Bantu bange bali basoma lubilo-lubilo leeli lyasi, bali baiipuzia keekio kiipuzio. Inzi, mu ezio milongo muli balalume babili bapuseene baali bakuutua ba Mefibosheti.

Likolo Sauli wa Israeli abanga wali na baana saba balalume ni baana babili banakazi. Muana libeli wakue Sauli abanga wakuutua Yonatani. Kisia likolo pamo ni Rispa mukazi wakue unge, baavyele muana unge waali wakuutua Mefibosheti. Kabili kintu kinge ni keeki, Yonatani ni weene abanga wali ni muana abanga wakuutua Mefibosheti. Pakaako, Likolo Sauli abanga wali ni muana waali wakuutua Mefibosheti, ni mwinzikulu waali wakuutua mu leelio lyenka liina.

Likolo Sauli waatendekele kubasuula Bagibeoni ni kwezia kubeepaya bonse. Kimonekele, kubanga kwali mpendua ya bantu baaipailue pakati kaabo. Keekio kintu kibanga kyabiipile. Juu ya ki? Paantu lwa ntaanzi mu nsiku yakue Yoshua, bakulu ba Baisraeli baalaile kukita mutende pamo ni Bagibeoni.​—Yosh. 9:3-27.

Bulayo bobo bubanga bwakibombasie ni mu nsiku yakue Likolo Sauli. Kupusana ni bobo bulayo, likolo waaeziizie kubeepaya Bagibeoni bonse. Kwezia kooko, kwaalengiizie ‘Sauli ni bantu ba mu nsesi yakue baaluke ni kilubo kya kwitila milopa.’ (2 Sam. 21:1) Kupuako Daudi, waalukile likolo. Bagibeoni baapusukile, baamubuilile Daudi keekio kilubo kikata. Eevi Yehova apaale kyalo, Daudi waabeepuziizie kintu kipalile kukitua kya kulipilamo palua kintu kibiipile kyaakitile Sauli. Kuliko kuloomba nfalanga, Bagibeoni baaloombele baana saba bakue olia muntu waali “wapaanga kubalovia,” batwalue ni kwipaiwa. (Mpen. 35:30, 31) Daudi waaitabiziizie kintu kibaaloombele.​—2 Sam. 21:2-6.

Kisia ba Sauli ni Yonatani baafuile ku bului, inzi Mefibosheti muana mwina Yonatani, weene waasiele wakosele. Waalukile kilema mu aksida yaakitikile lwaali wakili mwanike, kabili taakwasiizie mipaango yaakitile babu wakue ya kubeepaya Bagibeoni. Ba Daudi ni Yonatani baakitile bukibuza, kabili bobo bukibuza bubanga bwa kunoonsia ni baana babo, kubiika mukati ni Mefibosheti muana mwina Yonatani. (1 Sam. 18:1; 20:42) Mpunda ine ilandile eevi: “Likolo [Daudi] waamunvuiliile Mefibosheti nkumbu, muana mwina Yonatani muana mwina Sauli, paantu ba Daudi ni Yonatani mwina Sauli baakitile kilapo pakati kaabo ntaanzi yakue Yehova.”​—2 Sam. 21:7.

Daudi abanga wakikindikilesie bintu byaaloombele Bagibeoni. Waafumiizie baana babili balalume bakue Sauli, umo wabo waali wakuutua Mefibosheti, ni benzikulu basano bakue Sauli. (2 Sam. 21:8, 9) Keekio kintu kyaakitile Daudi, kyaakwasiizie kilubo kya kwitila milopa kipue mu kyalo.

Eezi mpunda, te lyasisie. Muzilo wakue Leeza te ubanga wafyeme. Muzilo waali walanda eevi: “Baana te bapalile kwipaiwa palua bintu bili byakita ba baba wabo.” (Mal Miz. 24:16) Kabenge baalia baana babili bakue Sauli pamo ni benzikulu bakue basano te babanga bali na kilubo, Yehova nga taaitabiziizie bepaiwe. Ozo muzilo waaongeziizie eevi: “Muntu apalile kwipaiwasie palua lizaambi lyakue muine.” Kimonekele nangue baalia bantu saba ba mu lupua lwakue Sauli, baakwasiizieko mipaango yakue Sauli ya kwezia kubeepaya Bagibeoni. Keekio kyaalengiizie babo bantu saba balipile palua bilubo byabo.

Leeli lyasi, lyalangilila nangue muntu taviinda kwipokolola mu bintu bibiipile byaakikita wali mukutontonkania ao kulanda nangue weene wakikoonkasie bintu byaakilandua kukita. Milandu imo ya mulangue ili yalanda eevi: “Waamia muli mwapita makasa obe, ni nzila yobe yonse yakaba sinta.”​—Tus Maf. 4:24-27; Baef. 5:15.