1-2. (a) Eunike abanga wali ni, kabili waapatile maavia ki palua kumusambilizia muana wakue juu yakue Yehova ni Yesu? (b) Londolola foto ili ku ntendeko ya kazeeti.

 ANZIA kine Bibilia te ilondoluele palua kubatiziiwa kwakue Timoteo, kunti twatontonkania nsaansa yaaunvuile Eunike, mama wakue, busiku bwa kubatiziiwa muana wakue. (Tus Maf. 23:25) Tontonkania Eunike vyali mukwitoneena musita lwamukentele Timoteo waimeene mu menda. Asekele, ni kooku Loisi bibi wakue kwa Timoteo wali peepi nakue wamukwete. Eunike wakula mpumuzi bukebuke musita Timoteo lwaibiziiwa mu menda. Menda asabuka musita Timoteo lwatumpuka wali ni nseko pa menso, ni Eunike wakolosia mensozi na nsaansa. Anzia kine kyaali kyakolele, Eunike waaviindile kumusambilizia muana wakue, amutone Yehova pamo ni Muana wakue Yesu Kristu. Waapatile maavia ki musita lwaali waikwinda kumusambilizia muana wakue?

² Baviazi bakue Timoteo te babanga bali mu diini imo. Baba wakue abanga wali Mugiriki, inzi ba mama wakue pamo ni bibi wakue babanga bali Bayuda. (Miil Bat. 16:1) Kipalile Timoteo abanga wakili mulumendo musita ba Eunike ni Loisi lubaalukile Bakristu. Inzi, Baba wakue taalukile Mukristu. Timoteo ali kukoonka diini yakue ni? Kipalile abanga wasyali ni miaka itosiizie eevi kukwata bupinguzi ye muine. Eba, ali kusaakula diini yakue baba wakue? Eba, ali kukoonka tubeelela twa Bayuda tubaamusambiliziizie wakili mwanike? Ao eba, ali kwitabila kwaluka musambi wakue Yesu Kristu?

3. Nga vilandile Tuswalo ni Mafunde 1:8, 9, Yehova ali wamona siani miilo ili yakita ba mama eevi kukwasia baana babo baaluke babibuza bakue?

³ Ba mama Bakristu ba mu enu nsiku ni beene, batonene lupua  lwabo. Kukila kintu kinge kyonse, batonene kukwasia baana babo bakite bukibuza bwa peepi ni Yehova. Kabili, Leeza weetu ali watasia saana palua bintu bibali baikwinda kukita. (Soma Tuswalo ni Mafunde 1:8, 9.) Yehova waakibakwasia ba mama bengi eevi basambilizie baana babo kumutona Yehova ni kumubombela.

4. Loonu ba mama bengi bali mukusaakaana ni maavia ki?

⁴ Nga vikili kyasaangua lingi, nsita inge mama kunti waiipuzia kine baana bakue kunti basaakula kumubombela Yehova, nga evelia vyaakitile Timoteo. Kabili, baviazi bamanine kyalo kyakue Sataana vikili mukukula baana babo. (1 Pet. 5:8) Kukila pakaako, ba mama bengi bali ni buavia bwa kusuunga baana bunke bila balume, ao bakwetesie balume basili Bakasininkizia bakue Yehova. Kwa mufuano, nkazi umo ali wakuutua Christine *, walanda eevi: “Mulume wane abanga wali baba aweeme kabili waali watonene lupua lwetu, inzi taali wangitabizia ata kaniini kubakwasia baana eevi baaluke Bakasininkizia bakue Yehova. Mu miaka ingi naali nalila lingi, naiipuzia kine kyakakitika baana bane bakafikiile kumupupa Yehova.”

5. Tuli kulondoluela ki mu leeli lyasi?

⁵ Kine uli mama Mukristu, kunti waviinda kukwasia baana bobe nga evelia vyaakitile Eunike. Mu leeli lyasi, tuli kumona vyuli kuviinda kupala mufuano wakue Eunike ni kubasambilizia baana bobe kupitila beelia byuli walanda ni beelia byuli wakita. Kabili, tuli kumona Yehova vyali wakaba kukukwasia.

