1. Bantu bakue Yehova ba mu miaka mia ya ku ntendeko baali bapaangilue siani?

 MUSITA Yehova lwali wabapeela bantu bakue miilo, ali watona baibombe mu nzila ipaangilue buino. (1 Bakor. 14:33) Kwa mufuano, Yehova atonene mpunda iweeme isimikilue mu kyalo kyonse. (Mat. 24:14) Yehova waamupeele Yesu nsaambu ya kutungulula ezio miilo. Kabili Yesu ali mukusininkizia nangue ezio miilo ili mukubombua mu nzila ipaangilue buino. Mu miaka mia ya ku ntendeko, musita bilonghaano lubyaaundilue mu fuasi paleepale, bakote basaakwilue eevi baye basoma malaizio ni kutungulula kilonghaano. (Miil Bat. 14:23) Mu Yerusalemu i mubanga mwali kabungue kali katungulula, kaalia kabanga kaundilue na batumua pamo ni bakote baali ni kibeelezio. Keekio kitente kyaali kyakwata bupinguzi paleepale bupalile kukoonkua na bilonghaano byonse. (Miil Bat. 15:2; 16:4) Balupua ni bankazi lubaali bakoonka malaizio abaali bapokelela, “bilonghaano byaali byakinkiziiwa kunti biye byaimeene sinta mu kiketekelo, ni bantu baali bakila kuvula.”—Miil Bat. 16:5.

2. Kubambila mu muaka wa 1919 mpaka loonu, Yehova ali mukubatungulula bantu bakue ni kubapeela kyakulia kya kimupasi mu nzila ki?

² Yehova atwaliliile kupaanga bantu bakue mpaka loonu. Kubambila mu muaka wa 1919, ali mukubombia kikundi kiniini kya balalume babiikilue mafuta eevi baye bapaanga miilo ya kusimikila ni kubapeela byakulia bya kimupasi basambi bakue. a (Luk. 12:42) Kimwenekele buino nangue Yehova ali mukupaala miilo ili mukubombua na keekio kikundi.—Is. 60:22; 65:13, 14.

3-4. (a) Leeta mufuano ulangiliile faida ili yafuma mu kuya twapaangilue buino. (b) Tuli kulondoluela ki mu leeli lyasi?

 ³ Kabenge bila twapaangilue buino, nga te tuli mukuviinda kufikilizia miilo itwapeelue na Yesu. (Mat. 28:19, 20) Kwa mufuano kabenge tuzonga twa kilonghaano te tukasaniiziwe, kila muntu nga ali wasimikila sie konse kwali kutona. Tuzonga tunge nga tuli twasimikiluamo lingi na bakasimika bengi bapusene-puseene, ni kooku tuzonga tunge twasiele sie bila kusimikiluamo. Eba, kunti watontonkania faida inge ili yafuma mu kuya twapaangilue buino?

⁴ Nga evelia sie Yesu vyaapaangile basambi bakue musita lwaali pa kyalo, ni loonu atwaliliile kupaanga bantu bakue Leeza. Mu leeli lyasi, tuli kulondoluela mufuano waabiikile Yesu. Kabili tuli kumona ni kuteania kwakue Yehova vikuli kwakoonka ozo mufuano. Kisia, tuli kumona vya kulangilila nangue tuswapiile kuteania kwakue Yehova.

KUTEANIA KWETU KUKOONKELE MUFUANO WAKUE YESU

5. Ni nzila ki imo ilangiliile nangue kuteania kwetu kukoonkele mufuano wakue Yesu? (Yoane 8:28)

⁵ Yesu waasambiliile kuli Baba wakue wa ku muulu bintu bya kukita ni bya kulanda. Kuteania kwakue Yehova kukoonkele mufuano wakue Yesu kupitila kubombia Mulandu Wakue Leeza eevi utukwasie kumana kiweeme ni kibiipile ni kututungulula mu buikazi bwetu. (Soma Yoane 8:28; 2 Tim. 3:16, 17) Tuli twalangulusiiwa lingi kuya twasoma ni kubombia Mulandu Wakue Leeza. Tuli twapata faida ki kupitila kukoonka azo masoke?

