1. Babombi bamo ba kisinka bakue Yehova kunti baiipuzia siani?

 NI KINTU kya nsaansa saana kumana nangue Yehova etabiile bantu bakue bali kikundi! Bibilia yalanda eevi: “Yehova ali wasekelela mu bantu bakue.” (Malum. 149:4) Inzi nsita inge, bantu bange bali batioka mutima ni kutendeka kwiipuzia eevi: ‘Eba, Yehova angitabiile neene palwane bunke’? Nsita inge, babombi bengi ba kisinka bakue Yehova ba kale baali baluisia mawazo a evio.—1 Sam. 1:6-10; Yob 29:2, 4; Malum. 51:11.

2. Yehova ali waitabila bantu baalia bali bakita siani?

² Bibilia ili yalondolola buino nangue fwe bantu basipuililikile kunti twaitabilua na Yehova. Kine twakita ki? Tupalile kumuketekela Yesu Kristu ni kubatiziiwa. (Yoan. 3:16) Musita utwakita evio, tuli twalangilila ku bantu bonse nangue twakilapila mazaambi etu, kabili nangue twakimulaya Leeza nangue twakaba kukita kutona kwakue. (Miil Bat. 2:38; 3:19) Yehova ali watona saana musita utuli twakita bebio bintu eevi twaluke ni burafiki bwa peepi pamo nakue. Kine twaikwinda saana kutwalilila kwikala kukoonkana ni kilapo kyetu kya kwipeela, Yehova ali kutwitabila ni kutumona kuya twali barafiki bakue ba peepi.—Malum. 25:14.

3. Ni biki bituli kulondoluela mu leeli lyasi?

³ Ale juu ya ki nsita inge bange kunti bamona nangue Leeza tabetabiile? Yehova ali walangilila siani nangue atwitabiile? Kabili Mukristu kunti wakita siani eevi akile kusininkizia nangue Yehova amwitabiile?

 JUU YA KI BANTU BANGE BALI BAMONA NANGUE LEEZA TABETABIILE?

4-5. Kine twaimona nangue te tuli bantu ba mana, ni kiki kitupalile kusininkizia?

⁴ Bengi pakati keetu baatendekele kwimona nangue te ba mana tangia sie ku bwanike. (Malum. 88:15) Lupua ali wakuutua Adrián, walanda eevi: “Lyonse ndi naimona nangue nsili wa mana. Nalanguluka lumbanga nakili mwanike; mbanga napepela bantu ba mu lupua lwane eevi bakengile mu Paradiso, ata sie kine mbanga namanine nangue nsikasanguamo.” Tony, olia waakuliile mu lupua lusili lwa Bakristu walanda eevi: “Baviazi bane te baali bangana ata limo nangue bantonene ao nangue bamwene kuya nali muntu wa mana. Keekio kyaalengiizie mone nangue te kuli kintu ata kimo kinaali nakita keelia kibanga kyabasansamusia.”

⁵ Kine nsita imo ni fwefue tuli twaimona nangue te tuli ba mana, tupalile kulanguluka nangue Yehova muine i waatukuliile kuli weene. (Yoan. 6:44) Ali wamona bintu biweeme mukati keetu beelia bitusiviinda kwimuena fwe bene, kabili amanine buino mutima weetu. (1 Sam. 16:7; 2 Mil Nsi. 6:30) Pakaako, tupalile kumuswapila musita lwali watulanda nangue atumwene kuya twali bantu ba mana.—1 Yoan. 3:19, 20.