6. Nga vilandile lileembo 2 Timoteo 3:14, 15, Timoteo waafikiile kwaluka siani Mukristu?

⁶ Musita Timoteo lwaali wakili mwanike, mama wakue waakitile maka saana eevi kumusambilizia “maleembo azuuke,” kukoonkana ni vyaali vyaunvua Bayuda. Kulanda kisinka, Eunike taali wamanine bintu bingi, paantu taali wamanine kantu palwakue Yesu Kristu. Inzi, bintu byaasambiliile Timoteo byaali byakumeene eevi kumukwasia asaakule kwaluka Mukristu. Eba, waalukile Mukristu? Paantu abanga wasyali mulumendo, waali ni nsaambu ya kusaakula kine ali kwaluka Mukristu. Bila kutwisika, kwikwinda kwakue mama wakue ni kwene kwaakwasiizie Timoteo afikiile ‘kuzumina’ kisinka palwakue Yesu. (Soma 2 Timoteo 3:14, 15.) Kakiine Eunike waasaansamukile saana paantu waaviindile kumusambilizia muana wakue, anzia kine kibanga kyakolele! Kakiine, Eunike waaikeele kukoonkana ni liina lyakue, lili ni mana ya muntu “ali waviinda.”

7. Eunike waali wapalile kumukwasia siani muana wakue atwalilile kukita buyantazi kisia kubatiziiwa?

⁷ Musita Timoteo lwaabatiziiziwe, waafikiliziizie kintu kya mana saana mu buikazi bwakue. Inzi, Eunike waali wakiemasie mu maano kine Timoteo wakaba kwaluka siani kisia kubatiziiwa. Muana wakue, wakaba kubombia siani buikazi bwakue busieleko? Wakaba kwaluka kibuza wa bantu bali ni lwendo lubiipile ni kwambukiziiwa na lwendo loolo? Eba, wakaba kuya kusoma ku Atene ni kwitabila masambilizio a bafilozofe basizumiine? Eba, wakaba kuzeezia musita wakue, maka, ni bulumendo bwakue wali mukukita maka eevi kwaluka munoonsi? Eunike taali wali na buviinde bwa kumukwatila bupinguzi Timoteo, inzi abanga wali ni buviinde bwa kumukwasia akwate bupinguzi bwa mulangue. Kumukwasia siani? Eunike waali wapalile kwikwinda saana kutwalilila kumusambilizia muana wakue akile kumutona Yehova ni kutasia palua bintu bibaakitiilue na Yehova ni Yesu mu lupua lwabo. Te baalia sie bali ni balume basizumiine bali ni buavia bwa kukwasia baana bafikiile kumutona Yehova. Atasie baviazi bali mu kisinka, kunti bamona kyakolele  kukumia mutima wa baana babo balumendo ao bakaziana eevi bafikiile kwaluka babombi ba kisinka bakue Yehova. Baviazi kunti basambilila ki kupitila mufuano wakue Eunike?

8. Mama kunti wamukwasia siani mulume wakue azumiine kufikilizia bintu bya kimupasi bikabiile baana babo?

⁸ Sambilila Bibilia pamo ni baana bobe. We nkazi, kine mulume obe ali mu kisinka, Yehova atonene umukwasie kwemena baana beenu bintu bya kimupasi. Nzila imo ya kukita evio ni kukwasia mupaango wa lupupo lwa mu lupua. Uye walanda bintu biweeme palua lupupo lwa mu lupua, kabili tontonkania palua bintu byuli kuviinda kukita eevi lupupo luye lwaweeme kabili lwasaansamusiizie. Paange kunti wamukwasia mulume obe kukita ntantiko ya mupaango wa lisambililo lya Bibilia liibeleele. Kukila pakaako, kine baana bange bakulileko, bapalile kusambilila Bibilia kupitila kitabu Sekelela Buikazi Loonse! paange kunti wamukwasia mulume obe mu bintu bikabiile baana beenu.

