Vyaakitiilue Tubua Twane
NICK, mwikazi umo ali waikala mu Oregon États-Unis walanda eevi: “Ku ntendeko ya muaka wa 2014, naatendekele kutwama tubua twane twana tubili musita unaali naya kwienzia mukati muzi mu naali naikala. Lingi Bakasininkizia babanga baikala mukati muzi bali peepi ni ma prezantware abo a bitabu. Baali bavuala buino, kabili baali bapozia basaansamukile kila muntu waali wapita peepi.
“Babo Bakasininkizia baali balangilila mibeele ya buwaame apanasie ku bantu, inzi ni ku tubua twane. Busiku bumo, Elaine abanga waali peepi ni prezantware, waatupeele biskwiti tubua twane tubili. Kisia, nsita yonse itwali twapalama peepi ni prezantware, tubua twane twali twatona kubapalama babo Bakasininkizia eevi tupeelue biskwiti.
“Miezi, yaapitilepo. Tubua twane twaasekeleele biskwiti, ni neene naasekeleele kulondolola pamo ni Bakasininkizia. Inzi, nsibanga natona kulondolola naabo saana. Mbanga naali na miaka ikilile pa 70, inzi nsibanga nasininkiziizie nangue bintu bizumiine Bakasininkizia ni bya kisinka. Paantu naationenue mutima na aali ya tunisa twingi twa Kikristu, naatontonkaniizie nangue kili buino kuya nasambililasie Bibilia ne muine.
“Mu keekio kyenka kipindi, naali namona Bakasininkizia bange mu fuasi paleepale ya muzi bali peepi ni ma prezantware abo. Ni beene babanga basaansamukilesie lyonse. Lyonse baali baasuka biipuzio byane kupitila Bibilia, ni keekio kyaalengele nkile kubaswapila.
“Busiku bumo, Elaine waangipuziizie eevi: ‘Eba, umanine nangue tunama ni bupe kufuma kuli Leeza?’ Naamwasukile eevi: ‘Een, manine evio!’ Kisia, Elaine waansomeene Isaya 11:6-9. Kutendekela paapo, naatonene kusambilila palua Bibilia, inzi mbanga natwisika kutwama lupapulo lonse lwa kusoma lwa Bakasininkizia.
“Mu nsiku yakoonkelepo, naasekeleele kupisia bulondolozi bufupi inzi bwaweeme ni Elaine pamo ni mulume wakue, Brent. Baanganine nsome kitabu kya Mateo mpaka kya Miilo, eevi mane vya kumupala Kristu. I vinaakitile. Musita uniini kisia paapo, naaitabiile kusambilila Bibilia pamo ni Brent ni Elaine. Keekio, kyaakitikile mukati ka muaka wa 2016.
“Mbanga napembelela kwa nkulu kusambilila Bibilia ni kulonghaana mu Nsesi ya Bukolo. Naaunvuile nsaansa saana ya kusambilila kisinka kiine kya Bibilia. Musita uniini kisia muaka umo kupita, naalukile Kasininkizia abatiziiziwe. Loonu, ndi ni miaka 79, kabili ndi mukutasia saana paantu naakipata diini ya kisinka. Yehova waakimpaala kupitila kunkwasia kwingila mu lupua lwakue lwa kyalo kyonse.”
