1. Paradiso ya kimupasi i kiki, kabili tupalile kuya twapinguile kukita ki?

 LOONU, paanu pa kyalo pali paradiso imo ilimo bantu bengi bali babomba miilo ingi iweeme. Ezio paradiso iizuzimo mamilioni a bantu, baalia bali ni mutende wa kisinka. Bantu bali moomo, bapinguile kusiala mu ezio paradiso, kabili batonene bantu bange bengi bengile mu ezio aali iibeleele. Ezio aali i kiki? I paradiso ya kimupasi! a

2. Ni kiki kili mukupapia palua paradiso ya kimupasi?

² Yehova waakitile mu nzila ya kupapia fuasi ya mufuano elia ikeelemo bantu bakue mu nzila ya mutende. Babo bantu, bakwateene ata sie kine bali mu kyalo kibiipile, kabili kyaviizie kyakue Sataana, moolia muli bantu basuuleene. (1 Yoan. 5:19; Nfy. 12:12) Leeza weetu wa ntono amwene keenu kyalo vikili mukukisia bantu. Inzi ali wakwasia babombi bakue beyunvue kuya basuungilue eevi batwalilile kumubombela weene bali ni nsaansa. Mulandu wakue uli walondolola paradiso ya kimupasi kuya yali nga fuasi iweeme ya ‘kufyaminamo’ kabili kuya yali nga “busitani buli bwaitililuamo menda buino.” (Is. 4:6; 58:11) Kupitila kukwasiiwa na Yehova, baalia bekeele mu ezio paradiso, bali ni nsaansa kabili basuungilue mu keenu kipindi kyaviizie kya nsiku ya mpeleezio.—Is. 54:14; 2 Tim. 3:1.

3. Lileembo lya Isaya katue ka 65 lyaafikiliziiziwe siani lya kuanza?

³ Yehova waamubombiizie Isaya eevi kulondolola buikazi vibwakaba ku baalia bakekala mu paradiso ya mufuano. Kunti wapata bobo bulondolozi mu lileembo lya Isaya katue ka 65. Bebio bintu bilandilue moomo, byaafikiliziiziwe lya kuanza mu muaka wa 537, Yesu tanavyalue. Pa ozo musita, Bayuda baalia baalapiile,  baakakwilue kufuma mu buzia mu Babiloni ni kubuela ku kyalo kyabo. Yehova waabapaalile bantu bakue ni kubakwasia baviinde kuwaamia kabili muzi wa Yerusalemu olia waali wainoonenue ni kukuula kabili ekalu elia yaali kitente kya lupupo luswetele mu Israeli.—Is. 51:11; Zek. 8:3.

4. Lileembo lya Isaya katue ka 65, lili mukufikiliziiwa siani mu nsiku yeetu?

⁴ Bukabika bwakue Isaya bwaatendekele kufikiliziiwa lya bubili mu muaka wa 1919 Yesu wasyavyelue, musita bantu bali bamupupa Yehova ba mu enu nsiku lubaakakwilue kufuma mu buzia bwakue Babiloni mukulu. Kisia paapo ezio paradiso ya kimupasi yaabambile kusalanghana mwaya kyalo. Bakasimikila ba mpunda ya Bukolo, baaundile bilonghaano bingi kabili baalangiliile mibeele ya Kikristu. Balalume ni banakazi baalia baali bakita lwa ntanzi bintu bya bungipaani kabili baalia baali bakoonkele lwendo lubiipile “baalukile ni mibeele ya leenu, mibeele yaalengelue [ao yabumbilue] mu kipalo kyakue Leeza.” (Baef. 4:24) Kulanda kisinka, mpaalo ingi elia yaalandile Isaya, yakaba kufikiliziiwa mu nzila ya kimubili mu kyalo kya leenu mu musita uli mukuiza. Inzi, ata sie leenu kuli bintu bingi bituli mukusekelela mu paradiso ya mufuano. Kansi, tumone ezio paradiso ya kimupasi viili mukutukwasia, kabili juu ya ki te tupalile kufumamo.

