1-2. Ntanzi ya kufikiila kubatiziiwa, muntu apalilenke kukita ki?

 MU MIAKA isano yakipita, bantu bakilile pa milioni imo, bakifikiila kubatiziiwa ni kwaluka Bakasininkizia Bakue Yehova. Nga evelia vikyaali palwakue Timoteo, musambi wa mu kipindi kya miaka mia ya ku ntendeko, bengi pakati ka babo bantu, baasambiliziiziwe kisinka “kutendekela [ku] bwanike” bwabo. (2 Tim. 3:14, 15, NWT) Bamo baasambiliziiziwe palwakue Yehova basyali bakulu, ni bange basyakotele. Mwanakazi umo, waasambiliile Bibilia pamo ni Bakasininkizia Bakue Yehova ni kufikiila kubatiziiwa wasyali na miaka makumi kenda na saba (97)!

² Kine loonu weewe uli mukusambilila Bibilia ao kine baviazi bobe ni Bakasininkizia, eba uli mukutontonkaniako palua kubatiziiwa? Kwibiikila ozo mupaango kuweeme saana. Inzi, ntanzi ya kubatiziiwa, upalile kwipeelanke kuli Yehova. Mu leeli lyasi, tuli kumana kine kwipeela kuli na mana ki. Kabili, lili kukukwasia kumona juu ya ki te upalile kutiina kwipeela ni kubatiziiwa kine witeaniizie kukita evio.

KWIPEELA KULI NA MANA KI?

3. Zimbula bantu balandilue mu Bibilia baalia baali bapeelue kuli Yehova.

³ Lwa kale, muntu epeele kuli Yehova abanga wasaakulua eevi akite miilo iibeleele. Baisraeli babanga bali ntundu ipeelue kuli Yehova. Inzi mu enka ezio ntundu, mubanga mwali bantu bange baali bapeelue kuli Yehova mu nzila iibeleele. Kwa mufuano, Haruni waali wavuala “kalangi katakatiifu ka kwipeela,” i kulanda kibandiko kibeekele kya oro keelia kyaali kyalamikilue pa mupangalala wakue. Keekio kibandiko kya oro kyaali kyalangiliile nangue Haruni waali wasaakwilue eevi kumubombela Yehova mu nzila iibeleele, i kulanda, kwaluka koani mukulu wa Israeli. (Bal. 8:9) Banaziri ni beene baali bapeelue kuli Yehova mu nzila iibeleele. Mulandu, “Munaziri,” olia ufumine mu mulandu wa  Kiebrania nazirʹ, uli na mana ya “muntu abiikilue pa mbali,” ao “muntu epeele.” Banaziri baali baloombelue kukoonka malaizio, alia abanga aleembelue mu Muzilo Wakue Musa palwabo.—Mpen. 6:2-8.

4. (a) Kine weewe waipeela kuli Yehova mu buikazi bobe, ni kintu ki kya mana saana kiwakaba kuya wakita? (b) ‘Kwikaana’ we muine kuli na mana ki? (Mona ni foto.)

⁴ Kine weewe waipeela we muine kuli Yehova, wasaakula kwaluka musambi wakue Yesu Kristu ni kumona kukita kutona kwakue Leeza kuya kwali kintu kya mana saana mu buikazi bobe. Keekio kibiikile mukati kiki? Yesu waalandile eevi: “Kine muntu ali onse watona kunkoonka, ekaane ye muine.” (Mat. 16:24, NWT) Bulanzi, “ekaane ye muine,” bolia bupilibwilue kufuma mu Kigiriki, kunti bwapilibulua kabili nangue “tapalile kwikala kukoonkana ni kutona kwakue ye muine.” Kine weewe waipeela eevi kwaluka mubombi wakue Yehova, te upalile kukita kintu kyonse kyasiizi kutona. (2 Bakor. 5:14, 15) Keekio kibiikile mukati kukaana “miilo ya mubili,” nga evelia kukita bukambue. (Bag. 5:19-21; 1 Bakor. 6:18) Eba, kukoonka azo malaizio kwakaba kulengia buikazi bobe bukole? Ata, paantu weewe umutone Yehova kabili usininkiziizie nangue weene abiikile sheria yakue eevi kukuleetela faida we muine. (Malum. 119:97; Is. 48:17, 18) Lupua umo ali wakuutua Nicholas walanda eevi: “Paange weewe kunti wamona mafunde akue Yehova kuya ali nga kiumba kya buloko kikitilue na byuma beelia bili mukukwanzia eevi te kunti ukite keelia kyutonene. Ao paange kunti wamona mafunde akue Yehova kuya ali nga kisesi kya bankalamu kikitilue na byuma bya kukukingilila eevi te kunti bakulie.”

