LYASI LYA KUSAMBILILA LYA 10
Weewe Kunti Waviinda ‘Kuvuula Bumuntu bwa Kale’
“Vuule bumuntu bwa kale pamo ni bikitua byakue.”—BAKOL. 3:9, NWT.
LWIMBO 29 (Lwa Kiswahili) Kwikala Kukoonkana ni Liina Lyetu
KIFUPI KYA LYASI *
1. Buikazi bobe bubanga bwali siani ntaanzi ya kutendeka kusambilila Bibilia?
BUIKAZI bobe bubanga bwali siani ntaanzi ya kutendeka kusambilila Bibilia pamo ni Bakasininkizia Bakue Yehova? Bengi pakati keetu te beezi kutona kutontonkania palua bobo buikazi. Kipalile aali ni bumuntu bwetu byaali byatungululua na bintu bili byalanda bantu ba mu kyalo nangue i biweeme ao i bibiipile. Kine i evio, twaali ‘twaikeele mu keenu kyalo tekuba twali na maswapi kabili tekuba twali na Leeza.’ (Baef. 2:12) Kisia kusambilila Bibilia, buikazi bwetu bwaalulukile!
2. Ni kiki kiwaavumbuile musita luwaasambiliile Bibilia?
2 Musita luwaatendekele kusambilila Bibilia, waafikiile kwinika nangue weewe uli ni Baba obe wa ku muulu akutonene saana. Waafikiile kwinika nangue kine utonene kumusaansamusia Yehova ni kwaluka mu lupua lwakue lwa bantu bali bamupupa, upalile kukita bupilibuko bukata mu buikazi bobe, mu aali yobe ni mukutontonkania kobe. Upalile kusambilila kukita bintu bili byalanda Yehova nangue biweeme ni kutiina kukita beelia byali walanda nangue bibiipile.—Baef. 5:3-5.
3. Nga vilandile Bakolosai 3:9, 10, Yehova atulandile tukite ki, kabili tuli kulondoluela ki mu leeli lyasi?
3 Yehova Kabumba weetu kabili Baba weetu wa ku muulu, ali ni nsaambu ya kupingula mibeele ipalile kukoonka bantu ba mu lupua lwakue. Kabili, atuloombele twikwinde saana ‘kuvuula bumuntu bwa kale pamo ni bikitua byakue’ ntaanzi ya kubatiziiwa. * (Soma Bakolosai 3:9, 10.) Leeli lyasi lili kubakwasia baalia batonene kubatiziiwa kwasuka beebi biipuzio bitatu: (1) “Bumuntu bwa kale” ni kiki? (2) Juu ya ki Yehova ali watulanda tuvuule bumuntu bobo? (3) Kunti twaviinda siani kuvuula bumuntu bobo? Ku bantu baabatiziiziwe kale pakati keetu, leeli lyasi lili kubakwasia kutiina kukita ao kutontonkania nga vibaali bakita ntaanzi tebanavuule bumuntu bwa kale.
“BUMUNTU BWA KALE” NI KIKI?
4. Muntu ali watungululua na “bumuntu bwa kale” ali wasaangua wali siani?
4 Muntu ali watungululua na “bumuntu bwa kale,” lingi ali wasaangua watontonkania ni kukita bintu mu nzila ili yatwalana ku mazaambi. Kunti waya waitonene muine, wafiitua lubilo, bila watasia, kabili wali ni kibuli. Kunti waya wasekelela kumona porno, kumona ma viideo alangiliile lwendo lubiipile lwa bupungue ni bungipaani. Kakiine, kunti wasaangua ni mibeele iweeme, kabili kunti waya waiunvua ovio palua bintu byali walanda ni kukita. Inzi, mutima wakue teumukinkiziizie kwalulula malanga ni lwendo lwakue.—Bag. 5:19-21; 2 Tim. 3:2-5.
Kine twavuula “bumuntu bwa kale,” mibeele ni bikitua bya kimubili te biya byatutungulula kabili (Mona lifungu lya 5) *
5. Eba, kunti twaviinda kuvuula bumuntu bwa kale mu nzila ipuililikile? Londolola. (Miil Bat. 3:19)
5 Te tupuililikile, pakaako, te kuli muntu ali kuviinda kufumia mu mutima ni mu maano akue malanga onse abiipile ni nkulu yonse ibiipile. Nsita inge kunti twakita ao kulanda kintu kili kulengia tufikiile kwiunvua ovio. (Yer. 17:9; Yak. 3:2) Inzi, kine twavuula bumuntu bwa kale, mibeele ni bikitua bya kimubili tebiviinda kuya byatutungulula kabili. Twaaluka bantu beebeleele.—Is. 55:7; soma Miilo 3:19.