9. Mama ali ni mulume asizumiine, kunti wapata pi bintu bya kumukwasia?

⁹ Bange ba mama bali batungulula bunke lisambililo lya Bibilia pamo ni baana babo, paange paantu te bali na balume, ao paange paantu balume babo te Bakasininkizia. Kine i vikili ni mu nsesi yeenu, te kwema saana. Yehova wakaba kukukwasia. Bombia biombo bya kusambiliziiziako bifumiizie Yehova kupitila kuteania kwakue eevi usambilizie baana bobe. Wamona siani kine weewe waya kubamona baviazi bange bali ni kibeelezio eevi bakupeele malanga aweeme palua kubombia bebio biombo mu lupupo lwa mu lupua? * (Tus Maf. 11:14) Yehova kunti wakukwasia uye walondolola buino pamo ni baana bobe. Muloombe akukwasie eevi umane beelia bili byatontonkania baana bobe ni beelia bili mu mutima wabo. (Tus Maf. 20:5) Weewe, kunti wamwipuzia muana kiipuzio kileengele nga keeki, ‘ni buavia ki bukata saana buuli wapata ku masomo?’ Kumwipuzia kiipuzio nga keekio, kunti kwakukwasia kutendekezia bulondolozi buli kukukwasia kumana bingi palua muana obe.

10. Kunti wabakwasia baana bobe mu nzila ki inge eevi basambilile palwakue Yehova?

¹⁰ Keba nzila paleepale ya kusambilizia baana bobe palwakue Yehova. Uye walanda palwakue Yehova ni bintu bingi biweeme byali wamikitila. (Mal Miz. 6:6, 7; Is. 63:7) Kukita evio ni kwa mana, asa kine teuviinda kusambilila lingi pamo ni baana bobe ku nsesi. Christine, utwazimbulanga lwa ntaanzi, walanda eevi: “Nsita ya kulondoluela palua bintu bya kimupasi ibanga yaali iniini saana, pakaako mbanga nakebasie fuasi yonse ili kumoneka. Twaali twaya mu kwenda, ao kwingila mu buato ni kuya twasoza kufuma ku musenga, eevi kulondoluela bibumbua bya kupapia byaabumbile Yehova, ni kulondoluela bintu binge bingi bya kimupasi. Musita baana bane lubaakuliileko, naabakinkiziizie baye basambilila Bibilia bo beene.” Kukila pakaako, uye walanda bintu biweeme palua kuteania kwakue Yehova ni palua balupua ni bankazi. Apana kuya waamba bakote. Beelia byuli walanda palua bakote, kunti byakwasia baana bobe bakabe baya kubaloomba masoke kine bakebele kukwasiiwa.

11. Nga vilandile Yakobo 3:18, juu ya ki ni kintu kya mana kuleeta mutende ku nsesi?

¹¹ Uye waleeta mutende ku nsesi. Lingi uye wamulangilila mulume obe ntono pamo ni baana bobe. Uye walanda palua mulume obe mu nzila iweeme ni ya mukinzi, kabili uye wabasambilizia baana bobe kukita evio vyenka. Kine wakita evio, baana bobe bali kumona kyaleengele kusambilila palwakue Yehova. (Soma Yakobo 3:18.) Mona mufuano wakue Jozsef, olia ali wabombela mu kyalo  kya Rumania wali painia ebeleele. Musita lwabanga wakula, baba wakue waalengiizie kumubombela Yehova kuye kwakolele kuli weene, mama wakue, dada wakue mukulu, pamo ni balabakue babili balalume. Jozsef walanda eevi: “Mama wane abanga waikwinda saana kutuleetela mutende mu nsesi. Baba vyabanga wakila kusasa, ni mama i vyabanga wakila kulangilila buwaame. Musita mama lwaali wainika nangue tetukili twamukindika ni kumunakila baba weetu, waali walondolola pamo neetu lileembo lya Baefeso 6:1-3. Kisia, waali walanda palua mibeele iweeme yakue baba, ni kutukwasia kwinika juu ya ki tupalile kumutona. Keekio kyaakwasiizie lupua lwetu luye lwali ni mutende.”

