1-2. Juu ya ki Yehova waaizuile nzila eevi twingile mu lupua lwakue, kabili waaizuile siani nzila palwetu?

YEHOVA atukupile twiunge ku lupua lwa bantu bali bamupupa. Ozo ni mukupo waweeme kakiine! Lupua lwetu lulimo bantu bepeele kuli Leeza, kabili bali ni kiketekelo mu ngeleelo ya kilubula mulandu yakue Muana wakue. Lupua lwetu, ni lupua luli ni nsaansa. Tuli mukusekelela buikazi buli ni mana leenu, kabili tuli ni nsaansa juu ya kiswapilo kya bukose busili na mpela​—ibe ni ku muulu ao mu paradiso pa kyalo.

² Paantu Yehova waakinkiziiziwe na ntono, kabili kupitila kwipeela, waatwizuiliile nzila eevi twaluke bantu ba mu lupua lwakue. (Yoane 3:16) ‘Twaasitilue na mutengo ukata.’ (1 Bakor. 6:20) Kupitila kilubula mulandu, Yehova waakitile kiviindikane kwaluka ni bukibuza pamo ni weene. Tusyukile kakiine paantu tupeelue nsaambu ya kumukuuta, Muntu mukulu saana mu myulu ni kyalo kyonse, nangue Baba weetu. Kabili, nga vitwakimona mu lyasi lyakipita, Yehova ni Baba akilile kuwaama.

3. Kunti twaiipuzia biipuzio ki? (Mona ni kisanduku “ Ozu Yehova, Amwene ni Neene?”)

³ Nga vyaalandile kaleemba umo wa Bibilia, paange kunti twaiipuzia eevi: “Nakaba kumulipa ki Yehova palua bintu byonse biweeme byali wankitila?” (Malum. 116:12) Kyasuko ni kulanda nangue tetuviinda ata kaniini kumulipa Baba weetu wa ku muulu. Lyonse tuli twaisaanga twakinkiziiziwe kumutona. Mutumua Yoane waaleembele eevi: ‘Tuli ni ntono paantu Leeza i waabambiilepo kututona.’ (1 Yoane 4:19) Kunti twamulangilila mu nzila ki Baba weetu wa ku muulu nangue tumutonene?

4. Nga vilandile lileembo lya Yakobo 4:8, juu ya ki tupalile kukita maka kumupalama Yehova?

⁴ Yehova atonene tumupalame kabili tuye twalanziana nakue. (Soma Yakobo 4:8.) Ali watulanda tuye ‘twapepa lyonse’ kabili lyonse ali watutuilizia. (Bar. 12:12) Teezi kuisaanga kuya wali na bintu bingi bya kukita ao kutopa kututuilizia. Ni fwefue, tuli twamutuilizia kupitila kusoma Mulandu wakue, Bibilia, pamo ni bitabu binge bili byatukwasia kunvua buino Bibilia. Kabili tuli twamutuilizia musita utwapoozako saana maano ku kulonghaana kwa buina Kristu. Nga evelia kulanziana lingi vikuli kwakwasia baana kuya baali peepi ni baviazi baabo, ni fwefue kulanziana lingi ni Yehova kuli kwatukwasia kutwalilila kuya twali peepi nakue.

5. Kunti twawaamia siani mapepo etu?

⁵ Tontonkania vili mapepo obe kuli Yehova. Weene atonene tumubuile, kupitila lipepo, malanga etu onse ni vituli twaiunvua. (Malum. 62:8) Tupalile kwiipuzia eevi: ‘Eba, mapepo ane ali asaangua ali a pa muulu-muulusie, nga milandu ikopiiziwe, ao asaangua ali nga milandu ili mukufuma ku mutima yaleembua mu mukanda na minue?’ Bila kutwisika, umutonene saana Leeza, kabili utonene kusuunga bukibuza bobe pamo nakue buye bwalumine. Pakunti uviinde, upalile kumulanzia lingi. Mubuile bintu biusiviinda kubuila muntu unge. Mubuile kyakulengia uye waali ni nsaansa ao bintu bili byakwemia. Uye waali ni kisinka nangue kunti wamulanda akukwasie.

