1. Ni kiki kili kyatuleetela nsaansa ikata?

 YEHOVA atonene tuye twali ni nsaansa. Tumanine evio, paantu nsaansa ni seemu ya lizabo lya mupasi wakue utakatiifu. (Bag. 5:22) Paantu mu kupeelana muli nsaansa ingi kukila mukupeelua, tuli twaunvua nsaansa saana musita utuli twabomba kwa mute miilo ya kusimikila ni kubakwasia balupua ni bankazi betu mu nzila paleepale.​—Miil Bat. 20:35.

2-3. (a) Nga vilandile Bagalatia 6:4, ni bintu ki bibili bili kutukwasia kusiala twali ni nsaansa mu miilo yakue Yehova? (b) Tuli kulondoluela ki mu leeli lyasi?

² Nga evelia vilandile Bagalatia 6:4, mutumua Paulo wazimbula bintu bibili bili kutukwasia kutwalilila kuya twali ni nsaansa. (Soma.) Kya kuanza, mupaango weetu upalile kuya wali wa kumupeela Yehova kintu kyetu kya mana saana. Kine twamupeela Yehova kintu kyetu kya mana saana, keekio kili kutukwasia tuye twali ni nsaansa. (Mat. 22:36-38) Kya bubili, tupalile kutiina kwipalania ku bange. Kyonse kituli kuviinda kukita kupitila bukose bwetu, kibeelezio kyetu ao buviinde butwaavyelue naabo, tupalile kumutasiasie Yehova. Kila kintu kituli nakio, weene i waatupeele. Mu nzila inge, kine bange bali mukupata mazabo aweeme mu miilo ibali bakita, tupalile kusekelela paantu bali babombia buviinde bwabo juu ya kumusaansamusia Yehova. Te beezi kukita evio juu ya kunti bamoneke nangue beene bamanine saana kuliko bange ao juu ya kwiwamiiziasie bo beene. Kansi, kuliko kuluisiana naabo, tupalile kusambilila kupitila beene.

³ Mu leeli lyasi, tuli kumona kintu kya kutukwasia kine twaiunvua kutioka mutima paantu te tuli na buviinde bwa kukita byonse bitutonene kukita mu miilo yeetu. Kabili, tuli kumona vya kubombia buino buviinde bwetu ni beelia bituli kuviinda kusambilila kupitila bange.

4. Ni aali ki ili yalengia muntu atioke mutima? Leeta mufuano.

⁴ Bengi pakati keetu, te baviinda kukita miilo yakue Yehova nga evelia vibatonene juu ya bukote ao juu ya kuluala, ni keekio kunti kyabalengia batioke mutima. Ni aali yakue Carol ibanga yaali evio vyenka. Waapatile lisyuko lya kubombela ku fuasi ibanga yakabiilue saana bakasimika. Mu ezio nsita, waali watungulula masambililo a Bibilia 35, kabili waakwasiizie bantu bengi kufikiila kwipeela ni kubatiziiwa. Kakiine Carol waapatile mazabo aweeme mu miilo ya kusimikila! Kisia, waaluele saana, kabili waali wapalile kuya wapisia nsita ingi wali ku nsesi. Carol walanda eevi: “Manine nangue juu ya kuluala, nsiviinda kukita bintu bili kuviinda kukita bange, inzi ndi naiunvua nga neene asikili Mukristu aweeme nga beene. Nsili na buviinde bwa kukita kila kintu nga evelia vintonene, kabili keekio kili kyantiona mutima.” Carol atonene kumukitila Yehova bintu kukoonkana ni buviinde bwakue bonse. Kakiine, kili buino saana kukita evio! Kunti twasininkizia nangue Leeza weetu wankumbu ali mukusekelela paantu Carol ali mukumukitila bintu kukoonkana ni buviinde bwakue bonse.

5. (a) Tupalile kulanguluka ki kine tutiokele mutima paantu tetuviinda kabili kukita byonse bitutonene kukita? (b) Nga vilangiliile ma foto, lupua atwaliliile siani kumupeela Yehova kintu kyakue kya mana saana mu miilo Yakue?