6. Juu ya ki Yehova ali watusoka tulekele kutontonkania bintu bibiipile ni kulekela mibeele ibiipile ya bumuntu bwa kale?
6 Yehova ali watusoka tulekele kutontonkania bintu bibiipile ni kulekela mibeele ibiipile paantu atutonene saana, kabili atonene tusekelele buikazi. (Is. 48:17, 18) Amanine nangue baalia basiizi kuluisia nkulu ibiipile bali baikisia bo beene ni kubakisia baalia bali peepi naabo. Ali wakisika musita lwali wamona twaikisia fwe beene ni kubakisia bange.
7. Nga vilandile Baroma 12:1, 2, tupalile kusaakula kukita ki?
7 Paange ku ntendeko, bange babibuza ni bantu bange ba mu lupua, kunti batuseka paantu tuli mukwikwinda kwalulula bumuntu bwetu. (1 Pet. 4:3, 4) Paange kunti batendeka kutulanda nangue tuli ni nsaambu ya kukita kyonse kitutonene, kabili nangue te tupalile kulekelela bantu bange batubuile beelia bitupalile kukita. Inzi, baalia bali bapuulula mafunde akue Yehova, kakiine te bali na buntungua ao uru. Kulanda kisinka, bali balekelela kyalo kiteekelue na Sataana kibatungulule. (Soma Baroma 12:1, 2.) Fwe bonse tupalile kusaakula: Kine ni kutwalilila kuya twali ni bumuntu bwa kale bolia buli bwatungululua na lizaambi ni kyalo kyakue Sataana, ao kine ni kumulekelela Yehova atwalulule eevi twaluke bantu baweeme saana loonu.—Is. 64:8.
KUNTI ‘TWAVUULA’ SIANI BUMUNTU BWA KALE?
8. Ni biki bili kuviinda kutukwasia kulekela malanga abiipile ni mibeele ibiipile?
8 Yehova amanine nangue kunti kyatwama musita ni maka eevi tufikiile kulekela malanga abiipile ni mibeele ibiipile. (Malum. 103:13, 14) Anzia evio, kupitila Mulandu wakue, mupasi wakue, ni kuteania kwakue, Yehova ali watupeela mulangue, maka ni kutukwasia mu nzila itukabiile eevi twalulule bumuntu bwetu. Kulanda kisinka, waakikukwasia kale. Kansi, tumone bintu paleepale byupalile kukita eevi ukile kuvuula bumuntu bwa kale, ni kwaluka ni mibeele ipalile eevi ufikiile kubatiziiwa.
9. Mulandu Wakue Leeza kunti wakukwasia kukita ki?
9 Bombia Bibilia eevi witoosie saana we muine. Mulandu Wakue Leeza uli wabomba nga kio; kunti wakukwasia kutoosia beelia byuli watontonkania, byuli walanda ni byuli wakita. (Yak. 1:22-25) Olia ali wakusambilizia Bibilia pamo ni Bakristu bange bakosele kimupasi, kunti bakupeela masoke. Kwa mufuano, kunti babombia Maleembo ali kukukwasia kwinika beelia byuli waviinda kukita ni bilubo byobe. Kunti bakusambilizia vya kupata mpunda iswapiile Bibilia ili kukupeela masoke ali abomba alangiliile vya kuluisia mibeele ibiipile. Kabili lyonse Yehova eteaniiziesie eevi kukukwasia. Amanine buino saana vya kukukwasia, kabili amanine bintu bili ku mutima obe. (Tus Maf. 14:10; 15:11) Kansi, uye wapepa lingi ni kusambilila Mulandu Wakue Leeza kila busiku.
