1-2. Kine ukilisie mukwiteania palua kubatiziiwa, juu ya ki te upalile kutioka mutima? (Mona foto ili ku ntendeko ya kazeeti.)

 KINE utonene kubatiziiwa, uli ni mupaango uweeme saana. Eba, witeaniizie kubatiziiwa lwenka loonu? Kine umwene nangue witeaniizie, kabili kine ni bakote baitabizia, te kutiina kubatiziiwa mu musita uli mukuiza. Kine wakita evio, wakaba kupaalua mu miilo yakue Yehova.

² Inzi, eba kuli muntu wakikulanda nangue upalile kukitako buyantanzi bunge ntaanzi ya kufikiila kubatiziiwa? Ao, ni weewe i vyumwene? Kine i evio, te kutioka mutima. Kunti wakita buyantanzi ni kufikilizia ozo mupaango wa mana, uye wali mulumendo, mukaziana, ao mukulu.

3. Olia mukulu waali wabombela mu buteeko bwa Etiopia waamwipuziizie siani Filipo, kabili keekio kyaleeta kiipuzio ki? (Miilo 8:36, 38)

³ Soma Miilo 8:36, 38. Mukulu wa mu buteeko bwa Etiopia waamwipuziizie eevi kasimika Filipo: “Ni kiki kili kunghanzia kubatiziiwa?” Ozo mwalalume Mwetiopia waali watonene saana kubatiziiwa, inzi, eba, waali waiteaniizie kakiine palua kubatiziiwa?

4. Mwalalume Mwetiopia waalangiliile siani nangue waali wapinguile kutwalilila kusambilila?

⁴ Mwalalume Mwetiopia “waali waile ku Yerusalemu ku kupupa.” (Miil Bat. 8:27, NWT) Kipalile waaitabiile diini ya Bayuda. Bila kutwisika, waasambiliile palwakue Yehova kupitila milandu itakatiifu ileembelue ya Maleembo a Kiebrania. Inzi, waali watonene kumana bingi. Ale Filipo lwamusaangile ozo mukulu mu musebo, ozo muntu waali wakita ki? Waali wasoma kitabu kya kukunzua kya maleembo akue kabika Isaya. (Miil Bat. 8:28) Keekio, kyaali kyakulia kikosele kya kimupasi. Ozo mukulu wa mu buteeko, taatonene kupeleelasie pa tuntu tuniini twa musinzi; inzi waatonene kutwalilila kusambilila.

5. Mwalalume Mwetiopia waakitile siani palua bintu byaasambiliile?

 ⁵ Ozo mwalalume, abanga wali mukulu wa pa muulu mu buteeko, wali pensina Nanfumu Kandake wa Etiopia; “waali waimaniine bukonto bwakue bonse.” (Miil Bat. 8:27, NWT) Kansi, kipalile ozo mwalalume abanga wali ni miilo ingi ya kukita. Inzi, waakwete musita wa kumupupa Yehova. Taatonene kupeleelasie pa kusambilila kisinka; inzi, waakitile kukoonkana ni beelia byaali wasambilila. Pakaako, waakitile bulendo kufuma ku Etiopia waya ku Yerusalemu ku hekalu, eevi kumupupa Yehova. Kipalile bobo bulendo bwaali bwaloombele musita waleepele, kabili bwali bwa ma depanse. Ozo mwalalume waatonene kuya kumupupa Yehova, anzia kine kyaali kyaloombele kwiteania buino.

6-7. Ntono yakue mwalalume Mwetiopia kuli Yehova yaatwaliliile siani kukula?