⁵ Kine nsita inge uli watioka mutima paantu teuviinda kukita bingi, iipuzie eevi: ‘Yehova atonene nkite ki?’ Yehova atonene ukite kintu kya mana saana kukoonkana ni aali yulimo. Tontonkania ozu mufuano: Nkazi ali ni miaka 80 waiunvua kutioka mutima paantu takili na buviinde bwa kukita bingi mu miilo ya kusimikila nga musita lwabanga wakili ni miaka 40. Watontonkania nangue anzia kine ali mukukita kukoonkana ni buviinde bwakue bonse, tali mukuya wamusaansamusia Yehova. Inzi, eba, kutontonkania kwa evio ni kwa kisinka? Ale, tontonkanianke. Kine nkazi waakitile kukoonkana ni buviinde bwakue musita lwabanga wali ni miaka 40, kabili akitwaliliilesie kuya wakita kukoonkana ni buviinde bwakue musita lwali ni miaka 80, manake tanalekele kukita kukoonkana ni buviinde bwakue. Kine twatendeka kutontonkania nangue te tuli mukukita bingi eevi tumusaansamusie Yehova, tupalile kwinika nangue Yehova i ali wapingula kintu kitosiizie kya kumusaansamusia. Kine twakita kukoonkana ni buviinde bwetu bonse, Yehova wakaba kusaansamuka saana juu yeetu!​—Palania ni Mateo 25:20-23.

6. Kunti twasambilila ki kupitila mufuano wakue Maria?

⁶ Kunti twamona kyaleengele saana kwaluka ni nsaansa kine twapooza maano ku keelia kituli kuviinda kukita, kuliko kupooza maano ku keelia kitusiviinda kukita. Mona mufuano wakue nkazi umo ali wakuutua Maria ali ni buluele buli bwamwanzia kukita bingi mu miilo ya kusimikila. Ku ntendeko waatiokele mutima ni kwiunvua nangue te wa mana. Inzi, waatontonkaniizie palua nkazi umo wa mu kilonghaano asibanga wabuuka ku butanda bwakue, kisia Maria waapinguile kumukwasia. Maria walanda eevi: “Naakwete mupaango wa kuya nasimikila nakue kupitila telefone ni mukanda. Kila musita utwali twabombela pamo, naali nabuela ku nsesi naunvuile nsaansa, kabili naiunvuile buino paantu naamukwasiizie nkazi wane.” Ni fwefue kunti twakizia nsaansa yeetu kine twapooza maano ku keelia kituli kuviinda kukita, kuliko kupooza maano ku keelia kitusiviinda kukita. Ale kine tuli ni buviinde bwa kukita bintu bingi ao tuli twakitasie buino bintu binge mu miilo yakue Yehova?

7. Mutumua Petro waabapeele Bakristu musoko ki uli wabomba?

⁷ Mu mukanda wakue wa kuanza, mutumua Petro waabakinkiziizie balupua bakue baye  babombia bupe bonse ni buviinde bwabo eevi baye bakoselezia bazumizi naabo. Petro waaleembele eevi: “Mwe bonse mwaapeelue byabupe bilekenkeene byakue Leeza, kansi kubalua muntu abombie keeki kyabupe mu kubombela bange. Kine mwakita evio, muli kuya mwali basuungi ba kiine ba byabupe bilekenkeene byakue Leeza.” (1 Pet. 4:10) Tupalile kukita maka eevi kubombia buino bupe bwetu, kabili te tupalile kutontonkania nangue bange bali kutunvuila bunkua ao nangue bali kutioka mutima. Kine twaandua kukita maka etu onse twatiinine kunvuilua bunkua ao kubationa bange mutima, tuli kwandua kumupeela Yehova kintu kyetu kya mana.