12. Nga vilandile lileembo lya 2 Timoteo 1:5, mufuano wakue Eunike waamukwasiizie siani Timoteo?

¹² Soma 2 Timoteo 1:5. Eunike waamubiikiile Timoteo mufuano uweeme. Kipalile waamusambiliziizie nangue kine tuli ni kiketekelo kya kisinka, tupalile kulangilila kiketekelo keekio, kupitila bikitua byetu. (Yak. 2:26) Bila kutwisika, Timoteo waamwene nangue bikitua byakue mama wakue byaali byasonseziiziwe na ntono ikata kuli Yehova. Kakiine Timoteo waamwene nangue kumubombela Yehova kwaamuleeteele mama wakue nsaansa. Mufuano wakue Eunike waamukwasiizie siani Timoteo? Mutumua Paulo waalandile nangue Timoteo abanga wali ni kiketekelo kikata nga mama wakue. Kiketekelo kyakue Timoteo te kibanga kyali kya kwisyukilasie. Timoteo waamwene mufuano wakue mama wakue ni kupala mufuano ozo. Evio vyenka, ni loonu ba mama bengi bali mukuviinda kukwasia lupua lwabo lumubombele Yehova ‘bila kulanda kantu.’ (1 Pet. 3:1, 2) Ni weewe kunti wakita evio vyenka. Mu nzila ki?

13. Juu ya ki mama apalile kukita bukibuza bwakue pamo ni Yehova buye bwali kintu kya kuanza mu buikazi bwakue?

¹³ Kita bukibuza bobe pamo ni Yehova buye bwali kintu kya kuanza. (Mal Miz. 6:5, 6) Nga vili vyakita ba mama bengi, ni weewe uli waipeela saana. Uli wafumia nsita, nfalanga, tulo tobe ni bintu binge eevi ukebe bintu bya kimubili bikabiile baana bobe. Inzi, te upalile ata kaniini kuya waali ni bingi saana bya kukita bya kukulengia wandue kupata musita wa kukosia bukibuza bobe pamo ni Yehova. Lingi uye waipangila nsita ya kupepa wali pa bunke, kukita lisambililo lya bunke ni kuya ku kulonghaana. Kine wakita evio, uli kukosia aali yobe ya kimupasi ni kubabiikila bantu ba mu lupua lobe pamo ni bantu bange mufuano uweeme wa kukoonka.

14-15. Weewe, wasambilila ki kupitila mufuano wakue Leanne, Maria, ni João?

¹⁴ Mona mifuano iniini ya balumendo ni bakaziana baasambiliile kumutona ni kumuswapila Yehova kupitila kukentesia bintu bibanga byakita mama wabo. Muana mwanakazi mwina Christine ali wakuutua Leanne walanda eevi: “Te twali twasambilila Bibilia kine baba ali ku nsesi. Inzi, mama taali waizi kupusa ku kulonghaana. Anzia kine te twaali twamanine bintu bingi palua Bibilia, bintu byaali wakita byaatukwasiizie kwaluka ni kiketekelo kikata. Twaainikile nangue Bakasininkizia Bakue Yehova bali basambilizia kisinka ntaanzi tetunatendeke kuya ku kulonghaana.”

¹⁵ Baba wakue kwa Maria abanga wabapeela bantu ba mu lupua lwakue malipizi juu ya kuya ku kulonghaana. Maria walanda eevi: “Mama wane ali wasaangua wasipile saana. Lunaali mwanike, nsita inge naali nakaana kukita bintu, paantu naali natiina beelia bili kulanda bange. Inzi kumona mama vyabanga wasipile ni vyaali wamubiika lyonse Yehova pa ntaanzi mu buikazi bwakue, kwaankwasiizie kulekela kutiina  muntu.” Baba wakue kwa João, abanga wabakaania bantu ba mu lupua lwakue kulanda palwakue Yehova ao palua Bibilia ku nsesi. João walanda eevi: “Paange kintu kyaankumiizie saana, kibanga kyali kumona mama vyabanga watonene kulekela kila kintu, kufumiakosie kumutona Yehova, eevi amusaansamusie baba wane.”