⁶ Mwalalume Mwetiopia waasambiliile bisinka paleepale bya leenu kabili bya mana kufuma kuli Filipo. Kisinka kimo kyaasambiliile ni keeki: Yesu waali Masia. (Miil Bat. 8:34, 35) Ozo mukulu wa mu buteeko, waakumiiziwe saana lwaasambiliile palua keelia kyaamukitiile Yesu. Waakitile siani kisia kusambilila bebio bintu? Paange nga waasielesie wali nga vyabanga wali, i kulanda wali muntu akindikilue kabili etabiile diini ya Bayuda. Inzi, ntono yakue kuli Yehova ni Yesu yaakilile kukula. Waakinkiziiziwe kukwata bupinguzi bwa mana bwa kubatiziiwa wali musambi wakue Yesu Kristu. Filipo lwaamwene nangue ozo mwalalume waali waiteaniizie, waamubatiziizie.

⁷ Kine ni weewe wakoonka mufuano wakue mwalalume Mwetiopia, kunti wafikiila kubatiziiwa. Ni weewe wakaba kuviinda kulanda wasininkiziizie nangue, “Ni kiki kili kunghanzia kubatiziiwa?” Kansi tulondoluele bintu byuli kuviinda kukita, nga beelia byaakitile mwalalume Mwetiopia. Weene, waatwaliliile kusambilila, waali wabombia beelia byaali wasambilila, kabili waatwaliliile kukuzia ntono yakue kuli Leeza.

8. Yoane 17:3 ilandile nangue ni kiki kyupalile kukita?

⁸ Soma Yoane 17:3. Eba, eezi milandu yakue Yesu, yakikukwasia weewe upingule kusambilila Bibilia? Ku bengi pakati keetu kili evio. Inzi eba, yenka ezio milandu yatulanda ni palua kutwalilila kusambilila? Een. Tetukaba kulekela ata kaniini ‘kumumana weene bunke Leeza wa kiine.’ (Kas. 3:11) Twakatwalilila kusambilila loonse. Vituli kuya twakila kusambilila, i vituli kuya twakila kumupalama Yehova.​—Malum. 73:28.

9. Ni kiki kitupalile kukita kisia kusambilila bisinka bya musinzi?

⁹ Tuli twatendeka kusambilila palwakue Yehova na masambilizio a musinzi a Bibilia.  Mu mukanda wakue ku Baebrania, Paulo waakuutile masambilizio a musinzi nangue “masambilizio a mambo.” Taali wakeba kulanda nangue “masambilizio a mambo” te a mana; inzi, waapalaniizie masambilizio azo na mabeele ali aonka muana. (Baeb. 5:12; 6:1) Inzi, waabasokele Bakristu bonse batwalilile kusambilila bintu bikilile pa masambilizio a musinzi pamo ni bisinka bya mukati, bili mu Mulandu Wakue Leeza. Eba, weewe waabambile kale kutona masambilizio a mukati saana a Bibilia? Eba, utonene kutwalilila kukula, kutwalilila kusambilila palwakue Yehova ni mipaango yakue?

10. Juu ya ki bange bali bamona kyakolele kusambilila?

¹⁰ Inzi, bengi pakati keetu bali bamona kusambilila kuya kwakolele. Ale weewe? Eba, ku masomo, waasambiliile vya kusoma ni kusambilila buino? Eba, waasekeleele kusambilila ni kwiunvua nangue waamanine bingi? Ao eba, weewe waafikiile kupingula nangue te uli na buviinde bwa kusambilila buino mu bitabu? Kine i evio, te uli bunke. Anzia evio, Yehova kunti wakukwasia. Weene apuililikile, kabili i Kasambilizia aweeme saana.

11. Yehova alangiliile siani nangue weene i “Kasambilizia . . . Mukulu”?

¹¹ Yehova ali waikuuta nangue “Kasambilizia obe Mukulu.” (Is. 30:20, 21) Weene i Kasambilizia ali ni mibeele ya kupembelela, aweeme kabili ali wamunvua muntu. Ali wakeba bintu biweeme mu basambi bakue. (Malum. 130:3) Kabili, weene taloombele ata kaniini bintu bingi kupita pa beelia bituli kuviinda kukita. Languluka nangue weene i waakitile bongo bobe, bupe buweeme saana. (Malum. 139:14) Twaavyelue twali ni nkulu ya kusambilila. Kabumba weetu, atonene tutwalilile kusambilila lyonse, kabili tuye twasekelela kukita evio. Pakaako, kili buino ‘kwaluka ni kyaka’ kya kusambilila bisinka bya Bibilia. (1 Pet. 2:2) Iibiikile mipaango yuli kuviinda kufikilizia, kabili kindika ntantiko yobe ya kusoma ni kusambilila Bibilia. (Yosh. 1:8) Kupitila kukwasiiwa na Yehova, weewe wakaba kukila kusekelela kusoma ni kusambilila palwakue.

