Kya bulanda, musita unaali nasyafikia miaka 13, bukibuza bwane bwa peepi pamo ni Yehova bwaatendekele kukeepa. Benaane ba ku masomo baali bamwenekele kuya bali ni buntungua bwa kukita kila kintu kibatonene, ni neene naatonene kwaluka ni buntungua nga beene. Naatendekele kwiunvua nangue ntitikiilue saana na mizilo ya baviazi ni mafunde a Kikristu, kabili naatendekele kumona nangue miilo ya kimupasi ikolele. Mu ozo musita onse, naali namanine nangue Yehova kwali, inzi nsyali naiunvuile kuya nali peepi nakue.

Anzia evio, naatiinine kwaluka asiizi kubomba mu miilo yakue Yehova, pakaako, naali nasimikilako kaniini. Musita unaali naya mu kusimikila, nsyaali naiteania ata kaniini. Pakaako, naali naandua kutendekezia ao kutwalilila ni bulondolozi. Kukita evio kwaalengiizie tekuti mpate bantu ba kubwelelela ao masambililo a Bibilia. Nsyaali nasekelela kabili miilo ya kusimikila, ni keekio kyaalengiizie nkile kusuula miilo ya kusimikila. Naali naiipuzia eevi, ‘Bintu bya eevi, muntu kunti wasimikila siani kila mulungu, kabili kila muezi?’

Lunaafikiizie miaka 17, naakilile kutona kwaluka ni buntungua. Pakaako, naalongeele ma sakoshi ane, naafumine ku nsesi, ni kukuukila ku Australia. Baviazi  baane baakisilue kumona nafuma pa nsesi. Baaunvuile muenzo, inzi baali baswapiile nangue nakaba kutwalilila kumubombela Yehova.

Mu Australia, aali yane ya kimupasi yaakilile kukeepa. Ku kulonghaana naali nasyayakosie limo-limo. Naakitile bukibuza na bamisepuka babanga bali ni aali nga yane. Fwe bonse twaali twatona kuya ku kulonghaana busiku bumo, ni kisia paapo, twaali twaya ku kumina ni kukinda mu fuasi mubali bakinda ni kusisia bwalua kine busiku bwaila. Lundi nalanguluka bintu binaali nakita mu ozo musita, ndi nainika nangue naali natikile kuulu kumo mu kisinka ni kunge natikile mu kyalo. Inzi, ibe mu kisinka ao ku kyalo, te kuli fuasi ku naali naiunvua buino.

Miaka ibili eevi kisia paapo, naasaakeene ni nkazi umo waankwasiizie ntendeke kutontonkania vili buikazi bwane. Naali naikala mu nsesi imo ni bankazi basaano basibanga baupilue. Twaamukupile kangalila pamo ni mukazi wakue Tamara eevi beeze bakite pamo ni fwefue mulungu umo mu nsesi yeetu. Musita mulume wakue lwaali wabomba miilo ya kilonghaano, Tamara waali wapisia musita ni kuseka pamo ni fwefue bakaziana. Naali natona lwaali wakita evio. Abanga wali muntu ali waemenana saana kabili waleengelesie kulanziiwa. Naapapile saana kumona muntu wa kimupasi nga weene kabili wali ni bingi bya kukita, kuya wali ni musita wa kusekiana saana ni bange.

Tamara waali wasaansamukile saana. Waali waambukiziako ni bange ntono yakue palua kisinka ni palua miilo ya kusimikila. Weene abanga wali ni nsaansa paantu waali wamubombela Yehova kwa maka akue onse, inzi neene nsyaali na nsaansa paantu naali namubombelasie Yehova kakaniini. Malanga akue aweeme ni nsaansa yakue byaankwasiizie saana mu buikazi bwane. Mufuano wakue waandengizie ntontonkanie palua kisinka kimo kiswapiile Lileembo, kilandile nangue: Yehova atonene fwe bonse tumubombele ‘twasaansamukile’ kabili ‘na tupundu twa nsaansa.’​—Malum. 100:2.

Naali natonene kuya nali ni nsaansa nga yakue Tamara. Inzi, pa kunti ngaluke ni ezio nsaansa, naali napalile kukita bupilibuko bukata mu bintu kampanda. Yaatweme musita, inzi naatendekele kukita bupilibuko bunini-buniini. Naatendekele kwiteania palua  miilo ya kusimikila, kabili naatendekele kukita bupainia bwa kukwasia mu nsita imo-imo. Kukita evio kwaankwasiizie kupunguzia muenzo ni kuya nali ni kisinka mu beelia bindimukulanda. Paantu naali nabombia saana Bibilia mu miilo ya kusimikila, naakilile kusaansamukila ezio miilo. Bila kukokola, naatendekele kukita bupainia bwa kukwasia kila muezi.

Naatendekele kukita bukibuza pamo ni bantu ba miaka yonse baali bakita buyantanzi bwa kimupasi kabili baali basekelela miilo yabo ya kumubombela Yehova. Mufuano wabo uweeme, waankwasiizie ntoosie kabili bintu bindinatonesia mu buikazi bwane ni kwibiikila ntantiko iweeme ya kimupasi. Naabambile kusaansamukila saana miilo ya kusimikila, kupuako, naatendekele miilo ya bupainia bwa loonse. Kupusana ni miaka inge yaapitile, ozo musita i lunaiunvuile kuya natekameene, nali ni nsaansa, kabili naiunvuile buino kuya nali mu kilonghaano.

