KWEMA kunti kwaaluka nga kifunda kifinine kili ku mutima. (Tus Maf. 12:25) Eba, waaiunvuilepo kale kuya wapondekele juu ya kwema mu maano? Eba, waaiunvuilepo kale nangue teuviinda kukita musita waleepele wasipikiziizie? Kine i evio, te uli bunke. Bengi pakati keetu bali baiunvua kutopa, kwema, ni kutioka mutima juu ya aali ipusene-puseene. Kwa mufuano, bange bali basuunga muntu wa mu lupua lwabo aluele, bange baakifuilua na muntu wa mu lupua ubatonene, ni bange bakisaanzua na maka a kyalo ali ainoona bintu. Inzi, ni kiki kili kutukwasia kusipikizia musita utuli mukwema? *

Kunti twasambilila bintu bingi palua kusipikizia lyemo kupitila kutoosia mufuano wakue Likolo Daudi. Daudi waasaakeene ni aali ingi ikolele mu buikazi bwakue, kabili nsita inge, abanga waaluka mu buavia bwa kuzeezia bukose bwakue. (1 Sam. 17:34, 35; 18:10, 11) Ni kiki kyaamukwasiizie Daudi musita lwabanga waemene? Kunti twapala siani mufuano wakue?

Daudi waasaakeene ni meezio engi pa musita umo. Tontonkania kintu kyaakitikile kuli weene musita lwabanga wamubutukile Likolo Sauli, olia wali wakeba kumwipaya. Musita Daudi pamo ni balalume bakue lubaali bafuma ku kuluana, baasaangile baluani baibile bintu byabo, baziziizie masesi ni lupua lwabo lwatwemue. Daudi waakitile siani? “Daudi pamo ni balalume baali wali naabo, baatendekele kupooka muzoa mpaka ni maka a kulila apua.” Kisia Daudi waakilile kwema paantu balalume bakue baali waswapiile baatendekele ‘kulanda nangue bali kumuuma mabue.’ (1 Sam. 30:1-6) Mu ozo musita, Daudi abanga wali ni maavia atatu akata mu musita umo: Lupua lwakue lubanga lwali mu buavia, waali waunvuile muenzo wa kwipaiwa na balalume bakue, kabili Likolo Sauli abanga wamukumbiziizie. Pakaako, kipalile Daudi waaemene saana!

Daudi waakitile ki kisia paapo? Bila kukokola, “waaipeele maka kupitila Yehova Leeza wakue.” Paange Daudi waaviindile siani kukita evio? Tumanine nangue Daudi waali ni kabeelela ka kupepa eevi Yehova amukwasie, kabili waali watontonkania Yehova vyaamukwasiizie musita waapitile. (1 Sam. 17:37; Malum. 18:2, 6) Daudi waainikile nangue waali wapalile kumwipuzia Yehova kintu kya kukita, pakaako waamwipuziizie Yehova keelia kyapalile kukita. Kisiasie Daudi kupokelela butunguluzi kufuma kuli Yehova, waakitile kukoonkana ni butunguluzi bobo bila kukokola. Keekio kyaakwasiizie Daudi pamo ni balalume bakue bapaalue na Yehova kabili baabueziizie lupua lwabo pamo ni bintu byabo. (1 Sam. 30:7-9, 18, 19) Eba, wainika bintu bitatu byaakitile Daudi? Waapepele kuli Yehova eevi amukwasie, waalangulukile Yehova vyaamukwasiizie musita waapitile, kisia waakitile kukoonkana ni butunguluzi bwakue Yehova. Kunti twamupala siani Daudi? Mona nzila itatu.

