Miilo imo pakati ka miilo ingi yaali yabombua na bantu basyaali bakoani mu mukowa wa Balawi, yaali ya kubomba bali bapolisi. Baali batungululua na kapita wa mu ekalu. Kaleemba Muyuda ali wakuutua Philo, walondolola miilo yaali yabomba babo bapolisi. Walanda eevi: “Bamo pakati ka babo [Balawi] baali baimana ku muliango baali bakamwenenena ba ku miliango ikata, pene-peene pa kwingilila, ni bange baali babombela mukati [nkeende ya ekalu] ntaanzi ya patakatiifu eevi kukingilila muntu onse asiizi kukindika mizilo te kunti engilemo, ibe yaali mukwitonena ao abe. Bange bazaamu, baali bazyungulukila ekalu bakomboziana kubomba busiku ni koba eevi kumwenenena ekalu.”

Babo bapolisi baali babombiiwa na Sanhedrini. Keekio i kikundi kimosie kya Bayuda kyaali kyapeelue nsaambu na Baroma ya kuya kyakwete biluilo.

Joachim Jeremias, muntu asambiliile saana palua Bibilia walondolola nangue, “milandu yakue Yesu ya kubaluula lubamukwete, ilandile nangue nsiku kwa nsiku waali mu ekalu wali mukusambilizia kabili bila kukwatua (Mat. 26.55), yamoneka kuya yaali ya kisinka kine bapolisi ba mu Ekalu i baaizile kumukwata.” Ozo wenka kaleemba wazumiine nangue baalia baatuminue kuya kumukwata Yesu ntaanzi ya paapo, ni beene baali benka bapolisi ba ku ekalu. (Yoane 7:32, 45, 46) Kisia nsiku kupita, bapolisi pamo ni kapita wabo baatuminue kuya kubatwama basambi bakue Yesu ni kubaleeta ku Sanhedrini. Kabili, kipalile ni benka ba polisi ba mu ekalu i baamutweeme mutumua Paulo kineneene ni kumutwala panze pa ekalu.​—Miilo 4:1-3; 5:17-27; 21:27-30.