6. Tupalile kukita ki eevi tuye twali peepi ni Baba weetu wa ku muulu?

⁶ Eevi tumupalame saana Baba weetu wa ku muulu, tupalile kutwalilila kuya twali ni mibeele ya kumutasia. Twamuitabizia kaleemba umo wa Malumbo waleembele eevi: ‘Bintu bwingi biukitile, We Yehova Leeza, miilo yobe ya kupapia ni malanga obe palwetu. Te kuli muntu ali kupalaniiwa na weewe; naeziizie kulondolola ni kulanda palua ezio miilo, nga bingi saana kubilondoluela!’ (Malum. 40:5) Te twizi kuya twali bantu bakutasiasie, inzi tuli twalangilila kutasia kuli Yehova kupitila milandu ni bikitua. Keekio i kili kyatupusania ni bantu bengi leenu. Twikeele mu kyalo muli bantu basiizi kutona kutasia bintu byonse bili byatukitila Leeza. Pakaako, kintu kinge kilangiliile nangue twikeele mu “nsiku ya mpeleezio” ni keeki: Bantu te beezi kutasia. (2 Tim. 3:1, 2) Te kunti tuye twali ata kaniini na mibeele nga ezio!

7. Yehova atonene tukite ki, kabili juu ya ki?

⁷ Baviazi te beezi kutona baana babo baye baluana, inzi, bali batona baye baali babibuza. Enka evio ni Yehova atonene baana bakue baye baali babibuza kila muntu ni mwinakue. Kulanda kisinka, ntono ituli nayo kila muntu ni mwinakue ilangiliile nangue tuli Bakristu ba kisinka. (Yoane 13:35) Twaitabiziana ni kaleemba wa Malumbo, waalandile eevi: “Kiweeme saana kabili kili kyasaansamusia balupua kwikala pamo mu buumo!” (Malum. 133:1) Musita utuli twabatona balupua ni bankazi betu, tuli twamulangilila Yehova nangue tumutonene. (1 Yoane 4:20) Ni kya nsaansa kuya twali mu lupua lwa balupua ni bankazi ‘baweeme, ni bali baunvuilana nkumbu ilambaleele ’!​—Baef. 4:32.

8. Nga vilandile lileembo lya 1 Yoane 5:3, ni nsaambu ki ikata ili yatulengia tumunakile Yehova?

⁸ Yehova akebele baana babanakile baviazi babo, kabili akebele ni fwefue tumunakile. (Baef. 6:1) Tupalile kumunakila paantu weene i Kabumba weetu, i ali Wakwasia bukose bwetu, kabili weene i ali ni mulangue  kukila baviazi bonse. Inzi, nsaambu ikata ili yatulengia tumukindike Yehova ni paantu tumutonene. (Soma 1 Yoane 5:3.) Anzia kine kuli nsaambu ingi ilangiliile juu ya ki tupalile kumunakila, Yehova teezi kutupatikizia tumunakile. Yehova waatupeele buntungua bwa kwisaakwila, ali watona saana kine twasaakula kumunakila paantu tumutonene.

9-10. Juu ya ki ni kintu kya mana kumana ni kubombia mafunde akue Yehova mu buikazi bwetu?

⁹ Baviazi batonene baana babo te kunti basaangue na buavia. I kili kyalengia baye babiika ni mafunde palua mibeele eevi kubasuunga baana babo. Musita baana lubali bakoonka azo mafunde, bali balangilila nangue babaswapiile baviazi babo ni kubanakila. Ni kintu kya mana saana paantu tumanine mafunde akue Baba weetu wa ku muulu kabili twikeele twakoonkele azo mafunde. Musita utuli twakita evio, tuli twamulangilila Yehova nangue tumutonene ni kumunakila, ni kingeko tuli twanoonkelamo fwe benka. (Is. 48:17, 18) Inzi, baalia bali bamukaana Yehova ni mafunde akue, bali bafikiilasie kwikisia bo beene.​—Bag. 6:7, 8.

¹⁰ Musita utuli twaikala buikazi bwa kumusaansamusia Yehova, tuli twasuungua mu bintu bili byainoona aali yeetu ya kimubili, ya kimupasi ni vituli twaiunvua. Yehova amanine ni kiki kikilile kuwaama kuli fwefue. Aurora, nkazi ekeele mu kyalo kya Amerika walanda eevi: “Manine nangue kumunakila Yehova lyonse kuIi kwaleeta buikazi bukilile kuwaama.” Keekio ni kisinka ku kila umo weetu. Eba, ni  mpaalo ki iwakipata mukukoonka butunguluzi bwa ntono bwakue Yehova?

11. Lipepo lili lyatukwasia siani?

¹¹ Kupepa kuli kwatukwasia kuya twanakila, atasie musita lukikolele kukita evio. Musita unge kunti kyatukolela kumunakila Yehova, inzi lyonse tupalile kuluisia mibeele yeetu ya lizaambi. Kaleemba wa Malumbo waamupapaatile Leeza walanda eevi: ‘Sonsezia mukati mwane ngitonene kukunakila.’ (Malum. 51:12) Denise, nkazi painia wa loonse, walanda eevi: “Kine namona kyakolele kunakila muzilo umo pakati ka mizilo yakue Yehova, ndi napepa namuloomba maka a kukita kiweeme.” Tuli ni kisinka nangue lyonse Yehova ali waasuka lipepo mu nzila nga ezio.​—Luka 11:9-13.