10. Weewe, wasambilila ki kupitila mufuano wakue Elie?
10 Uye wasininkiziizie nangue mafunde akue Yehova i aweeme saana. Kine twakita kila kintu kili kyatulanda Yehova kukita, kunti twanoonkelamo. Baalia bali baikala kukoonkana ni mafunde akue, bali bakindikua, bali basaangua ni buikazi buli ni mupaango, kabili bali basaangua ni nsaansa ikata. (Malum. 19:7-11) Kupusana ni babo bantu, baalia bali bapuulula mafunde akue Yehova, bali bapata maavia ali afuma mu kukita miilo ya mubili. Mona vyalanda mwalalume umo ali wakuutua Elie palua kukaana kukoonka mafunde akue Leeza. Waakuziiziwe na baviazi babanga bamutonene Yehova. Inzi, musita Elie lwabanga waya wakula, waatendekele kwenda pamo ni bantu bali ni lwendo lubiipile. Waatendekele kubombia miti ili yakolana, kuya wali ni lwendo lwa bupungue ni kwiba. Elie walanda nangue waalukile muntu ali wafipua saana kabili wa mazibo. Walanda eevi: “Naali nakita kila kintu kinaasambiliziiziwe nangue Mukristu tapalile kukita.” Anzia evio, Elie taalabile bintu byaasambiliziiziwe musita lwabanga wakili mwanike. Kisia, waatendekele kabili kusambilila Bibilia. Waaikwindile saana kulekela mibeele ibiipile ni kufikiila kubatiziiwa mu muaka wa 2000. Kukoonka mafunde akue Yehova, kwakimukwasia siani? Elie walanda eevi: “Loonu ndi ni mutende mu maano, kabili ndi ni kampingu kaswetele.” * Mufuano wakue Elie watukwasia kwinika nangue baalia bali bakaana kukoonka mafunde akue Yehova, bali baikisia bo beene. Anzia evio, Yehova atonenesie kubakwasia eevi baaluluke.
11. Ni bintu ki bili byasuula Yehova?
11 Sambilila kusuula beelia bisiizi kutona Yehova. (Malum. 97:10) Bibilia ili yatubuila nangue Yehova teezi kutona “menso a kwileendula, lulimi luli lwabeepa, ni minue ili yaitila milopa isili na kilubo.” (Tus Maf. 6:16, 17) Kabili “ali wasuula bantu bali bakita bintu bya bungipaani ni baalia bali babeepana.” (Malum. 5:6) Yehova ali wasuula saana ezio aali ni bebio bikitua, keekio i kyaalengiizie enoone bantu bonse babiipile ba mu nsiku yakue Noa paantu baaizuziizie kyalo na bubiifi. (Kut. 6:13) Mona mufuano unge. Kupitila kabika Malaki, Yehova waalandile nangue ali wabasuula saana baalia bali batunga bufi eevi kubakaana bakazi ao balume babo basili na kilubo. Leeza ali wakaana lupupo lwabo, kabili wakabapingula palua lwendo lwabo.—Mal. 2:13-16; Baeb. 13:4.
Kukita kintu kili kyalanda Yehova nangue kibiipile, kupalile kuya kwali kintu kya nkeni kili nga kulia kyakulia kibolele (Mona lifungu lya 11-12)
12. ‘Kusuula kintu kibiipile’ kuli na mana ki?
12 Yehova atonene ‘tusuule kintu kibiipile.’ (Bar. 12:9) Mulandu ‘kusuula’ ulangiliile kukaana saana, i kulanda kusuula saana, kumona kintu kuya kyali kya nkeni. Tontonkania vyuli kwiunvua kine bakulanda ulie kyakulia kibolele. Kutontonkaniasie palua keekio kintu kunti kwakulengia wiunvue ovio. Enka evio ni fwefue, kutontonkania palua kintu kili kyalanda Yehova nangue kibiipile, kupalile kutulengia twiunvue ovio.
13. Juu ya ki tupalile kusuunga buino malanga etu?
13 Suunga buino malanga obe. Beelia bituli twakita, bili byatungululua na beelia bituli twatontonkania. Keekio i kyaalengiizie Yesu atusoke tulekele kutontonkania bintu bili kutufikia ku kukita lizaambi likata. (Mat. 5:21, 22, 28, 29) Kakiine, tutonene kumusaansamusia Baba weetu wa ku muulu. Kansi, ni kintu kya mana saana kufumia bila kukokola malanga onse abiipile ali aiza mu maano etu!
