YA TATU, pa nsiku 18 Muezi wa 01, 2023, ku jw.org kwaabikilue mpunda iibeleele. Ezio mpunda yaalandile nangue Balupua Gage Fleegle ni Jeffrey Winder baasaakwilue eevi kubomba mu Kabungue Kali Katungulula ka Bakasininkizia Bakue Yehova. Bonse babili bamubombela kale Yehova miaka ingi bali ba kisinka.

Lupua Fleegle waakuliile mu Amerika ya kuzika-koba, mu Pennsylvania. Baviazi bakue i baamusambiliziizie kisinka. Lwaali mulumendo, bantu ba mu lupua lwakue baakuukiile mu muzi uniini, molia mwali mwakabiilue bakasimika bengi. Kisia musita uniini, pa nsiku 20 Muezi wa 11, 1988, waabatiziiziwe.

Lyonse, baviazi bakue Lupua Fleegle babanga bamukoselezia kubomba mu miilo ya nsita yonse. Lingi, babanga bapokelela kwabo bakangalila ba muputule pamo ni balupua ni bankazi baali babombela ku Beteli. Kabili, Lupua Fleegle abanga wamona babo balupua ni bankazi vibabanga bali ni nsaansa. Musita uniini kisia kubatiziiwa, waalukile painia wa loonse pa busiku 01 Muezi wa 09, 1989. Kisia miaka ibili, waafikiliziizie mupaango wakue, olia waaibikiile lwabanga wali na miaka 12, i kulanda, mupango wa kubombela ku Beteli. Muezi wa 10, 1991, waatendekele kubombela ku Beteli ya Brooklyn.

Ku Beteli, Lupua Fleegle waakitile miaka munane wabombela ku miilo ya kukwatania mapapie, kisia waatendekele kubomba mu Kabungue ka Miilo. Ozo musita, waakitile miaka fulani wali mu kilonghaano kya lulimi lwa Kirusi. Mu muaka wa 2006, waamuupile Nadia. Mu ozo muaka, baatendekele kubomba bonse babili ku Beteli. Bonse babili baabombeele mu kilonghaano kya lulimi lwa Kireno. Kabili baakitile miaka ikilile pa likumi bali mukubombela mu kilonghaano kya lulimi lwa Kihispania. Kisia kubomba miaka ingi mu Kabungue ka Miilo, Lupua Fleegle waatendekele kubomba mu Biro ya Kabungue Kemaniine Miilo ya Kusambilizia, kisia waatendekele kubomba mu Biro ya Kabungue Kemaniine Miilo. Muezi wa 03, 2022, waatendekele kukwasia mu Kabungue  Kemaniine Miilo ka Kabungue Kali Katungulula.

Lupua Winder waakuliile mu Murrieta, mu California, mu kyalo kya Amerika. Baviazi bakue i baamusambiliziizie kisinka, kabili waabatiziiziwe pa nsiku 29 Muezi wa 03, 1986. Muezi waakoonkelepo, waabombele bupainia bwa kukwasia. Paantu waasekeleele saana ezio miilo, waatonene kutwalilila. Kisia kukita miezi ingi wali painia wa kukwasia, pa busiku 01 Muezi wa 10, 1986 waatendekele bupainia bwa loonse.

Lwaali wakili mulumendo, Lupua Winder waaile kubendela ba kaka wakue babili, baalia babanga babombela ku Beteli ozo musita. Keekio kyaamusonseziizie atone saana kwizuzia fomu ya kubombela ku Beteli wasyakulile. Kabili, Muezi wa 05, 1990, waakuutilue eevi atendeke kubombela ku Beteli, mu Wallkill.

Lwabanga wali ku Beteli, Lupua Winder waabombele mu tubungue tupusene-puseene. Waabombele mu Kabungue ka Miilo ya Busaka, ni mu kabungue kali kaimaniine miilo ya Makaba. Kisia paapo, waapelue miilo ya mu Biro. Mu muaka wa 1997, waamupile Angela. Ozo i muaka ubaatendekele kubombela pamo ku Beteli. Mu muaka wa 2014, baatuminue ku Warwick. Kooko, Lupua Winder waatendekele kukwasia mu miilo ya kukuula kitente kikata kya bakasininkizia bakue Yehova. Mu muaka wa 2016, baatuminue ku Kitente kya Masomo kya Bakasininkizia Bakue Yehova, mu Patterson. Kooko Lupua Winder waabombele mu miilo ya Audio-Vidéo. Kisia miaka ina, baabuelele kabili ku Warwick. Lupua Winder waapeelue miilo ya kubomba mu Biro ya Kabungue Kemaniine Babombi. Muezi wa 03, 2022, waapelue miilo ya kukwasia mu Kabungue Kemaniine Babombi ka Kabungue Kali Katungulula.

Babo balalume, ni “bupe mu bantu.” Tuli mukumuloomba Yehova abapaale saana musita ubatwaliliile kubomba saana mu miilo ya Bukolo.—Baef. 4:8.