6. Ni faida ki ituli twapata musita utuli twasambilila Bibilia twakwasiiziwe na mpapulo yeetu?

⁶ Tuli twapata faida ingi musita utuli twasambilila Bibilia twakwasiiziwe na mpapulo yeetu. Kwa mufuano, tuli ni buviinde bwa kupalania masambilizio a Bibilia pamo ni malaizio atuli twapeelua mu kuteania. Musita utuli twamona nangue malaizio atuli twapeelua apateene ni Maleembo, tuli twakila kuswapila kuteania kwakue Yehova.—Bar. 12:2.

7. Ni mpunda ki yaali yasimikila Yesu, kabili kuteania kwakue Yehova kukoonkele siani ozo mufuano?

⁷ Yesu waali wasimikila “mpunda iweeme ya Bukolo Bwakue Leeza.” (Luk. 4:43, 44) Kabili Yesu waabalandile basambi bakue baye basimikila palua Bukolo. (Luk. 9:1, 2; 10:8, 9) Loonu, baalia bonse bali mukuteania kwakue Yehova, bali basimikila mpunda ya Bukolo ata sie kine bali baikala pi ao ata sie kine bali ni miilo ingi mu kuteania.

8. Ni lisyuko ki litupeelue?

⁸ Tuli ni lisyuko likata lya kubabuilako bange mpunda palua Bukolo Bwakue Leeza! Te kila muntu apeelue leelio lisyuko. Kwa mufuano, musita Yesu lwaali pa kyalo, taalekeleele mipasi ibiipile ileete busininkizio palwakue. (Luk. 4:41) Loonu, ntanzi muntu atendeke kusimikila pamo ni Bakasininkizia bakue Yehova, apalile kwikala kukoonkana ni nzila ili yamusaansamusia Yehova. Tuli twalangilila nangue tuli twatasia palua lisyuko litupeelue lya kusimikila kupitila kubuilako bange palua Bukolo Bwakue Leeza, konse kutuli kusaangua ni musita onse utuli kuviinda kukita evio. Tuli twatona kumupala Yesu. Pakaako, tuli twaikwinda saana kubasimikilako bange ni kubasambilizia kisinka kya Bibilia.—Mat. 13:3, 23; 1 Bakor. 3:6.

9. Kuteania kwakue Yehova kuli mukukwasia siani bantu bamane liina lyakue Yehova?

⁹ Yesu waababuilile bantu liina lyakue Leeza. Musita Yesu lwaapepele kuli Baba wakue wa ku muulu, waalandile eevi: ‘Nakibabuila liina lyobe.’ (Yoan. 17:26) Eevi kukoonka mufuano wakue Yesu, kuteania kwakue Yehova kuli mukukita kyonse kili kuviindikana eevi kukwasia bange bamane liina lyakue Leeza. Kwa mufuano, Bibilia Tafsiri ya Ulimwengu Mupya, ikwasiizie saana palua kaako. Ibueziizie liina lyakue  Leeza mu fuasi ipalile. Loonu, ezio mpilibulo ili yasaangua mu ndimi ikile pa mia ibili ni makumi saba (270), yalingi ao yali kipande. Mu ezio mpilibulo, mu Apandisi ya A4 ni A5, muli bulondolozi bulandiile palua kubueziiwa kwa liina lyakue Leeza mu Bibilia. Apandisi ya C, elia ili yasaangua mu Bibilia ya Lisambililo, ileetele busininkizio buingi bulangiliile nangue liina lyakue Leeza lipalile kumoneka mara mia ibili ni makumi atatu na saba (237), mu Maleembo a Kigiriki a Kikristu.

10. Mufuano wakue mwanakazi umo wa mu Myanmar, wakusambilizia ki weewe?

¹⁰ Nga Yesu, ni fwefue tutonene kukwasia bantu bengi saana bafikiile kumana liina lyakue Leeza. Kisia kusambilila nangue Leeza ali ni liina, mwanakazi umo wa miaka 67, olia ali waikala mu Myanmar, waakolosiizie mensozi ni kumulanda eevi olia abanga wamusambilizia Bibilia: “Eezi i mara yane ya kuanza kunvua nangue liina lyakue Leeza ni Yehova. . . . Weewe wansambilizia kintu kya mana saana kinsinasambililepo.” Nga vitwamona mu ozu mufuano, kumana liina lyakue Leeza kunti kwakwasia bantu bakite bupilibuko mu buikazi bwabo.