16. Mufuano wakue mama kunti wabakwasia siani bange?

¹⁶ Mwe ba mama, languluke nangue mufuano wenu uli wakwasia ni bange. Mu nzila ki? Mona mufuano wakue Eunike viwaamukwasiizie mutumua Paulo. Waainikile nangue kiketekelo kyakue Timoteo kisili kya bunafiki ‘kibanganke kyali na . . . Eunike.’ (2 Tim. 1:5) Paulo waamwene kiketekelo kyakue Eunike lya kuanza musita ki? Kipalile mu lwendo lwakue lwa kuanza lwa bumisionere i lwaasaakeene ni Loisi pamo ni Eunike ku Listra, kabili paange waabakwasiizie baaluke Bakristu. (Miil Bat. 14:4-18) Tontonkania kaniini, musita Paulo lwaamuleembeele Timoteo kisia miaka 15, abanga wakilangulukilesie bintu byaakitile Eunike bilangiliile kiketekelo, kabili waamuzimbuile kuya wali mufuano uweeme wa kupala! Kakiine mufuano wakue waamukinkiziizie mutumua Paulo, kabili kipalile waabakinkiziizie ni Bakristu bange ba mu ozo musita. Kine uli mukusuunga baana bila mulume ao uli mu nsesi ilimo bantu ba diini ipuseene, uye wasininkiziizie nangue mufuano obe wa kisinka uli wakosia ni kusonsezia baalia bali peepi nobe.

17. Upalile kukita siani kine kimwenekele nangue muana obe tali mukufutuluka anzia kine uli mukwikwinda?

¹⁷ Ale kine kimwenekele nangue muana obe tali mukufutuluka anzia kine uli mukwikwinda? Languluka nangue kubeelezia muana kuli kwatwama musita. Nga vilangiliile foto, kine wabyala  lubezu paange nsita inge uli kuya waiipuzia kine lubezu loolo lwakaba kukula ni kwaluka kimuti kili kyatwama mazabo. Anzia kine te uli na buviinde bwa kumana nangue kyakaba kutwama mazabo, uli kuya watwaliliilesie kwitilila eevi kukipeela kimuti keekio fuasi ya kukula. (Mark. 4:26-29) Evio vyenka, nsita inge mama kunti watendeka kwiipuzia kine kakiine kwikwinda kwakue kuli mukukwasia baana bakue bamutone Yehova. Teuviinda kubakwatila baana bobe bupinguzi. Inzi, kine watwalilila kwikwinda saana kubabeelezia, ili kubapeela baana bobe fuasi iweeme saana ya kukula kimupasi.​—Tus Maf. 22:6.

18. Yehova kunti wabakwasia siani baana bobe kukula kimupasi?

¹⁸ Kutendekela mu nsita ya kale mpaka loonu, Yehova wakwasia kale balumendo ni bakaziana bengi kwaluka babibuza bakue. (Malum. 22:9, 10) Yehova kunti wabakwasia ni baana bobe kukula kimupasi kine batonene kukita evio. (1 Bakor. 3:6, 7) Anzia kine baana bobe te bali mukumubombela Yehova kwa mutima wabo onse, weene wakaba kutwalilila kubatona. (Malum. 11:4) Kine balangilila atasie mu kantu kaniini nangue batonene kumusaansamusia Yehova, weene eteaniiziesie kubakwasia eevi baaluke babibuza bakue. (Miil Bat. 13:48; 2 Mil Nsi. 16:9) Kunti wakukwasia ulande kintu kipalile musita muana obe lwakabiile saana kunvua kintu keekio. (Tus Maf. 15:23) Ao Yehova kunti wakinkizia lupua ao nkazi mu kilonghaano abapoozeko maano baana bobe mu nzila iibeleele. Atasie muana obe wasyakulile, Yehova kunti wamukwasia kulanguluka kintu kiwaamusambiliziizie lwa kale. (Yoan. 14:26) Kine weewe watwalilila kubabeelezia baana bobe kupitila milandu ni mufuano obe, Yehova wakaba kukupaala.

19. Juu ya ki kunti waya wasininkiziizie nangue Yehova akwitabiile?

¹⁹ Yehova teezi kukenta bupinguzi buli bwakwata baana bobe mane akutone. Akutonene, paantu ni weewe umutonene. Kine uli wasuunga baana bunke, Yehova alaile kwaluka Baba wa baana bobe kabili Musuungi obe. (Malum. 68:5) Teuviinda kubakwatila baana bobe bupinguzi bwa kumubombela Yehova. Inzi, kine watwalilila kuswapila kukwasiiwa na Yehova ni kwikwinda saana, weene wakaba kukwitabila.