1-2. Muntu ali wapata faida ki kisia kubatiziiwa?

 TULI twaunvua nsaansa kine twabatiziiwa ni kwingila mu lupua lwakue Yehova. Baalia babatiziiziwe kunti baitabizia eezi milandu yaalandile kaleemba wa malumbo Daudi. Waalandile eevi: “Ali ni nsaansa ni muntu uwasaakula weewe [Yehova] ni kumupalamika eevi ekale mu misolo yobe.”—Malum. 65:4.

² Yehova ali waingizia bantu ba siani mu musolo wakue? Nga vyakilanda lyasi lyakipita, ali wabapalama baalia bali balangilila nangue batonene kukita burafiki bwa peepi pamo nakue. (Yak. 4:8) Kine weewe waipeela kuli Yehova ni kubatiziiwa, uli kukila kumupalama mu nzila iibeleele. Kisia paapo, weene wakaba ‘kwitila mpaalo pali weewe mpaka waaluke asipusilue na kantu ata kamo.’—Mal. 3:10; Yer. 17:7, 8.

3. Ni bintu ki bya mana saana bipalile kukita Bakristu baalia bepeele kuli Yehova ni kubatiziiwa? (Kasimika 5:4, 5)

³ Kulanda kisinka kubatiziiwa te mpela, inzi ni muanzo sie. Kisia kubatiziiwa, weewe wakaba kutona kwikwinda saana eevi kwikala kukoonkana ni kilapo kyobe kya kwipeela. Kabili wakaba kutona kukita evio, ata sie kine weewe wasaakaana na maavia ao meezio a kukulengia paange ulekele kumubombela Yehova. (Soma Kasimika 5:4, 5.) Paantu wakaba kwaluka musambi wakue Yesu, kyakaba kuloomba ukabe kukoonka saana mufuano ni mafunde akue Yesu. (Mat. 28:19, 20; 1 Pet. 2:21) Leeli lyasi lili kukukwasia kukita evio.

 TWALILILA KUMUKOONKA YESU ATA SIE KINE WAPATA MAAVIA PAMO NI MEEZIO

4. Basambi bakue Yesu bali batwama “kimuti kya busaanso” mu mana ki? (Luka 9:23)

⁴ Te kutontonkania nangue kisia kubatiziiwa, teukaba kupata maavia mu buikazi bobe. Kulanda kisinka, Yesu waalandile buino nangue basambi bakue bakaba kutwama ‘kimuti kyabo kya busaanso,’ kisia kubatiziiwa kwabo. Bapalile kukitwama “kila busiku.” (Soma Luka 9:23.) Eba, Yesu waali wakeba kulanda nangue basambi bakue bakaba bali sie mu bukyuzi lyonse? Ata, te evio. Inzi, waali wakebele sie kulanda nangue, te bakaba bapata sie mpaalo bila kusaakaana na maavia. Kabili ange pakati ka azo maavia kunti aya akolele saana.—2 Tim. 3:12.

5. Yesu waalaile nangue baalia bali mukwipeela bakaba kupata mpaalo ki?

⁵ Paange weewe waapingilue kale na bantu ba mu lupua lobe. Ao paange waaipeele ni kulekela kukoonkelela bintu binge bya kimubili eevi ubiike miilo ya Bukolo pa ntanzi. (Mat. 6:33) Kine i evio, mana nangue Yehova amwene byonse byuli wamukitila. (Baeb. 6:10) Paange, waaimweneene kale nangue eezi milandu yaalandile Yesu ni ya kisinka. Waalandile eevi: “Kubalua muntu wakasia nghanda, ni bandumeeze, ni bankaziize, ni nghina, ni se [ao baba wakue], ni baana pamo ni makaba pa mulandu wane, ni pa mulandu wa nsimiko yane waakapokelela bintu bingi kukila pa 100, nghanda, ni bandumeeze ni bankaziize, ni banghina, ni baana, ni makaba pamo ni lyemo. Ni musita waiza, wakaba ni bukose bwa muyayaya.” (Mark. 10:29, 30) Kulanda kisinka, mpaalo iwaapatile ao yuli mukupata ivulile saana kupita bintu byonse biwaasiile.—Malum. 37:4.