8. Nga vilandile lileembo lya 1 Bakorinto 4:6, 7, juu ya ki te tupalile kwitasia palua bupe bwetu?

⁸ Tupalile kubombia saana bupe bwetu, inzi tupalile kuya twakengeele eevi apana tuye twaitasia palua bupe bobo. (Soma 1 Bakorinto 4:6, 7.) Kwa mufuano, paange uli ni bufundi saana bwa kutendekezia masambililo a Bibilia a ku nsesi. Upalile kubombia bupe bobo! Inzi, te upalile kwitasia palua bobo bupe. Tulande mu nsiku ya buleenu, waakiimwena kintu kya kupapia, kisia kintu keekio kyaakikukwasia kutendekezia lisambililo lya Bibilia. Uli ni nkulu ikata ya kubabuilako bantu ba mu kikundi kyobe kya miilo ya kusimikila palua kintu keekio kiwaakiimwena. Inzi, musita luwafika pa bantu ba mu kikundi kyenu kya kusimikila, nkazi umo ali mukubalondoluela nangue waakipeelana kazeeti mu miilo ya kusimikila. Weene, waakipeelana kazeeti, inzi weewe waakitendekezia lisambililo lya Bibilia. Uli kukita siani? Umanine nangue bantu ba mu kikundi kyenu bali kukinkiziiwa saana na kintu kiwaakiimwena. Inzi, kunti wapingula kupembelela nsita ipalile paantu teutonene nkazi olia waakipeelana kazeeti eyunvue nangue weene tali na bufundi saana nga weewe. Ezio i mibeele ya buwaame. Inzi keekio, te kilangiliile nangue upalile kulekela kutendekezia masambililo a Bibilia. Paantu uli ni bupe, kansi bombia bupe bobo!

9. Tupalile kubombia siani bupe bwetu?

⁹ Kansi, tulanguluke nangue buviinde bonse bwa kavyalilo butuli naabo ni bupe kufuma kuli Leeza. Tupalile kubombia bupe bobo juu ya kukuula kilonghaano, apana juu ya kunti tumoneke buino. (Baf. 2:3) Kine twabombia maka ni buviinde bwetu juu ya kukita kutona kwakue Yehova, twakaba kuya twali ni nsaambu ya kwitoneena, apana paantu tuli twakita bingi kuliko bange ao tuye twali bafundi kuli beene, inzi paantu tuli twabombia bupe bwetu juu ya kumusaansamusia Yehova.

10. Juu ya ki te kili buino kuya twaipalania ku bange?

¹⁰ Kine muntu takengeele, kunti watendeka kupalania beelia byali wakita buino pamo ni beelia  bili byaandua kukita unge. Kwa mufuano, paange lupua ali walanda buino saana maasi a bantu bonse. Bobo i buviinde bwakue. Inzi, mu mutima wakue, kunti watendeka kutontonkania nangue weene ni wa mana saana kuliko lupua unge asimanine kulanda maasi. Inzi, ozo lupua unge kunti waya wali saana ni mibeele ya kupokelela baeni, kubabeelezia baana bakue ao kuya wali ni mute saana mu miilo ya kusimikila. Kakiine tuli twatasia saana kuya twakwete balupua ni bankazi bali ni bufundi, bali babombia bupe bwabo eevi kumubombela Yehova ni kubakwasia bange!

11. Juu ya ki tupalile kupala mufuano wakue Yesu?

¹¹ Anzia kine tupalile kutiina kwipalania ku bange, kunti twasambilila kupitila mifuano ya babo bantu bali ni kiketekelo. Kwa mufuano, tulondoluele palwakue Yesu. Anzia kine weene wali wapuililikile, kunti twasambilila bintu bingi palua aali ni mibeele yakue iweeme saana. (1 Pet. 2:21) Kine twakita maka etu onse eevi kukoonka mufuano wakue mu peepi, tuli kwaluka babombi bakue Yehova bali buino saana kabili bali ni bufundi saana mu miilo yeetu ya kusimikila.

12-13. Kunti twasambilila ki kupitila mufuano wakue Likolo Daudi?

¹² Mu Mulandu Wakue Leeza, muli mifuano ya balalume ni banakazi ba kisinka batupalile kupala anzia kine te baali bapuililikile. (Baeb. 6:12) Tontonkania palua mufuano wakue Likolo Daudi olia waali wakuutua na Yehova nangue “mwalalume etabiilue na mutima wane.” Mu mpilibulo inge ya Bibilia, bobo bulanzi bupilibuilue eevi: “Muntu unghwamiinuemo.” (Miil Bat. 13:22) Anzia evio, Daudi taali wapuililikile. Kulanda kisinka, waakitile ni bilubo bikata saana. Anzia evio, weene ni mufuano uweeme kuli fwefue. Juu ya ki? Paantu taaeziizie kwisakila musita ubaamusokele palua bilubo byakue. Inzi, waaitabiile masoke afinine abaamupeele ni kulapila mu kisinka palua kintu kyaakitile. Keekio kyaalengiizie Yehova amweleele.​—Malum. 51:3, 4, 10-12.

