. Paange ni kiki kili kyalengia tumone kyakolele kumupalama Yehova?
2 Paange kunti twaandua kwitabila nangue Yehova atutonene paantu tetuviinda kumumona. Ao paange kunti twaandua kwitabila nangue Yehova kunti watutona paantu twaaemene saana mu buikazi bwetu musita waapitile. Paange baba weetu tabanga watutonene. Yehova ali wainika ezio aali ituli twaiunvua, kabili amanine nangue keekio kili kyalengia kiye kyakolele kuli fwefue kumupalama. Eevi kutukwasia, ali watubuila mibeele yakue iweeme saana mu Mulandu wakue, Bibilia.
3. Juu ya ki tupalile kupooza maano ku ntono yakue Yehova?
3 Ntono i mulandu ulondoluele buino saana bumuntu bwakue Yehova. (1 Yoan. 4:8) Yehova ni ntono. Bibilia ili yalanda nangue weene i ntono. Kila kintu kyali wakita kili kyasonseziiwa na ntono. Leeza ali walangilila ntono mu nzila ya buwaame, kabili mu nzila ikata. Teezi kwilangilila sie ku baalia bamutonene, inzi ali wailangilila ni ku baalia basimutonene. (Mat. 5:44, 45) Mu leeli lyasi, tuli kulondoluela palwakue Yehova ni palua ntono yakue. Kine twakila kusambilila palwakue Leeza, twakaba kukila kumutona.
YEHOVA ATUTONENE SAANA
4. Ntono yakue Yehova ilambaleele yakulengia weewe wiunvue siani? (Mona ni foto.)
4 “Yehova alambaleele saana mu ntono.” (Yak. 5:11, NWT) Mu Bibilia, Yehova epalaniizie na mama ali ni ntono. (Is. 66:12, 13) Ezia kutontonkania mama ali waemena muana wakue muniini kwa ntono. Ali wamulela buino, kabili ali walanda nakue buino mu lizui lifuukile. Kine muana ali mukulila ao kukisua, mama ali wamupeela beelia byakabiile. Enka evio ni fwefue, kine tuli mu maavia, kunti twaswapila nangue Yehova ali kutulangilila ntono. Kaleemba umo wa Malumbo waalandile eevi: “Musita unaatitikiilue na lyemo, weewe waanteekiizie mutima ni kundengia nteekamane.”—Malum. 94:19.
“Nga evelia sie mama vyali wamuteekia mutima muana wakue, ni neene nakaba kutwalilila kukuteekia mutima” (Mona lifungu lya 4)
5. Yehova ali wakulangilila siani ntono ilamatiliile?
5 Yehova ni wa kisinka. (Malum. 103:8) Teezi kutusuula kine twakita kintu kibiipile. Baisraeli baamuluviizie Yehova lingi saana. Inzi lubaali bakisua ni kulekela bilubo byabo, waali wabalangilila ntono yakue ya kisinka. Kwa mufuano, waabalandile nangue: ‘Mwaalukile ba mana pa menso ane, mwaakindikilue, kabili naakimitona.’ (Is. 43:4, 5) Loonu, ni fwefue Yehova atutonene enka evio. Lyonse, tupalile kuya twaswapiile nangue atutonene. Ata sie kine twakita bilubo bikata, Yehova teezi kutupooza. Kine twalapila ni kubuela kuli weene, twakaba kwimwena nangue atwaliliile sie kututona. Alaile nangue “wakaba kutweleela mu nzila ikata.” (Is. 55:7) Bibilia ili yalanda nangue twakaba kwaluka mu ‘nsita ya kuwaaminua ifumine kuli Yehova muine.’—Miil Bat. 3:19, NWT.
6. Lileembo lya Zekaria 2:8, lyatusambilizia ki palwakue Yehova?
6 Soma Zekaria 2:8. Paantu Yehova atutonene, ali wainika lubilo vituli twaiunvua, kabili ali wasaangua watonene kutukingilila. Ni weene ali wakisua musita utuli twakisua. Pakaako, tusininkiziizie nangue ali watwasuka musita utuli twamuloomba eevi: “Nsuunge nga kambooli ka mu linso lyobe.” (Malum. 17:8) Linso ni kintu kya kupoozako saana maano, kabili ni lya mana saana ku mubili. Pakaako, musita Yehova lwali watupalania na kambooli ka mu linso lyakue, kili nga evelia ali wakeba kulanda eevi: ‘Muntu onse ali wamikisia, mwe bantu bane, ali wakisia kintu kyane kya mana saana.’