6. Juu ya ki upalile kutwalilila kuluisia “lwinso lwa mubili” kisia kubatiziiwa?

⁶ Kisia kubatiziiwa, weewe wakaba kutwalilila kuluisia “lwinso lwa mubili.” (1 Yoan. 2:16) Nga vikili, wakaba kuya wali sie muana wa lizaambi, muina Adamu. Nsita inge weewe kunti waiunvua nga evelia vyaaiunvuile mutumua Paulo. Weene waalandile eevi: “Mukati mwane nghwamiinue na Mizilo yakue Leeza. Inzi mu mubili wane ndi namonamo lifunde linge lili lyaluana ni mizilo ya mu maano ane, ni leeli lifunde i mibeele ya bibalo bili mukati mwane bindengele kuba muzia.” (Bar. 7:22, 23) Nsita inge, weewe kunti watioka mutima paantu upalile kuluisia amu yobe ya kutona kukita bintu bibiipile. Anzia evio, kutontonkania palua bintu biwaamulaile Yehova musita luwaipeele kuli weene, kwakaba kukupeela maka a kutwalilila kuluisia ezio aali. Kulanda kisinka, musita luwakaba kusaakaana ni buezio, kilapo kyobe kya kwipeela kyakaba kukukwasia. Mu nzila ki?

7. Kwipeela kuli Yehova kunti kwakukwasia siani kusiala wali wa kisinka kuli weene?

⁷ Kine weewe waipeela kuli Yehova, keekio kilangiliile nangue waikaana we muine. I kulanda, walekela kukoonkelela mipaango yobe ni kukita bintu beelia byutonene we muine, beelia bili mukulengia Yehova afipue. (Mat. 16:24) Pakaako, musita luwakaba kusaakaana ni buezio, teukaba kuzeezia musita watontonkania beelia byupalile kukita paantu wakaba wasyapaangiile mbela bya kukita, i kulanda, kutwalilila kuya wali wa kisinka kuli Yehova. Wakaba kuya wapinguile saana kumusaansamusia weene. Wakaba kumupala Yobu. Ata sie kine Yobu waapatile maavia akolele saana, walandile eevi wasininkiziizie: “Neene nsikaba kulekela bukisinka bwane!”—Yob. 27:5.

8. Kutontonkania palua lipepo lyobe lya kwipeela kunti kwakukwasia siani kine waeziiwa?

⁸ Kutontonkania palua lipepo lyobe lya kwipeela kuli Yehova, kwakaba kukupeela maka a kuluisia buezio buwakaba kupata. Kwa mufuano, eba kunti watendeka kumusaapila muka nguana? Ata, te ukita evio! Wakaba kuya wapinguile mbela kukaana kukita evio. Kine tewizi kulekelela mawazo abiipile akule mu mutima obe, teukaba kuya wali na miilo ya kuafumia. Wakaba kuya ‘waiseelukile’ kufuma mu “nzila ya babiifi.”—Tus Maf. 4:14, 15.

9. Kutontonkania palua lipepo lyobe lya kwipeela kunti kwakukwasia siani kutwalilila kubiika pa ntanzi bintu bya kimupasi?

 ⁹ Weewe kunti wakita siani kine miilo iwapeelua yakaba kulengia te kunti ukabe kuya walonghaana? Paantu weewe waapinguile kale kukaana miilo ya evio ntanzi tebanakupeele, teukaba kwema, wakaba kuya wamanine vya kukita. Pakaako, teuviinda kwitabila ezio miilo ni kisia utendeke kukeba namuna ya kumubiika Yehova pa ntanzi. Kulanda kisinka, kutontonkania palua mufuano wakue Yesu kunti kwatukwasia. Weene waali wapinguile kumusaansamusia Baba wakue. Kansi, nga vyaakitile Yesu, pingula lubilo kukaana saana kukita kintu kyonse keelia kyumanine nangue kili kumulengia Leeza olia uwaipeeleko afipue.—Mat. 4:10; Yoan. 8:29.

10. Yehova wakaba kukukwasia siani kisia kubatiziiwa eevi uviinde ‘kutwalilila kumukoonka’ Yesu?

¹⁰ Kisinka ni keeki, maavia pamo ni meezio ali kukupeela fuasi ya kulangilila nangue upinguile ‘kutwalilila kumukoonka’ Yesu. Musita luutwaliliile kumukoonka Yesu, uye wasininkiziizie nangue Yehova wakaba kukukwasia. Bibilia ili yalanda eevi: “Leeza weetu ni wa kisinka, . . . kabili weene taviinda kumilekelela kweziiwa kukila maka enu. Leeza waya wamipeela maka a kusipikizia ni musango wa kwanzia azo meezio luali aiza.”—1 Bakor. 10:13.

KUNTI WAKITA KI EEVI UTWALILILE KUMUKOONKA YESU?

