1-2. Nga vilangiliile lileembo lya Miilo 8:27-31, 35-38, ni kiki kyamukinkiziizie mukulu wa mu buteeko bwa Etiopia afikiile kubatiziiwa?

EBA, UTONENE kubatiziiwa eevi waluke musambi wakue Kristu? Ntono ni nsantilo bili byakinkizia bantu bengi kukwata bupinguzi bobo. Mona mufuano wakue mukulu wa mu buteeko waali wabombela kuli nanfumu wa ku Etiopia.

² Ozo Mwetiopia waakwete bupinguzi bila kukokola palua beelia byasambiliile kufuma mu Maleembo. (Soma Miilo 8:27-31, 35-38.) Ni biki byamukinkiziizie? Kakiine waamwene Mulandu Wakue Leeza kuya wali wa mana, paantu waali wasoma milongo kampanda ya kitabu kya Isaya musita lwaali waendele lwa tyakala. Kabili, musita Filipo lwalondoluele nakue, ozo mwalalume waatasiizie saana palua beelia byamukitiile Yesu. Inzi, juu ya ki ozo mukulu wa mu buteeko waaile ku Yerusalemu? Paantu waali wasyamutonene Yehova. Twamana siani? Waali wakifumasie ku Yerusalemu kumupupa Yehova. Kimonekele nangue ozo mwalalume walekeele diini yakue ya kavyalilo ni kwiunga ku ntundu imosie yaali yaipeele kuli Leeza wa kisinka. Yenka ezio ntono kuli Yehova i yamukinkiziizie kukita lutanfu lunge lwa mana: kubatiziiwa ni kwaluka musambi wakue Kristu.​—Mat. 28:19.

3. Paange, ni biki bili byaanzia muntu te kunti abatiziiwe? (Mona kisanduku “ Ni Kiki Kili ku Mutima obe?”)

³ Kumutona Yehova kunti kwakukinkizia ufikiile kubatiziiwa. Inzi, yenka ntono kunti yakwanzia kubatiziiwa. Kunti yakwanzia siani? Mona mifuano kampanda. Kunti waya watonene saana babibuza ni lupua lobe lwa kimubili lusiizi kulonghaana, kabili kunti waunvua muenzo nangue kine  wabatiziiwa bakaba kukusuula. (Mat. 10:37) Paange kunti waya watonene mibeele elia yumanine nangue Leeza aisuulile, kabili kunti wamona kyakolele kulekela kukita ezio mibeele. (Malum. 97:10) Ao paange waakuliile mu tuswalo twakukita nsikunkulu ipateene ni diini ya bufi. Paange uli watona bintu biweeme byulangulukile bipateene ni ezio nsikunkulu. Ni pakaako, kunti wamona kyakolele kulekela tuswalo tusiizi kutona Yehova. (1 Bakor. 10:20, 21) Kansi, upalile kwiipuzia eevi: “Ni kiki ao naani untoneesie saana?”

4. Ni kintu ki kikata kili kuviinda kukukinkizia ufikiile kubatiziiwa?

⁴ Uli ni bintu bingi biweeme bya kutona ni bya kukulengia usantile. Kwa mufuano, atasie ntaanzi teunatendeke kusambilila ni Bakasininkizia Bakue Yehova, paange waali waikindikile saana Bibilia. Kabili paange waali wamutonene Yesu. Paantu wakifikiila kubamana Bakasininkizia Bakue Yehova, kunti watona kwiunga nabo. Inzi, te kutonasie bebio bintu i kuli kukulengia utone kwipeela we muine kuli Yehova ni kubatiziiwa. Kintu kikata kili kukukinkizia kufikiila kubatiziiwa ni ntono kuli Yehova Leeza muine. Kine wamutona saana Yehova kuliko kintu kinge kyonse, teukaba kulekelela kintu ata kimo aosie muntu yeyonse, kukwanzia kumubombela weene. Kumutona Yehova kwakaba kukukinkizia ukabe kubatiziiwa, kabili kwakaba kukukwasia ukabe kusiala waali wa kisinka kuli weene kisia kubatiziiwa kobe.