TWALILILA KUSWAPILA KUTEANIA KWETU

11. Bakote kunti balangilila siani nangue baswapiile kuteania kwakue Yehova? (Mona ni foto.)

¹¹ Bakote kunti balangilila nangue baswapiile kuteania kwakue Leeza mu nzila ki imo? Musita ubali bapokelela malaizio, bakote bapalile kwikwinda saana kuasoma bapoozeleko maano ni kwikwinda saana kuabombia. Kwa mufuano te beezi kupokelela sie malaizio alandiile vya kutungulula seemu paleepale ya kulonghaana, ni vya kupepa mu kulonghaana, inzi kabili bali bapokelela ni malaizio alangiliile vya kusuunga mikooko yakue Kristu. Bakote baalia bali bakoonka malaizio a kuteania, bali bakwasia balupua ni bankazi beyunvue kuya basuungilue kabili batonenue.

12. (a) Juu ya ki tupalile kukoonka malaizio a baalia bali batutungulula? (Baebrania 13:7, 17) (b) Juu ya ki tupalile kupooza maano ku mibeele iweeme ya baalia bali batutungulula?

¹² Musita utuli twapeelua malaizio na bakote, tupalile kuakoonka twatonene. Kine twakita evio, tuli kukwasia baalia bali batutungulula babombe buino miilo yabo. Bibilia ili yatusonsezia tuye twabanakila baalia bali batutungulula. (Soma Baebrania 13:7, 17.) Nsita inge, kukita evio te kuizi kusaangua kwaleengele. Juu ya ki? Paantu babo balalume te bapuililikile. Inzi, kine twapooza maano ku butope bwabo kuliko kupooza maano ku mibeele yabo iweeme, tuli kutendeka kubakwasia baluani betu. Mu nzila ki? Tuli kubamba kwaluka ni masiaka palua kuteania kwakue Leeza. Kabili baluani betu i vibatonene tukite. Kunti twakita siani eevi twinike ni kukaana bufi bwa baluani betu?

TE KULEKELELA BANGE BALENGIE WAALUKE NI MASIAKA PALUA KUTEANIA KWAKUE YEHOVA

13. Baluani bakue Leeza bali baezia siani kulengia kuteania kwakue kumoneke nangue kubiipile?

¹³ Baluani bakue Leeza bali baezia kulangilila nangue bintu biweeme bili byakitua mu kuteania kwakue Yehova, bibiipile. Yehova atonene bantu bali bamupupa baye baswetele kimubili, baye bali ni lwendo luweeme, kabili baye bamupupa mu nzila yali waitabila. Ali walanda nangue olia onse ali watwalilila kukoonka lwendo lufiitile, kabili bila watonene kwaluluka, apalile kutengua kufuma mu kilonghaano. (1 Bakor. 5:11-13; 6:9, 10) Tuli twakoonka azo malaizio apateene ni Bibilia. Inzi, paantu tuli twakoonka azo malaizio, baluani betu bali balanda nangue fwefue te tubatonene bantu, tubamwene kuya babiipile, kabili nangue tetwizi kweleelana.

14. Naani ali walengia bantu balande bufi palua kuteania kwetu?

¹⁴ Inika olia ali wasaukila kuteania kwetu. Sataana i ali wasonsezia bantu balande bobo bufi  palua kuteania kwetu. Weene, i “ntuntuko ya bufi.” (Yoan. 8:44; Kut. 3:1-5) Pakaako, tupalile kuya twainikile nangue Sataana wakaba kuya wabombia bantu bali bamukwasia eevi kulanda maasi a bufi palua kuteania kwakue Yehova. Sataana waakitile enka evio kuli Yesu ni ku Bakristu ba ku ntendeko.