BAALIA BALI MU PARADISO YA KIMUPASI BALI MU AALI KI?

5. Nga vilandile lileembo lya Isaya 65:13, ni biki bituli mukusekelela mu paradiso ya kimupasi?

⁵ Bali ni bukose bwaweeme kabili bawamiinue. Bukabika bwakue Isaya bulangiliile nangue buikazi bwa baalia bali mu paradiso ya kimupasi bupuseene saana ni bwa baalia bali panze. (Soma Isaya 65:13.) Yehova ali wabapeela babombi bakue bintu bya kimupasi bibakabiile eevi basiale bali peepi nakue. Tuli ni mupasi utakatiifu, kabili tuli ni Bibilia pamo ni mpapulo iswapiile Bibilia. Bebio bintu bili byatukwasia kuya ‘twalia, . . . kuya twamina, . . . [ni] kusaansamuka.’ (Palania ni Nfyulo 22:17, NWT.) Inzi aali ikolele saana ku baalia basili mu paradiso ya kimupasi. Babo bantu bali ‘ni nzala . . . , bali ni kyaka . . . , [kabili] bali mukufua busoni.’ Te bamumanine Leeza.—Amos. 8:11.

6. Lileembo lya Yoeli 2:21-24 lyalondolola siani bupe paleepale butupeelue na Yehova, kabili bobo bupe buli bwatukwasia tunoonkelemo siani?

⁶ Mu bukabika bwaaleembele Yoeli, waabombiizie bintu bya mana nga evelia mbezu, divai, mafuta a muzeituni eevi kulangilila Yehova vyali wabapeela bantu bakue bintu bibakabiile, kubiika mukati ni kyakulia kya kimupasi. (Yoel. 2:21-24) Kwa mufuano, Bibilia, mpapulo iswapiile Bibilia, kitente kyetu kya Enternete, kulonghaana kwa kila mulungu, kulonghaana kwa muputule, pamo ni kulonghaana kwa kalaale. Tuli twanoonkela mu bebio bintu kila busiku. Keekio kili kyalengia twiunvue kuya twali ni bukose buweeme kabili twawamiinue saana.

7. Ni biki bili byatuleetela “aali iweeme ya mutima”? (Isaya 65:14)

⁷ Bali ni nsaansa kabili barizikile. Bantu bakue Leeza bali ‘mukusamuna kwa nsaansa’ paantu bali mukumutasia Yehova. (Soma Isaya 65:14.) Bintu bimaniine pa ngeleelo ya kilubula mulandu kyakue Kristu, i kulanda, bisinka bya kukosia kiketekelo, bulayo bwa kuteekia mutima buli mu Mulandu Wakue Leeza pamo ni kiswapilo kyetu kilumine, bili byatuleetela “aali iweeme ya mutima.” Kulondolola pamo ni balupua ni bankazi neetu palua bebio bintu kuli kwatuleetela saana nsaansa!—Malum. 34:8; 133:1-3.

8. Ni bintu ki bibili bya mana bili mu paradiso ya kimupasi?

⁸ Ntono pamo ni buumo bili pakati ka bantu bakue Yehova i bintu bibili bikata bimonekele mu paradiso ya kimupasi. Keekio “kifundo kya buumo,” kili kyatulengia tutontonkanie buikazi vibwakaba mu kyalo kya leenu. Moomo, babombi bakue Yehova bakakila  kutonana ni kukwatana kuliko loonu. (Bakol. 3:14, NWT) Nkazi umo Mukristu walondolola kintu kyaamwene ku bantu bakue Yehova musita lwaasaakeene nabo lya kuanza. Walanda eevi: “Nsyali namanine vya kwaluka ni nsaansa, ata sie mu lupua lwetu. Naamwene lya kuanza bantu balangililana ntono musita unaasaakeene ni Bakasininkizia Bakue Yehova.” Olia onse atonene kwaluka ni nsaansa ya kisinka ni kuya warizikile, apalile kwingilila mu paradiso yeetu ya kimupasi. Ata sie kine bantu ba mu keenu kyalo baye batontonkania siani palua babombi bakue Yehova, babo babombi, beene bali ni liina likindeeme ao sifa iweeme pamo ni Yehova ni muntu onse ali wamupupa.—Is. 65:15.