11. Ni kintu ki kimo kili pakati ka bintu bya mana saana kyupalile kukita eevi kulangilila nangue utwaliliile kumukoonka Yesu? (Mona ni foto.)

¹¹ Yesu waali ni mute, kabili waatwaliliile kuya wali peepi ni Yehova kupitila lipepo. (Luk. 6:12) Kulanda kisinka, kintu kimo kili pakati ka bintu biweeme saana byupalile kukita eevi utwalilile kumukoonka Yesu kisia kubatiziiwa ni keeki: kuya wakita lyonse bintu beelia bili  kukulengia umupalame saana Yehova. Bibilia yalanda eevi: “Kukoonkana ni buyantanzi butusyakitile, kansi tutwalilile kwenda twakoonkele lwendo lwenka loolu.” (Baf. 3:16) Nsita inge wakaba kuya waunvua mpunda palua bintu byaaimweneene balupua ni bankazi baalia baafikiliziizie mipaango yabo ya kubomba saana mu miilo itakatiifu. Paange baasomene Masomo a Bakabilambila ba Bukolo ao paange baabombeele kale mu fuasi ikabiilue saana bakasimika. Ozo, ni mupaango uweeme saana wa kwibiikila kine uli ni buviinde bwa kukita evio. Bantu bakue Yehova bali batona kumubombela saana. (Miil Bat. 16:9) Ale kine weewe teuli na buviinde bwa kukita evio loonu? Te kutontonkania nangue weewe uli wa pansi kuliko baalia bali ni buviinde bwa kukita evio. Kintu kya mana ku Bakristu bonse ni kutwalilila kusipikizia. (Mat. 10:22) Te kulaba nangue uli wamusaansamusia saana Yehova musita luuli wamubombela kukoonkana ni buviinde bobe. Kisia kubatiziiwa, keekio i kintu kiweeme kyupalile kukita eevi kulangilila nangue umukoonkele Yesu.—Malum. 26:1.

12-13. Weewe kunti wakita siani kine teukili na mute saana? (1 Bakorinto 9:16, 17) (Mona ni kisanduku, “ Te Kufuma mu Masindano a Mbilo.”)

¹² Kunti wakita siani kine weewe wainika nangue teukili wapepa kufuma ku mutima, teukili watonesia kusimikila, ao teukili watonesia kusoma Bibilia nga viwaali watona lwa ntanzi? Kine wainika evio kisia kubatiziiwa, te kumona nangue waakizeezia mupasi wakue Yehova. Paantu weewe te upuililikile, mawazo obe kunti aya aaluluka-aluluka, mu kuya kwa nsiku. Kine teukili na mute saana, tontonkania palua mufuano wakue mutumua Paulo. Ata sie kine weene waali waikwinda kumupala Yesu, waali wamanine nangue kunti kyakitika nsita inge te kunti aye watonene saana kukita evio. (Soma 1 Bakorinto 9:16, 17.) Waalandile eevi: ‘Kine  ndi nabomba tekuba natonene, ndi nabomba sie paantu i vinaaninue.’ Mu nzila inge, Paulo waali wapinguile kubomba miilo ya kusimikila ata sie kine nsita inge kunti waiunvua siani.

¹³ Enka evio ni weewe, te kukwata bupinguzi buswapiile sie mawazo a mu mutima obe. Uye wapinguile kukita kintu kiweeme ata sie kine te utonesie kukita keekio kintu. Kine watwalilila kukita kintu kiweeme, kisia musita, mawazo a mu mutima obe akaba kwaluluka. Kulanda kisinka, kine watwalilila kukoonka ntantiko yobe iweeme ya bintu bya kimupasi, wakaba kutwalilila kumukoonka Yesu kisia kubatiziiwa. Kabili kine weewe watwalilila kukita evio lyonse, wakaba kubasonsezia balupua ni bankazi.—1 Bat. 5:11.

‘TWALILILA KWIEZIA . . . TWALILILA KWISININKIZIIZIA’

14. Ni biki byupalile kuya watoosia lyonse, kabili juu ya ki? (2 Bakorinto 13:5)

¹⁴ Kisia kubatiziiwa kili buino kuya waitoosia lingi. (Soma 2 Bakorinto 13:5.) Nsita inge, kunti kyawaama kwiipuzia kine uli wapepa kila busiku, kine uli wasoma ni kusambilila Bibilia, kine uli walonghaana, kabili kine uli wasimikila. Ikwinde saana kukeba nzila ili kukukwasia kusekelela ni kunoonkela mu bebio bintu. Kwa mufuano, iipuzie eevi: ‘Eba, kunti naviinda kubabuilako bange bisinka bili mu Bibilia? Kuli ni bintu bimpalile kukita eevi nkile kutonesia miilo ya kusimikila? Eba, ndi nazimbula kintu kintonene mu mapepo ane? Kabili mapepo ane ali alangilila nangue muswapiile Yehova kakiine? Ndi nalonghaana lyonse? Kunti nakita siani eevi ngie napooza saana maano ku kulonghaana ni kwasukapo?’

