1. Ntaanzi ya kutendeka kukuula nsesi, muntu apalilenke kukita ki?

TONTONKANIA muntu wapingula kukuula nsesi. Amanine nsesi yatonene kukuula. Eba, kunti waya penka palia ku nsoko kusita biombo ni kuiza kutendeka kukuula? Ata. Ntaanzi tanatendeke kukuula, kuli kintu kya mana kyapalile kukita​—kupendula kine wakaba kupooza nfalanga inga pa kukuula nsesi. Juu ya ki? Paantu apalile kumananke kine akwete nfalanga ikumeene kupuisia miilo ya kukuula nsesi. Kine wabambanke kupendula nfalanga yakaba kupoozuapo, kunti kyakitika aviinde kakiine kupua kukuula nsesi yakue ya leenu.

2. Nga vilandie lileembo lya Luka 14:27-30, upalile kutontonkania saana palua ki ntaanzi teunabatiziiwe?

² Eba, ntono ni nsantilo yobe kuli Yehova bili byakukinkizia utontonkanie kubatiziiwa? Kine i evio, ukabiile kukwata bupinguzi bupaleene ni bolia bwa muntu atonene kukuula nsesi. Juu ya ki kunti twalanda evio? Mona milandu yakue Yesu ili mu Luka 14:27-30. (Soma.) Yesu waali walandila palua mana ya kwaluka musambi wakue. Kine tutonene kumukoonka weene, tupalile kwitonena kusipikizia maavia ni kulekela bintu kampanda. (Luka 9:23-26; 12:51-53) Kansi, ntaanzi ya kubatiziiwa upalile kutontonkania wapoozeleko ni maano palua bintu byonse bibiikile mukati kubatiziiwa. Kisia, uli kuya waiteaniizie buino palua kumubombela Leeza mu kisinka wali Mukristu abatiziiziwe.

3. Tuli kulondoluela ki mu leeli lyasi?

³ Eba, kwaluka musambi abatiziiziwe wakue Kristu, kuweemesie anzia kine muntu apalile kusipikizia maavia engi ni kwipeela? Een, kuweemesie! Paantu lubatizio luli lwaizula muliango wakupata mpaalo ingi​—leenu ni musita uli waiza. Ele kansi tulondoluele biipuzio kampanda bya mana palua kubatiziiwa. Kukita evio kuli kukukwasia kwasuka kiipuzio keeki: “Eba, ngiteaniizie palua kubatiziiwa?”

4. (a) Kwipeela kuli na mana ki? (b) Nga vilandile Mateo 16:24, “kwikaana” we muine kuli na mana ki?

⁴ Kwipeela kuli na mana ki? Ntaanzi teunabatiziiwe upalilenke kwipeela. Musita luwaipeela kuli Yehova, wamupalamina kupitila mu lipepo lya kufuma ku mutima ni kumubuila nangue wakaba kubombia buikazi bobe wamubombela weene loonse. Kine waipeela kuli Leeza, “waikaana” we muine. (Soma Mateo 16:24.) Kutendekela paapo, weewe waaluka wakue Yehova. Leelio ni lisyuko likata. (Bar. 14:8) Wamubuila weene nangue kutendekela loonu ni kutwalilila, weewe wakaba kupooza maano obe kumubombela weene, apana kwisaansamusia we muine. Kwipeela koobe ni kilapo​—bulayo bwafinine bwa kumulaya Leeza. Yehova teezi kutupatikizia kukita kilapo keekio. Inzi, kine twakita kilapo ali waya watupembeleele tufikilizie kilapo kyetu.​—Malum. 116:12, 14.

5. Kwipeela kobe kupuseene siani ni kubatiziiwa?

⁵ Kwipeela kupuseene siani ni kubatiziiwa? Kwipeela kuli kwakitua kila muntu palwakue kabili pa bunke; kuli kwakitua kati yobe ni Yehova. Lubatizio lwene ni lwa pa bantu bengi, luli lwakitua ntaanzi ya bange, lingi ku kulonghaana kwa muputule ao kwa kalaale. Musita luwabatiziiwa wabalangilila bange nangue wakiipeela kale kuli Yehova. * Kansi, lubatizio lobe luli kulenga bange bamane nangue umutonene Yehova Leeza obe na mutima obe onse, mweo obe onse, maano obe onse, ni maka obe onse kabili nangue wakipingula kumubombela weene loonse.​—Marko 12:30.

6-7. Nga vilandile 1 Petro 3:18-22, ni nsaambu ki ibili ilangiliile nangue lubatizio ni lwa mana?

