1-2. Ni kiki kili kyakitika lingi musita bantu lubali babatiziiwa, kabili ni kiki kyupalile kutontonkania?

 EBA, weewe wasaangiluepo kale, wamweneneene kikundi kya bantu ba kubatiziiwa? Weewe, waaunvuile basininkizia kupitila mazui abo, musita ubaasukile ku biipuzio bibili ntaanzi ya kubatiziiwa. Waamwene bantu ba mu lupua lwabo pamo ni babibuza babo baitoneena saana. Musita babo bantu lubaatumpukile mu menda, weewe waaunvuile mapi akoselua kabili waamwene lukebu lwa kila umo lwaaluka ni nsaansa. Mu kulingilila, kila mulungu, maelufu a bantu ali mukukoonka ezio nzila kupitila kwipeela ni kwaluka Bakasininkizia Bakue Yehova Leeza babatiziiziwe.

² Ale weewe? Kine uli mukutontonkania palua kubatiziiwa, uli muntu ebeleele saana mu keenu kyalo kibiipile, paantu uli mukuya ‘wamukeba Yehova.’ (Malum. 14:1, 2) Leeli lyasi lili mukulandila pa lobe, ibe uli mulumendo, mukaziana ao mukulu. Inzi, atasie baalia baabatiziiziwe kale pakati keetu, ni beene batonene kukosia bupinguzi bwetu bwa kumubombela Yehova loonse. Kansi fwe bonse tulondoluele bintu bitatu bili pakati ka nsaambu ingi ili yalengia tutone kumubombela Yehova.

3. Juu ya ki babombi bakue Yehova bali batona kisinka ni nsaambu? (Malumbo 119:128, 163)

³ Yehova waabalandile bantu bakue ‘batone kisinka.’ (Zek. 8:19) Yesu waabakinkiziizie basambi bakue baye bakoonkezia nsaambu. (Mat. 5:6) Keekio kilangiliile nangue iloombele kwaluka ni nkulu ikata ya kukita kintu kya nsaambu, kiweeme kabili kiswetele pa menso akue Leeza. Eba, uli watona kisinka ni nsaambu? Tusininkiziizie nangue uli watona. Tewizi kutona bufi ni kintu kyonse kisiweeme ao kibiipile. (Soma Malumbo 119:128, 163.) Muntu ali wabeepa ali wamupala Sataana, kateeka wa keenu kyalo. (Yoan. 8:44; 12:31) Kubeepela liina litakatiifu  lyakue Yehova Leeza, kuli pakati ka mipaango yakue Sataana. Sataana waatendekele kusalanghania bufi kubambila ku bukisanguka bwa mu Edeni. Weene waaeziizie kubalengia bantu batontonkanie nangue Yehova ali ni butani, kabili nangue weene ni Kateeka asili wa kisinka olia ali wabatana bantu bintu biweeme. (Kut. 3:1, 4, 5) Bufi bwakue Sataana juu yakue Yehova, butwaliliile kwinoona maano ni mitima ya bantu. Musita bantu lubali basaakula kukaana ‘kutona kisinka,’ Sataana kunti wabatungulula mu nzila yonse isili ya nsaambu ni mu lwendo lubiipile.​—Bar. 1:25-31.

4. Yehova alangiliile siani nangue weene ni “Leeza wakisinka”? (Mona ni foto.)

⁴ Yehova ni “Leeza wakisinka,” kabili ali wabasambilizia mukwitonena baalia bamutonene. (Malum. 31:5) Kupitila kukita evio, ali wabakwasia eevi te kunti baye bavulunghaniiwa kabili na bufi bwakue Sataana. Kabili Yehova ali wabasambilizia babombi bakue kuya bali ba kisinka ni kuya bali ba nsaambu. Keekio kili kyabakwasia kuya bakindikilueko ni kuya bali ni mutende wa mukati. (Tus Maf. 13:5, 6) Eba, Yehova waakukitiile kale evio musita luwaali wasambilila Bibilia? Waasambiliile nangue, lyonse nzila yakue Yehova ili yasaangua yaweeme saana ku bantu bonse, ni kuli weewe pa lobe bunke. (Malum. 77:13) Pakaako, utonene kukita keelia kili kyalanda Leeza nangue i kiweeme. (Mat. 6:33) Utonene kusakila kisinka ni kukwasia kubepulula bufi bwaalandilue palwakue Leeza weetu, Yehova. Weewe kunti waviinda siani kukita evio?

