1. Kunti twaibiikila mipaango ki ya kimupasi?

 PAANTU tuli Bakristu ba kisinka, tumutonene saana Yehova. Tutonene kumupeela Yehova kintu kiweeme saana. Inzi, kine tutonene kumubombela Yehova kwa maka etu onse, tupalile kwibiikila mipaango ya kimupasi, nga evelia kukuzia mibeele ya Kikristu, kusambilila bufundi paleepale ao kukeba nzila ya kukwasia bange. *

2. Juu ya ki tupalile kwibiikila mipaango ya kimupasi ni kukita maka eevi kuifikilizia?

² Juu ya ki tupalile kuya twatonene kwaluka babombi bakue Yehova baweeme saana? Kintu kya mana saana ni keeki, tutonene kumusaansamusia Baba weetu wantono ali ku muulu. Yehova ali wasaansamuka musita lwali wamona twabombia buviinde bwetu bonse mu miilo yakue. Kukila pakaako, tutonene kukita buyantanzi bwa kimupasi eevi tuviinde kubakwasia saana balupua ni bankazi betu. (1 Bat. 4:9, 10) Anzia kine twakokola kale mu kisinka ao abe, fwe bonse tupalile kukita buyantanzi bwa kimupasi. Kansi, tumone kine kunti twakita siani evio.

3. Nga vilandile 1 Timoteo 4:12-16, mutumua Paulo waamukinkiziizie Timoteo akite ki?

³ Musita mutumua Paulo lwaamuleembeele Timoteo mukanda wakue wa kuanza, ozo mwalalume mulumendo aweeme, abanga wasyali mukote ali ni kibeelezio. Anzia evio, Paulo waamukinkiziizie atwalilile kukita buyantanzi bwa kimupasi. (Soma 1 Timoteo 4:12-16.) Kine watontonkania milandu yakue Paulo, uli kwinika nangue weene, waali watonene Timoteo akite buyantanzi  mu nzila ibili: Kukuzia mibeele ya kimupasi nga evelia ntono, kiketekelo, lwendo luswetele, ni kangeko kuwaamia bufundi paleepale nga evelia kusoma ntaanzi ya bantu, kusoka ni kusambilizia. Tuli kulondoluela mufuano wakue Timoteo, eevi tumone kwibiikila mipaango ya kimupasi kukoonkana ni buviinde bwetu vikuli kutukwasia kwaluka babombi baweeme saana bakue Yehova. Kabili, tuli kumona nzila paleepale ya kutaniiziamo miilo yeetu.

4. Nga vilandile Bafilipi 2:19-22, ni kiki kyaalengiizie Timoteo abombiiwe saana mu miilo yakue Yehova?

⁴ Ni kiki kyaamukwasiizie Timoteo abombiiwe saana mu miilo yakue Yehova? Mibeele yakue ya Kikristu yaali yamonekele paswetele. (Soma Bafilipi 2:19-22.) Kupitila bulondolozi bwakue Paulo palwakue Timoteo, kunti twainika nangue Timoteo abanga waikefiizie, wali wa kisinka, wali ni mute, kabili waswapiilue. Abanga wabatonene balupua, kabiili abanga wabeemena saana. Keekio kyaalengiizie Paulo amutone Timoteo, kabili te kunti atiine kumupeela miilo ikolele. (1 Bakor. 4:17) Enka evio ni fwefue, kine twakuzia mibeele ili yatona Yehova, weene wakaba kututona, kabili twakaba kukwasia saana kilonghaano.​—Malum. 25:9; 138:6.

5. (a) Kunti wamana siani mibeele ya Kikristu yupalile kuwaamia? (b) Nga vilangiliile foto, nkazi mukaziana wabombela siani mupaango wakue wa kukila kwibiika pa fuasi ya bange?

⁵ Saakula mibeele imanikile buino yutonene kukuzia. Pepa ni kutoosia eevi umone seemu ya bumuntu bobe yupalile kuwaamia. Saakula mibeele imanikile buino yuli kutona kuwaamia. Kwa mufuano, eba, kunti wakila kukosia mibeele ya kwibiika pa fuasi ya bange ao kukuzia nkulu ikata ya kukwasia balupua ni bankazi? Ao, eba, kunti waikwinda kukila kwaluka muntu ali wakita mutende pamo ni bange kabili ali waeleela saana? Paange, kunti wamona kyaweeme kumwipuzia kibuza obe wa peepi eevi akubuile mibeele yupalile kuwaamia.​—Tus Maf. 27:6.