9. Isaya 65:16, 17 ilaile siani palua maavia atuli twapata mu buikazi loonu?

⁹ Batuuziizie kabili bateekameene. Isaya 65:14, ilandile nangue baalia bali basaakula kwikala panze ni paradiso ya kimupasi bali ‘mukulila juu ya misa ku mutima, kabili bali mukuloosia juu ya kutioka kwa mutima.’ Ale kyakaba siani palua beebi bintu byonse bili mukulengia bantu bakue Leeza baye bakisilue ni kwema? Bebio bintu ‘byakafikiila kulabua [ni] kuvutua pa menso [akue Leeza].’ (Soma Isaya 65:16, 17.) Yehova wakapuisia maavia etu, kabili kisia musita, tetukaba twalanguluka kabili azo maavia viabanga atukisia.

10. Juu ya ki weewe uli mukutasia saana kuya wali mu kuteania kwakue Leeza pamo ni balupua ni bankazi Bakristu? (Mona ni foto.)

¹⁰ Ata sie loonu, musita utuli ku kulonghaana kwa Kikristu, tuli twaiunvua kuya twateekameene. Musita utuli kooko tuli twaiunvua kuya twatuziizie kabili tetwizi kupooza maano ku maavia a mu keenu kyalo kibiipile. Kabili tuli twakwasia balupua ni bankazi beyunvue kuya bateekameene musita utuli twalangilila ntono, nsaansa, mutende, kuwamiziana ni bufuuke. Ezio mibeele ili pakati ka mibeele ya lizabo lya mupasi wakue Leeza. (Bag. 5:22, 23) Tuli mukutasia saana paantu tuli mu kuteania kwakue Leeza! Baalia bekeele mu paradiso ya kimupasi, bakaba kumona bulayo bwakue Leeza bwa kuleeta “myulu ya leenu ni kyalo kya leenu” bwafikiliziiwa.

11. Nga vilandile Isaya 65:18, 19, paradiso ya kimupasi elia ikitilue na Yehova ipalile kutulengia tukite ki?

¹¹ Bali batasia kabili basonseziiziwe. Isaya watwalilila kulondolola nsaambu ipalile kutulengia ‘kusekelela ni kusaansamuka’ mu paradiso ya kimupasi. Ezio paradiso ya mufuano yaabumbilue ao yaakitilue kuli Yehova. (Soma Isaya 65:18, 19.) Kulanda kisinka, Yehova ali mukutubombia fwefue eevi tubakwasie bantu bafume mu kuteania kwa mu keenu kyalo kikote kisia bengile mu aali iweeme saana ili mu paradiso ya mufuano. Tuli ni nsaansa ikata juu ya mpaalo  ituli mukupata paantu tuzumiine kisinka, kabili tuli mukusonseziiwa kubabuilako ni bange.—Yer. 31:12.