⁶ Eba, kakiine ni kintu kya mana kubatiziiwa? Mona milandu ili mu lileembo lya 1 Petro 3:18-22. (Soma.) Nga evelia safina viyali yalangiliile paswetele kiketekelo kyakue Noa, lubatizio lobe i busininkizio buli paswetele bwa kwipeela kobe kuli Yehova. Inzi, lubatizio ni lwa mana kakiine? Een, ni lwa mana. Petro walondoluele nsaambu. Ya kuanza ni eezi, lubatizio ‘luli lwakupususia.’ Lubatizio kunti lwatupususia kine twakikita ntafu ya mana eevi kulangilila nangue tuli ni kiketekelo muli Yesu ni kuzumina nangue wafuile juu yeetu, waatuntumwinue ni kuya ku muulu, kabili loonu ekeele “ku kuboko kulio kwakue Leeza.”

⁷ Kya bubili, lubatizio luli lwakwasia kwaluka ni “kampingu kaweeme.” Musita utuli twaipeela fwe beene kuli Yehova ni kubatiziiwa, tuli twaingila mu bukibuza bwibeeleele pamo nakue. Kupitila kulapila kakiine kufuma ku mutima ni kiketekelo kyetu, Leeza ali watweleela mazaambi etu. Kansi kunti twaaluka ni kampingu kaweeme ntaanzi yakue.

8. Ni kiki kipalile kukulengia upingule kubatiziiwa?

⁸ Ni kiki kipalile kukulengia upingule kubatiziiwa? Paantu wakisambilila Bibilia wapoozeleko ni maano, wakimana bintu bingi palwakue Yehova​—bumuntu bwakue ni nzila yakue. Beelia biwakisambilila palwakue byakikukumia ku mutima obe ni kukukinkula umutone saana weene. Ntono yobe kuli Yehova i kintu kikata kipalile kukulengia ukwate bupinguzi bwa kufikiila kubatiziiwa.

9. Nga vilandile Mateo 28:19, 20, kubatiziiwa mu liina lyakue Baba, ni Muana, ni mupasi utakatiifu kuli na mana ki?

⁹ Kabili, bupinguzi bobe bwa kubatiziiwa bwimaniine palua bisinka bya mu Bibilia biwakizumina. Mona vyalandile Yesu musita lwafumiizie malaizio a kukita basambi. (Soma Mateo 28:19, 20.) Nga vyalandile Yesu, baalia bakubatiziiwa bapalile kukita evio “mu liina lyakue Baba, lyakue Muana, ni lya mupasi utakatiifu.” Keekio kili na mana ki? Upalile kuzumina na mutima obe onse bisinka bili mu Bibilia  palwakue Yehova, Yesu Muana wakue, ni palua mupasi wakue utakatiifu. Beebi bisinka bili ni buviinde bukata kabili kunti byakumia saana ku mutima obe. (Baeb. 4:12) Kansi, tumone kabili bisinka paleepale pakati ka bebio bisinka.

10-11. Ni bisinka ki palwakue Baba biwakisambilila ni kuzumina?

¹⁰ Languluka musita luwasambiliile beebi bisinka palwakue Baba: ‘Liina lyakue ni Yehova,’ weene i “Ali ku Muulu Saana, ku muulu kwa kyalo kyonse,” kabili weenesie i “Leeza wa kisinka.” (Malum. 83:18; Is. 37:16) Weene i Kabumba weetu kabili “bupusuko ni bwakue Yehova.” (Malum. 3:8; 36:9) Waakitile mipaango eevi atupususie kufuma mu lizaambi ni lufu kabili waatupeele kiswapilo kya bukose bwa loonse. (Yoane 17:3) Kwipeela ni kubatiziiwa kobe kwakaba kukulengia ukabe kumanika kuya wali umo wa Bakasininkizia Bakue Yehova. (Is. 43:10-12) Wakaba kwaluka mu lupua lwa kyalo kyonse lwa bantu bali bamupupa Leeza, bali baitoneena kukuutua mu liina lyakue Leeza kabili bali bababuilako bange leelio liina.​—Malum. 86:12.

¹¹ Ni lisyuko likata kakiine kumana beelia bili byasambilizia Bibilia palwakue Baba! Kine wazumina bebio bisinka bya mana, mutima obe uli kukulengia wipeele kuli Yehova ni kubatiziiwa.

12-13. Ni bisinka ki biwakisambilila ni kuzumina palwakue Muana?