6. Weewe, kunti wakuzia siani mibeele yutonene kukuzia?

⁶ Ikwinde kufikilizia mupaango obe. Kunti waviinda siani kukita evio? Nzila imo ya kukita evio ni kusambilila wapoozeleko maano mibeele yutonene kuwaamia. Tulande wapingula kubombela palua mibeele ya kweleela saana bange. Kunti watendeka kusoma ni kutontonkania saana palua mifuano ya bantu bazimbuilue mu Bibilia, baalia baalangiliile mibeele ya kweleela mu kwitonena, ni ya baalia baasyakitile evio. Tontonkania palua mufuano wakue  Yesu. Waabeeleele bange mu kwitonena. (Luk. 7:47, 48) Kabili, taapoozele maano ku bilubo byabo, inzi waapoozele maano ku beelia bibaali ni buviinde bwa kukita. Kupusana ni Yesu, Bamafarisayo beene ‘baali babafuupuile benabo.’ (Luk. 18:9) Kisia kutontonkania palua ezi mifuano, iipuzie eevi: ‘Ni mibeele ki indi namona mu bange? Ni mibeele ki ibali naayo indi napoozako saana maano?’ Kine uli wamona kyakolele kumweleela muntu umo, ezia kukita liste ya mibeele yonse iweeme ili na ozo muntu. Kisia, iipuzie eevi: ‘Yesu amumwene siani ozu muntu? Eba, weene kunti wamweleela?’ Kine twakita evio, tuli kwalulula nzila yeetu ya kutontonkania. Ku ntendeko, kunti kyaloomba kukita maka eevi kumweleela muntu wakituluvia. Inzi, kine twatwalilila kukita maka, twakaba kufikiila kumona kyaleengele saana kweleela.

7. Nga vilandile Tuswalo ni Mafunde 22:29, Yehova ali mukubombia mu nzila ki babombi bali ni bufundi mu enu nsiku?

⁷ Mupaango unge uuli kuviinda kwibiikila ni kusambilila bufundi buli kukukwasia. Tontonkania palua babombi bengi bakabiilue eevi kukwasia kukuula ma Beteli, Bipaka bya Kulonghaaninamo, ni Masesi a Bukolo. Bengi pakati ka babo balupua ni bankazi bali mukusambilila bufundi kupitila kubomba pamo ni balupua ni bankazi bange bali ni kibeelezio. Nga vilangiliile foto, balupua pamo ni bankazi bali mukusambilila bufundi bukabiilue eevi kukwasia kusuunga Bipaka bya Kulonghaaninamo ni Masesi a Bukolo. Kupitila ezio nzila pamo ni nzila inge, Yehova Leeza , “Likolo wa muyayaya,” ni Kristu Yesu, “Likolo wa . . . ba makolo,” bali mukufikilizia miilo ya kupapia kupitila babombi bali ni bufundi. (1 Tim. 1:17; 6:15, NWT; soma Tuswalo ni Mafunde 22:29.) Tutonene kubomba kwa maka, kabili kubombia bufundi bwetu eevi kumutasia Yehova apana fwe beene.​—Yoan. 8:54.

8. Kunti wamana siani bufundi buupalile kusambilila?

⁸ Saakula bufundi bumanikile buino buutonene kusambilila. Weewe, kunti wasambilila bufundi ki? Beepuzie bakote ba mu kilonghaano kyenu, ao paange kunti wamuipuzia kangalila obe wa muputule eevi bakubuile bufundi buuli kuviinda kukuzia. Kine bakubuila nangue upalile kukuzia bufundi bwa kulanda ni kusambilizia, beepuzie eevi bakubuile bufundi bumo bwa kulanda buupalile kubombelapo. Kisia, kita maka eevi uwaamie bufundi bobo. Kunti waviinda siani kukita evio?

9. Kunti wakita siani maka eevi ufikilizie mupaango obe wa kusambilila bufundi buutonene?

⁹ Kita maka eevi ufikilizie mupaango obe. Tulande utonene kukosia bufundi bobe bwa kusambilizia. Kunti wasambilila wapoozeleko maano broshua Fanya Bidii Katika Kusoma na Kufundisha. Kine upeelue kiputulua ku kulonghaana kwa mukati ka mulungu, kunti wamulanda lupua umo ali ni bufundi bwa kusambilizia akutuilizie musita luuli mukuteania, kabili akubuile vya kuwaamia bufundi bobe. Uye wateania biputulua byobe ntaanzi ya musita keekio kili kulengia bantu bamone nangue uli waikwinda, kabili bakaba kukuswapila.​—Tus Maf. 21:5; 2 Bakor. 8:22.