5. Tuli kulondoluela biipuzio ki?

⁵ Yesu walandile nangue tupalile kumutona Yehova na mutima weetu onse, na mweo weetu onse, na maano etu onse ni maka etu onse. (Marko 12:30) Kunti wasambilila siani kumutona Yehova ni kumukindika saana? Kutontonkania Yehova vyatutonene kwakaba kutulengia ni fwefue tumutone. (1 Yoane 4:19) Wakatendeka kwiunvua siani kabili ni bikitua ki biwakaaluka nabio musitasie luwakaaluka ni ezio ntono ikilile kukindama? *

6. Nga vilandile lileembo lya Baroma 1:20, ni nzila ki imo ili kukukwasia kusambilila palwakue Yehova?

⁶ Sambilila palwakue Yehova kupitila bibumbua. (Soma Baroma 1:20; Nfy. 4:11) Tontonkania palua mulangue umonekele kupitila kubumbua kwa bimuti ni banama. Tontonkanianke kaniini vibumbilue mubili obe mu nzila ya kupapia. (Malum. 139:14) Kabili tontonkania palua maka aabiikile Yehova mu koba keetu, mana nangue koba ni lutanda lumosie pakati ka mamilioni a ntanda. * (Is. 40:26) Kine wakita evio, mukinzi obe kuli Yehova uli kukila kutana. Anzia evio, kumana nangue Yehova ali ni mulangue ni maka, ezio ni seemusie ya musinzi wa bukibuza bobe pamo nakue. Pakunti ukuule ntono ikosele kuli Yehova, upalile kumana bingi palwakue.

7. Eevi umutone saana Yehova, upalile kuya wali ni kisinka ki?

⁷ Upalile kuya wali ni kisinka nangue Yehova ali wakwemena kakiine. Eba, umwene kyakolele kuzumina nangue Kabumba wa muulu ni kyalo amanine nangue weewe pauli kabili nangue ali wakwemena? Kine i vyumwene, languluka nangue Yehova “tali kule ni fwefue.” (Miilo 17:26-28) Ali “watoosia mitima yonse,” kabili akulaile, nga evelia Daudi vyaamulandile Sulemani: “Kine wamukeba, ali kwilekeela umupate.” (1 Mil Nsi. 28:9) Kulanda kisinka, kilengiizie uye wasambilila Bibilia loonu ni  paantu Yehova ali walanda nangue, “Nakikukulila kuli neene.” (Yer. 31:3) Vyuli kuya wakila kutasia byonse bili byakukitila Yehova, i vyakaba kukila kutana ntono yobe.

8. Kunti waitabizia siani nangue Yehova akutonene?

⁸ Nzila imo ya kwitabizia nangue kakiine Yehova atutonene ni kupitila kulanziana nakue mu lipepo. Ntono yobe kuli Leeza yakaba kukula kine wamubuila lyemo lyobe ni kumutasia palua byonse byali wakukitila. Kabili kine wamona Yehova vyali waasuka mapepo obe, bukibuza bobe pamo nakue bwakaba kukosa saana. (Malum. 116:1) Wakaba kufikiila kusininkizia nangue ali wakunvua. Inzi, pa kukuzia bukibuza bwa peepi pamo ni Yehova, ukabiile kumana juu ya ki ali watona, wasuula ni kukita bintu kampanda. Kabili ukabiile kumana kintu kyatonene weewe ukite. Nzila imosie ya kukukwasia kupata azo maano ni kusambilila Mulandu wakue, Bibilia.

9. Kunti walangilila siani nangue umwene Bibilia kuya yali ya mana?

⁹ Sambilila kusaansamukila Mulandu wakue Leeza, Bibilia. Mu Bibilia sie bunke i muli kisinka palwakue Yehova ni mupaango wakue pa lobe. Uli kulangilila nangue umwene Bibilia kuya yaali ya mana kine uli waisoma kila busiku, kuteania lisambililo lya Bibilia lyuli wakita pamo ni olia ali wakusambilizia, ni kupitila kubombia beelia byuli wasambilila. (Malum. 119:97, 99; Yoane 17:17) Eba, uli ni ntantiko ya kusoma Bibilia pa lobe bunke? Ukoonkele ezio ntantiko ni kusininkizia nangue uli wasoma Bibilia kila busiku?

