1-2. Leeta mufuano ulangiliile vituli kuviinda kukoonka ntanfu yakue Yesu.

TONTONKANIA uli pakati ka bantu bali mukupita mu kaseba kali katiinia, kalimo binkandu. Katungulula ali ni kibeelezi ali mukuya wamitungulula. Musita lwali mukuya waenda, ali mukuya wasia tulangi, ao makasa mu binkandu. Kupuako, te ukimumwene kabili! Inzi weewe te unvuile ata muenzo. Kuliko kunvua muenzo, weewe pamo ni balendo noobe, mwakoonka mu peepi saana ntanfu ao makasa akue katungulula kukoonkana ni buviinde bwenu bonse!

² Ni fwefue Bakristu ba kisinka, tuli nga babo balendo. Tuli mukwenda mu kaseba kali katiinia, i kulanda, keeno kyalo kibiipile. Tuli twatasia paantu Yehova waatupeele Katungulula akilile kuwaama​—Muana wakue, Yesu Kristu, wa kunti tuye twakoonkele ntanfu yakue mu peepi. (1 Pet. 2:21) Kukoonkana ni kitabu kimo kilondoluele Bibilia, pa ezio nkeende, Petro wamupalania Yesu na Katungulula. Nga evelia katungulula ali mukusia tulangi, Yesu ni weene waasiile ntanfu ao makasa, mwakunti tuye twanianta ao kukoonka. Ale kansi tulondoluele biipuzio bitatu palua kukoonka ntanfu yakue: Kukoonka ntanfu yakue Yesu kuli na mana ki? Juu ya ki tupalile kuikoonka? Kabili kunti twaikoonka siani?

3. Kukoonka ntanfu ya muntu kampanda kuli na mana ki?

³ Kukoonka ntanfu ya muntu kampanda kuli na mana ki? Mu Bibilia, mulandu ‘kwenda,’ ni mulandu “makasa”, musita unge ili yabombiiwa eevi kulondoluela bintu bili byakita muntu mu buikazi. (Kut. 6:9; Tus Maf. 4:26) Bintu bili byakita muntu mu buikazi kunti byapalaniiwa na ntanfu ao makasa ali mukusiala aleembele pansi musita lwali mukwenda. Pakaako, kukoonka ntanfu ya muntu kampanda kuli na mana ya kukoonka mufuano wakue, kumupala.

4. Kukoonka ntanfu yakue Yesu kuli na mana ki?

 ⁴ Pakaako, kukoonka ntanfu yakue Yesu kuli na mana ki? Mu kifupi, kukoonka ntanfu yakue Yesu kuli na mana ya kupala mufuano wakue. Mu lileembo limaniine lyasi lyetu, mutumua Petro ali mukulondoluela palua mufuano uweeme saana wa kusipikizia kukyuziiwa waabiikile Yesu. Anzia evio, kuli nzila ingi mutuli kuviinda kumupala Yesu. (1 Pet. 2:18-25) Kakiine, buikazi bonse bwakue Yesu​—kila kintu kyaalandile ni kukita—​ni mufuano utupalile kupala.

5. Eba, bantu basipuililikile kunti bakoonka mufuano wakue Yesu upuililikile? Londolola.

⁵ Inzi, te tupuililikile; pakaako, eba, kunti twaviinda kakiine kukoonka mufuano wakue Yesu? Een, kunti twaviinda. Languluka nangue Petro watulanda ‘tukoonke ntanfu yakue [Yesu] mu peepi’​—apana mu nzila ipuililikile. Kine twakoonka ntanfu yakue twapoozeleko maano, i kulanda twakita maka etu onse anzia kine te tupuililikile, tuli kuya twanakila milandu yakue mutumua Yoane ilandile eevi: ‘Ikale nga vyaali vyaikeele Yesu.’​—1 Yoan. 2:6.

6-7. Juu ya ki kunti twalanda nangue kukoonka ntanfu yakue Yesu kuli kutukwasia tukile kumupalama Yehova?

⁶ Kukoonka ntanfu yakue Yesu kuli kutukwasia kumupalama Yehova. Juu ya ki kunti twalanda evio? Kya mambo, Yesu waatusiliile mufuano ukilile kuwaama ulangiliile vya kwikala mu nzila ili yamusaansamusia Leeza. (Yoan. 8:29) Kansi, kine twakoonka ntanfu yakue Yesu, twakaba kumusaansamusia Yehova. Kabili tuli ni kisinka nangue Baba weetu wa ku muulu wakaba kubapalama bantu bali baikwinda saana eevi baaluke babibuza bakue.​—Yak. 4:8.