5. (a) Muntu ali waipeela siani ye muine kuli Yehova? (b) Kwipeela kuli Yehova kupuseene siani ni kubatiziiwa? (Mona ni foto.)

⁵ Muntu ali waipeela siani ye muine kuli Yehova? Ali wakita evio kupitila kupepa kuli weene ni kumulaya nangue wakaba kuya  wamupupa sie weene mu buikazi bwakue. Kulanda kisinka, lwali mukukita evio, ali mukumulaya Yehova nangue weene wakaba kutwalilila kumutona ‘na mutima wakue onse, na mweo wakue onse, na maano akue onse, kabili na maka akue onse.’ (Mark. 12:30, NWT) Apalile kwipeela ye muine kuli Yehova wali pa bunke. Inzi, lwali wakaba kubatiziiwa wakaba kukita evio ntanzi ya bantu, eevi alangilile nangue weene wakiipeela kuli Yehova. Kine muntu waipeela wakita kilapo kiibeleele. Pakaako, apalile kwikala kukoonkana ni kilapo kyakue, kabili Yehova atonene ozo muntu akite evio.—Kas. 5:4, 5.

JUU YA KI UPALILE KWIPEELA WE MUINE KULI YEHOVA?

6. Ni kiki kili kyamusonsezia muntu afikiile kwipeela kuli Yehova?

⁶ Kumutona Yehova i nsaambu ikata ipalile kukulengia weewe wipeele kuli weene. Ezio, te ntono sie ya kwiunvua. Inzi, ipalile kuya yazieme mu “kumana kusili na kilubo” ni mu “kunvua kwa kimupasi.” I kulanda, ntono yobe ipalile kuya yazieme mu bintu biwaasambiliile palwakue Yehova. (Bakol. 1:9, NWT) Kusambilila Maleembo kwaalengiizie usininkizie (1) nangue Yehova kwali kakiine, (2) nangue Bibilia i Mulandu wakue utungulwilue na mupasi, kabili (3) nangue ali wabombia kuteania kwakue eevi kufikilizia beelia byatonene.

7. Ntanzi ya kufikiila kwipeela kuli Leeza, muntu apalile kuya wakita ki?

⁷ Baalia bali baipeela kuli Yehova bapalile kumana masambilizio a musinzi ali mu Mulandu Wakue Leeza. Kabili bapalile kwikala kukoonkana ni mafunde ali moomo. Bali baikwinda kubabuilako bange beelia bibasambiliile. (Mat. 28:19, 20) Bali bakila kumutona Yehova, kabili bali bapingula kumupupa sie weene. Eba, i vikili ni kuli weewe? Kine weewe umutonene Yehova  mu ezio nzila, wakaba kwipeela ni kubatiziiwa apana juu ya kumusaansamusia sie mwalimu obe wa Bibilia ao baviazi bobe. Kabili wakaba kukita evio apana juu ya kukoonka sie benoobe baalia baabatiziiziwe kale.

8. Kutasia kunti kwakukwasia siani upingule kwipeela we muine kuli Yehova? (Malumbo 116:12-14)

⁸ Kine weewe watontonkania palua bintu byonse byaakukitiile kale Yehova, wakaba kumutasia ni kutona kwipeela kuli weene mu buikazi bobe bonse. (Soma Malumbo 116:12-14.) Bibilia ili yalanda nangue Yehova i ali wapeelana ‘kubalua bupe buweeme ni bupuililikile.’ (Yak. 1:17) Ngeleelo yakue Yesu, Muana wakue, i bupe bukilile kutana pa bobo bupe bonse. Tontonkanianke kaniini! Kupitila kilubula mulandu, weewe uli ni fuasi ya kwaluka ni burafiki bwa peepi pamo ni Yehova. Kabili Yehova akupeele kiswapilo kya kwikala loonse. (1 Yoan. 4:9, 10, 19) Kwipeela we muine kuli Yehova kuli pakati ka nzila iweeme saana ya kulangilila nangue uli mukumutasia palua ntono ikata saana elia yaalangiliile. Kabili nangue uli mukutasia ni palua bintu binge biweeme byali wakukitila. (Mal Miz. 16:17; 2 Bakor. 5:15) Mu kitabu Sekelela Buikazi Loonse, lisomo lya 46, kamutue kaniini ka 4, mulandilue saana palua kooko kutasia, kabili muli ni viideo ya dakika itatu ilandile, Mupeele Leeza Bupe Bobe.