12. Juu ya ki tupalile kupooza maano kuli Yesu mu lisambililo lyetu lya bunke?

¹² Lyonse uye wapisia musita watontonkania palua buikazi bwakue Yesu ni palua miilo yakue ya kusimikila. Kukoonka ntanfu yakue Yesu mu peepi, i nfungulo ya kutukwasia kumubombela Yehova asa mu enu nsita ikolele. (1 Pet. 2:21) Yesu waalandile bila kufiika palua maavia akasaanga basambi bakue. (Luk. 14:27, 28) Inzi, waali wasininkiziizie nangue basambi bakue ba kisinka, bakasiala bali ba kisinka kuli Leeza, nga evelia vyaakitile weene. (Yoan. 16:33) Sambilila bintu byaakitikile mu buikazi bwakue Yesu, kabili iibiikile mipaango ya kumupala weene mu buikazi bobe bwa kila busiku.

13. Ni kiki kyupalile kutwalilila kumuloomba Yehova, kabili juu ya ki?

¹³ Kumanasie kisinka te kutosiizie. Nsaambu ilengele uye wakabiile kumana kisinka ni eezi: Uli kusambilila bingi palwakue Yehova, ni kukuzia mibeele paleepale nga evelia, kumutona weene ni kumuketekela. (1 Bakor. 8:1-3) Luuli mukuya watwalilila kusambilila, uye wamuloomba Yehova aye wakukwasia kukila kwaluka ni kiketekelo. (Luk. 17:5) Ali waasuka mapepo a evio watonene. Kiketekelo kikata kiswapiile kumana kwa kisinka palwakue Leeza weetu, kyakaba kukukwasia kukita buyantanzi.​—Yak. 2:26.

14. Mutumua Petro waalangiliile siani nangue ni kintu kya mana kubombia beelia bituli twasambilila? (Mona ni foto.)

¹⁴ Mutumua Petro waalangiliile juu ya ki ni kintu kya mana basambi bakue Kristu, batwalilile  kubombia beelia bibali basambilila. Waabombiizie mpunda ili mu Bibilia ilandiile palwakue Noa. Yehova waamulandile Noa nangue wakaba kwinoona bantu babiipile ba mu nsiku yakue kupitila nvula ikata. Kumanasie nangue nvula ikata yakaba kuiza, te kwaali kwatosiizie eevi kumukwasia Noa pamo ni lupua lwakue bapusuke. Mona nangue Petro waali walandila palua kipindi kya ntaanzi ya kuiza kwa kibunda, musita “Noa lwaali waunda buato.” (1 Pet. 3:20) Kakiine, Noa pamo ni lupua lwakue, baakitile kukoonkana ni beelia bibaabuililue kuli Leeza kupitila kuunda safina, i kulanda bato ikata saana. (Baeb. 11:7) Kisia, Petro waapalaniizie na lubatizio keelia kyakitile Noa, kupitila kulanda eevi: “Keeki kintu kyaali kyalisie kipalo kya lubatizio luli lwamipususia leenu.” (1 Pet. 3:21) Pakaako, beelia byuli wakita loonu juu ya kwiteania palua kubatiziiwa, kunti twabipalania na miilo ya kuunda safina yaakitile Noa pamo ni lupua lwakue mu miaka ingi. Ni miilo ki yupalile kukita eevi ufikiile kwiteania palua kubatiziiwa?