7. Juu ya ki tupalile kukila kuswapila nangue Yehova atutonene?
7 Yehova atonene tuye twasininkiziizie nangue weene atutonene kila muntu palwakue. Inzi, amanine nangue bintu bitwaasaakeene nabio mu buikazi, paange kunti byalengia tumone nangue taviinda kututona. Ao paange loonu tuli mukusaakaana ni aali elia ili mukutulengia tumone nangue tatutonene. Ni kiki kili kutukwasia tukile kuswapila nangue atutonene? Kunti twaswapila evio kine twasambilila Yehova vyaalangiliile nangue amutonene Yesu, baalia babiikilue mafuta, ni fwe bonse.
YEHOVA ALI WALANGILILA SIANI NTONO YAKUE?
8. Juu ya ki Yesu waali wasininkiziizie nangue Baba wakue waali wamutonene?
8 Burafiki bwa peepi kabili bwa ntono buli pakati kakue Yehova ni Muana wakue mutonua, bwaatendekele lwa kale saana, kabili bwakokola saana. Bwaatendekele ntanzi tekunaaluke muntu ata umo. Nga vilandile Mateo 17:5, Yehova walandile bila kufiika nangue amutonene Yesu. Yehova nga waalandile sie nangue, ‘ozu i muntu etabiilue na neene.’ Inzi, waatonene fwefue tumane nangue weene amutonene saana Yesu. Pakaako, waamukuutile nangue “Muana wane, mutonua.” Yehova waali wamwitoneena Yesu, asa paantu Yesu abanga watonene kufumia bukose bwakue. (Baef. 1:7) Kabili, Yesu taali watwisika nangue Baba wakue waali wamutonene. Waali wasininkiziizie saana nangue Baba wakue waali wamutonene. Waali walanda lingi wasininkiziizie nangue baba wakue waali wamutonene.—Yoan. 3:35; 10:17; 17:24.
9. Ni milandu ki ilangiliile nangue Yehova abatonene baalia babiikilue mafuta? Londolola. (Baroma 5:5)
9 Kabili, Yehova ali wabalangilila ntono baalia babiikilue mafuta. (Soma Baroma 5:5.) Mona milandu ilandile nangue, “iitililue.” Referanse imo ili yalondolola nangue bobo bulanzi bulangiliile nangue ntono ili “yaitikila pali fwefue nga katooni.” Bobo bulanzi bulangiliile nangue Yehova abatonene saana baalia babiikilue mafuta! Baalia babiikilue mafuta bamanine nangue “batonenue na Leeza.” (Yud. 1) Mutumua Yoane waalangiliile baalia babiikilue mafuta vibali baiunvua, musita lwaaleembele eevi: “Mone vitutonesiiwe na Situe [ao, Baba weetu]! Kutona kwaatutoneesie i kulengele kunti tuye twakuutua baana bakue Leeza!” (1 Yoan. 3:1) Eba, Yehova atonene sie baalia babiikilue mafuta? Ata, atutonene fwe bonse.
10. Ni kintu ki kikata saana kisininkiziizie nangue Yehova akutonene?
10 Ni kintu ki kikata saana kisininkiziizie nangue Yehova atutonene? Ni kilubula mulandu. Kupitila kilubula mulandu, Yehova waalangiliile ntono ikata saana, elia isinalangililuepo na muntu unge. (Yoan. 3:16; Bar. 5:8) Yehova waamufumiizie Muana wakue wa mana saana ni kulekelela atufuile fwe bonse eevi mazaambi etu eleelue, kabili eevi twaluke benakue. (1 Yoan. 4:10) Kine twakila kutontonkania palua bei yaalipile Yehova ni Yesu, tuli kukila kwinika nangue beene batutonene saana fwe bonse, kila umo palwakue. (Bag. 2:20) Kilubula mulandu te kyaalipilue paantu sie nsaambu yakue Yehova yaaloombele kukita evio. Kilubula mulandu ni bupe busininkiziizie nangue atutonene. Yehova waatulangiliile ntono kupitila kufumia kintu kya mana saana kuli weene, i kulanda, Yesu. Yehova waalekeleele Muana wakue akyuziiwe ni kufua juu yeetu.
11. Lileembo lya Yeremia 31:3 lyatusambilizia ki?
11 Nga vitwamona, Yehova teezi kufiika ntono yakue mu mutima, inzi ali watubuila nangue atutonene saana. (Soma Yeremia 31:3.) Yehova waatukulile kuli weene paantu atutonene. (Palania ni Malanguluzi a Mizilo 7:7, 8.) Te kuli kintu ao muntu ali kuviinda kutupusania na ntono yakue Leeza. (Bar. 8:38, 39) Ezio ntono ili yakulengia weewe wiunvue siani? Soma Malumbo a 23, kisia ezia kumona Daudi vyaaiunvuile palua ntono yakue Yehova, kabili ezia kutontonkania keekio vikili kukulengia weewe wiunvue.
NTONO YAKUE YEHOVA YAKULENGIA WIUNVUE SIANI?