EBA WITEANIIZIE PALUA KWIPEELA NI KUBATIZIIWA?

9. Juu ya ki muntu tapalile kwimona nangue atintilue palua kwipeela ni kubatiziiwa?

⁹ Paange kunti wamona nangue teunaiteanie palua kwipeela ni kubatiziiwa. Paange kuli ni bintu byupalile kwalulula mu buikazi bobe eevi ukoonke mafunde akue Yehova, ao paange kupalile kupita musita waleepele eevi ukosie kiketekelo kyobe. (Bakol. 2:6, 7) Te basambi bonse ba Bibilia bali bakita buyantanzi mu namuna imo. Kabili te balumendo ni bakaziana bonse bali basaangua baiteaniizie palua kwipeela ni kubatiziiwa mu miaka imo. Ezia kutoosia bintu byupalile kuwaamia. Kisia, ikwinde kukita beelia byupalile kukita kukoonkana ni buviinde bobe, kabili apana kwipalania ku bange.—Bag. 6:4, 5.

10. Kunti wakita ki kine wamona nangue teunaiteanie palua kwipeela we muine ni kubatiziiwa? (Mona ni kisanduku, “ Baalia Bali Mukukuziiwa na Bakasininkizia Bakue Yehova.”)

¹⁰ Ata sie kine wamona nangue teunaiteanie eevi kwipeela we muine kuli Yehova, te kufumia mu maano ozo mupaango. Muloombe Yehova akukwasie eevi uviinde kwalululako bintu bimo bya mana mu buikazi bobe. (Baf. 2:13; 3:16) Uye wasininkiziizie nangue Yehova wakaba kunvua ni kwasuka mapepo obe.—1 Yoan. 5:14.

JUU YA KI BANGE BALI BATIINA KWIPEELA KULI YEHOVA NI KUBATIZIIWA?

11. Yehova wakaba kutukwasia siani eevi tusiale twali ba kisinka kuli weene?

¹¹ Ata sie kine bange beteaniizie palua kwipeela kuli Yehova ni kubatiziiwa, bakili sie mukutiina kukita evio. Paange bali baiipuzia eevi, ‘Ale kine, kisia kubatiziiwa, nakita lizaambi likata ni kufikiila kutengua?’ Kine ni weewe uli waiipuzia evio, uye wasininkiziizie nangue Yehova wakaba kukupeela kila kintu kyukabiile eevi uviinde ‘kwenda mu nzila imupalile [weene] eevi kumulengia asekelele saana.’ (Bakol. 1:10) Kabili wakaba kukupeela maka aukabiile eevi uviinde kukita bintu biweeme. Paantu tasyakwasiizie bantu bengi, keekio kisininkiziizie nangue weene ali ni buviinde bwa kukukwasia ni weewe. (1 Bakor. 10:13) Ezio i nsaambu imo ilangiliile juu ya ki bantu baniini sie i bali batengua mu kilonghaano kya Kikristu. Yehova ali wabakwasia bantu bakue eevi batwalilile kuya bali ba kisinka.

12. Tupalile kukita ki eevi te kunti tuponene mu lizaambi likata?

¹² Muntu onse asipuililikile ali waeziiwa kukita bintu bibiipile. (Yak. 1:14) Inzi kine weewe  waeziiwa, we muine i wakusaakula kintu kyuli kukita. Kisinka ni keeki, we muine i wakusaakula bintu byupalile kukita mu buikazi bobe. Inzi bange kunti balanda nangue teuviinda kukaana kukita bintu bibiipile kine waeziiwa. Bobo ni bufi. Weewe kunti waviinda kutiina kukita evio. Atasie kine waeziiwa kukita bintu bibiipile, kunti wasaakula kukaana kukita bebio bintu. Eevi uviinde kukita evio, uye wapepa kila busiku, uye watwalilila kukoonka ntantiko yobe ya kusambilila Mulandu Wakue Leeza. Uye walonghaana lyonse ni kusimikilako bange. Kine weewe watwalilila kukita bebio bintu, keekio kyakaba kukukwasia kusiala waikeele kukoonkana ni kilapo kyobe kya kwipeela. Kabili te kulaba ata kaniini nangue Yehova wakaba kukukwasia kukita evio.—Bag. 5:16.