15. Bantunguluzi ba ma diini baamukitiile siani Yesu pamo ni basambi bakue?

¹⁵ Anzia kine Yesu, Muana wakue Leeza waali wapuililikile, kabili wakitile bimpezia maano biweeme saana, Sataana waabombiizie bantu eevi balande bufi palwakue. Kwa mufuano, Yesu lwaakumbile myela ibiipile, bantunguluzi ba ma diini, baabalandile bantu nangue weene waali waapeelue maka na “mukulu wa myela.” (Mark. 3:22) Musita Yesu lwabanga wali mu maavia, bantunguluzi ba ma diini baamusongeele nangue waali wamutuka Leeza, kabili baasonseziizie bantu eevi bamwipaye. (Mat. 27:20) Kisia musita, basambi bakue Kristu lubaali basimikila mpunda iweeme, baalia babanga bapinga “baabembele bantu” eevi babatese Bakristu. (Miil Bat. 14:​2, 19) Lupungu Lwakue Kamwenenena lwa pa 01, Muezi wa 12, 1998, lwaalandile eevi palua lileembo lya Miilo 14:2: “Bayuda baalia babanga bapinga, baakeene mpunda ibaasimikiilue, kabili baaile ni mu mizi ya mukati ni kulanda bintu bibiipile palua basambi eevi kubalengia bantu babasuule, kabili te kunti babatuilizie.”

16. Ni kiki kitupalile kulanguluka kine twaunvua maasi a bufi palua kuteania kwetu?

¹⁶ Sataana atwaliliile kulanda bufi mpaka loonu. Atwaliliile “kubeepa bekala kyalo bonse.” (Nfy. 12:9) Kine weewe waunvua mpunda ibiipile yali mukulandua palua kuteania kwakue Yehova ao palua balupua bali batungulula, languluka baluani bakue Leeza vibaamukitiile Yesu pamo ni basambi bakue ba mu miaka mia  ya ku ntendeko. Loonu bantu bakue Yehova bali mukutesua, ni kukitilua bintu nga enka evelia vyaalandile Bibilia. (Mat. 5:11, 12) Maasi a bufi teaviinda kutuvulunghania kine twainika koolia kuafumine ni kukitapo kintu kimo kya kutukwasia kwisuunga bila kukokola. Kunti twaisuunga siani?

17. Kunti twakita siani eevi kukaana maasi a bufi? (2 Timoteo 1:13) (Mona ni kisanduku kilandile, “ Tupalile Kukita Siani Kine Twaunvua Maasi a Bufi?”)

¹⁷ Kaana maasi a bufi. Mutumua Paulo waaleetele malaizio onvuikile alia alangiliile vya kukita kine twaunvua maasi a bufi. Waamwanine Timoteo ‘abalande bantu bamo balekele . . . kupooza maano ku maasi a bufi’ ni ‘kukaana maasi a bufi ali amukoosiizia Leeza mukinzi.’ (1 Tim. 1:3, 4; 4:7, NWT) Muana muniini kunti watoola kintu pansi ni kuvwata mu kanua, inzi mukulu taviinda kukita evio paantu amanine nangue keekio kintu kunti kyamuleetela maluele. Tuli twakaana kukoonka maasi a bufi paantu tumanine kuali afuma. Fwefue, tuli twakoonka sie “twebo” ao milandu ya kisinka.—Soma 2 Timoteo 1:13.

18. Kunti twalangilila siani nangue tuswapiile kuteania kwakue Yehova?

¹⁸ Twalondoluela sie nzila itatu ili pakati ka nzila ingi ilangiliile nangue kuteania kwakue Leeza kukoonkele mufuano wakue Yesu. Musita luuli wasambilila Bibilia, ikwinde kukeba bintu binge bilangiliile nangue kuteania kukoonkele mufuano wakue Yesu. Kwasia bange mu kilonghaano kyenu eevi bakile kuswapila kuteania kwakue Yehova. Kabili twalilila kulangilila nangue uswapiile kooko kuteania. Kunti wakita evio, kupitila kumubombela Yehova mu kisinka, ni kusiala wali peepi ni kuteania koolia kuli mukubombiiwa na weene eevi kufikilizia kutona kwakue. (Malum. 37:28) Kansi, tutwalilile kulangilila nangue tutweme twafiniizie lisyuko lyetu lya kuya twali pakati ka bantu ba kisinka bakue Yehova kabili bali ni ntono.