10. Ni kintu ki kimo pakati ka bintu bilengele Bibilia iye yaibeeleele saana?

¹⁰ Kintu kimo pakati ka bintu bilengele Bibilia iye yaibeeleele ni keeki: Ili ni mpunda kufuma ku bantu benka baamumwene Yesu. I kitabu kimosie kya kisinka kili kyalondolola keelia kyakitile Yesu juu yobe. Kine wasambilila beelia byalandile ni kukita Yesu, kunti wakinkiziiwa kukita bukibuza pamo nakue.

11. Ni kiki kili kukukwasia kumutona Yehova?

¹¹ Sambilila kumutona Yesu, ni ntono yobe kuli Yehova yakaba kukula. Juu ya ki usambilile? Paantu Yesu walangiliile mibeele yakue Baba wakue mu nzila ipuililikile. (Yoane 14:9)  Kansi, vyuli kuya wakila kusambilila palwakue Yesu, i vyuli kukila kumumana ni kumutasia Yehova. Tontonkania palua nkumbu yalangiliile Yesu ku bantu baali bamwenue na bange nangue ni ba pansi, nga evelia bapabi, baluele, ni balemeene. Tontonkania ni palua masoke a mana auli mukupeelua na Yesu, kabili ni vili vyawaama buikazi bobe musita luuli wamutuilizia.​—Mat. 5:1-11; 7:24-27.

12. Musita luwatwalilila kusambilila palwakue Yesu, kunti wakinkiziiwa kukita ki?

¹² Ntono yobe kuli Yesu kunti yakila kutana kine watontonkania saana vyaaipeele aaluke ngeleelo eevi tweleelue mazaambi etu. (Mat. 20:28) Kabili kine wainika nangue Yesu waaitabiile kufua juu yobe, kunti wakinkiziiwa kulapila ni kumuloomba Yehova akweleele. (Miilo 3:19, 20; 1 Yoane 1:9) Kabili musita luwakila kumutona Yehova ni Yesu uli kutendekasie kutona kuba ni bantu bali balangilila ntono nga ezio yenka.

13. Yehova akupeele ki?

¹³ Sambilila kutona lupua lwakue Yehova. Lupua loobe lusiizi kulonghaana ni babibuza bobe ba kale kunti baandua kunvua juu ya ki ukebele kwipeela we muine kuli Yehova. Kabili kunti bakupinga. Yehova ali kukukwasia kupitila kukupeela lupua lwa kimupasi. Kine wasyala waali peepi ni loolo lupua lwa kimupasi, wakaba kusaanga ntono kabili wakaba kukwasiiwa nga vyukabiile. (Marko 10:29, 30; Baeb. 10:24, 25) Pa musita kampanda, lupua lobe lwa kimubili kunti lwaiunga pamo ni weewe kumubombela Yehova ni kwikala lwakoonkele mafunde akue.​—1 Pet. 2:12.

14. Nga vilandile 1 Yoane 5:3, ni kiki kiwakiinika palua mafunde akue Yehova?

¹⁴ Sambilila kutasia ni kubombia mafunde akue Yehova. Ntaanzi teunamumane Yehova, waali waipinguila we muine biweeme ni bibiipile. Inzi loonu, wakimona nangue mafunde akue Yehova i akilile kuwaama. (Malum. 1:1-3; soma 1 Yoane 5:3.) Tontonkania palua masoke a Bibilia alandiile palua balume, bakazi, baviazi ni baana. (Baef. 5:22–6:4) Eba, uli mukumona buikazi mu lupua lobe vibwawaama paantu uli mukubombia azo masoke? Musita luwanakila mafunde akue Yehova palua kusaakula babibuza kwa mulangue, eba, mibeele yobe ili mukuwaama? Eba, uli mukukila kwaluka muntu wa nsaansa? (Tus Maf. 13:20; 1 Bakor. 15:33) Paange waasuka nangue een.