¹² Wakitile siani musita luwasambiliile beebi bisinka bili paapa pensina palwakue Muana? Yesu i muntu wa bubili wa mana saana pa kyalo ni mu myulu. Weene i waatulubuile ao kutukombola. Wafumiizie bukose bwakue mukwitonena juu yeetu. Kine twalangilila kupitila bikitua byetu nangue tuli ni kiketekelo mu kilubula mulandu, tuli kweleelua mazaambi etu, bukibuza bwetu pamo ni Yehova buli kukosa kabili twakaba kupata bukose bwa loonse. (Yoane 3:16) Yesu i Koani Mukulu weetu. Atonene kutukwasia eevi tunoonkelemo mu kilubula mulandu kabili twaluke ni bukibuza bwa peepi pamo ni Leeza. (Baeb. 4:15; 7:24, 25) Paantu Yesu i Likolo wa Bukolo Bwakue Leeza, kupitilasie weene, Yehova wakaba kuswesia liina Lyakue, kufumiapo bubiifi, ni kuleeta mpaalo ya loonse mu paradiso ili yakaba kuiza. (Mat. 6:9, 10; Nfy. 11:15) Yesu i mufuano utupalile kukoonka. (1 Pet. 2:21) Watubiikiile mufuano kupitila kufumia bukose bwakue eevi akite kutona kwakue Leeza.​—Yoane 4:34.

¹³ Kine wazumina beelia bilandile Bibilia palwakue Yesu, uli kumutona Muana atonenue wakue Leeza. Ezio ntono ili kukulengia ubombie buikazi bobe eevi ukite kutona kwakue Leeza, nga vyakitile Yesu. Ni bili kufuminamo ni beebi, uli kwiunvua kuya wakinkiziiziwe kwipeela we muine kuli Yehova ni kubatiziiwa.

14-15. Ni bisinka ki biwakisambilila ni kuzumina palua mupasi utakatiifu?

¹⁴ Waamwene siani musita luwasambiliile bisinka bili paapa pensina palua mupasi utakatiifu? Mupasi utakatiifu te muntu, inzi ni maka akue Leeza ali abomba. Yehova waabombiizie mupasi utakatiifu eevi kubatungulula bakaleemba ba Bibilia, kabili mupasi uli watukwasia kunvua ni kubombia beelia bituli twasoma mu Bibilia. (Yoane 14:26; 2 Pet. 1:21) Kupitila mupasi, Yehova ali watupeela “maka akata [ao, akilile maka a bumuntu].” (2 Bakor. 4:7) Mupasi utakatiifu uli watupeela maka a kusimikila mpunda iweeme, kuluisia meezio, kusipikizia kutioka mutima ni kuviinda maavia. Mupasi, uli watukwasia kwaluka ni mibeele iweeme ili yakuzia “lizabo lya mupasi.” (Bag. 5:22) Leeza ali wabapeela mukwitonena mupasi baalia bamuswapiile kabili bali bamuloomba kufuma ku mutima.​—Luka 11:13.

¹⁵ Kili kyakoselezia kakiine kumana nangue bantu bali bamupupa Yehova kunti baswapila mupasi utakatiifu ubakwasie kumubombela  Leeza! Kine wazumina bisinka biwakisambilila palua mupasi utakatiifu, uli kukinkiziiwa kwipeela we muine kuli Leeza ni kubatiziiwa.

16. Twasambilila ki mu lisambililo lyetu?

¹⁶ Kine wapingula kwipeela kuli Yehova ni kubatiziiwa, wakita lutanfu lwa mana. Nga vitwafuma mukusambilila, upalile kwitabila mu kwitonena bintu biwakaba kusaakaana nabio, nga evelia maavia ni bintu biwakaba kwitana. Inzi mpaalo iwakaba kupata yakaba kuya yali ingi kupita kwipeela kuwakaba kukita. Lubatizio kunti lwakupususia kabili luli kukulengia uye waali ni kampingu kaweeme ntaanzi yakue Leeza. Kumutona saana Yehova Leeza i kupalile kukusonsezia upingule kubatiziiwa. Kabili upalile kuzumina na mutima obe onse bisinka biwakisambilila palwakue Baba, Muana ni mupasi utakatiifu. Kisia kumona beelia bitwalondololanga ku ntaanzi, kunti waasuka siani keeki kiipuzio: “Eba, ngiteaniizie palua kubatiziiwa?”

17. Ni bintu ki paleepale bipalile kukita muntu ntaanzi ya kufikiila kubatiziiwa?

¹⁷ Kine waimona nangue wakiiteania kale palua kubatiziiwa, kakiine wakikita kale ntanfu ingi eevi kukita bukibuza buweeme pamo ni Yehova. * Paantu wakiba wasambilila Bibilia kwa mute, wakifikiila kumana bingi palwakue Yehova ni Yesu. Wakikosia kiketekelo. (Baeb. 11:6) Wakiswapila kakiine bulayo bwakue Yehova buli mu Bibilia, kabili uli ni kisinka nangue kiketekelo kyobe mu kilubula mulandu kyakue Yesu, kunti kyakupususia kufuma mu lizaambi ni nfua. Wakilapila mazaambi obe ni kunuuna saana palua bilubo biwakitile, kabili wakimuloomba Yehova akweleele. Wakyalulula buikazi bobe; wakilekela bila kutiina mibeele ya kale ya mu buikazi bobe ibiipile kabili wakitendeka kwikala kukoonkana ni mibeele ili yamusaansamusia Leeza. (Miilo 3:19) Uli ni nkulu ikata ya kubabuilako bange palua kiketekelo kyobe. Wakilangilila we muine nangue upalile kuya wali kasimika asibatiziiziwe kabili wakitendeka kusimikila pamo ni kilonghaano. (Mat. 24:14) Yehova ali mukwitoneena juu yobe, paantu wakikita beebio bintu bya mana. Wakisaansamusia saana mutima wakue.​—Tus Maf. 27:11.