12. Bulayo buli mu Isaya 65:20-24 bwakulengia weewe wiunvue siani, kabili juu ya ki?

¹² Kabili tuli twatasia ni kusonseziiwa juu ya kiswapilo kituli nakio paantu tuli ni bukibuza bwa mutende pamo ni Yehova Leeza. Ezia kutontonkania bintu byonse bitwakamona ni kukita mu kyalo kya leenu kyakue Leeza! Bibilia ilaile eevi: “Tekukaba kabili muana . . . olia wakeekala sie miaka iniini, aosie mukote wakandua kukumania nsiku yakue.” ‘Twakaba kukuula masesi ni kwikalamo, kabili twakaba kubyala mizabibu ni kulia mazabo akue.’ ‘Tetukaba twabomba miilo ya mpuni,’ paantu twakaba ‘twapaalilue na Yehova.’ Weene atulaile nangue twakaba twasuungilue mu buikazi, twali ni nsaansa kabili twali ni buikazi buli ni mana. ‘Ata sie ntanzi tanakuute,’ Yehova wakamana keelia kikabiile kila muntu ni “kufikilizia nkulu ya kila kintu kili ni bukose.”—Is. 65:20-24; Malum. 145:16.

13. Isaya 65:25 ilondoluele siani bupilibuko buli bwakita bantu mu buikazi bwabo musita ubali batendeka kumubombela Yehova?

¹³ Bali ni mutende kabili bali mu aali yaweeme. Kupitila kukwasiiwa na mupasi wakue Leeza, bantu bengi baalia babanga bali ni mibeele ya bungipaani, bakikita bupilibuko bukata saana mu buikazi bwabo. (Soma Isaya 65:25.) Bakikwinda saana eevi balekele mibeele yabo ibiipile. (Bar. 12:2; Baef. 4:22-24) Kulanda kisinka, fwe bantu bakue Leeza tetunapuililike, pakaako, twakaba kutwalilila kukita bilubo. Inzi Yehova akwataniizie, “bantu bonse” mu kifundo kisiviinda kuputuka kya ntono ni mutende. (Tit. 2:11) Leeza sie wa maka onse i ali ni buviinde bwa kukita keekio kimpezia maano!

14. Mufuano wakue lupua umo ulangiliile siani nangue lileembo lya Isaya 65:25 ni lya kisinka?

¹⁴ Eba kunti kyakitika kakiine muntu aalulule mibeele yakue? Tontonkania palua ozu mufuano. Mulumendo umo, olia waakakilue lingi musita lwabanga wali ni miaka 20, waaiingiziizie saana mu lwendo lubiipile kabili lwa bungipaani. Waakakilue paantu waaibile motoka, waali waingila mu masesi kwa maka ni kwiba bintu. Kabili waali wakakua juu ya kukita bubiifi bunge bukata. Lyonse abanga waiteaniizie sie kuluana na kila muntu. Musita lwaaunvuile lya kuanza kisinka kya Bibilia ni kutendeka kulonghaana pamo ni Bakasininkizia bakue Yehova, waainikile nangue wapata buikazi buli ni mana, i kulanda, kumupupa Yehova mu paradiso ya kimupasi. Kisia kubatiziiwa ni kwaluka Kasininkizia, lingi abanga watontonkania lileembo lya Isaya 65:25 vilyaabombele palwakue. Waafumine mu mibeele ya bunkalamu, ao ya bungipaani, ni kwaluka ni mibeele ya mukooko, ao kwaluka muntu wa mutende.

15. Juu ya ki tuli twatona kukwasia bange bengile mu paradiso ya kimupasi, kabili tuli twakita evio mu nzila ki?

¹⁵ Isaya 65:13 itendekele na eezi milandu: “Mulopue wa Buteeko Bukata Saana Yehova walanda eevi.” Mulongo wa 25 upuililiile na milandu ilandile nangue, “i vyalanda Yehova.” Lyonse bulayo bwakue buli bwafikiliziiwa. (Is. 55:10, 11) Loonu paradiso ya kimupasi kuili. Yehova waakitile lupua lwa bantu bali bamupupa, kabili loolo lupua lwibeleele saana. Paantu tuli mu loolo lupua, loonu tuli ni mutende ulingiliile, kabili tusuungilue mu keenu kyalo kilimo bungipaani. (Malum. 72:7) Ezio i nsaambu ilenge tuye twatonene kukwasia bantu bengi bengile mu lupua lwetu lwa Kikristu. Tuli twakita evio musita utuli twapooza saana maano ku miilo ya kukita basambi.—Mat. 28:19, 20.

