BANAKAZI babili babanga baali mukupita mu nkeende ili yasisiiziwamo bintu ili mu kalaale ka muzi wa Baguio mu kyalo kya Ufilipino. Baamwene prezantware, inzi bila kupalamapo. Helen, nkazi abanga pa prezantware, waabakentele wasekele. Babo banakazi baatwaliliile kuya, inzi baali mukulanguluka nseko ya nsaansa yakue Helen.

Lubaali babuela ku nsesi lwa bis, baamwene masomo akata a jw.org alamikile ku Nsesi ya Bukolo. Baalangulukile nangue i alia enka masomo abamonanga lwa ntaanzi ku prezantware. Bonse babili baakookele ku bis ni kupalama ku Nsesi ya Bukolo. Lubaafikile baamwene ntantiko ya kulonghaana ya bilonghaano paleepale ibanga yalamikilue ku muliango wa Nsesi ya Bukolo.

Babo banakazi baaile ku kulonghaana kwa koonkelepo. Ale, naani ubaamwene musita ubaali baya kwingila mu Nsesi ya Bukolo? Helen! Baainikile bila kukokola nangue i olia wenka muntu wa nseko. Helen walanda eevi: “Lubaapaleeme naaunvuile muenzo, naatendekele kwiipuzia ‘nakiluvia ki?’” Inzi, babo banakazi baamubuilile Helen nangue lwa ntaanzi baamusangile pa prezantware.

Babo banakazi baasekeleele kulonghaana ni kuya bali pamo ni balupua ni bankazi, baaisangilesie nga bali kwabo. Lubaamwene bange baali mukupyanga, baalandile ni beene bakwasieko. Umo pa babo banakazi waafumine mu kyalo kya Ufilipino, inzi olia unge waatendekele kulonghaana ni kusambilila Bibilia​—nseko i yaalengiizie!