18. Ni biki binge byupalile kukita ntaanzi teunabatiziiwe?

¹⁸ Ntaanzi teunabatiziiwe kuli bintu binge biniini byupalile kukita. Nga vitwamonanga, upalile kwipeela we muine kuli Leeza. Mupalame pa bunke mu lipepo lya kufuma ku mutima, kabili mulaye nangue wakaba kubombia buikazi bobe eevi kukita kutona kwakue. (1 Pet. 4:2) Kisia, mubuile mukote emaniine kabungue ka bakote nangue utonene kubatiziiwa. Ali kubalanda bakote kampanda bakabe kusaakaana pamo ni weewe. Twapapaata, te kwemooka saana palua bulondolozi bubakaba kukita pamo nobe. Kakiine baaba balupua baweeme, bakumanine mbeela kabili bakutonene. Bakaba kubweluluka pamo nobe masambilizio a musinzi a Bibilia alia awakisambilila. Batonene kusininkizia nangue umanine azo masambilizio kabili nangue umwene kwipeela ni kubatiziiwa kuba bintu bya  mana saana. Kine bamona nangue upalile, bakaba kukubuila nangue kunti wabatiziiwa ku kulonghaana kuli kwaiza, kwa muputule ao kwa kalaale.

19-20. Upalile kukita ki kisia kubatiziiwa, kabili kunti waviinda siani kukita evio?

¹⁹ Kisia kubatiziiwa, upalile kukita ki? * Languluka nangue, kwipeela ni kilapo kabili Yehova akukenteleele uye wakisuungile. Kansi, kisia kubatiziiwa kobe, upalile kwikala kukoonkana ni kwipeela kobe. Kunti waviinda siani kukita evio?

²⁰ Ikala wapaleeme ni kilonghaano. Paantu uli Mukristu abatiziiziwe, loonu waaluka ‘pakati ka bazumizi nobe.’ (1 Pet. 2:17) Balupua ni bankazi bobe mu kilonghaano, i lupua lobe lwa kimupasi. Kupitila kuya kukulonghaana kwa mute wakaba kukosia bukibuza bobe pamo nabo. Soma ni kutontonkania Mulandu Wakue Leeza kila busiku. (Malum. 1:1, 2) Kisia kusoma seemu kampanda ya mu Bibilia, kwata musita watontonkania saana beelia byuli wasoma. Kukita evio kuli kulengia milandu iwasoma ikumie ku mutima obe. ‘Twalilila kupepa.’ (Mat. 26:41) Mapepo obe a kufuma ku mutima ali kukulengia umupalame saana Yehova. ‘Twalilila kukebanke Bukolo.’ (Mat. 6:33) Kunti waaviinda kukita evio kine wabiika pa ntaanzi miilo ya kusimikila mu buikazi bobe. Kupitila kusimikila kwa mute, wakaba kulengia kiketekelo kyobe kisyale kyakosele, kabili kunti wakwasia bange bapate nzila ya kubatungulula ku bukose bwa loonse.​—1 Tim. 4:16.

21. Lubatizio lobe lwakaba kukwizuila nzila ya kupata ki?

²¹ Bupinguzi bwa kwipeela we muine kuli Yehova ni kufikiila kubatiziiwa i bupinguzi bwa mana saana buwakaba kuviinda kukwata mu buikazi bobe. Kakiine, pa kukwata bupinguzi bobo iloombele kutoosianke. Anzia kikolele eba, ni kintu kiweeme? Een! Kila maavia auli kusaakaana nao mu keeno kyalo kikote, ni “a musita uniini kabili aleengele.” (2 Bakor. 4:17) Inzi, lubatizio lobe lwakaba kukwizuila nzila ya kupata buikazi buli ni nsaansa saana leenu ni “bukose bwine bwine” musita uli waiza. (1 Tim. 6:19) Kansi, twapapaata, tontonkania wapoozeleko ni maano ni kupepa palua kyasuko kyobe ku keeki kiipuzio: “Eba, ngiteaniizie palua kubatiziiwa?”