10. Leeta mufuano ulangiliile vyakukosia bufundi bututonene.

¹⁰ Kunti wakita siani kine bufundi buukebele kusambilila bubiikile mukati kintu kyumwene nangue kikolele saana kukita? Te kutioka mutima! Lupua umo ali wakuutua Garry tabanga wali na buviinde bwa kusoma buino. Walanguluka vyaali waema saana musita lwabanga waikwinda kusoma na lizui likata ku kulonghaana. Inzi, waatwaliliile kwikwinda eevi awaamie bufundi bwakue. Walanda nangue kukwasiiwa na balupua bali ni kibeelezio pamo ni mpapulo, kwaalengiizie afikiile kwaluka fundi wa kulanda maasi ku Nsesi ya Bukolo, ku kulonghaana kwa muputule ni ku kulonghaana kwa kalaale!

11. Ni kiki kyakaba kutukwasia kuya twali ni bingi bya kukita mu miilo yakue Yehova nga Timoteo?

 ¹¹ Eba, Timoteo waalukile mulanzi ao kasambilizia ali ni bufundi saana? Bibilia te ilandile. Inzi, kakiine Timoteo waalukile ni bufundi mu miilo yakue, paantu waakoonkele musoko ubaamupeele kuli Paulo. (2 Tim. 3:10) Evio vyenka kine twakuzia bufundi bwetu, twakaba kwaluka ni buviinde bwa kukita bingi mu miilo yakue Yehova.

12. Miilo ya bange ili yakukwasia siani?

¹² Fwe bonse tuli twanoonkelamo kupitila miilo ili yabomba bange. Bange bali bakita bintu bingi eevi kutukwasia. Kwa mufuano, musita utuli mu opitali, tuli twatasia kwendelua na bakote bali babombela mu Kabungue Kali Kabombela Pamo ni Opitali ao kine twaendelua na Bikundi bya Kupempula Baluele. Musita utuli twasaakaana ni maavia mu buikazi bwetu, tuli twatasia saana kumona mukote ali waemenana wapisia nsita pamo ni fwefue eevi kututuilizia ni kutukoselezia. Musita utukebele kukwasiiwa palua kutungulula lisambililo lya Bibilia, tuli twasekelela musita painia ali ni kibeelezio lwali waitabila kututwala ku lisambililo ni kutubuila masoke a kukoonka pa kusambilizia. Babo balupua ni bankazi bonse bali basekelela kutukwasia. Ni fwefue kunti twapata nsaansa nga ezio, kine twaipeela fwe beene eevi kubabombela balupua betu. Yesu waalandile eevi: “Mu kupeelana muli nsaansa ingi kukila mukupeelua.” (Miil Bat. 20:35, NWT) Kine utonene kukita bingi mu miilo yakue Yehova mu ezio nzila ao mu nzila inge, ni kiki kili kukukwasia kukita evio?

13. Musita utuli twaibiikila mupaango, tupalile kulanguluka ki?

¹³ Te kwibiikila mupaango usimanikile buino. Kwa mufuano, weewe kunti watontonkania eevi: ‘Ntonene kukita bingi mu kilonghaano.’ Inzi, paange kunti kyakola kumana vya kufikilizia mupaango ozo, kabili kunti wamona nangue tekikitika kumana musita luwakaba kufikilizia mupaango ozo. Kansi, keba mupaango umanikile buino. Kabili, kunti waleemba mupaango ozo ni vya kuufikilizia.

14. Juu ya ki kili buino kuya twaaluluka musita utuli twaipaangila mipaango?

¹⁴ Kabili, kili buino kuya twaaluluka musita utuli twaipangila mipaango. Juu ya ki? Paantu tetuviinda kumana mu nzila ipuililikile aali  yeetu viyakaba kwaluka. Mona ozu mufuano: Mutumua Paulo waakwasiizie kutendekezia kilonghaano kya leenu mu muzi wa Tesalonika. Kabili, kakiine abanga wali ni mupaango wa kusiala kooko ni kukwasia babo Bakristu ba leenu. Inzi, bantu baali bamupinga, baamufumiizie kwa maka mu ozo muzi. (Miil Bat. 17:1-5, 10) Paulo asialenge waikeele moomo, waasiile kubaleetela buavia balupua. Inzi, taalekeele kubakwasia. Waaipatanisiizie kukoonkana ni aali yaalulukile. Kisia, waamutumine Timoteo eevi abakwasie babo Bakristu ba leenu mu Tesalonika, baye baali ni kiketekelo kyalumine. (1 Bat. 3:1-3) Kakiine Bakristu ba ku Tesalonika, baaunvuile nsaansa saana paantu Timoteo waali watonene kuya konse kwaali wakabiilue!