KUNTI TWAKWASIA SIANI BANGE EEVI BATONE KWINGILA MU PARADISO YA KIMUPASI?

16. Ni kiki kili kuviinda kukwasia bantu batone kwingila mu paradiso ya kimupasi?

¹⁶ Kila umo pakati keetu kunti wakita bintu beelia bili kulengia bange batone kwingila mu  paradiso ya kimupasi. Eevi tuviinde kukita evio, tupalile kumupala Yehova. Teezi kubapatikizia bantu eevi bengile mu kuteania kwakue. Inzi, ali “wabakulila” kuli weene mu buwaame. (Yoan. 6:44; Yer. 31:3) Bantu bali ni mitima iweeme baalia bali basambilila palua ntono yakue Yehova ni mibeele inge iweeme, bali bakulilua kuli weene bila kupatikiziiwa. Kunti twabakula siani bantu mu paradiso ya kimupasi kupitila mibeele yeetu pamo ni lwendo lwetu luweeme?

17. Kunti twabakula siani bange mu paradiso ya kimupasi?

¹⁷ Nzila imo ya kubakula bange mu paradiso ya kimupasi ni eezi, kubakitila balupua ni bankazi neetu mu nzila ya ntono ni ya buwaame. Musita bantu basili Bakasininkizia lubali baiza ku kulonghaana kwetu, tutonene baye baiunvua nga evelia vyali vyaaiunvua muntu ali onse olia waali wasaangua ku kulonghaana mu Korinto ya kale. Babo bantu baalandile eevi: “Kisinka, Leeza ali pakati keenu.” (1 Bakor. 14:24, 25; Zek. 8:23) Pakaako, tupalile kutwalilila kukoonka masoke alandile nangue “be ni mutende pakati keenu.”—1 Bat. 5:13.

18. Ni kiki kili kulengia bantu batone kwingilila mu kuteania kwetu?

¹⁸ Lyonse tupalile kwikwinda saana kubamona balupua ni bankazi nga evelia Yehova vyali wabamona. Tuli twakita evio kupitila kupooza maano ku mibeele yabo iweeme kuliko kupooza maano ku bilubo byabo, paantu te bakatwalilila kuya bali ni bebio bilubo loonse. Kunti twaviinda kupuisia kusyunvuana konse kuli pakati keetu mu nzila ya ntono kine lyonse tuli twalangililana ‘buwaame pakati keetu, [kine] tuli ni nkumbu ingi, kabili [kine] tuli twaeleelana mukwitonena.” (Baef. 4:32) Keekio kili kulengia bantu baalia batonene kukitilua evio batone kwingila mu paradiso ya kimupasi. b

 SIALA MU PARADISO YA KIMUPASI

19. (a) Nga vilangiliile kisanduku kilandile “ Baafumine, Kisia Baabuelele,” bantu bange baalandile siani kisia kubuela mu paradiso ya kimupasi? (b) Tupalile kuya twapinguile siani? (Mona ni foto.)

¹⁹ Tuitonene saana paradiso yeetu ya kimupasi! Iweeme saana kuliko lwa ntanzi, kabili muli bantu bengi saana, kuliko lwa ntanzi, bali bamupupa Yehova. Kansi, tutwaliliile kumutasia Yehova loonse pa kutuleeta mu paradiso ya kimupasi. Olia onse atonene kuya wawamiinue, warizikile, wateekameene kabili wakingiliilue, apalile kwingila mu paradiso ya kimupasi, kabili tapalile kufumamo ata kaniini! Inzi tuye twailabukiile paantu Sataana ali mukwikwinda na maka akue onse eevi atufumie mu ezio paradiso. (1 Pet. 5:8; Nfy. 12:9) Te tupalile kumulekelela aviinde. Kansi, tutwalilile kusuunga kufuanina ni kusweta kwa paradiso ya kimupasi pamo ni mutende uli moomo.