⁷ Kya bubili, Yesu waamupalile Baba wakue mu nzila ipuililikile. Keekio i kyaalengele Yesu alande eevi: “Olia wamona neene, wamumona ni Baba.” (Yoan. 14:9, NWT) Kunti twapala mibeele yakue Yesu ni vyaali wakitila bange. Kwa mufuano, waamunvuiliile nkumbu muntu abanga ni buluele bwa tembue, waamunvuiliile luse muntu abanga ni buluele bukolele, kabili waaunvuiliile bulanda bantu bafuiliilue. I kulanda  nangue, kine twamupala Yesu, twamupala ni Yehova. (Mark. 1:40, 41; 5:25-34; Yoan. 11:33-35) Kine twakila kupala mibeele yakue Yehova, bukibuza bwetu pamo nakue buli kukila kukosa.

8. Londolola juu ya ki kukoonka ntanfu yakue Yesu kuli kutukwasia “kwanzia” kyalo.

⁸ Kukoonka ntanfu yakue Yesu kuli kwatukwasia tekuti tupuululue na keeno kyalo kibiipile. Mu busiku bwa kupeleezia buikazi bwakue bwa pa kyalo, Yesu waali ni nsaambu ya kulanda eevi: “Naanzia kyalo.” (Yoan. 16:33) Waakebele kulanda nangue, weene waakeene kwilekelela atungululue na malanga, mipaango ni bikitua bya keeno kyalo. Yesu taalabile ata kaniini kyaalengele atumue pa kyalo​—kulandila palwakue Yehova. Ale fwefue? Mu keeno kyalo muli bintu bingi bili kuviinda kutupuulula. Inzi, nga vyaakitile Yesu, kine twatwalilila kupooza maano ku kukita kutona kwakue Yehova, ni fwefue, twakaba “kwanzia” kyalo.​—1 Yoan. 5:5.

9. Tupalile kukita ki eevi tusiale mu nzila ili yatwala ku bukose bwa muyayaya?

⁹ Kukoonka ntanfu yakue Yesu kuli kwatungulula ku bukose bwa muyayaya. Musita mulumendo umo munoonsi lwaaipuziizie palua keelia kyapalile kukita eevi apate bukose bwa muyayaya, Yesu waamwasukile eevi: ‘Iza unkoonke.’ (Mat. 19:16-21) Ku Bayuda bamo basibanga bazumiine nangue weene i Kristu, Yesu waalandile eevi: “Mikooko yane . . . ili yankoonka. Ni neene ndi naipeela bukose bwa muyayaya.” (Yoan. 10:24-29) Nikodemu abanga wali umo wa bantu baali bapaangile Sanhedrini, kabili waatonene kumana bingi palua masambilizio akue Yesu. Yesu wamulandile nangue baalia bali ‘bamuketekela’ bakaba ni “bukose bwa muyayaya.” (Yoan. 3:16) Tuli twalangilila kiketekelo muli Yesu musita utuli twakita kukoonkana ni milandu ni bikitua byakue. Kine twakita evio, twakaba kusiala mu nzila ili yatwala ku bukose bwa muyayaya.​—Mat. 7:14.

10. ‘Kumumana’ buino Yesu kubiikile mukati kiki? (Yoane 17:3)

¹⁰ Tupalilenke kumumana Yesu ntaanzi ya kutendeka kukoonka ntanfu yakue. (Soma Yoane 17:3.) ‘Kumumana’ Yesu ni kintu kitupalile kutwalilila kukita. Tupalile kutwalilila kukila kumumana buino, i kulanda, kusambilila palua mibeele yakue, kutontonkania kwakue, ni mafunde akue. Anzia kine twakita kale miaka inga twali mu kisinka, tupalile kutwalilila kumumana Yehova ni Muana wakue.

11. Mu kitabu kya Mateo, Marko, Luka ni Yoane muli mwasaangua mpunda ki?

¹¹ Ntono yaamulengizie Yehova abiike bitabu bina bya Nsimiko mu Mulandu wake, eevi kutukwasia tumumane Muana wakue. Mu Nsimiko, i kulanda, mu bitabu bya Mateo, Marko, Luka, ni Yoane muli mpunda palua buikazi ni miilo yakue Yesu. Ezio mpunda ili yatubuila bintu byaakitile Yesu, ili yatulangilila bintu byaalandile ni vyaali waiunvua. Bebio bitabu bina bili byatukwasia ‘kulanguluka’ saana mufuano wakue Yesu. (Baeb. 12:3) Mu bebio bitabu i muli  ntanfu yaasiile Yesu. Pakaako, kine twasambilila bebio bitabu, kunti twakila kumumana buino Yesu. Ni kili kufuminamo, tuli kukoonka ntanfu yakue mu peepi.