15. Tuli twalangilila siani nangue twalapila kisinka?

¹⁵ Kintu kimo kili pakati ka bintu bya kuanza bitupalile kukita ni keeki, kulapila mu kisinka mazaambi etu. (Miil Bat. 2:37, 38) Kulapila kwa kisinka kunti kwalengia tukite bupilibuko bukata. Eba, weewe waalekeele kale kukita bintu bisiizi kutona Yehova, nga evelia, kwikala lwendo lwa bukambue, kupeepa, kubombia bulanzi bubolele ao bubiipile? (1 Bakor. 6:9, 10; 2 Bakor. 7:1; Baef. 4:29) Kine, teunakite evio, twalilila kukita bupilibuko. Mubuile olia ali wakusambilizia Bibilia, ao baloombe bakote ba mu kilonghaano kyobe, eevi bakukwasie ni kukutungulula. Kine uli mulumendo ao mukaziana ekeele ku nsesi ya baviazi, twalilila kubaloomba baviazi bobe eevi bakukwasie kulekela mibeele yonse ibiipile, elia ili kukulengia tekuti ubatiziiwe.

16. Ntantiko iweeme ya kukita bintu bya kimupasi ibiikile mukati kiki?

¹⁶ Kabili, ni kintu kya mana kukoonka ntantiko iweeme ya kukita bintu bya kimupasi. Keekio kibiikile mukati kuya ku kulonghaana kwa Kikristu ni kwasukapo. (Baeb. 10:24, 25) Kabili kine wafikilizia mibeele iloombelue eevi kwaluka kasimika, sininkizia nangue uli wasimikila lyonse. Vyuli kuya wakila kukwasia ezio  miilo ili yapususia bukose, i viwakaba kuya wakila kusekelela ezio miilo. (2 Tim. 4:5) Kine uli mulumendo ao mukaziana ekeele ku nsesi ya baviazi, iipuzie eevi: ‘Eba, ili yaloomba baviazi bane bandangulusie palua kuya ku kulonghaana ni kusimikila? Ao ndi nayasie ne muine?’ Kuya wakita bebio bintu we muine kulangiliile nangue uli ni kiketekelo, ni ntono kuli Yehova Leeza, kabili nangue uli walangilila sante palua bintu byaakupeele. Bebio i “bikitua bya kwipeela kuli Leeza,” i kulanda bupe buuli wamupeela Yehova. (2 Pet. 3:11, NWT; Baeb. 13:15) Bupe bonse butuli twamupeela Yehova mu kwitonena, buli bwamusaansamusia Leeza weetu. (Palania ni 2 Bakorinto 9:7.) Tuli twakita bintu bya evio, paantu tuli twatona kumupeela Yehova bintu byetu biweeme saana.

17-18. Ni mibeele ki ya mana yakaba kukukwasia kukita buyantanzi ni kufikiila kubatiziiwa, kabili juu ya ki? (Tuswalo ni Mafunde 3:3-6)

¹⁷ Musita luwakaba kuya watwaliliile kukita buyantanzi eevi kubatiziiwa, wakaba kusaakaana ni maavia. Paange bantu bange kunti bakuseka juu ya kiketekelo kyobe kya leenu kabili kunti bakukyuzia. (2 Tim. 3:12) Paange uli mukuluisia kulekela kukita kintu kimo kibiipile, inzi kabili nsita inge uli wabuela kuponenamo. Ao paange weewe kunti wamona kyakolele kusipikizia, paantu umwene nangue mupaango obe teukaba kuleenga kufikiliziiwa. Ni kiki kyakaba kukukwasia kusipikizia? Mibeele ya mana saana, i kulanda kumutona Yehova.

¹⁸ Kumutona Yehova i mibeele iweeme saana yuli naayo. (Tuswalo ni Mafunde 3:3-6.) Kumutona saana Leeza kunti kwakukwasia kuviinda kusipikizia maavia mu buikazi. Kabili kine uli ni ezio mibeele teukaba kulekela kumubombela Yehova kine wasaakaana ni maavia. Lingi, Bibilia ili yalandila palua ntono ilamatiliile ili yalangilila Yehova ku babombi bakue. Ntono ilamatiliile ilangiliile nangue weene takaba kubasia ata kaniini babombi bakue ao kulekela kubatona. (Malum. 100:5) Weewe waakitilue kwa mufuano wakue Leeza. (Kut. 1:26) Kunti wapala siani ntono ya evio?

