Eba, Wakiba Wamanine?
Juu ya ki bantu basili Baisraeli babanga babomba mu kisepe kya ba soda bakue Likolo Daudi?
PAKATI ka balalume babanga bali mu kisepe kya basoda bakue Daudi, pabanga pali Seleki Mwamoni, Uria Muhiti, pamo ni Itma Mumoabu. a (1 Mil Nsi. 11:39, 41, 46) Kabili, mu kisepe kya basoda bakue Daudi mubanga mwali “Bakereti, Bapeleti, ni Bagati.” (2 Sam. 15:18) Kimwenekele nangue Bakereti ni Bapeleti babanga bali bantu ba peepi saana ni Bafilisti. (Ezek. 25:16) Bagati baali bafumine mu muzi wa Gati, mu Ufilisti.—Yosh. 13:2, 3; 1 Sam. 6:17, 18.
Juu ya ki Daudi waabengiziizie babo bantu basili Baisraeli mu kisepe kyakue kya basoda? Abanga wasininkiziizie nangue babo bantu babanga bali ba kisinka kuli weene, kabili kikililepo kuwaama, babanga bali ba kisinka kuli Yehova. Kwa mufuano, diksionere imo ya Bibilia ili yalanda eevi palua Bakereti ni Bapeleti: “Baasiele bali ba kisinka kuli Daudi mu aali ibanga yakolele saana mu kipindi kya buteeko bwakue.” Baakitile siani evio? Musita “balalume bonse ba mu Israeli” lubaamusiile Likolo Daudi ni kumukoonka “mwalalume wa kinvulunghania, olia waali wakuutua Sheba,” Bakereti pamo ni Bapeleti baasiele bali ba kisinka kuli Daudi, kabili baamukwasiizie kupuisia bukisanguka bwakue Sheba. (2 Sam. 20:1, 2, 7) Mu lwendo lunge, Adonia, muana mwina Likolo Daudi, waali waezia kumupoka baba wakue kitebe kya bukolo. Inzi, Bakereti ni Bapeleti baasiele bali ba kisinka kuli Daudi, kabili baamukwasiizie kumubiika Sulemani pa kitebe kya bukolo, olia waali wasaakwilue na Yehova eevi kwaluka likolo kisia Daudi.—1 Mak. 1:24-27, 38, 39.
Itai Mugati, i muntu unge asili Mwisraeli waasiele wali wa kisinka kuli Daudi. Itai pamo ni kisepe kyakue kya basoda 600 baamukwasiizie Likolo Daudi musita Absalomu muana wakue lwaamusangukiile ni kutendeka kwalula mitima ya Baisraeli bange eevi ni beene bamusangukile likolo. Ku ntendeko, Daudi waamulandile Itai nangue, paantu tabanga wali Mwisraeli, tabanga wapalile kwiingizia mu leelio lizibo. Inzi, Itai waasukile eevi: “Nga evelia kakiine Yehova vyakosele, kabili nga evelia kakiine mulopue wane likolo vyakosele, konse kuli kuya kwali mulopue wane likolo, ibe ni juu ya lufu ao juu ya bukose, kooko i kuli kuya kwali mubombi obe!”—2 Sam. 15:6, 18-21.
Itai abanga wali wa kisinka kuli Daudi, likolo abanga wabiikilue mafuta na Yehova
Ata sie kine Bakereti, Bapeleti, pamo ni Bagati te babanga bali Baisraeli, baali bainikile nangue Yehova i Leeza wa kisinka, kabili nangue weene i waali wamubiikile mafuta Daudi. Kulanda kisinka, Daudi waatasiizie saana paantu babo bantu ba kisinka babanga bali ku lubali lwakue!
a Sheria yakue Leeza elia ili mu lileembo lya Malanguluzi a Mizilo 23:3-6 yaakaniizie Baamoni ni Bamoabu kwingila mu libumba lya Baisraeli. Inzi, kimwenekele nangue ezio sheria yaali yalandila palua muntu asili Mwisraeli kwaluka wa mu ntundu ya Israeli. Te yaakaniizie bantu basili Baisraeli kupisia musita pamo ao kwikala pamo ni bantu bakue Leeza. Mona kitabu Étude perspicace, Volime 1, lub. 95.