14. Bulanzi bwetu buli bwalangilila ki palwetu, kabili ni biipuzio ki bitupalile kwiipuzia?
14 Toosia bintu byuli walanda. Yesu waalandile eevi: “Kintu kili kyafuma mu kanua ka muntu kili kyafuma mu mutima.” (Mat. 15:18) Kakiine, milandu yeetu ili yalangilila saana vili bumuntu bwetu bwa mukati. Kansi, iipuzie eevi: ‘Eba, ndi nakaana kubeepa anzia kine kulanda kisinka kunti kwandeetela buavia? Kine ndi muntu opile ao opilue, eba, ndi natiina kumusaapila ovio mwalalume ao mwanakazi unge? Eba, ndi natiina saana bulanzi bwa bupungue? Kine muntu wanduvia, eba, ndi namwasuka nateekameene?’ Kutontonkania bebio biipuzio wapoozeleko maano kuli kukukwasia. Milandu yuli walanda kunti yapalaniiwa na mabuto a ku ngubo yobe. Kine waikwinda saana kufumia bulanzi bubiipile, bwa bufi ni bwa bupungue mu milandu yobe, wakaba kumona kyaleengele kuvuula bumuntu bwa kale.
15. Kwipaya bumuntu bwetu bwa kale “pa kimuti” kuli na mana ki?
15 Uye watonene kukita kintu kyonse kya mana kyupalile kukita. Mutumua Paulo waabombiizie mufuano eevi kutusambilizia nangue ni kintu kya mana saana kwalulula aali yeetu ya buikazi. Waaleembele nangue tupalile kwipaya bumuntu bwetu bwa kale “pa kimuti.” (Bar. 6:6, NWT) I kulanda nangue tutonene kukoonka mufuano wakue Kristu. Tupalile kwipaya mibeele ni bikitua bisiizi kutona Yehova. Tupalile kukita bebio bintu eevi twaluke ni kampingu kaswetele ni kiswapilo kya kusekelela bukose bwa loonse. (Yoan. 17:3; 1 Pet. 3:21) Languluka nangue Yehova taviinda kwalulula mafunde akue eevi atusaansamusie. Inzi fwefue i bapalile kwalulula bumuntu bwetu ni kwipatanisia ku mafunde akue.—Is. 1:16-18; 55:9.
16. Juu ya ki upalile kuya wapinguile kutwalilila kuluisia nkulu ibiipile?
16 Twalilila kuluisia nkulu ibiipile. Atasie kisia kubatiziiwa, upalile kutwalilila kuluisia nkulu ibiipile ya kimubili. Mona kintu kyaaimweneene mwalalume umo ali wakuutua Maurício. Musita lwabanga wali mulumendo, waatendekele kwiingizia mu mibeele ya kulaalana balalume kwa balalume. Kisia, waasaakeene ni bantu bakue Yehova ni kutendeka kusambilila Bibilia. Kisia kukita bupilibuko mu buikazi bwakue, waabatiziiziwe mu muaka wa 2002. Anzia kine loonu wakita kale miaka ingi wamubombela Yehova, Maurício walanda eevi: “Nginikile nangue nsita inge, ili yaloomba kuya naluisia palua nkulu ibiipile.” Keekio, te kiizi kumulengia atioke mutima. Inzi walanda eevi: “Ndi nateekiwa mutima paantu nginikile nangue kine nasaakula kutiina kukita kukoonkana ni ezio nkulu ibiipile, kunti namusaansamusia Yehova.” *
17. Bintu byaaimweneene Nabiha byakukinkizia siani weewe?
17 Pepa kuli Yehova eevi akukwasie, kabili swapila mupasi wakue apana maka obe we muine. (Bag. 5:22; Baf. 4:6) Tupalile kwikwinda saana kine tutonene kuvuula bumuntu bwa kale ni kusiala twabupoozele kule. Mona kintu kimo kyaaimweneene mwanakazi umo ali wakuutua Nabiha. Baba wakue waamusiile musita lwabanga wakilisie na miaka sita. Walanda eevi: “Naakisikile saana.” Lwaalukile mukulu, Nabiha waalukile muntu ali wafipua saana kabili wa mazibo. Waatendekele kusisia miti ili yakolana, kisia waakakilue ni kukita miaka wali mu buloko. Bakasininkizia bamo, baaile kwendela ku buloko ni kutendeka kusambilila Bibilia pamo nakue. Nabiha waatendekele kukita bupilibuko bukata. Walanda eevi: “Kuli mibeele inge ibiipile ibanga yaleengele kulekela. Inzi, kupeepa kubanga kwakolele saana kulekela.” Nabiha waakitile kipindi kikilile pa muaka umo waluisia kulekela kupeepa, kisia waafikiile kulekela. Waaviindile siani? Walanda eevi: “Kintu kikata kyaankwasiizie ni kupepa lingi kuli Yehova.” Loonu wabalanda eevi bange: “Kine neene nakiviinda kukita bupilibuko eevi musaansamusie Yehova, kila muntu onse kunti waviinda!” *
KUNTI WAVIINDA KWALUKA NI MIBEELE IPALILE EEVI UBATIZIIWE!
