Kilapo ni “bulayo bufinine bwa kukita kintu. Lingi, Leeza . . . ali wazimbulua kuya wali kasininkizia.” Kunti kyakitua kupitila kulanda ao kupitila kuleemba.

Bantu bange kunti batontonkania nangue kulapa kubiipile paantu Yesu waalandile eevi: “Te kwezie kulapa . . . Kulanda kwenu kuye kwalisie, ‘een,’ ao ‘ata.’ Paantu keebo ka kusonsekapo kali kafuma kuli Sataana.” (Mat. 5:33-37) Kulanda kisinka, Yesu waali wamanine nangue Muzilo Wakue Musa waali wabaloombele Baisraeli kukita kilapo mu aali paleepale. (Kut. 14:22, 23; Kuf. 22:10, 11) Kabili waali wamanine nangue Yehova ni weene waalapile. (Baeb. 6:13-17) Pakaako, Yesu taali wakeba kulanda nangue te tupalile kulapa ata limo. Inzi, waali wakeba kulanda nangue bantu te bapalile kulapa palua bintu bisili bya mana ao mu nzila isili ya kukwasia mupaango upalile. Lyonse, tupalile kufikilizia bulayo bwetu, paantu Yehova i vyatonene tukite.

Ale kine bakulanda ulape, uli kukita siani? Kya kuanza, upalile kusininkizia nangue kunti waviinda kukita keelia kyuli kulapa. Kine te usininkiziizie nangue wakaba kuviinda, kunti kyawama kwikalasie bila kulapa. Mulandu Wakue Leeza uli watusoka eevi: “Kili buino saana wikalesie bila kukita bulayo kuliko kukita bulayo bila kufikilizia.” (Kas. 5:5) Kisia, toosia Maleembo alandiile kilapo kiwakeba kukita, kupuako, kwata bupinguzi buswapiile kampingu kabeeleziiziwe buino. Eba, kuli ni mafunde paleepale aswapiile Maleembo?

Bilapo binge bili byasaangua byapateene ni kutona kwakue Leeza. Kwa mufuano, Bakasininkizia Bakue Yehova bali balayana musita ubali baupana. Bobo bulayo ni bwene ni kilapo. Ntaanzi yakue Leeza ni ntaanzi ya bantu bakusininkizia, ba mwalalume ni mwanakazi bali balayana kutonana, kutonana saana ni kukindikana, kabili nangue bakaba kukita evio “nsita yonse ya buikazi bwabo.” (Paange ba mulume ni mukazi bange, te baviinda kulanda ezio yenka milandu musita ubaupana ntaanzi ya bantu, inzi kuya basiele bakitile bulayo ntaanzi yakue Leeza.) Kisia, baaluka ba mulume ni mukazi, kabili bapalile kutwalilila kuya baupeene mu buikazi bwabo bonse. (Kut. 2:24; 1 Bakor. 7:39) Bulayo buli bwakitua pa kuupana bupalile, kabili bupateene ni kutona kwakue Leeza.

Bilapo binge, tebiizi kusaangua byapateene ni kutona kwakue Leeza. Mukristu wa kisinka taviinda kukita kilapo evio, eevi kuluisia kyalo kyabo na mabunduuki ao kulekela kumuketekela Leeza. Kukita evio, te kupateene na malaizio akue Leeza. Bakristu ‘te bali seemu ya kyalo,’ pakaako te tupalile kwiingizia mu bulondolozi bwa kusyunvuana ao mu bului bwa keenu kyalo.​—Yoan. 15:19, NWT; Is. 2:4; Yak. 1:27.

 Bakristu Bapalile kupingula kukoonkana ni kampingu kaabo kine kunti balapa ao ata. Nsita inge kunti kyapala kutoosia buino kilapo kyetu kukoonkana ni musoko wakue Yesu ulandile eevi: “Byakue Kaizari, mupeele Kaizari. Ni byakue Leeza mupeele Leeza.”​—Luk. 20:25.

Tulande kwa mufuano, Mukristu waloomba apeelue nsaambu ya kwaluka mwikala muzi wa mu kyalo kimo eevi ao apeelue mukanda wa kwendela mu keekio kyalo, kisia bamubuila nangue apalile kulapa kunakila ao kusiala wali wa kisinka ku keekio kyalo. Kine mu keekio kyalo, kulapa kuloombele kukita kintu kipingeene ni mizilo yakue Leeza, Mukristu ali ni kampingu kabeeleziiziwe na Bibilia taviinda kwitabila. Inzi, buteeko kunti bwamwitabizia kwalulula milandu ezio ya kilapo, eevi akite kilapo kipateene ni kampingu kakue.

Kwitabila kukita kilapo kya kunakila kyalulwilue, kunti kwapatana ni lifunde lili mu Baroma 13:1, lilandile eevi: “Kubalua muntu apalile kuya wanakila buteeko.” Pakaako Mukristu kunti wapingula nangue te kibiipile kulapa palua kukita kintu kyaalandile kale Leeza nangue Bakristu bapalile kukita.

Kabili, ni kintu kya mana kukoonka kampingu kabeeleziiziwe na Bibilia, kine bakulanda kubombia kintu ao kukita kalangi kamo musita wa kukita kilapo. Baroma ba kale ni Basikithe babanga balapa kupitila bipanga eevi kulangilila maka akue leeza wa bului ni kulangilila nangue muntu aswapiilue. Bagiriki babanga balendula minue mu muulu musita wa kulapa. Keekio kilangiliile nangue babanga bamanine nangue kuli ni leeza amwene beelia bibali mukulanda ni kukita, kabili nangue bantu bakapingulua ntaanzi yakue.

Kulanda kisinka, mubombi wakue Yehova taviinda kulapa palua kalangi konse ka kyalo kapateene ni lupupo lwa bufi. Inzi, uli kukita siani kine bakulanda ku tribinali ubiike minue pa Bibilia ni kulapa eevi kulangilila nangue wasininkizia kakiine beelia biwalanda? Mu aali nga ezio, paange kunti wapingula kukita evio paantu Bibilia izimbuile bantu ba kisinka baakitile kilapo kupitila tulangi. (Kut. 24:2, 3, 9; 47:29-31) Ni kintu kya mana kulanguluka nangue kine wakita kilapo kya evio, walapa ntaanzi yakue Leeza nangue wakaba kulanda kisinka. Upalile kuya waiteaniizie kwasuka mu kisinka kila kiipuzio kibali kukwipuzia.

Paantu bukibuza bwetu ni Yehova ni bwa mana saana kuli fwefue, tupalile kupepa ni kutontonkania twapoozeleko maano palua kilapo kyonse kitwalandua kukita, twasininkiziizie nangue te kipingeene na kampingu keetu ao na mafunde a Bibilia. Kine weewe wapingula kulapa, upalile kuya wasininkiziizie nangue wakaba kufikilizia.​—1 Pet. 2:12.