Baaimweneene Ntono ya Kilonghaano
YOMARA pamo ni balupua bakue, ba Marcelo ni Hiver, baali baikala mu muzi uniini mu Guatemala. Yomara waatendekele kusambilila Bibilia pamo ni Bakasininkizia. Kisia, balupua bakue ni beene baatendekele kusambilila Bibilia. Inzi babanga bali ni buavia. Bonse batatu babanga bali bampofu. Pakaako, mwalimu wabo wa Bibilia wali wabasomena mafungu a mu lisomo ni maleembo a Bibilia.
Kabili kibanga kyakolele kuli beene kuiza ku kulonghaana. Te babanga bali na buviinde bwa kukita dakika 40, eevi kuya bo beene ku Nsesi ya Bukolo ibanga yali peepi ni kwabo. Inzi balupua mu kilonghaano baakwete mipaango ya kuya babatwama ku kulonghaana konse. Kabili musita ubaatendekele kupisia biputulua bya banafunzi ku kulonghaana kwa mukati ka mulungu, balupua baali babakwasia kubiikilila biputulua byabo.
Mu Muezi wa 05, 2019, kulonghaana kwaatendekele kukitua mu muzi wabo. Kisia ba mulume ni mukazi bamo, baaizile kwikala mu muzi wabo. Te baali bamanine kusoma ni kuleemba maleembo a bampofu, inzi baatonene kusambilizia babo basambi bampofu vya kusoma ni kuleemba maleembo a bampofu. Pakaako, baaile ku Bibilioteke imo ni kukebako bitabu bilandiile palua maleembo a bampofu, eevi basambilile vya kusambilizia bange azo maleembo.
Marcelo ali mukwasukapo mu kulonghaana
Kisia miezi iniini, babo basambi batatu bampofu, baalukile ni buviinde bwa kusoma maleembo a bampofu, kabili keekio kyaabakwasiizie bakiteko buyantanzi bunge bwa kimupasi. Loonu ba Yomara, Marcelo, ni Hiver bali mukubomba bali bapainia ba loonse. Marcelo ni mubombi ali wabombela. Mu mulungu onse bali ni bingi bya kukita mu miilo yakue Yehova. Bali ni mute saana mu miilo yakue Yehova, kabili keekio kili kyakwasia ni baalia bali peepi naabo baaluke ni mute.
Baaba bantu batatu ba mu lupua, bali mukutasia saana palua kukwasiiwa kubakikwasiiwa kwa ntono na kilonghaano. Yomara walanda eevi: “Kubambilasie lutwasaakeene ni Bakasininkizia lya kuanza, baatulangiliile ntono ya kisinka ya Kikristu.” Marcelo, waongezia eevi: “Tuli ni babibuza baweeme saana mu kilonghaano kyetu, kabili tuli ni lupua lwa kyalo kyonse lukwateene mu ntono.” Yomara pamo ni balupua bakue bapembeele kwa nkulu busiku bubakamona kyalo kyaalulua paradiso.—Malum. 37:10, 11; Is. 35:5.