15-16. Weewe wasambilila ki kupitila mufuano wakue lupua umo palua kwanzia buezio?

¹⁵ Kabili, ni kintu kya mana kuya waitoosia mu kisinka palua butope bobe. Lupua umo ali wakuutua Robert, walondolola kintu kyaaimweneene kilangiliile juu ya ki ni kintu kya mana kwitoosia. Walanda eevi: “Lunaali na miaka 20 eevi, naali ni miilo i nsyaali nabomba nsita yonse. Busiku bumo kisia miilo, mwanakazi umo umbanga nabomba nakue, wankuutile ku nsesi yakue. Waanganine nangue kooko tuli kuya twali sie babili, kabili nangue ‘tuli kuya kupisia musita waweeme.’ Ku muanzo naakeene bila nasipile, inzi ku muisio, naakeene nasipile ni kumubuila keelia kyalengiizie nkaane.” Robert apalile kutasiiwa paantu waanziizie bobo buezio. Inzi kisia kutontonkania palua keekio kyaakitikile, waamwene nangue ku muanzo taali wapalile kukaana bila wasipile. Walanda eevi: Nsyaakeene nasipile ao kukaana penka paalia nga evelia Yosefu vyaakeene musita lwaakebelue na muka Potifa. (Kut. 39:7-9) Kulanda kisinka, naapapile saana paantu  ku muanzo naakeene bila nasipile. Bobo buavia bunaapitilemo, bwaankwasiizie kwinika nangue mbanga napalile kukosia burafiki bwane pamo ni Yehova.”

¹⁶ Kwitoosia lingi nga evelia vyaakitile Robert, kunti kwakuleetela faida. Ata sie kine weewe waviinda kwanzia buezio, iipuzie eevi: ‘Papitanga musita waleepele siani pa kunti nkaane?’ Te kwimona kuya wali ni kilubo kine wainika nangue kuli ni kantu kaupalile kuwaamia. Kuliko kukita evio, uye wali ni nsaansa paantu wainika paalia pali butope bobe. Uye wapepa palua bobo butope, kabili kita bintu bili kukulengia ukosie bupinguzi bobe bwa kwikala kukoonkana ni mafunde akue Yehova.—Malum. 139:23, 24.

17. Bintu byaakitile Robert mu aali yaasaakeene nayo byaalengiizie liina lyakue Yehova likitue siani?

¹⁷ Kuli ni bintu binge byaaimweneene Robert. Weene watwalilila kulanda eevi: “Musita neene lunakeene kuya ku nsesi yakue olia mwanakazi waankuutile, weene waanganine eevi: ‘Ha! kakiine weewe uli mwalalume!’ Kisia naamwipuziizie juu ya ki waalandile evio. Waanganine nangue rafiki wakue umo, olia abanga wali Kasininkizia Wakue Yehova lwa kale, i waamwanine nangue balumendo ni bakaziana bonse Bakasininkizia, bali bakita bintu bibiipile baifikiliile, kabili bali bapona sie lubilo kine baeziiwa. Pakaako, ozo mwanakazi waamulandile rafiki wakue nangue ali kungezianke ni neene eevi esininkiziizie. Kisia kutontonkania palua bebio byonse, naaunvuile nsaansa saana paantu naakindikile liina lyakue Yehova.”

18. Utonene kukita ki kisia kubatiziiwa? (Mona ni kisanduku, “ Maasi Abili Auli Kutona.”)

¹⁸ Kine weewe waipeela kuli Yehova ni kubatiziiwa, walangilila nangue utonene kuswesia liina lyakue ata sie kine wasaakaana na meezio a siani. Kabili uye wasininkiziizie nangue Yehova amanine maavia auli mukusaakaana nao pamo ni meezio auli mukwanzia. Weene wakaba kukupaala kine weewe waikwinda eevi kusiala wali wa kisinka. Uye waswapiile nangue weene kunti wakupeela maka kupitila mupasi wakue utakatiifu eevi uviinde kukita evio. (Luk. 11:11-13) Kupitila kukwasiiwa na Yehova weewe wakaba kuviinda kutwalilila kumukoonka Yesu kisia kubatiziiwa.