Mu aali nga ezio, kine mwalalume waupa kabili, kilonghaano kili kumona kyupo kya ntaanzi kuya kyapuile, kabili kili kumona nangue kyupo keekio kya leenu kitabiziiziwe. Eevi tunvue buino nsaambu yalenga tulande evio, tutoosienke bintu byaalandile Yesu palua kukaanana ni kuupa kabili.

Mu lileembo lya Mateo 19:9, Yesu waalondoluele nsaambu imosie iswapiile Maleembo ili kulengia kyupo kipue. Waalandile eevi: “Kine mwalalume wamukaana mukazi wakue kikaane-kaane pasili mulandu wa bukende, ni kuya kuupa unge mwanakazi, wakita bukende.” Mu milandu yakue Yesu twasambilila (1) nangue bukende i nsaambusie imo iswapiile Maleembo ya kupuisia kyupo, kabili (2) nangue mwalalume ali wamukaana mukazi wakue bila nsaambu iswapiile Maleembo ni kuya kuupa unge, wakita bukende. *

Eba, milandu yakue Yesu ikebele kulanda nangue kine mwalalume wakita bukende ni kumukaana mukazi wakue, manake etabiziiziwe na Maleembo kuya kuupa kabili? Tekiizi kusaangua evio lyonse. Kine mulume wakita bukende mu kyupo, olia asili na kilubo ali kupingula kine kunti wamweleela mulume wakue ao abe. Kine mukazi wamukaana mulume, kisia wapata ni mikanda iswapiile mizilo, bonse babili baaluka ni buntungua bwa kuupa ao kuupua kabili, kine bakipuisia byonse biloombelue palua kukaanana.

Inzi, mukazi asili na kilubo kunti waya watonene kusuunga kyupo kyabo ni kumweleela mulume wakue mukwitonena. Ale kine ozo mulume waakikita bukende wakaana kweleelua na mukazi, kisia waya kukeba kipeepala kya kukaanana wali bunke? Paantu mukazi atonene kumweleela ni kutwalilila kuya baali mu kyupo, mulume tetabiziiziwe na Maleembo kuya kuupa kabili. Kine wapingula kuupa mwanakazi unge anzia kine tali na nsaambu ya kukita evio, ozo mwalalume wakita bukende kabili. Bakote ba mu kilonghaano bali kukita kabili kabungue ka bupinguzi eevi kuya kupingula kabili lizaambi lyakue ozo muntu.​—1 Bakor. 5:1, 2; 6:9, 10.

Kine mwalalume waya kuupa kabili bila waitabiziiziwe na Maleembo, kilonghaano kili kumona siani kyupo kya kuanza ni kyupo kya leenu? Eba, kyupo kya kuanza kisielesie kyaitabiilue kukoonkana ni Maleembo? Eba, mukazi asili na kilubo kunti watwalilila kupingula kumweleela ao kumukaana mulume wa kale? Eba, kilonghaano kipalile kumona nangue keekio kyupo kya leenu ni kya bukende?

Lwa ntaanzi, kilonghaano kyaali kyamona keekio kyupo kya leenu kuya kyali kya bukende kine olia asili na kilubo akisiele wakosele, tanaupue, kabili kine tanaingile mu kilubo kya kukita bukende. Anzia evio, Yesu taazimbuile muntu asili na kilubo musita lwaalandile palua kukaanana ni kuupa ao kuupua kabili. Inzi, waalandile nangue  mwalalume ali wamukaana mukazi wakue bila nsaambu itabiziiziwe na Maleembo ni kuya kuupa unge, wakita bukende. Mu aali nga ezio, kumukaana mukazi ni kuya kuupa unge kolia kwaalandile Yesu nangue ni bukende, i kwapuisia kyupo kya kuanza.

Kine mwalalume wamukaana mukazi wakue ni kuya kuupa unge, te kiloombele mukazi asikitile kilubo asaakule kine kunti wapingula kumweleela ozo mwalalume ao abe. Pakaako ozo mwanakazi tapalile kwimona kuya wali ni kifunda kya kupingula kine kunti wamweleela mulume wa kale ao abe. Kukila pakaako, kilonghaano te kipalile kumona kyupo kya leenu kuya kyapalile ao abe, paantusie mukazi asili na kilubo akosele, waupua kabili ao wakita bukende. *

Mu mufuano utwalondoluela paapo pa muulu, mulume waakikita bukende, keekio i kyalengia bakaanane. Ale kine mulume taakikita bukende, inzi wamukaana mukazi wakue ni kuya kuupa unge? Ao ale kine mulume taakikita bukende lwa ntaanzi, inzi wakita bukende kisia kumukaana mukazi wakue ni kooku mukazi wakue watonenesie kumweleela? Mu aali ezio yonse, kumukaana mukazi ni kuya kuupa unge kwalengia kwaluke bukende, kabili keekio kyalengia kyupo kya kuanza kipue. Kyupo keekio kya leenu kili kuya kyaitabiilue na mizilo ya buteeko. Lupungu Lwakue Kamwenenena, lwa Kifaransa, lwa pa nsiku 15 Muezi wa 02, 1980, lubali lwa 32 lwaali lwalandile eevi: “Paapa, muntu waaluka mu kyupo kya leenu, kabili taviinda kukitiona waleengeelue ni kubuela ku mukazi wakue wa kuanza, paantu keelia kyupo kya kuanza kyaapuile juu ya kukaanana, kukita bukende ni kuupa kabili.”

Bobo bulondolozi bwa leenu te bulangiliile nangue Mukristu apalile kuya watontonkania nangue kyupo te kitakatiifu, kabili nangue bukende te lizaambi lifinine. Kine mwalalume wamukaana mukazi wakue bila nsaambu ya Maleembo ya kukita evio ni kuya kuupa mwanakazi unge bila wali na buntungua ao uuru wa kukita evio kukoonkana ni Maleembo, bakote bakaba kukita kabungue ka bupinguzi paantu ozo muntu waakikita bukende. (Kine mwanakazi ozo wakyupua leenu nawe ni Mukristu, apalile kupingulua mu kabungue ka bupinguzi paantu wakikita bukende.) Anzia kine keekio kyupo kya leenu tekiya kyamwenekele kyali bukende, ozo mwalalume wakaba kukita miaka ingi bila kupeelua kifulo mu kilonghaano, mpaka musita bantu lubakalekela kufipua palua kilubo kyakue kyaakitile ao mpaka musita ubaakatendeka kumumona nangue apalile kukindikua. Ntaanzi ya kumupeela miilo, bakote bapalile kutontonkania kabili palua aali ya leenu yakue mukazi wakue wa kuanza olia waakitiilue bintu mu nzila isipalile, pamo ni aali ya baana bonse baniini baasiilue na mwalalume akitile kilubo.​—Mal. 2:14-16.

Kukoonkana ni kufina kwa bintu byaakilengiiwa na kukaanana kusipateene na Maleembo ni kuya kuupa kabili, Bakristu bali balangilila mulangue kupitila kumupala Yehova ni kumona kyupo kuya kyali kitakatiifu.​—Kas. 5:4, 5; Baeb. 13:4.