19. Weewe kunti wakila siani kutasia palua bintu byonse byaakukitiile Yehova? (Bagalatia 2:20)

¹⁹ Tendeka na kulangilila sante. (1 Bat. 5:18) Kila busiku uye waiipuzia eevi, Yehova wandangilila siani ntono?’ Kisia, sininkizia nangue wamutasia Yehova mu mapepo obe, kupitila kuzimbula bintu bimonekele byakukitilanga. Nga evelia vyaainikile mutumua Paulo palua  ntono yaalangiliilue na Yehova, ni weewe inika nangue Yehova ali wakukitila bintu biweeme pa lobe bunke paantu akutonene. (Soma Bagalatia 2:20.) Iipuzie eevi, ‘Eba, neene ntonene kumubueziizia weene ntono yane?’ Kumutona Yehova kwakaba kukukwasia kutwalilila kuluisia meezio ni kuviinda kusipikizia maavia. Kwakaba kukusonsezia utwalilile kumupupa Yehova lyonse, eevi kumulangilila baba obe nangue umutonene.

20. Ni kiki kyupalile kukita eevi ufikiile kwipeela kuli Yehova, kabili juu ya ki bobo bupinguzi ni bwa mana?

²⁰ Pa musita umo, ntono yobe kuli Yehova, yakaba kukusonsezia ukite lipepo liibeleele. We muine, wakaba kwipeela kuli Leeza. Languluka nangue kine weewe waipeelasie kuli Yehova, wakaba kwaluka ni keeki kiswapilo kiweeme saana: Wakaba kwaluka muntu wakue loonse. Musita luwamupeela Yehova buikazi bobe, wamulaya nangue wakaba kumubombela mu nsita iweeme ni mu nsita ibiipile. Te iloombele ata kaniini kukita bobo bulayo kabili. Kulanda kisinka musita utuli twaipeela, tuli twakwata bupinguzi bukata. Inzi, tontonkania palua keeki: Weewe wakaba kukita bupinguzi buingi mu buikazi bobe, kabili bunge pakati ka bobo bupinguzi bwakaba kuya bwaweeme saana. Inzi, tekuli bupinguzi buwakaba kukita buweeme saana kupita bolia bwa kwipeela we muine kuli Yehova. (Malum. 50:14) Sataana wakaba kwezia kutopia ntono yobe kuli Baba obe, waswapiile nangue weewe teukaba kusiala waali wa kisinka kuli Baba obe. Te kumulekelela ata kaniini Sataana akabe kuviinda! (Yob. 27:5) Ntono yobe ikata yakaba kukukwasia kwikala kukoonkana ni kwipeela kobe ni kukila kwaluka peepi ni Baba obe wa ku muulu.

21. Juu ya ki kunti twalanda nangue lubatizio te mpela inzi ni ntendeko?

²¹ Kisia kwipeela kuli Yehova, babuile bakote ba mu kilonghaano kyobe palua kukwata bupinguzi bwa mana bukoonkelepo. Inzi, lyonse uye walangulukile nangue kubatiziiwa te mpela inzi ni ntendeko. Ezio ni ntendeko ya lwendo lwa buikazi bwa loonse bwa kumubombela Yehova. Pakaako, kosia ntono palwakue Baba obe loonu. Iibiikile mipaango ili kulengia ntono yobe iye yakila kuluma kila busiku. Lwendo lwa evio, lwakaba kukusonsezia ukabe kubatiziiwa. Bobo bwakaba kuya bwali busiku buweeme saana. Inzi, ezio ni ntendekosie. Kansi, ntono yobe kuli Yehova ni kuli Muana wakue itwalilile kukula loonse!