NSITA imo bakaleemba ba Bibilia baali babuela kabili kuleemba milongo inge mulandu kwa mulandu. Paange bintu bitatu beelia byaalengiizie babo bakaleemba bakite evio ni beebi:

Musita waaleembelue Bibilia. Mu Israeli ya kale, bantu bengi saana te babanga bakwete makopi a Muzilo. Bengi babanga baunvua Muzilo wasomua musita Baisraeli lubabanga balonghaana pamo ku tabenakulo ni ku ekalu. (Mal Miz. 31:10-12) Kipalile kubanga kwali bintu bya kubapuulula musita ubabanga batuilizia ni kwimana nsa ingi mu bantu bengi. (Neh. 8:2, 3, 7) Mu aali ya evio, kubuelulukamo milongo ya mana kubanga kwakwasia kiye kyaleengele ku bantu kulanguluka maleembo ni kuabombia. Kubuelulukamo milandu imo, kwaali kwabakwasia saana kulanguluka bintu bingi palua Mizilo ibaapeelue na Yehova.—Bal. 18:4-22; Mal Miz. 5:1.

Bibilia Yaaleembelue siani? Mu Bibilia muli ni nghimbo ingi: Kwa mufuano kitabu kya Malumbo, kya Lwimbo Luweme, ni kya Lwimbo lwa Malilo. Nsita inge mu nghimbo mubanga mwasaangua milandu ibuelulukiluemo, keekio kibanga kyakwasia bakatuilizia babiikilile milandu ya lwimbo. Kwa mufuano, Malumbo a 115:9-11 alanda eevi: “Mwe Baisraeli, muswapile Yehova—Weene i mukwasi wabo, kabili i kisoolelo kyabo. Mwe ba mu nsesi yakue Aruni, muswapile Yehova—Weene i mukwasi wabo, kabili i kisoolelo kyabo. Mwe bali bamutiina Yehova, muswapile Yehova— Weene i mukwasi wabo, kabili i kisoolelo kyabo.” Eba, te umwene nangue kubuelulukamo kwaakwasiizie baalia baali baimba babiikilile ezio milandu iweeme?

Milandu inge ibuelulukiluemo mu Bibilia eevi kukonkobezia bintu bya mana. Nsita imo bakaleemba ba Bibilia baali babwelulukamo milongo imo ya mana. Kwa mufuano, musita Yehova lwaabakaniizie Baisraeli kulia milopa, waamulandile Musa abuelulukemo lingi kubabuila nsaambu yaalengiizie akite evio. Leeza abanga watonene kukonkobezia nangue, bukose bwa mubili buli mu milopa, i kulanda nangue, milopa i bwenka bukose. (Bal. 17:11, 14) Kisia batumua pamo ni bakote baali mu Yerusalemu lubaalondoluele vya kukita eevi kutiina kumuzikisia Leeza, baakonkobeziizie nangue ni kintu kya mana kwitiinia na milopa.—Miil Bat. 15:20, 29.

Inzi Yehova tatonene twaluke ni kibeelezio kya kubuelulukamo milongo paleepale ili mu Bibilia. Kwa mufuano, Yesu waalandile eevi: “Musita umuli mwapepa, tekuba mwabueluluka-bueluluka mu bintu bimonke.” (Mat. 6:7) Kisia paapo waalandile bintu paleepale bitupalile kupepelapo, beelia bipateene ni kutona kwakue Leeza. (Mat. 6:9-13) Pakaako, ata sie kine tuli twatiina kubueluluka mu milandu imonke musita utuli twapepa, nsita inge kunti twabueluluka mu bintu bimonke.—Mat. 7:7-11.

Kansi, bakaleemba baalia batunguluilue na Mupasi wakue Leeza baali ni nsaambu iweeme ya kubuelulukamo milandu ni milongo inge. Ezio ni imo pakati ka nzila ingi ili yabombia Kasambilizia weetu mukulu eevi kutusambilizia vya kunti tunoonkelemo fwe beene.—Is. 48:17, 18.