6. Mutumua Paulo waaimwene siani palua mazaambi alia aakitile lwa kale?

⁶ Ntanzi ya kusambilila kisinka, bamo pakati keetu babanga bakita bintu beelia bilengiizie ni loonu baye baimona nangue bali ni kilubo. (1 Pet. 4:3) Nsita inge, ata sie Bakristu ba kisinka, bali baluisia mawazo a kukita lizaambi. Eba, weewe uli wamona nangue nsita imo Yehova taviinda kukweleela? Kine i evio, teka mutima paantu ata sie babombi bakue Yehova ba kale babanga baiunvua enka evio. Kwa mufuano, mutumua Paulo waali waimona nangue abanga wasyeme musita lwabanga watontonkania palua bilubo byakue. (Bar. 7:24) Kya nsaansa, waalapiile mazaambi akue ni kufikiila kubatiziiwa. Inzi ata sie kine waakitile evio, abanga waimwene kuya wali muntu ‘akepeesie kukila batumua bonse,’ kabili muntu ‘abipiisie kukila bonse.’—1 Bakor. 15:9; 1 Tim. 1:15.

7. Ni kiki kitupalile kumana palua mazaambi alia atwaakitile lwa kale?

⁷ Baba weetu wa ku muulu alaile kutweleela kine twalapila. (Malum. 86:5) Pakaako, kine twaunvua bulanda kakiine ni kulapila mazaambi etu, weene ali kutweleela. Keekio kili kulengia tuswapile nangue bulayo bwakue ni bwa kisinka.—Bakol. 2:13.

8-9. Tupalile kukita siani kine tuli twamona nangue te kuli kintu ata kimo kituli kuviinda kukita eevi kumusaansamusia Yehova?

⁸ Fwe bonse tuli twatona kumubombela Yehova saana. Anzia evio, bange bali baimona nangue te kuli kintu ata kimo kibali kuviinda kukita eevi Yehova abetabile. Nkazi umo ali wakuutua Amanda walanda eevi: “Ndi natontonkania nangue kumubombela Yehova kuli na mana ya kuya nakita bintu bingi saana lyonse. Pakaako, ndi naezia kukita bintu bingi saana beelia bisili mu buviinde bwane. Musita undi ‘naandua’ kukita bebio bintu, ndi nalanda nangue Yehova amwene kuya nali wa bulebule nga evelia sie vingimwene.”

⁹ Tupalile kukita siani kine tuli twamona nangue te kuli kintu ata kimo kituli kuviinda kukita eevi kumusansamusia Yehova? Languluka nangue Yehova ni muntu ali waaluluka, teezi kuya waumiine sie ku kantu kamo. Kabili teezi kutulomba ata kaniini tukite bintu bingi saana kupita buviinde bwetu. Ali watasia palua kintu kyonse kituli twamukitila kine twakikita kwa mweo, maka, ni mutima weetu onse. Kabili, ezia kutontonkania palua mifuano ya kale ya babombi bakue Yehova, baalia baamubombeele kwa mweo wabo onse. Kwa mufuano, tontonkania palwakue Paulo. Waabombele kwa mute kwa miaka ingi, waali waenda ma kilometre engi saana, kabili waatendekeziizie bilonghaano bingi. Musita lwasyali na buviinde bwa kusimikila saana nga lwa kale, eba Yehova waamukeene? Ata, te evio. Yehova waamupaalile paantu waatwaliliile kukita bintu kukonkana ni buviinde bwakue. (Miil Bat. 28:30, 31) Ni fwefue, kunti twaandua kumubombela Yehova saana nga evelia vitubanga twamubombela lwa ntanzi. Inzi kuli weene, kintu kya mana saana ni keeki: juu ya ki tuli twamubombela. Kansi, tumone bintu paleepale bilangiliile nangue Yehova atwitabiile.

 YEHOVA ALI WALANGILILA SIANI NANGUE ATWITABIILE?