5. Weewe kunti wakwasia siani kisinka ni nsaambu?

⁵ Weewe kunti wasaakula kwikala buikazi bulangiliile paswetele ku bantu bonse nangue ukwasiizie kisinka ni kukaana bufi bwakue Sataana. Kunti walangilila nangue utonene Yehova aye wali kateeka obe, kabili nangue utonene kukita beelia byali walanda nangue i biweeme. Weewe kunti wakita siani evio? Mupalame Yehova kupitila lipepo ni kwipeela we muine kuli weene, kisia kita kooko kwipeela kumanike ku bantu bengi kupitila kubatiziiwa. Kutona kisinka ni nsaambu i bintu bikata bipalile kukusonsezia kubatiziiwa.

6. Ni nsaambu ki ili mu Malumbo 45:4 ipalile kukulengia umutone Yesu Kristu?

⁶ Juu ya ki umutonene Yesu Kristu? Mona nsaambu iweeme ili mu Malumbo 45:4. (Soma.) Yesu ali watona kisinka, kwikeefia ni nsaambu. Kine uli watona kisinka ni nsaambu, keekio kilangiliile nangue umutonene ni  Yesu Kristu. Tontonkania Yesu vyaalangiliile mibeele ya kusipa kupitila kusakila kisinka ni nsaambu. (Yoan. 18:37) Inzi, Yesu alangiliile siani nangue atonene mibeele ya kwikeefia?

7. Ni kiki kyakusonsezia weewe palua kwikeefia kwakue Yesu?

⁷ Yesu alangiliile nangue atonene mibeele ya kwikeefia kupitila mufuano wakue. Kwa mufuano, kuliko kwipeela bulumba weene muine, waali wamupeela Baba wakue bulumba bonse. (Mark. 10:17, 18; Yoan. 5:19) Kwikeefia kwakue Yesu kwakulengia weewe wiunvue siani? Eba, kwakukinkizia kumutona Muana wakue Leeza ni kumukoonka? Kakiine i evio! Juu ya ki Yesu ekefiizie? Paantu amutonene, kabili ali wamupala Baba wakue, olia ekefiizie. (Malum. 18:35; Baeb. 1:3) Eba, weewe te ukuliilue kuli Yesu, olia ali walangilila mibeele yakue Yehova mu nzila ipuililikile?

8. Juu ya ki tutonene Yesu aye wali Likolo weetu?

⁸ Tutonene Yesu aye wali Likolo weetu paantu weene ni Kateeka apalile. Yehova muine waamubeeleziizie Muana wakue ni kumusaakula eevi aye wali kateeka. (Is. 50:4, 5) Kabili tontonkania Yesu vyaalangiliile nangue waaipeele kwa ntono. (Yoan. 13:1) Paantu Yesu i Likolo obe, upalile kumutona. Weene waalandile nangue, ali wabakuuta baalia bamutonene weene mu kisinka nangue babibuza bakue, kabili nangue bali balangilila ntono kupitila kukindika malaizio akue. (Yoan. 14:15; 15:14, 15) Kakiine tuli ni lisyuko likata saana lya kuya twali babibuza bakue Muana wakue Yehova!

9. Lubatizio lwa Bakristu lupaleene siani ni lwakue Kristu?

⁹ Kintu kimo kili pakati ka malaizio akue Yesu ni keeki, basambi bakue babatiziiwe. (Mat. 28:19, 20) Weene waatubikiile mufuano. Lubatizio lwakue lupuseeneko mu nzila paleepale ni loolia lwa basambi bakue. (Mona kisanduku kilandile, “ Lubatizio Lwakue Yesu Lupuseene Siani ni Loolia lwa Basambi Bakue?”) Inzi, mu nzila inge lupaleene. Musita lwaabatiziiziwe, Yesu waalangiliile ye muine nangue atonene kukita kutona kwakue Baba wakue. (Baeb. 10:7) Evio vyenka ni basambi bakue Kristu bali babatiziiwa eevi kulangilila nangue baipeela bo beene kuli Yehova. Loolo, kukita kutona kwakue Leeza i kuli kwaaluka kintu kya mana mu buikazi bwabo kuliko kukita kutona kwabo. Pakaako, bali bakoonka mufuano wakue Mulopue wabo.

10. Juu ya ki kumutona Yesu kupalile kukusonsezia ufikiile kubatiziiwa?

¹⁰ Weewe, uzumiine nangue Yesu i Muana lyonga wakue Yehova, kabili uli ni nsaansa paantu weene waasaakwilue kuya wali Likolo eevi ateeke pali fwefue. Umanine nangue Yesu ekefiizie, kabili nangue ali wamupala Baba wakue mu nzila ipuililikile. Weewe wakisambilila nangue, weene waalisiizie bantu baali ni nzala, waateekiizie mutima bantu batiokele mutima, kabili waakosiizie ni baluele. (Mat. 14:14-21) Uli mukumona Yesu vyali mukutungulula kilonghaano kyakue loonu. (Mat. 23:10) Kabili, umanine nangue weene wakaba kutukitila bintu biweeme saana mu musita uli mukuiza wali Likolo wa Bukolo Bwakue Leeza. Weewe kunti walangilila siani nangue umutonene? Kupitila kukoonka mufuano wakue. (Yoan. 14:21) Weewe, kunti watendeka kukita evio kupitila kwipeela we muine kuli Yehova ni kubatiziiwa.