Kisia muaka umo, naasaakeene ni Alex, mwalalume wali buino, wa kisinka, wamutonene Yehova ni miilo ya kusimikila. Abanga wali mubombi ali wabombela kabili abanga wasyakitile miaka sita wali painia. Kabili, mu musita kampanda, Alex waabombeele ni mu kazonga kakabiiluemo saana bakasimika ka mu kyalo kya Malawi. Kooko, waali wapisia musita pamo ni bamisionere babanga bali mifuano iweeme kuli weene, kabili baamukoseleziizie atwalilile kubiika miilo yakue Yehova pa ntaanzi mu buikazi bwakue.

Neene ni Alex, twaaupeene mu 2003, kabili kutendekela loolo, tutwaliliile kubomba mu miilo ya nsita yonse. Twakisambilila masomo engi a mana, kabili Yehova waakitupaala mu nzila ingi saana.

Mu 2009, twaakupilue eevi tutendeke kubomba twali ba misionere mu ka kyalo kaniini kali kakuutua Timor-Leste, kali kasaangua mu bilila bya ku Indonezia. Twasiele twapapile, twaanvuile nsaansa kabili ni muenzo mwenka. Kisia miezi isaano, twaafikile mu muzi ukata wa keekio kyalo uli wakuutua Dili.

Buikazi bwetu mu keekio kyalo bwaali bwapuseene saana ni koolia kutwafumine. Twaali twapalile kutendeka kwipatanisia ni tubeelela twa leenu, lulimi, byakulia, ni aali ya buikazi. Lingi, mu miilo ya  kusimikila tubanga twasaakaana ni bantu babanga bali bapabi saana, basibanga basomene ao babanga basomenesie kakaniini, kabili babanga bakitilua ovio. Kabili twaali twamona bantu bengi baali bakyulile kimubili ni kwema mu maano juu ya vita ni bubiifi. *

Kakiine miilo ya kusimikila yaali yaweeme saana! Kwa mufuano, busiku bumo, naasakeene ni Maria, * mukaziana wa miaka 13 abanga wali ni bulanda. Paali papitilesie miaka iniini ntangia mama wakue afue kabili wali wamumona baba wakue limo-limo saana. Nga baanike bange ba miaka yakue, Maria ni weene taali wamanine bya kukita mu buikazi bwakue. Nalanguluka busiku bumo waalilile musita lwabanga wambuila vyabanga waiunvuile. Inzi, naandilue kunvua byabanga walanda paantu naali nsinamane buino lulimi lwakue. Naapepele kuli Yehova namulomba ankwasie eevi mukoselezie ozo mukaziana, kisia, naatendekele kusoma nakue maleembo ali akoselezia. Kisia miaka iniini, naamwene kisinka kyaalulula aali yakue, kumoneka kwakue, ni buikazi bwakue bonse. Waabatiziiziwe, ni loonu ali watungulula masambililo akue ye mwine a Bibilia. Loonu, Maria ali ni lupua lukata lwa kimupasi kabili ali waiunvua nangue atonenue.

Yehova ali mukupaala miilo ya kusimikila mu Timor-Leste. Anzia kine bakasimika bengi bakibatiziiwa mu miaka likumi eezi yakipita paapa, bengi tebasiali bapainia, babombi bali babombela, ni bange ni bakote. Bange bali babomba mu biro ya kupilibula, kabili bali bakwasia kufumia byakulia bya kimupasi mu ndimi ili yalandua mu ezio nkeende. Naali naunvua saana nsaansa kunvua bali mukuimba ku kulonghaana, kubamona basaansamukile, kabili kubamona baaluka babibuza bakue Yehova.

Buikazi bwetu mu Timor-Leste bwaali bwapuseene saana ni buikazi butwali nabo mu Australia, inzi bwaali bwasaansamusiizie saana. Nsita inge twaali twatwamua mu bis iniini yalimo bantu bengi, mwenka moomo mwali ni nsabi yume pamo ni bifunda bya saasa byaali byafumiiziwe ku nsoko. Nsiku inge, twaali twatungulula lisambililo lya Bibilia mu nsesi iniini mubanga mwaaluka lyuza ni kinuanvi. Ezio nsesi, ibanga yali ni misolo yasapile ni bankonko bali mukwendoka mu mbali yeetu. Anzia azo maavia, lingi naali nalanda nangue, ‘Eezi i nsaansa yane!’

Lundi natontonkania palua musita waapitile, ndi natasia saana baviazi bane paantu baaikwindile saana kunsambilizia nzila yakue Yehova ni kunkwasia, atasie musita wa bukaziana bwane bwali bwakolele. Lileembo lya Tuswalo ni Mafunde 22:6 lyakifikiliziiwa mu buikazi bwane. Ba mama ni baba bali baitonena juu yane ni Alex; bali ni nsaansa ya kutumona twamubombela Yehova. Kutendekela mu 2016, tuli mukubombela mu muputule uli mu kazonga kemaniinue na musambo wa Australasia.

Kunti kyamoneka kyakolele kuzumina nangue musita waapitile nsyaali natonene miilo ya kusimikila. Loonu i vinatona miilo ya kusimikila! Naakifikiila kwinika nangue, anzia tusaangue na ki mu buikazi bwetu, nsaansa ya kisinka ili yafumasie mu kumubombela Leeza kwa mutima weetu onse. Kakiine, eezi miaka 18 yapita twamubombela Yehova pamo ni Alex, i yakiba yasaansamusiizie saana mu buikazi bwetu. Loonu, nainika kisinka kya milandu yakue kaleemba wa malumbo Daudi, waamulandile eevi Yehova: “Baalia bonse bali babutukila kuli weewe bakaba kusaansamuka; lyonse bakaba kusamuna kwa nsaansa. . . . Kabili baalia batonene liina lyobe bakaba kusaansamuka muli weewe.”​—Malum. 5:11.