10. Kunti “twaunvua” siani lizui lyakue Yehova lya kulangilila nangue atwitabiile? (Yoane 16:27)

¹⁰ Kupitila Bibilia. Yehova ali wabalangilila bantu bakue mu nzila paleepale nangue abatonene ni kubetabila. Maleembo alangiliile nangue Yehova waamulandile Yesu mara ibili nangue weene i Muana wakue olia watonene, kabili olia waitabiile. (Mat. 3:17; 17:5) Eba, ni weewe utonene kunvua Yehova wakusininkiziizia nangue akwitabiile? Tetuviinda kunvua lizui lyakue Yehova lyafuma ku muulu, inzi ali walanda ni fwefue kupitila Mulandu wakue. Kunti “twaunvua” lizui lyakue Yehova lya kulangilila nangue atwitabiile kupitila kusoma milandu yakue Yesu, elia ili mu bitabu bya nsimiko. (Soma Yoane 16:27.) Yesu waalangiliile mu nzila ipuililikile mibeele yakue Baba wakue. Pakaako, musita utuli twasoma milandu yakue, elia ilangiliile nangue abanga wabetabiile basambi bakue ba kisinka ata sie kine te babanga bapuililikile, tuli kumona nga evelia Yehova ali mukutulanda ni fwefue enka ezio milandu.—Yoan. 15:9, 15.

11. Juu ya ki kupatua na maavia te kulangiliile nangue Leeza takitwitabiile? (Yakobo 1:12)

¹¹ Kupitila bikitua byakue. Yehova ali watona saana kutukwasia. Ali wakita evio kupitila kutupeela bintu bya kimubili beelia bitukabiile. Inzi, nsita inge kunti walekelela tupate maavia, nga evelia sie vyaamulekeleele Yobu, mubombi wakue wa nsaambu. (Yob. 1:8-11) Anzia evio, kupatua na maavia te kulangiliile nangue Leeza takitwitabiile. Kintu kitupalile kumana ni keeki: maavia ali atupeela fuasi ya kulangilila nangue tumutonene saana Leeza, kabili nangue tumuswapiile. (Soma Yakobo 1:12.) Musita lwali watukwasia kusipikizia azo maavia, tuli twasininkizia nangue atutonene saana, kabili nangue ali watwemena.

12. Mufuano wakue Dmitrii kunti watusambilizia ki?

¹² Tumone mufuano wakue lupua umo ali waikala mu Asia, olia ali wakuutua Dmitrii. Waazeziizie miilo yakue, kabili waakitile miaka ingi bila wapata miilo inge. Eevi kulangilila nangue waali wamuswapiile Yehova, waatendekele kusimikila saana. Anzia evio, kwaapitile miezi ingi bila wapata miilo. Kisia paapo, waaluele saana; keekio kyaalengiizie aye wasiala sie mu kitanda. Waatendekele kwimona nangue tabanga wali mulume ni baba aweeme, kabili waatendekele kwiipuzia kine Yehova waali watwaliliile kumwitabila kakiine. Busiku bumo kyungulo, muana wakue mwanakazi waandikile pa lipapie milandu elia ili mu Lileembo lya Isaya 30:15, leelia lili lyalanda  eevi: “Mwakaba ni maka kine mwatwalilila kuya mwateekameene ni kuswapila.” Waamuleteele baba wakue leelio lipapie musita lwaali waleele pa kitanda. Waamulandile eevi: “Baba, kine waunvua bulanda, uye walanguluka leeli lileembo.” Dmitrii waamwene nangue Yehova waamukwasiizie paantu bantu ba mu lupua lwakue te babulilue na byakulia, ngubo, ni fuasi ya kwikala. Dmitrii walanda eevi: “Kintu kimbanga napalile kukita ni keeki, kutwalilila kuya nateekameene ni kumuswapila Leeza wane.” Kine ni weewe uli ni buavia nga bwakue Dmitrii, uye waswapiile nangue Yehova ali mukukwemena, kabili nangue wakaba kukukwasia eevi ukabe kusipikizia.

