1. Bakasimika bange bali baiunvua siani palua kulanda ni bantu mu kusimikila? (Mona ni foto.)

 FWEFUE bantu bakue Yehova, tuli twabasimikila bange paantu tumutonene Baba weetu wa ku muulu, kabili paantu tutonene kukwasia bantu bafikiile kumumana weene. Kulanda kisinka, bakasimika bengi bali basaansamukila saana miilo ya kusimikila. Inzi, bange bali baandua kusaansamukila ezio miilo. Juu ya ki? Paange bange bali baunvua saana busoni ni kwimona nangue te bali na buviinde bwa kusambilizia buino. Bange te beezi kwiunvua buino kuya ku masesi a bantu bila baalikilue. Ni bange bali baunvua muenzo nangue paange kunti bakumbua. Bange baasambiliziiziwe kale kutiina kubisiana na bantu. Anzia kine bamutonene saana Yehova, babo balupua ni bankazi bali bamona kyakolele kusimikila mpunda iweeme ku bantu babasimanine. Anzia evio, bamanine nangue ezio miilo ni ya mana, kabili lingi bali basimikila. Kakiine Yehova ali waunvua buino saana juu yabo!

2. Kine weewe uli waandua kusaansamukila miilo ya kusimikila juu ya ki te upalile kutioka mutima?

² Eba, nsita inge ni weewe uli waiunvua evio, ni keekio kili kyakulengia wandue kusaansamukila miilo ya kusimikila? Kine i evio, te kutioka mutima. Paantu te wiswapiile, keekio kunti kyalangilila nangue wikefiizie kabili nangue te utonene bange baye bakupoozeleko saana maano. Kabili keekio kilangiliile nangue tewizi kutona kukankabula na bantu. Kabili te kuli muntu ali watona kubalengia bange bafipue, asa kine ali mukwikwinda eevi aye wabakitila bange bintu biweeme. Baba obe wa ku muulu amanine buino vyuli waiunvua, kabili atonene kukukwasia mu  nzila yukabiile. (Is. 41:13) Mu leeli lyasi, tuli kumona masoke asano a kutukwasia kuluisia ezio aali, kabili tuli kumona bintu bituli kuviinda kukita eevi tusaansamukile miilo ya kusimikila.

LEKELA MULANDU WAKUE LEEZA UKUPEELE MAKA

3. Ni kiki kyaamukwasiizie Yeremia aviinde kubasimikila bange?

³ Ata sie mu nsita ya kale mpunda ifumine kuli Leeza yaali yabapeela maka babombi bakue musita ubabanga bapeelua miilo ikolele ya kukita. Tumone mufuano wakue kabika Yeremia. Musita Yehova lwaamupeele miilo ya kusimikila mpunda, Yeremia waatiinine. Weene waalandile eevi: “Nsimanine vya kulanda, paantu neene nkili sie mwanike.” (Yer. 1:6) Ni kiki kyaamukwasiizie kupata maka a kusimikila? Waapatile maka kupitila Mulandu Wakue Leeza. Waalandile eevi: “Ozo mulandu waalukile nga mulilo uli mukuleema ukakiliilue mu bikuza byane; kabili naatopele kuya nausuungile mukati mwane.” (Yer. 20:8, 9) Ata sie kine fuasi elia yaapeelue Yeremia ya kusimikilamo ibanga yaaviizie, mpunda ibaamulandile kusimikila yaamupeele maka alia abanga wakabiile eevi kubomba ezio miilo.