13. Ni mufuano ki uweeme waatubiikiile Yosefu?

¹³ Kine weewe wapinguila mbeela kutendeka loonu, keelia kiwakaba kukita musita luwakaba kweziiwa, wakaba kumona kyaleengele kwikala kukoonkana ni kilapo kyobe. Bibilia ili yatubuila palua bantu bengi baalia baaviindile kukita evio ata sie kine te baali bapuililikile. Kwa mufuano, muka Potifa, waali wamukeba Yosefu lingi. Inzi Yosefu wali wamanine buino kya kukita. Bibilia ili yatubuila nangue weene “waakeene,” ni kulanda eevi: “Ale kunti naviinda siani kukita bobu bubiifi bukata ni kumukitila kakiine Leeza lizaambi?” (Kut. 39:8-10) Kulanda kisinka, Yosefu waali wamanine vya kukita ata sie ntanzi, muka Potifa tanamwezie. Keekio i kyaamukwasiizie kukita kintu kiweeme kisia kweziiwa.

14. Weewe kunti wakita siani eevi te kunti ukite bintu bibiipile?

¹⁴ Nga vyaakitile Yosefu, ni weewe kunti wakita siani eevi uviinde kukita kintu kiweeme kine waeziiwa? Kubambila loonu, uye wakaana lubilo bintu bisitonene Yehova. Kabili te kuya waezia ata sie kutontonkania palua bebio bintu. (Malum. 97:10; 119:165) Kine weewe wakita evio, teukaba kwemooka kine waeziiwa. Wakaba wasyamanine vya kukita.

15. Muntu kunti wakita siani eevi kulangilila nangue ali ‘mukumukeba’ Yehova? (Baebrania 11:6)

¹⁵ Paange weewe umanine nangue waapatile kale kisinka. Kabili paange utonene kumubombela Yehova kwa mutima obe onse. Inzi paange kuli kintu kimo kili kyakwanzia kwipeela kuli Yehova ni kubatiziiwa. Kine i evio, kunti wakoonka mufuano wakue Likolo Daudi. Kunti wamuloomba eevi Yehova: “Keba mukati kane, We Leeza, kabili mana mutima wane. Ntoosie,  kabili mana mawazo ane alia ali mukungemia. Mona mukati kane kine muli ni nzila yonse ya kukisia, kabili ntungulule mu nzila ya muyayaya.” (Malum. 139:23, 24) Yehova ali wabapaala baalia bali “bamukeba.” Weewe kunti walangilila nangue uli mukumukeba Yehova kine waikwinda kufikilizia mupaango obe wa kwipeela kuli Yehova ni kubatiziiwa.—Soma Baebrania 11:6.

TWALILILA KUMUPALAMA YEHOVA

16-17. Yehova kunti wabakula siani baalia bali bakuziiwa na baviazi Bakasininkizia? (Yoane 6:44)

¹⁶ Yesu waalandile nangue basambi bakue bali bakulua na Yehova. (Soma Yoane 6:44.) Kulanda kisinka, keekio ni kya kupapia saana, kabili ni kya mana kuli weewe. Yehova ali wamona kintu kiweeme mu mutima wa kila muntu ni kumukulila kuli weene. Ali wamona kila muntu kuya wali “bunoonsi bwibeleele,” ao “bunoonsi bwa mana.” (Mal Miz. 7:6; bulondolozi bwa pensina.) Weene, akumwene enka evio ni weewe.

¹⁷ Inzi paange weewe uli mulumendo ao mukaziana olia ali mukukuziiwa na baviazi Bakasininkizia Bakue Yehova. Paange weewe kunti wamona nangue uli wamubombela Yehova paantu sie baviazi bobe bali bakita evio. Anzia evio, Bibilia ili yalanda eevi: “Mupalame Leeza, ni ye ali kumipalama.” (Yak. 4:8; 1 Mil Nsi. 28:9) Kine weewe watendeka kumupalama Yehova, ni weene ali kukupalama. Yehova teezi kukumona weewe nga evelia sie muntu ali mu kikundi. Ali wamukula kila muntu palwakue, kubiika mukati ni olia akuziiziwe na baviazi Bakasininkizia Bakue Yehova. Kine ozo muntu watendeka kumupalama Yehova, Yehova ni weene ali kukita nga vilandile Yakobo 4:8.—Palania ni 2 Batesalonika 2:13.

18. Ni kiki kitwakaba kulondoluela mu lyasi likoonkelepo? (Malumbo 40:8)

¹⁸ Kine weewe waipeela kuli Yehova ni kubatiziiwa, keekio kili kulangilila nangue uli ni mawazo nga akue Yesu. Waatonene kwilangilila kuli Baba wakue eevi kukita kintu kili kyonse keelia kyaaloombelue kukita. (Soma Malumbo 40:8; Baeb. 10:7) Mu lyasi likoonkelepo, twakaba kulondoluela keelia kili kukukwasia utwalilile kumubombela Yehova wali wa kisinka kisia kubatiziiwa.