15. Mipaango yeetu kunti yaaluluka siani kine aali yaaluluka? Leeta mufuano.

¹⁵ Kunti twasambilila kupitila kintu kyaasaakeene ni Paulo ku Tesalonika. Kunti twaibiikila mupaango, inzi aali yeetu kunti yaaluluka ni kutwanzia kufikilizia mupaango ozo. (Kas. 9:11) Kine aali yobe ili evio, uye waleengele kusaakula mupaango unge uuli kuviinda kufikilizia. Evio, i vyaakitile lupua lwa ba Ted ni Hiedi. Kuluala kwaabalengiizie bafume ku Beteli. Inzi, kumutona Yehova kwaabakinkiziizie bakebe nzila inge ya kutania miilo yabo. Ku ntendeko, baalukile bapainia ba loonse. Kisia musita, baalukile bapainia bebeleele, ni Ted waabeeleziiziwe kwaluka kangalila wa muputule ali wakwasia. Kisia, miaka ya kufikia mu miilo ya bukangalila yaalulukile. Ted ni Hiedi baainikile nangue te bakili na buviinde bwa kubomba ezio miilo. Anzia kine baatiokele mutima, baainikile nangue kunti bamubombela Yehova mu nzila inge. Ted walanda eevi: “Twaakisambilila nangue kunti twamubombela Yehova mu nzila ingi ipusene-puseene.”

16. Kunti twasambilila lisomo ki kupitila lileembo lya Bagalatia 6:4?

¹⁶ Tetuviinda kumana kila kantu kakaba kukitika mu buikazi bwetu. Pakaako, kili buino te kunti tuye twatontonkania nangue tuli ba mana kuli Yehova juu ya sie miilo ituli naayo, kabili te tupalile kwipalania ku bange bali ni miilo itusikwete. Hiedi walanda eevi: “Nsaansa yobe kunti yazeeza kine watendeka kupalania buikazi bobe ni buikazi bwa bange.” (Soma Bagalatia 6:4.) Ni kintu kya mana kukeba nzila ya kubakwasiiziamo bange ni kumubombela Yehova. *

17. Kunti wakita siani eevi ukabe kufikiila kupata bifulo mu miilo?

¹⁷ Weewe, wakaba kuviinda kukita bingi mu miilo yakue Yehova kine watwalilila kuleengia buikazi bobe ni kutiina madeeni asili a mana. Ibiikile mipaango ya musita uniini ili kukukwasia kufikilizia mipaango ya musita uleepele.  Kwa mufuano, kine utonene kwaluka painia wa loonse, wamona siani kine watendeka kubomba bupainia bwa kukwasia kila muezi kutendekela loonu? Kine mupaango obe ni kwaluka mubombi ali wabombela, wamona siani kine watendeka kupisia nsita ingi mu miilo ya kusimikila, kupempula baluele ni bantu bakotele ba mu kilonghaano kyobe? Kibeelezio kyuli kwaluka nakio loonu, kunti kyakukwasia kupata miilo inge mu nsita ili mukuiza. Pingula kubomba saana miilo yonse ibali bakupeela.​—Bar. 12:11.

18. Nga vilangiliile foto, weewe wasambilila ki kupitila mufuano wakue Beverley?

¹⁸ Bukote tebuviinda kutwanzia kwibiikila ni kufikilizia mipaango ya kimupasi. Mona mufuano wakue nkazi umo akotele ali ni miaka 75 ali wakuutua Beverley. Abanga wali ni buluele bwaviizie bwaali bwamwanzia kwenda. Anzia evio, abanga watonene saana kukwasia kampanye ya kukupa bantu ku Kibukisio. Pakaako, waaibikiile mipaango ibanga yamanikile buino. Musita Beverley lwaafikiliziizie mipaango yakue palua kampanye, waaunvuile nsaansa saana. Mute wakue waakwasiizie ni bange bepeele saana mu miilo ya kusimikila. Yehova amwene miilo ili yakita balupua ni bankazi bakotele kuya yali ya mana, anzia kine aali yabo kunti yabanzia kubomba nga vibatonene.​—Malum. 71:17, 18.

19. Kunti twaibiikila mipaango ki paleepale ya kimupasi?

¹⁹ Uye waibiikila mipaango yuli kuviinda kufikilizia. Kuzia mibeele ili kumusaansamusia Yehova. Sambilila bufundi bwakaba kukukwasia ubombiiwe saana na Leeza weetu ni kuteania kwakue. Keba nzila ya kubabombela saana balupua ni bankazi bobe. * Nga Timoteo, kupitila mpaalo yakue Yehova ‘buyantanzi bobe kunti bwamoneka saana ntaanzi ya bantu bonse.’​—1 Tim. 4:15, NWT.