11. Weewe kunti walanda nangue ni nsaambu ki ya mana saana ipalile kulengia muntu abatiziiwe?

¹¹ Kintu kya mana saana kili kyalengia muntu abatiziiwe ni kiki? Yesu waalangiliile malaizio amana saana ali pakati ka malaizio akue Leeza. Waalandile eevi: “Tona Mulopue Leeza obe na mutima obe onse, na mweo obe onse, na maano obe onse pamo ni maka obe onse.” (Mark. 12:30) Eba, ezio milandu ilangiliile vili ntono yobe kuli Leeza?

12. Juu ya ki umutonene Yehova? (Mona ni foto.)

 ¹² Kuli nsaambu ingi saana ili yalengia kumutona Yehova. Kwa mufuano, weewe, waakifikiila kumana nangue weene i “nsulo ya bukose” kabili nangue weene i ali watupeela ‘kubalua . . . bupe buweeme ni bupuililikile.’ (Malum. 36:9; Yak. 1:17) Kila kintu kiweeme kyuli nakio kifumine kuli Leeza weetu wantono, olia ali wapeelana mu kwitonena.

13. Juu ya ki kilubula mulandu i bupe buweeme saana?

¹³ Kilubula mulandu i bupe buweeme saana butwaapeelue na Yehova. Juu ya ki kunti twalanda evio? Tontonkania palua bukibuza bwa peepi saana buli pakati kakue Yehova ni Muana wakue. Yesu waalandile eevi: ‘Ntonenue na Tawe, ao Baba wane’ ni ‘Neene mutonene Tawe.’ (Yoan. 10:17; 14:31) Bukibuza bwabo bwaakilile kuluma lubaakitile mabilioni a miaka bali pamo. (Tus Maf. 8:22, 23, 30) Tontonkania misa yaaunvuile Leeza musita lwaamulekeleele Muana wakue akyuziiwe ni kufua. Yehova abatonene saana bantu, kubiika mukati ni weewe. Keekio i kyaalengiizie amufumie Muana wakue mutonua eevi kukulengia weewe pamo ni bange mukeekale loonse. (Yoan. 3:16; Bag. 2:20) Ezio, i nsaambu ikata ituli naayo ipalile kutulengia kumutona Leeza.

14. Ni mupaango ki uweeme saana mu buikazi uupalile kusaakula?

¹⁴ Ntono yobe kuli Yehova yakikila kukosa musita luwakisambilila bintu bingi palwakue. Kulanda kisinka utonene kumupalama  loonu, ni kutwalilila. Kabili weewe kunti waviinda kukita evio. Weene ali wakusonsezia mu buwaame eevi usaansamusie mutima wakue. (Tus Maf. 23:15, 16) Weewe, kunti wakita evio apanasie kupitila milandu, inzi kabili kupitila bintu byuli wakita. Nzila yobe ya buikazi yakaba kulangilila kine umutonene Yehova kakiine. (1 Yoan. 5:3) Ozo i mupaango uweeme saana mu buikazi bobe uuli kuviinda kusaakula.

15. Weewe kunti walangilila siani ntono yobe kuli Yehova?

¹⁵ Weewe kunti walangilila siani ntono yobe kuli Yehova? Kya kuanza, kunti wakita lipepo liibeleele lya kwipeela we muine kuli Leeza bunke wakisinka. (Malum. 40:8) Kisia kunti wafikiila kubatiziiwa, eevi kwipeela kobe kumanike ntaanzi ya bantu bengi. Nga vitwalondololanga lwa ntaanzi mu leeli lyasi, lubatizio lobe ni lwa mana, kabili bobo ni busiku bwa mana mu buikazi bobe. Weewe watendeka kwikala buikazi bwa leenu, apana pa lobe we muine, inzi palwakue Yehova. (Bar. 14:8; 1 Pet. 4:1, 2) Bobo kunti bwamoneka kuya bwali bupinguzi bukolele kukwata, kabili i evio. Inzi, buli bwaizula nzila ya kupata bukose buweeme saana. Mu nzila ki?