12. Nga vilandile lileembo lya Baefeso 5:1, tupalile kukita ki?

¹² Soma Baefeso 5:1. Paantu tuli “baana batonenue” bakue Yehova, tuli twakita maka etu onse eevi tumupale. Tuli twapala mibeele yakue musita utwalangilila ntono, buwaame ni kweleela bange. Musita baalia basimumanine Leeza lubali kumona lwendo lwetu luweeme bali kukinkiziiwa kusambilila bingi palwakue Leeza. (1 Pet. 2:12) Baviazi Bakristu bapalile kumupala Yehova mu nzila ibali babakitila baana babo. Kine bakita evio, baana babo bali kutona kwikitila bukibuza bwabo beene pamo ni Baba weetu ali ni ntono.

13. Tupalile kukita ki eevi twaluke ni mutima wa kusitiina?

 ¹³ Muana muniini ali waitoneena baba wakue kabili ali waunvua makola kubabuilako bange palua baba wakue. Enka evio, ni fwefue tuli twaitoneena Baba weetu wa ku muulu, Yehova, kabili tutonene ni bange bamumane. Mu mitima yeetu, fwe bonse tuli twaiunvua nga vyaiunvuile Likolo Daudi, waaleembele eevi: ‘Nakaba kwitasia muli Yehova.’ (Malum. 34:2) Ale kine tuli ni muenzo ao tuli twaunvua busoni? Kunti twaaluka siani ni mutima wa kusitiina? Tuli twakila kwaluka ni mutima wa kusitiina kine twatontonkania vituli kumusaansamusia Yehova kabili bantu bange vibali kunoonkelamo kine basambilila palwakue. Yehova wakaba kutupeela mutima wa kusipa utukabiile. Waabakwasiizie Bakristu ba mu miaka mia (100) ya ku ntendeko kwaluka ni mutima wa kusitiina, kansi wakaba kutukwasia ni fwefue benka.​—1 Bat. 2:2.

14. Ni nsaambu ki paleepale ilangiliile nangue ni kintu kya mana kukita basambi?

¹⁴ Yehova tali na kapatulula, kabili ali wasaansamuka musita lwali wamona twabalangilila bange ntono anzia baye baali ba kupi. (Miilo 10:34, 35) Nzila imo pakati ka nzila ikilile kuwaama ya kunti tubalangilile bange ntono, ni kubasimikila mpunda iweeme. (Mat. 28:19, 20) Ezio miilo kunti yakwasia siani? Baalia bali batutuilizia kunti bawaamia buikazi bwabo leenu kabili kunti baswapila kupata bukose bwa loonse musita uli waiza.​—1 Tim. 4:16.

15-16. Ni bintu ki bili byatuleengia kusaansamuka?

¹⁵ Yehova ni muviazi ali ni ntono, pakaako atonene lupua lwakue luye lwali ni nsaansa. (Is. 65:14) Kuli nsaambu ingi ilangiliile nangue ni leenu kunti twaya twali ni nsaansa, atasie kine twasaakaana ni maavia. Kwa mufuano, tuzumiine kakiine nangue Baba weetu wa ku muulu atutonene saana. Tuli ni kisinka kisili na kilubo kya Mulandu Wakue Leeza, Bibilia. (Yer. 15:16) Kabili tuli bantu ba mu lupua lwibeleele lwa bantu bamutonene Yehova, batonene mafunde akue a pa muulu, kabili batoneene.​—Malum. 106:4, 5.

¹⁶ Kunti twatwalilila kuya twali ni nsaansa paantu tuswapiile kisinka nangue buikazi bwakaba kukila kuwaama musita uli waiza. Tumanine nangue leenusie Yehova wakaba kufumiapo bibiipile byonse, kabili kupitila butunguluzi bwa Bukolo bwakue, kyalo kyakaba kwaluka Paradiso. Kabili tuli ni kiswapilo kyaweeme saana nangue baalia bafuile bakaba kutuntumunua ni kwikala kabili pamo ni fwefue. (Yoane 5:28, 29) Ezio nsaansa yakabako, tekakwezia! Kabili kintu kya mana saana, tuli ni kisinka nangue leenusie kila muntu ku muulu ni pa kyalo wakaba kumupeela Baba weetu ali ni ntono mukinzi, bulumba ni lupupo lumupalile.