18. Nga vilandile 1 Bakorinto 6:9-11, babombi bengi bakue Leeza bakiviinda kukita ki?
18 Mu miaka mia ya ku ntendeko, bantu bange baasaakwilue na Yehova eevi bakateeke pamo ni Kristu, lwa ntaanzi babanga bakita bintu bibiipile saana. Kwa mufuano, babanga bakita bukende, kulaalana balalume kwa balalume ni banakazi kwa banakazi ni kwiba. Inzi, kupitila kukwasiiwa na mupasi utakatiifu wakue Leeza, baaviindile kwalulula mibeele yabo. (Soma 1 Bakorinto 6:9-11.) Enka evio ni loonu, Bibilia ili mukukwasia mamilioni a bantu kwalulula buikazi bwabo. * Baakilekela kukita bintu bibiipile bibanga byakolele saana kulekela. Mufuano wabo wasininkizia nangue ni weewe kunti waviinda kwalulula bumuntu bobe ni kuluisia mibeele ibiipile eevi ufiikile kubatiziiwa.
19. Twakaba kulondoluela ki mu lyasi likoonkelepo?
19 Kukila pa kwikwinda kuvuula bumuntu bwa kale, baalia batonene kubatiziiwa, bapalile kwikwinda kuvuala bumuntu bwa leenu. Lyasi likoonkelepo lyakaba kutubuila vya kuvuala bumuntu bwa leenu, ni bange vibali kuviinda kutukwasia.
LWIMBO 41 (Lwa Kiswahili) Napapaata Tuilizia Lipepo Lyane
^ kip. 5 Eevi tufikiile kubatiziiwa, tupalile kuya twatonene kwalulula bumuntu bwetu. Leeli lyasi lili kutukwasia kumana kine ni mibeele ki ili yasaangua mu bumuntu bwa kale, juu ya ki tupalile kuvuula ezio mibeele, kabili kunti twakita siani eevi tuviinde kuvuula mibeele ezio. Mu lyasi likoonkelepo, twakaba kusambilila vya kutwalilila kuvuala bumuntu bwa leenu atasie kisia kubatiziiwa.
^ kip. 3 MILANDU ILONDOLWELUE: ‘Kuvuula bumuntu bwa kale’ kuli na mana ya kwifumia mu mibeele ni nkulu elia isiizi kutona Yehova. Tupalile kutendeka kukita evio ntaanzi ya kubatiziiwa.—Baef. 4:22.
^ kip. 10 Eevi upate mpunda ingi, mona mutue wa lyasi ulandile, “Biblia Inabadili Maisha—‘Nilihitaji Kumrudia Yehova,’” mu Lupungu Lwakue Kamwenenena, lwa Kiswahili, lwa pa busiku 01 Muezi wa 04, 2012.
^ kip. 16 Eevi upate mpunda ingi, mona mutue wa lyasi ulandile “Biblia Inabadili Maisha—‘Walinitendea kwa Fadhili Sana,’” mu Lupungu Lwakue Kamwenenena, lwa Kiswahili, lwa pa busiku 01, Muezi wa 05, 2012.
^ kip. 17 Eevi upate mpunda ingi, mona mutue wa lyasi ulandile “Biblia Inabadilisha Maisha ya Watu—‘Nilifikia kuwa kijana mwanamuke mwenye kukasirika haraka na muchokozi,’” mu Lupungu Lwakue Kamwenenena, lwa Kiswahili Congo, lwa pa busiku 01 Muezi wa 10, 2012.
^ kip. 18 Mona kisanduku kilandile, “ Bibilia Ili Yaalulula Buikazi bwa Bantu.”
^ kip. 64 BULONDOLOZI BWA FOTO: Kufumia mibeele ni bikitua bibiipile kuli nga kuvuula ngubo ya kale.
