Nga vitumanine, Yehova atonene tuye twamupembeleele twasipikiziizie mpaka musita olia wabiikile eevi kuwaamia bintu ufike. Juu ya ki atonene tukite evio? Ni kiki kili kutukwasia tuye twali ni nsaansa musita utupembeleele?

JUU YA KI YEHOVA ATONENE TUPEMBELELE?

Bibilia ili yalanda eevi: “Yehova apembeleele wasipikiziizie eevi amilangilile buwaame, kabili wakeemana eevi kumilangilila luse. Paantu Yehova ni Leeza wa nsaambu. Bali ni nsaansa ni baalia bonse batwaliliile kumukentelela weene.” (Is. 30:18) Ku ntendeko, Bayuda baalia baali ni kibuli i baaninue ezio milandu yakue Isaya. (Is. 30:1) Inzi, pakati kaabo pabanga pali ni Bayuda ba kisinka, kabili ezio milandu yakue Isaya yaabapeele kiswapilo. Ni loonu, ezio milandu ili yabapeela kiswapilo babombi ba kisinka bakue Yehova.

Pakaako, tupalile kupembelela twasipikiziizie paantu Yehova ni ye ali wapembelela wasipikiziizie. Abiikile busiku bwa kwinoona keenu kyalo, kabili apembeleele bobo busiku ni nsa bifike. (Mat. 24:36) Ozo musita, kyaakamoneka buino nangue bintu byonse bibiipile beelia bili byalanda kibanda palwakue Yehova ni palua baalia bonse bali bamubombela, ni bya bufi. Kisia, wakamufumiapo weene pamo ni baalia bonse bali ku lubali lwakue, inzi fwefue ‘[wakatulangilila] luse.’

Loonu, Yehova teezi kupuisia maavia etu onse, inzi ali watusininkiziizia nangue musita utupembeleele kunti twaviinda kuya twali ni nsaansa. Nga evelia vyaalandile Isaya, kunti twatwalilila kuya twali ni nsaansa musita utupembeleele kwa amu saana kintu kiweeme kikitike. (Is. 30:18) a Kunti twakita siani eevi tupate ezio nsaansa? Tumone bintu bina bili kutukwasia.

BINTU BYA KUKITA EEVI TUYE TWALI NI NSAANSA MUSITA UTUPEMBELEELE

Tontonkania palua bintu biweeme. Likolo Daudi waaimweneene bintu bingi bibiipile mu buikazi bwakue. (Malum. 37:35) Inzi, waaleembele eevi: “Siala tondolo ntanzi yakue Yehova, kabili mupembelele wasipikiziizie. Te kufipua paantu muntu unge waviinda kufikilizia mipaango yakue ibiipile.” (Malum. 37:7) Evio i vyaakitile Daudi musita lwaatontonkaniizie palua bulayo bwakue Yehova bwa kumupususia. Kabili, waatontonkaniizie palua bintu byonse biweeme byaakitiilue na Yehova.  (Malum. 40:5) Kuliko kutontonkania palua maavia atuli twasaakaana nao, tupalile kutontonkania palua bintu biweeme bituli twaimwena mu buikazi bwetu. Kine twakita evio, tuli kumona kyaleengele kumupembelela Yehova.

Uye wamutasia Yehova lyonse. Kimwenekele nangue Daudi i waaleembele Malumbo a 71. Waamulandile eevi Yehova: “Nakaba kutwalilila kuya napembeleele; nakaba kukila kukutasia.” (Malum. 71:14) Eba, weene waali wamutasia siani Yehova? Waali wababuilako bange palwakue Yehova ni kwimba nghimbo ya kumutasia. (Malum. 71:16, 23) Nga evelia Daudi, ni fwefue kunti twaviinda kuya twali ni nsaansa musita utumupebeleele Yehova. Tuli twamutasia weene musita utuli twasimikilako bange, musita utuli twalanda bintu biweeme palwakue, musita utuli twalanziana ni beneetu kila busiku, ni musita utuli twaimba nghimbo ya kumupupa. Musita uli waiza, weewe luwakaba kwimba lwimbo lumo lwa Bukolo, wamona siani kine wapooza maano ku milandu ya kuleeta nsaansa ili mu loolo lwimbo?

Pisia musita pamo ni balupua ni bankazi eevi bakuteekie mutima. Musita Daudi lwaali mu maavia, waamulandile eevi Yehova: “Ntanzi ya bantu bobe ba kisinka, nakaba kuswapila liina lyobe.” (Malum. 52:9) Ni fwefue kunti twateekiiwa mutima na balupua ni bankazi betu ba kisinka. Tupalile kuya twapisia nabo musita, apana sie ku kulonghaana kwetu ni mu kusimikila, inzi ata sie musita utwaizia.—Bar. 1:11, 12.

Kosia kiswapilo kyobe. Malumbo 62:5 alanda eevi: “Neene mupembeleele Leeza nali tondolo paantu kiswapilo kyane kili kyafuma kuli weene.” Ni kintu kya mana saana kuya twali ni kiswapilo kikosele, asa kine twamona nangue mpela ya keenu kyalo yakokola kuliko vitwaali twaswapiile. Tupalile kuswapila nangue bulayo bonse bwakue Yehova bwakaba kufikiliziiwa ata sie kine kwapita musita waleepele siani twabupembeleele. Kunti twakosia kiswapilo kyetu kupitila kusambilila Mulandu Wakue Leeza; kwa mufuano kusambilila bukabika paleepale, ni kusambilila bakaleemba ba Bibilia vibaaleembele bintu byapateene. Kabili, kunti twasambilila bintu paleepale bili byatubuila Yehova palwakue. (Malum. 1:2, 3) Kabili, tupalile kutwalilila ‘kupepa twali ni mupasi utakatiifu’ eevi burafiki bwetu pamo ni Yehova butwalilile kuya bwaweeme musita utupembeleele afikilizie bulayo bwakue bwa kutupeela bukose bwa loonse.—Yud. 20, 21.

Nga evelia sie Likolo Daudi, uye waswapiile nangue Yehova ali waemena baalia bonse bali bamupembelela, kabili nangue ali wabalangilila babo bantu ntono ilamatiliile. (Malum. 33:18, 22) Kansi, twalilila kumupembelela Yehova wasipikiziizie: kupitila kutontonkania palua bintu biweeme beelia byuli waimwena mu buikazi bobe, kupitila kumutasia weene, kupitila kupisia musita pamo ni Bakasininkizia benoobe eevi bakuteekie mutima, ni kupitila kukosia kiswapilo kyobe kya mana.