1. Pepa. Nsita yonse ituli twatendeka kwema, kunti twapepa kuli Yehova eevi atukwasie ni kutupeela mulangue. Kupepa kunti kwatukwasia kwiunvua buino kine twamubuila Yehova kila kintu kili kyatwemia. Ao kunti twakita lipepo lifupi twapepela ku mutima kine aali yeetu itulimo yatwitabiziasie kukita evio. Nsita yonse ituli twamuloomba Yehova atukwasie, tuli twalangilila nangue tumuswapiile saana weene nga evelia vyaakitile Daudi, olia waalandile eevi: “Yehova ni muamba wane, kabili kifyamino kyane kabili Olia ali wampususia.  Leeza wane i muamba wane, mundi nabutukila.” (Malum. 18:2) Paapo lipepo lili lyakwasia? Nkazi umo painia ali wakuutua Kahlia, walanda eevi: “Kisia kupepa, ndi naiunvua kuteekamana. Lipepo lili lyankwasia kutontonkania nga Yehova vyali watontonkania, kabili ndi nakila kumuswapila.” Kakiine lipepo ni bupe buli ni maka kufuma kuli Yehova, buli bwatukwasia kuluisia lyemo.

2. Tontonkania Yehova vyaakikukwasia musita wakipita. Kine walanguluka bintu byaakitikile mu buikazi bobe, eba, kunti watontonkania meezio a waaviindile kusipikizia paantu waakwaasiiziwesie na Yehova? Musita utuli twatontonkania Yehova vyaatukwaasiizie ni vyaabakwasiizie babombi bakue mu nsita yaapitile, keekio kili kutukwasia kwaluka ni mutende ni kukila kumuswapila weene. (Malum. 18:17-19) Mukote umo ali wakuutua Joshua walanda eevi: “Ndi ni liste ya mapepo engi aasukilue kale. Keekio kili kyankwasia kulanguluka nsita inaamuloombele Yehova kintu kimo, kisia wampeela keelia kyenka kinaali nakabiile.” Kakiine, musita utuli twatontonkania bintu byaatukitiile kale Yehova, tuli twapata maka atukabiile eevi kutwalilila kuluisia kine tuli mu lyemo.

3. Kita kukoonkana ni butunguluzi. Ntaanzi ya kukwata bupinguzi palua kintu kitupalile kukita mu aali yeetu, kunti twakebulula mu Mulandu Wakue Leeza eevi tupate butunguluzi buswapiilue saana. (Malum. 19:7, 11) Bengi bali bainika nangue musita ubali bakebulula lileembo limo, bali bafikiila kwaluka ni buviinde bwa kwinika vya kubombia leelio lileembo mu buikazi bwabo. Mukote umo ali wakuutua Jarrod walanda eevi: “Kukebulula kuli kwankwasia kusambilila bingi palua lileembo, ni kumana beelia bindi mukubuilua na Yehova. Keekio kili kyankwasia kuzumina saana beelia bindi mukusoma ni kukita kukoonkana ni butunguluzi bobo.” Musita utuli twakeba butunguluzi bwakue Yehova kupitila Maleembo ni kukoonka bobo butunguluzi, kili kyasaangua kyaleengele kupata mutende pamo ni nsaansa kine tuli mukwema.

Daudi waainikile nangue pa kunti asipikizie lyemo lyabanga wali nalio, waali wapalile kukwasiiwa na Yehova. Waatasiizie saana kukwasiiwa na Yehova, ni keekio kyaamukinkiziizie alande eevi: “Kupitila maka akue Leeza kunti nalamata mu kibumba. Leeza wakisinka i ali wanvuika maka.” (Malum. 18:29, 32) Kunti twaiunvua nangue maavia etu ali nga bibumba bitusiviinda kulamata. Inzi, kupitila kukwasiiwa na Yehova kunti twaviinda kusipikizia maavia onse akolele! Kansi, musita utuli twapepa Yehova atukwasie, tutontonkanie bintu byonse byaatukitiile kale, kabili tukite kukoonkana ni butunguluzi bwakue. Kine twakita evio, tuli kuya twasininkiziizie nangue weene wakaba kutupeela maka ni mulangue utukabiile eevi kuluisia lyemo!