13. Yehova kunti wabombia baani eevi kulangilila nangue atwitabiile, kabili ali wakita evio mu nzila ki? Londolola.

¹³ Kupitila balupua ni bankazi. Yehova ali wabombia balupua ni bankazi betu eevi kulangilila nangue atwitabiile. Kwa mufuano, kunti wasonsezia bange balande milandu ya kututeekia mutima pa musita upalile. Nkazi umo wa mu Asia waaimweneene evio, musita lwabanga wali mu maavia akata saana. Waazeziizie miilo yakue, kisia waaluele saana. Kisia paapo, mulume wakue waakitile lizambi likata. Keekio kyalengiizie te kunti atwalilile kuya wali mukote mu kilonghaano. Ozo nkazi walanda eevi: “Naandilue kunvua kyaalengiizie bintu bya evio bimpate.” Naatontonkaniizie nangue paange kubanga kwali kintu kimo kibiipile kinakitile, kabili nangue pange nsyali naitabiilue kabili na Yehova.” Ozo nkazi waamuloombele Yehova amusininkiziizie nangue waali wamwitabiile. Eba, Yehova wakitile siani evio? Olia nkazi walanda eevi: “Bakote ba mu kilonghaano baalanziene ni neene, kabili baansininkiziizie nangue Yehova antonene.” Kisia kukita evio, olia nkazi waamulombele Yehova amukwasie. Walanda eevi: “Bwenka bobo busiku, naapokeleele mukanda olia waaleembelue na kikundi kya balupua ni bankazi ba mu kilonghaano. Lumbanga nasoma milandu  ya kuteekia mutima mu ozo mukanda, nainikile nangue Yehova waasukile lipepo lyane.” Keekio kyatusambilizia nangue lingi Yehova ali walangilila nangue atwitabiile kupitila milandu iweeme, kabili ya kuteekia mutima elia ili yalandua na bange.—Malum. 10:17.

14. Yehova ali wabombia nzila ki inge eevi kulangilila nangue atwitabiile?

¹⁴ Kabili, Yehova ali walangilila nangue atwitabiile kupitila kubombia balupua ni bankazi betu eevi batusoke musita utukabiile kusokua. Kwa mufuano, mu miaka mia imo ya ku ntendeko, Yehova waamubombiizie Paulo ni kumutungulula kupitila mupasi wakue utakatiifu eevi abaleembele balupua ni bankazi benakue mikanda 14. Mu ezio mikanda mubanga mwali masoke akosele, inzi aali alangiliile nangue waali wabatonene. Eba, juu ya ki Yehova waamutunguluile Paulo eevi aleembe azo masoke? Yehova ni Baba aweeme, kabili ali wabapeela malipizi baana bakue “baalia batonene.” (Tus Maf. 3:11, 12) Pakaako, kine muntu umo watusoka kupitila Bibilia, tupalile kumona nangue ezio i nzila yabombia Yehova eevi kulangilila nangue atwitabiile, te nzila ya kulangilila nangue atusuulile. (Baeb. 12:6) Ni bintu ki binge bilangiliile nangue Yehova atwitabiile?

BINTU BINGE BILANGILIILE NANGUE YEHOVA ATWITABIILE

15. Yehova ali wabapeela baani mupasi wakue utakatiifu, kabili juu ya ki keekio kunti kyatuteekia mutima?

¹⁵ Yehova ali wabapeela mupasi utakatiifu baalia baitabiile. (Mat. 12:18) Kunti kyawaama kine kila muntu palwakue waiipuzia eevi: ‘Eba, neene ndi nalangilila mibeele paleepale pakati ka mibeele ya lizabo lya mupasi wakue Leeza mu buikazi bwane?’ Eba, winikile nangue uli wapembelela saana bange kuliko vyubanga wakita ntanzi teunamumane Yehova? Kulanda kisinka, vyuli kuya wakila kulangilila lizabo lya mupasi wakue Leeza, i vyuli kukila kusininkizia nangue weene akwitabiile!—Mona kisanduku, “ Lizabo lya Mupasi Ni . . . ”