15. Kine utonene kumana vyakubombia mafunde a Bibilia kunti wakita ki?

¹⁵ Lunge, kunti wamona kyakolele kumana vyakubombia mafunde a Bibilia auli mukusambilila. Keekio i kilengele Yehova abombie kuteania kwakue eevi kukupeela mpapulo ilondoluele palua Bibilia ili kukukwasia kupusania kiweeme ni kibiipile. (Baeb. 5:13, 14) Kine wasoma ni kusambilila ezio mpapulo, wakaba kumona viili yalondoluela mpunda paleepale yenka ikupalile, kabili kunti watona kwingila mu kuteania kwakue Yehova.

16. Yehova apangile siani bantu bakue?

¹⁶ Sambilila kutona ni kukwasia kuteania kwakue Yehova. Yehova waapangile bantu bakue mu bilonghaano, ni mwana wakue Yesu i mutue wa bilonghaano byonse. (Baef. 1:22; 5:23) Yesu waasaakuile libumba liniini lya bantu babiikilue mafuta eevi batungulule mu kupanga miilo yatonene ikitike loonu. Yesu waakuutile leelio lubumba liniini lya bantu nangue “muzia wa kisinka ni wa maano,” kabili bantu bali mu leelio libumba bakwete bafiniizie miilo ya kukuliisia ni kukusuunga kimupasi. (Mat. 24:45-47) Muzia wa kisinka ali wasininkizia nangue bakote bapalile ba mu kilonghaano basaakulua, ezio i nzila imo pakati ka nzila ili yamukwasia ozo muzia kukwemena.  (Is. 32:1, 2; Baeb. 13:17; 1 Pet. 5:2, 3) Bakote batonene kwipeela juu yobe, kukukoselezia, ni kukukwasia kukuzia bukibuza bobe bwa peepi pamo ni Yehova. Inzi, kukukwasia ubasambilizie bange palwakue Yehova i kintu kimo kya mana saana kibali kuviinda kukukitila.​—Baef. 4:11-13.

17. Nga vilandile lileembo lya Baroma 10:10, 13, 14, juu ya ki tuli twababuilako bange palwakue Yehova?

¹⁷ Kwasia bange basambilile kumutona Yehova. Yesu waabalandile basambi bakue babasambilizie bange palwakue Yehova. (Mat. 28:19, 20) Kunti kyakitika kunakila ku azo malaizio, paantu tumanine nangue tulandilue kukita evio. Musita ntono yobe kuli Yehova luili kuya yakula, wakaba kwiunvua nga evelia vyaiunvuile mutumua Petro ni Yoane. Baalandile eevi: “Tetuvinda kulekela kulanda pa bintu bitwaimweneene ni kwiunvwila.” (Miilo 4:20) Kumukwasia muntu amutone Yehova, kuli kwaleeta nsaansa ikata saana. Tontonkania nsaansa yaaunvuile kasimika Filipo musita lwamukwasiizie mwalalume Mwetiopia kusambilila kisinka kyaali mu Maleembo ni kufikiila kubatiziiwa! Kine wakoonka mufuano wakue Filipo, ni kunakila malaizio akue Yesu palua kusimikila, uli kulangilila nangue utonene kwaluka umo wa Bakasininkizia Bakue Yehova. (Soma Baroma 10:10, 13, 14.) Palua kaako, kunti waiipuzia kelia kyenka kiipuzio kyaiipuziizie Mwetiopia: ‘Ni kiki kili kunghanzia kubatiziiwa?’​—Miilo 8:36.

18. Twakaba kusambilila ki mu lyasi likoonkelepo?

¹⁸ Uli kukita lutanfu lwa mana saana kine wapingula kubatiziiwa. Paantu loolo lutanfu te lwa musaapo, upalile kumana buino bintu bikabiilue. Upalile kumana ki palua kubatiziiwa? Upalile kukita ki ntaanzi ni kisia kubatiziiwa? Bebio biipuzio byakaba kwasukua mu lyasi likoonkelepo.