16. Nga vilandile Malumbo 41:12, Yehova ali wabapaala siani baalia bali babombia buikazi bwabo juu ya kumubombela weene?

¹⁶ Yehova i muntu ali ni mibeele ya kupeelana saana. Anzia kine uli kumupeela bintu byavulile siani, lyonse weene wakaba kukubueziizia bintu bikilile paapo. (Mark. 10:29, 30) Wakaba kukupeela buikazi buweeme saana, bulimo mpaalo ingi, kabili buli ni mana saana, atasie loonu, mu keenu kyalo kibiipile. Kabili ezio ikilisie ntendeko. Buikazi bolia bwatendekela pa lubatizio lobe, bupalile kutwalilila. Kunti watwalilila kumubombela loonse Baba obe mutonua. Ntono yobe pamo ni Baba obe, yakaba kutwalilila kukula, kabili weewe, wakaba kwikala loonse nga weene.​—Soma Malumbo 41:12.

17. Ni kiki kyuli kuviinda kumupeela Yehova keelia kyasinapatepo?

¹⁷ Kine weewe waipeela kuli Leeza ni kubatiziiwa, uli kwaluka ni lisyuko lya kumupeela Baba obe kintu kya mana saana. Waakupeele kila kintu kiweeme, kila musita wa nsaansa olia uwaasekeleele. Kine wakita evio, uli kumupeela muine waabumbile myulu ni kyalo, kintu kyasinapatepo, i kulanda kwipeela mu miilo yakue  mu kwitonena. (Yob. 1:8; 41:11; Tus Maf. 27:11) Kakiine ezio i nzila iweeme saana ya kukoonka mu buikazi bobe. Kulanda kisinka kumutona Yehova, i nsaambu iweeme saana ipalile kukulengia ubatiziiwe.

18. Ni biipuzio ki byuli kuviinda kwiipuzia?

¹⁸ Ale uli kwasuka siani keeki kiipuzio, Eba weewe, wakaba kubatiziiwa? Weewesie i ali kuviinda kwasuka. Inzi, kunti kyaaluka buino kine waiipuzia eevi we muine, ‘Juu ya ki nkokuele bila nabatiziiwa?’ (Miil Bat. 8:36) Languluka nsaambu itatu itwafuma mu kulondoluela. Kya kuanza, utonene kisinka ni nsaambu. Iipuzie eevi, ‘Eba, ntonene kumona bolia busiku bwakalanda kila muntu kisinka ni kukita kintu kiweeme?’ Kya bubili, umutonene Yesu Kristu. Iipuzie eevi, ‘Eba, ntonene Muana wakue Leeza kuya wali Likolo wane, kabili eba, ntonene kukoonka mufuano wakue?’ Kya butatu kikilile pa byonse, umutonene Yehova. Iipuzie eevi, ‘Eba ntonene kusaansamusia mutima wakue Yehova kupitila kumubombela weene?’ Kine waitabizia bebio biipuzio, ale ni kiki kilengiizie te kunti ubatiziiwe lwenka loonu?​—Miil Bat. 16:33.

19. Juu ya ki te upalile kutwisika palua kubatiziiwa? Leeta mufuano. (Yoane 4:34)

¹⁹ Kine uli watwisika palua kubatiziiwa, tontonkania mufuano waabombizie Yesu. (Soma Yoane 4:34.) Mona nangue, Yesu waapalaniizie kukita kutona kwakue Baba wakue na kyakulia. Juu ya ki? Kyakulia, kiweeme kuli fwefue. Yesu waali wamanine nangue kila kintu kili kyatuloomba Yehova tukite, kili kyasaangua kyaweeme kuli fwefue. Yehova tatonene fwefue tukite kintu kyonse kya kutulengia tukisike. Eba, Yehova atonene weewe ubatiziiwe? Een. (Miil Bat. 2:38) Kansi, uye wali ni kisinka nangue kunakila malaizio a kufikiila kubatiziiwa, kwakaba kukulengia ukabe kunoonkelamo. Kine teuviinda kutwisika kulia kyakulia kiweeme saana, ale juu ya ki uye watwisika palua kubatiziiwa?

20. Twakaba kulondoluela ki mu lyasi likoonkelepo?

²⁰ Juu ya ki bange bali batiina kubatiziiwa? Bantu bengi kunti baasuka nangue, “Nsinaiteanie.” Kintu kya kumana ni keeki, bupinguzi bwa kwipeela we muine ni kubatiziiwa, i bupinguzi bwa mana saana buwakaba kukwata bukililepo kuwaama. Pakaako, upalile kutontonkania buino palua bobo bupinguzi. Kabili, eevi upale kubatiziiwa, keekio kiloombele musita ni kwikwinda saana. Inzi, kine utonene kakiine kubatiziiwa, ni kiki kyupalile kukita loonu eevi witeanie? Twakaba kumona kyasuko kya keeki kiipuzio mu lyasi likoonkelepo.