¹³ Kunti twasambilila kupitila mufuano wakue Daudi kupitila kwiipuzia eevi: ‘Ndi naitabila siani masoke? Eba, ndi nasaangua naleengele kwinika bilubo byane ao ndi naezia kwisakila? Ndi nasaangua naleengele kusentuila bange kilubo? Eba, ndi naikwinda saana eevi apana mbueziepo kabili bilubo byane?’ Kunti waiipuzia bebio byenka biipuzio musita luuli mukusoma maasi a balalume ni banakazi bange ba kisinka bazimbuilue mu Bibilia. Eba, babo bantu baapatile maavia apaleene ni alia andi mukusaakaana nao? Baalangiliile mibeele ki iweeme? Mu kila aali iipuzie eevi: ‘Kunti nakila siani kwaluka nga ozu mubombi wa kisinka wakue Yehova?’

14. Kine twapooza maano ku bintu bili kyakita bazumizi neetu, kunti twanoonkelamo siani?

 ¹⁴ Kunti twanoonkelamo kabili kupitila kupooza maano ku bintu bili byakita bazumizi neetu, bakulu ao bamisepuka. Kwa mufuano, eba, kunti watontonkania palua muntu umo wa mu kilonghaano ali mukusipikizia buavia, paange bwa kutintua na bakaziana ao balumendo nakue, ali mukupingua na bantu ba mu lupua ao ali mukusipikizia buluele? Eba, umwene mu ozo muntu mibeele iweeme yutonene kupala? Kine watoosia wapoozeleko maano mufuano wakue uweeme, uli kusambilila nzila ili yabomba ya kusipikizia maavia obe we muine. Tuli twatasia saana paantu babo balupua ni bankazi batubiikiile mufuano uweeme wa kukoonka!​—Baeb. 13:7; Yak. 1:2, 3.

15. Mutumua Paulo waaleetele masoke ki ali kutukwasia kutwalilila kuya twamubombela Yehova twali ni nsaansa?

¹⁵ Pa kunti kilonghaano kiye kyali mu mutende ni buumo, kila umo pakati keetu apalile kwikwinda saana. Mona mufuano wa Bakristu ba mu miaka mia ya ku ntendeko. Babanga baali ni bupe ni miilo ya pusene-puseene. (1 Bakor. 12:4, 7-11) Inzi, keekio te kyaalengiizie batendeke kuluisiana ni kukasanika. Pakaako, Paulo waamukinkiziizie kila muntu kukita kintu kibanga kyaakabiilue, i kulanda ‘kukuula mubili wakue Kristu.’ Paulo waabaleembeele eevi Baefeso: “Biizo byonse bya mubili bilundeene (bikwateene), ni mubili onse ulundaniiziwe na bebio biizo ni pakaako, kubalua kiizo lukili kyabomba nga vikipalile kubomba, mubili onse uli wakula ni kwikuula wiine kupitila mu ntono.” (Baef. 4:1-3, 11, 12, 16) Baalia baakoonkele ozo musoko, baaleetele mutende ni buumo, mibeele ituli mukumona ni loonu mu bilonghaano byetu.

16. Tupalile kupingula kukita ki? (Baebrania 6:10)

¹⁶ Pingula kutiina kwipalania ku bantu bange. Kuliko kwipalania ku bange, sambilila kupitila mufuano wakue Yesu, kabili ikwinde kupala mibeele yakue. Sambilila kupitila mufuano wa bantu baali ni kiketekelo bazimbuilue mu Bibilia ni wa bantu ba mu enu nsiku. Musita luuli kuya watwaliliile kwikwinda saana, uye wasininkiziize nangue Yehova ‘ni wakisinka, weene takalaba bikitua byobe.’ (Soma Baebrania 6:10.) Kansi, twalilila kumubombela Yehova wali ni nsaansa, wamanine nangue ali wasekelela musita luuli wakita maka obe onse eevi umusaansamusie.