12. Kunti twakita siani eevi tukile kunoonkelamo mu Nsimiko?

¹² Eevi tunoonkelemo mu Nsimiko, tupalile kukita bingi kuliko kupeleelasie pa kuisoma. Tupalile kukwata musita wa kuisoma twapoozeleko maano ni kutontonkania saana palua belia bitwasoma. (Palania ni Yoshua 1:8, bulondolozi buli pensina.) Ale kansi tulondoluele palua masoke abili ali kutukwasia kutontonkania palua Nsimiko ni kubombia beelia bitwasomamo.

13. Kunti wakita siani eevi Nsimiko yaluke ya kisinka kuli weewe?

¹³ Kya mambo, kita mpunda ili mu Nsimiko iye yali ya kisinka kuli weewe. Bombia buviinde bobe bwa kumona mu maano eevi umone, unvue, ni kwisaanga kuya walipo musita lubibanga byakitika. Eevi uviinde kukita evio, kebulula mu mpapulo iteaniiziwe na kuteania kwakue Yehova. Toosia bulondolozi buzyungulukiile, i kulanda, bintu byaakitikile mu bulondolozi bwa ntaanzi ni bukoonkelepo bwa mpunda yuli mukusoma. Kebulula palua bantu ni nkeende ilondolwelue mu ezio mpunda yuli mukusoma. Palania mpunda yuli mukusambilila ni mpunda ipaleene ni ezio ili mu Nsimiko inge. Musita unge, kaleemba umo wa Nsimiko kunti waya waleembele bulondolozi bumo bwa mana busileembelue na kaleemba unge wa Nsimiko.

14-15. Tupalile kukita siani eevi tubombie mu buikazi bwetu beelia bitwasambilila mu Nsimiko?

¹⁴ Kya bubili, bombia mu buikazi bobe mpunda ili mu Nsimiko. (Yoan. 13:17) Kisia kusambilila mpunda ili mu Nsimiko wapoozeleko saana maano, iipuzie eevi: ‘Eba, mu eezi mpunda muli ni lisomo lindi kubombia mu buikazi bwane? Kunti nabombia siani eezi mpunda eevi nkwasieko muntu unge?’ Ezia kutontonkania palua muntu umo waumanine, ni kisia pa musita upalile, mubuileko leelio lisomo mu nzila iweeme kabili ya ntono.

¹⁵ Ale kansi tulondoluele mufuano uli kutukwasia kumona vya kubombia azo masoke abili. Tuli kulondoluela mukanfwilua waali wabuliilue, waamwenue na Yesu mu ekalu.

16. Soma Marko 12:41 ni kulondolola beelia biwamona byakitika.

¹⁶ Kita ezio mpunda iye yali ya kisinka kuli weewe. (Soma Marko 12:41.) Mona mu maano bintu byaakitikile. Tuli mu Muezi wa Nisani 11, muaka wa 33 Yesu wasyavelue, kabili kusielesie nsiku iniini Yesu afue. Yesu wapua nsa ingi wali mukusambilizia mu ekalu. Bantunguluzi ba diini bali mukumupinga saana. Ntaanzi, bange pakati kaabo, baatwisikanga palua buviinde bwakue. Bange, baezianga kumwipuzia biipuzio bikolele baizi nangue taviinda kwasuka. (Mark. 11:27-33; 12:13-34) Loonu, Yesu waya mu nkeende inge ya ekalu. Eezi nkeende, paange yaali yakuutua Musolo wa Banakazi. Momo, wamonamo bisanduku bili mumbali bibumba bya musolo. Waikala ni kutendeka kumwenenena bantu musita ubali mukubiika bulongio bwabo mu bisanduku. Wamona banoonsi bali mukubiika mu bisanduku nfalanga ingi ya bingolongolo. Paange paantu ali peepi, waunvua bingolongolo byabo byalila saana musita ubili mukuponena mu bisanduku.

17. Munkafwilua alondolwelue mu Marko 12:42 waakitile ki?

¹⁷ Soma Marko 12:42. Kisia musita uniini, Yesu wamona mwanakazi umo. Ozo, ni “mukanfwilua umo abuliilue,” kabili mupabi. (Luk. 21:2, NWT) Buikazi bwakue bukolele saana, kabili paange ali ni buavia bwa kupata nfalanga ya kumukwasia kusita bintu byakabiile eevi aye wakosele. Anzia evio, waya ku kisanduku kimo ni kuponiiziamo bingolongolo bibili biniini bange bila bamwene. Kabili paange beebio bingolongolo te bisamiizie musita ubyaponena mu kisanduku. Yesu wamana beelia byabiika mu kisanduku ozo mwanakazi. Wabiikamo leputa ibili. Beebio, i byaali bingolongolo biniini saana bibanga byabombiiwa mu ozo musita. Ezio nfalanga te ikumeene atasie kusita luzeeba, koni kamo pakati ka toni twa mutengo uniini saana twaali twasisiiwa eevi kuliiwa.