12. Lileembo lya Malumbo a 23 lilandile ki mu kifupi?
12 Soma Malumbo 23:1-6. Milandu ya lwimbo ili mu Malumbo a 23, isininkiziizie nangue Yehova ali ni ntono kabili ali watwemena. Daudi, olia waaleembele azo Malumbo, walondolola burafiki bwa peepi bolia bubanga bwali pakati kakue ni Yehova, Musuungi wakue. Musita Daudi lwaali wakoonka butunguluzi bwakue Yehova, waali waiunvua kuya wasuungilue kabili waali waamuswapila saana weene. Daudi waali wamanine nangue Yehova wakatwalilila kumutona loonse mu buikazi bwakue. Ni kiki kyaamulengiizie aye waswapiile saana evio?
13. Juu ya ki Daudi waali wasininkiziizie nangue Yehova wakaba kumwemena?
13 “Nsikaba kupusua na kintu ata kimo.” Daudi waaiunvuile kuya wasuungilue buino paantu Yehova waali wamupeela bintu byaali wakabiile. Daudi waali wamanine nangue Yehova ni mwinakue kabili nangue waali wamwitabiile. Waali wasininkiziizie nangue Yehova wakaba kutwalilila kumupeela bintu byonse byakabiile mu musita uli mukuiza ata sie kine wasaakaana na ki. Daudi waali wainikile nangue Yehova amutonene kabili nangue wakaba kumwemena. Keekio kyaamukwasiizie tekuti atiine, aye waali ni nsaansa, kabili aye wasekelela beelia byakwete.—Malum. 16:11.
14. Yehova kunti watwemena siani mu nzila ya ntono?
14 Yehova ali watwemena mu nzila ya ntono, asa musita utuli twapatua na bintu bibiipile mu buikazi bwetu. Claire, a olia waakibombela ku Beteli mu miaka ikilile pa 20, taamwene vya kukwasia bantu ba mu lupua lwakue musita ubaapatile maavia akata akoonkeene. Baba wakue waaluele bifulubi, ni mwalawakue umo mwanakazi waatengelue. Kukila pakaako, lupua lwabo lwaalukile ni buavia bwa kupata nfalanga, kabili bazeziizie nsesi yabo. Yehova waabemeene siani mu nzila ya ntono? Claire walanda eevi: “Yehova waamwene maavia abo, kabili lyonse bantu ba mu lupua lwetu te baali babulua na kintu ata kimo kibaali bakabiile kila busiku. Lingi, Yehova waali watupeela bintu bingi kupita ni beelia bitwaali twakabiile! Lingi ndi natontonkania Yehova vyaatukwasiizie, kabili nsikaba kulaba ata kaniini ntono yakue. Kulanguluka bebio bintu kwaankwasiizie ntwalilile kumubombela Yehova nali ni nsaansa musita unaapatile maavia ange mu buikazi bwane.”
15. Juu ya ki Daudi waasaansamukile? (Mona ni foto.)
15 “Weene ali wansaansamusia.” Nsita inge, Daudi waali waema saana juu ya maavia aali wasaakaana nao. (Malum. 18:4-6) Inzi, paantu Yehova waali wamulangilila ntono ni kumwemena, keekio kyaali kyamusaansamusia. Yehova waamutunguluile mwinakue ku “fuasi ya kulisiizia ilimo bikusi bingi” ni “fuasi ya kutuziizia ilipo menda engi.” Keekio, kyaamukoseleziizie Daudi ni kumukwasia atwalilile kumubombela Yehova wali ni nsaansa.—Malum. 18:28-32.
Ata sie kine Daudi abanga wabutuka, kumana nangue Yehova abanga wamutonene kwaamuleteele nsaansa (Mona lifungu lya 15)
16. Ntono yakue Yehova ili yakusaansamusia siani?
16 Ni loonu, ‘juu ya ntono ilamatiliile yakue Yehova te twapua’ musita utwasaakaana na meezio ni maavia paleepale mu buikazi. (Lwi Mal. 3:22; Bakol. 1:11) Tumone mufuano wakue Rachel. Weene waatiokele mutima musita mulume wakue lwaamusiile weene pamo ni Yehova mu kipindi kya Korona (COVID-19). Eba, Yehova waamukwasizie siani? Walanda eevi: “Yehova waalengiizie ngiunvue kuya natonenue. Yehova waampeele benane baalia baali bapisia musita pamo ni neene, baali bandeteela byakulia, baali bantumina mpunda ya kunteekia mutima, baali bansekia, ni kundangulusia nangue Yehova waali wantonene. Ndi namutasia Yehova lyonse pa kumpeela lupua lukata luli ni ntono.”