16. Yehova ali wabombia baani eevi basimikile mpunda iweeme, kabili keekio kili kyakulengia wiunvue siani? (1 Batesalonika 2:4)

¹⁶ Yehova ali wabapeela miilo ya kusimikila mpunda iweeme baalia baitabiile. (Soma 1 Batesalonika 2:4.) Mona faida yaapatile nkazi Jocelyn kupitila kubasimikilako bange mpunda iweeme. Busiku bumo, lukele-keele, Jocelyn waabuukile wali ni bulanda. Walanda eevi: “Naali nanakukile saana kabili naimwene kuya nali wa bulebule. Inzi mbanga nali painia, kabili bobo bubanga bwali busiku bwane bwa kuya  mu kusimikila. Pakaako, naapepele ni kuya mu kusimikila.” Bobo busiku, Jocelyn waasaakeene ni Mary. Ozo mwanakazi abanga wali buino, kabili waaitabiile kusambilila Bibilia. Kisia miezi fulani kupita, Mary waalandile nangue musita Jocelyn lwabanga wakokosia ku muliango wakue, weene abanga wapepa kuli Yehova eevi akwasiiwe. Kisia kutontonkania palua keekio, Jocelyn walanda eevi: “Naaunvuile nga evelia Yehova ali mukunghana nangue, ‘nkwitabiile.’” Kulanda kisinka, te bantu bonse bali baitabila mpunda ituli twabasimikila. Inzi, tupalile kuya twasininkiziizie nangue Yehova ali waunvua buino musita utuli twakita maka etu onse eevi kusimikilako bange mpunda iweeme.

17. Milandu yaalandile Vicky palua kilubula mulandu kunti yatusambilizia ki? (Malumbo 5:12)

¹⁷ Yehova waafumiizie kilubula mulandu eevi baalia betabiilue na weene banonkelemo. (1 Tim. 2:5, 6) Ale kine tukimwene sie nangue paange Yehova tatwitabiile ata sie kine tuketekeele kilubula mulandu, kabili ata sie kine tetusyabatiziiziwe? Languluka nangue lyonse tetuviinda kuswapila mawazo etu, inzi kunti twaviinda kumuswapila Yehova. Weene abamwene baalia bonse bali ni kiketekelo mu kilubula mulandu kuya bali ba nsaambu, kabili alaile kubapaala. (Soma Malumbo 5:12; Bar. 3:26) Kutontonkania palua kilubula mulandu kwaamukwasiizie Vicky. Busiku bumo, kisia kutontonkania saana palua kilubula mulandu, walandile eevi: “Yehova waandangiliile mibeele ya kupembelela musita waleepele. . . . Inzi, kyaali sie nga neene ali mukumwana eevi Yehova: ‘Teuviinda kutona muntu nga neene. Ngeleelo ya kilubula mulandu ya Muana obe teiviinda kuvimba mazaambi ane.’” Kutontonkania palua bupe bwa kilubula mulandu, kwamukwasiizie atendeke kwinika nangue Yehova waali wamutonene. Ni fwefue kine twatontonkania palua kilubula mulandu, tuli kwinika nangue Yehova atutonene, kabili nangue atwitabiile.

18. Kine twatwalilila kumutona Baba weetu wa ku muulu, tuli kuya twasininkiziizie ki?

¹⁸ Ata sie kine twaikwinda saana kubombia bintu byonse bitwasambilila mu leeli lyasi, nsita imo kunti twatioka mutima ni kutendeka kwiipuzia kine kakiine Yehova atwitabiile. Kine keekio kyakitika, languluka nangue Yehova ali waitabila “baalia batwaliliile kumutona.” (Yak. 1:12, NWT) Pakaako, twalilila kumupalama Yehova ni kwinika nzila yali wabombia eevi kulangilila nangue akwitabiile. Lyonse, uye wasininkiziizie nangue Yehova “tali kule ni kila umo weetu.”—Miil Bat. 17:27, NWT.