18. Kukoonkana ni Marko 12:43, 44, Yesu waalandile ki palua bulongio bwakue mukanfwilua?

¹⁸ Soma Marko 12:43, 44. Yesu wapapiiwa saana na ozo mukanfwilua. Pakaako, wabakuuta basambi bakue, wabalanda bapooze maano ku ozo mwanakazi, ni kubaana eevi: “Ozu munkanfwilua mupabi wabiikamo byavulile [. . .] kukila bange bonse.” Kisia walondolola eevi: “Bange [maka-maka banoonsi] babiikangamo toolia tuli twailundilapo pa bunoonsi bwabo, inzi weene anzia ni mupabi, wabiikangamo tonse twali nato, wapeelanga tonse twakiba waketekeele mu buikazi bwakue.” Musita ozo mwanakazi wa kisinka lwaafumiizie nfalanga yakue iniini yabanga wasyaliilue naayo bobo busiku, waabiikile bukose bwakue mu minue yakue Yehova ili yaemenana.​—Malum. 26:3.

19. Ni lisomo ki lya mana litwapata mu milandu yakue Yesu palua mukanfwilua mupabi?

¹⁹ Bombia mpunda ezio mu buikazi bobe. Iipuzie eevi, ‘Nasambilila lisomo ki mu milandu yakue Yesu palua mukanfwilua mupabi?’ Tontonkania palua ozo mukanfwilua. Kakiine waali watonene amupeele Yehova bingi. Anzia evio, waakitile kukoonkana ni buviinde bwakue, waamupeele Yehova kikilile kuwaama. Ni Yesu waali wamanine nangue bulongio bwakue ozo mwanakazi bwaali bwa mana pa menso akue Leeza, Baba wakue. Paapa twapatapo lisomo lya mana: Yehova ali wasekelela kine twamupeela kintu kyetu kikilile kuwaama, i kulanda, miilo yeetu ya mutima ni mweo weetu onse. (Mat. 22:37; Bakol. 3:23) Yehova ali watona kine wamona twaikwinda kukoonkana ni buviinde bwetu bonse! Leelio lifunde lili lyabomba palua musita ni maka atuli twabombia mu lupupo lwetu, lubiikile mukati miilo yeetu ya kusimikila ni kulonghaana.

20. Kunti wabombia siani lisomo lili mu milandu yakue Yesu palua mukanfwilua? Leeta ni mufuano.

 ²⁰ Kunti wabombia siani lisomo lili mu milandu yakue Yesu palua mukanfwilua? Ezia kutontonkania palua bantu baumanine, bakabiile kusininkiziiziwa nangue Yehova ali wasaansamuka musita ubali baikwinda. Kwa mufuano, eba, umanineko ni nkazi akotele, ali waimona kuya wali ni kilubo ao wa bule, paantu takili kabili na bukose buweeme ao maka a kubomba miilo ya kusimikila nga kale? Ao kunti watontonkania palua lupua umo ali ni buluele busiizi kukosapo kabili buli bwamuleetela misa, ali watioka mutima paantu taviinda kuya kulonghaana lyonse ku Nsesi ya Bukolo? Bakwasie bantu bali nga babo kupitila kulanda milandu ili ‘yakuula.’ (Baef. 4:29) Babuileko lisomo lili lyakoselezia litwasambilila mu mpunda palua munkafwilua mupabi. Milandu yobe ya kukoselezia kunti yamusininkiziizia nangue Yehova ali wasaansamuka musita utuli twamupeela keelia kikilile kuwaama. (Tus Maf. 15:23; 1 Bat. 5:11) Kine weewe watasiako bange paantu bali bamupeela Yehova keelia kikilile kuwaama​—anzia kine kimwenekele nangue ni kiniini—​wakoonka ntanfu yakue Yesu mu peepi.

21. Weewe, wapingula kukita ki?

²¹ Tuli twatasia saana paantu mpunda ili mu Nsimiko ili yatupeela bulondolozi buingi palua buikazi bwakue Yesu. Ili yatukwasia kumupala ni kukoonka mu peepi ntanfu yakue! Kakiine kunti kyawaama saana kine wakwata mupaango wa kusambilila we bunke ao mu Lupupo lwa Lupua mpunda ili mu Nsimiko. Inzi, tulanguluke nangue, pakuti tunoonkelemo kakiine mu ezio mpunda, tupalile kuikita iye yali ya kisinka kuli fwefue ni kuibombia mu buikazi bwetu. Anzia evio, te tupalilesie kupeleela pa kupala beelia byaakitile Yesu, tupalile kutuilizia ni beelia byaalandile. Mu lyasi likoonkelepo, twakaba kulondoluela bintu bituli kuviinda kusambilila ku milandu ya kupeleezia yaalandile Yesu ntaanzi ya kufua.