17. Juu ya ki Daudi ‘taatiinine kintu ata kimo kya kumukisia’?
17 “Nsiizi kutiina kintu ata kimo kya kunkisia, paantu uli pamo ni neene.” Lingi buikazi bwakue Daudi bwaali mu buezio, kabili abanga waali ni baluani bengi ba maka. Anzia evio, ntono yakue Yehova yaamulengiizie eyunvue kuya wasuungilue kabili wakingiliilue. Daudi waaimweneene nangue Yehova waali pamo nakue mu aali yonse, ni keekio kyaamukoseleziizie. Keekio, kyaalengiizie embe eevi: “[Yehova] waampususiizie ku bintu byonse byaali byantiinia.” (Malum. 34:4) Ata sie kine nsita inge Daudi abanga waunvua saana muenzo, abanga waluisia muenzo wakue paantu waali wamanine nangue Yehova abanga wamutonene.
18. Kusininkizia nangue Yehova akutonene kunti kwakukoselezia siani musita luuli ni muenzo?
18 Kumana nangue Yehova atutonene kuli kwatupeela siani maka musita utuli twasaakaana ni bintu bya kututiinia? Painia umo ali wakuutua Susi walondolola weene pamo ni mulume wakue vibaaiunvuile musita muana wabo lwaasangukile. Walanda eevi: “Musita kintu kibiipile saana lukili kyakitika, muntu ali waunvua maka apua ni kumona nangue te kuli ata muntu ali kuviinda kumukwasia. Inzi ntono yakue Yehova yaatulengiizie twiunvue kuya twasuungilue kabili twakingiliilue.” Rachel, olia utwazimbulanga lwa ntanzi, walanda eevi: “Busiku bumo mu nsita ya busiku lunaali nakisilue kabili naemene saana ni kunvua muenzo, naapepele kuli Yehova. Penka paalia waantekiizie mutima ni kundengia ndekele kwema, nga evelia mama vyali watalazia muana wakue, kisia paapo naaunvuile tulo ni kulaala. Nsikalaba ata kaniini bobo busiku.” Mukote umo wa mu kilonghaano, olia ali wakuutua Tasos waakitile miaka ina mu buloko paantu waakeene kwaluka soda. Eba, waaimweneene siani nangue Yehova waali wamutonene, kabili nangue waali wamwemena? Walanda eevi: “Yehova waali wampeela bintu byonse binaali nakabiile. Keekio kyaalengiizie nkile kumona nangue mpalile kumuswapila kakiine. Kabili kupitila mupasi wakue, Yehova waampeele nsaansa atasie kine mbanga nali mu fuasi ibiipile saana. Keekio kyaansininkiziizie nangue kine nakila kubomba nakue, ndi kukila kunoonkela mu buwaame bwakue. Pakaako naatendekele kumubombela nali painia wa loonse lumbanga nali mu buloko.”
MUPALAME LEEZA OBE WA NTONO ILAMBALEELE
19. (a) Kumana nangue Leeza atutonene kuli kulengia tupepe siani? (b) Ni bulondolozi ki palua ntono yakue Yehova bwakukumia weewe pa lobe? (Mona kisanduku “ Milandu ya Kutukwasia Kwinika Nangue Yehova Atutonene Saana.”)
19 Mifuano i twalondoluela mu leeli lyasi isininkiziizie nangue Yehova, “Leeza wa ntono,” ali pamo ni fwefue! (2 Bakor. 13:11) Ali wapooza maano kukila muntu pakati keetu. Kila umo pakati keetu apalile kuya wasininkiziizie nangue “azyungulukiilue na ntono Yakue ilamatiliile.” (Malum. 32:10) Kine twatwalilila kutontonkania palua bintu byonse byali wakita eevi kulangilila nangue atutonene, tuli kukila kwinika nangue atutonene saana, kabili tuli kukila kumupalama. Tetuviinda kunvua muenzo wa kupepa kuli weene ni kumubuila nangue tukabiile ntono yakue. Kunti twamubuila byonse bili byalengia tunvue muenzo, paantu tusininkiziizie nangue ali waunvua, kabili nangue atonene kutukwasia.—Malum. 145:18, 19.
20. Paantu Yehova atutonene, keekio kili kyalengia tukite siani?
20 Busiku buliko kasama, muntu ali watona kupalama ku mulilo. Enka evio ni fwefue, tuli twatona kumupalama Yehova paantu atutonene. Ntono yakue Yehova ilumine saana, kabili ilambaleele. Pakaako uye wali ni nsaansa paantu Yehova akutonene. Paantu Yehova atutonene, ni fwefue tupalile kulanda eevi: “Mutonene Yehova”!—Malum. 116:1.
WEEWE, KUNTI WAASUKA SIANI?
-
Londolola vili ntono yakue Yehova.
-
Juu ya ki usininkiziizie nangue Yehova akutonene saana?
-
Paantu Yehova akutonene, keekio kili mukulengia wiunvue siani?
LWIMBO 108 (Lwa Kiswahili) Ntono ya Kisinka Yakue Leeza
a Meena ange aalulwilue.