4. Kunti kwaaluka ki kine tuli twasoma Mulandu Wakue Leeza ni kutontonkania? (Bakolosai 1:9, 10)

⁴ Bakristu bali bapata maka kupitila mpunda ili mu Mulandu Wakue Leeza. Musita lwaali waleembela kilonghaano kya mu Kolosai, mutumua Paulo waalandile nangue kusambilila bingi palua kutona kwakue Yehova kwakaba kubakwasia balupua batwalilile ‘kuseeka lizabo [ao litunda] mu kila miilo iweeme,’ kabili keekio kunti kyabakwasia ‘kwenda mu nzila imupalile Yehova.’ (Soma Bakolosai 1:9, 10.) Ezio miilo iweeme ibiikile mukati kusimikila mpunda iweeme. Pakaako, kine tuli twasoma Mulandu Wakue Leeza ni kutontonkania tuli kukila kumuketekela Yehova ni kukila kwinika nangue kusimikila mpunda ya Bukolo ni kwa mana.

5. Kunti twakita siani eevi tunoonkelemo saana musita utuli mukusoma ni kusambilila Bibilia?

⁵ Eevi tunoonkele saana mu Mulandu Wakue Leeza musita utuli mukusambilila, te tupalile kusoma ni kutontonkania sie lubilo-lubilo. Tupalile kuya bukebuke. Kine wasaanga lileembo likolele kunvuika musita luuli mukusambilila te kutaaluka. Inzi bombia bitabu, Fahirisi ni kitabu Musaada wa Kutafuta Habari kwa Ajili ya Mashahidi wa Yehova, eevi upate bulondolozi palua leelio lileembo. Kine weewe waya bukebuke musita luuli mukusambilila, wakaba kukila  kuswapila nangue Mulandu Wakue Leeza ni wa kisinka. (1 Bat. 5:21) Kine weewe wakila kusininkizia nangue Mulandu Wakue Leeza ni wa kisinka, wakaba kukila kutona kubabuilako bange beelia byuli mukusambilila.

IITEANIE BUINO PALUA MIILO YA KUSIMIKILA

6. Juu ya ki tupalile kwiteania buino palua miilo ya kusimikila?

⁶ Kine weewe waiteania buino palua miilo ya kusimikila, teuya waema saana musita luuli kuya walanda ni bantu. Yesu waabakwasiizie basambi bakue kwiteania ntanzi ya kubatuma mu miilo ya kusimikila. (Luk. 10:1-11) Paantu basambi baabombiizie beelia bibaasambiliziiziwe kuli Yesu, baaviindile kukita bintu bingi biweeme, kabili keekio kyaalengiizie basaansamuke saana.—Luk. 10:17.

7. Kunti twaiteania siani palua miilo ya kusimikila? (Mona ni foto.)

⁷ Kunti twaiteania siani palua miilo ya kusimikila? Tupalile kutontonkanianke palua beelia bitukebele kulanda. Kisia, tulondolole nga mutuli twalandila, kabili mu milandu yeetu fwe beene. Tupalile kuteaniizia mbeela bintu bibili ao bitatu beelia bili byalanda saana bantu mu kazonga keetu ni kubiikilila vya kwasuka. Musita utusyali twamupalama muntu utukebele kusimikila kunti twaikwinda kuteekamana ni kulangilila aali ya nseko pa menso ni ya burafiki.

8. Bakristu bapaleene siani ni ngeso izimbuilue mu mufuano wakue mutumua Paulo?

⁸ Mutumua Paulo waabalandile balupua ni bankazi bakue Bakristu nangue: ‘Fwefue tuli nga ngeso ilimo bukonto bwa mutengo ao bei ikata.’ (2 Bakor. 4:7) Bobo bukonto bwa bei ikata i kiki? I miilo ya kusimikila mpunda ya bukolo elia ili yapususia bukose. (2 Bakor. 4:1) Ale ngeso i kiki? I babombi bakue Leeza baalia bali babasimikila bantu mpunda iweeme. Mu nsiku yakue Paulo, basulu baali babombia bitondo bya bulongo eevi kutwaminamo bintu bikindeeme, nga evelia byakulia, divai, ni nfalanga. Enka evio ni fwefue, Yehova watupeele mpunda iweeme kabili ikindeeme. Kupitila kukwasiiwa na Yehova, kunti twapata maka a kutukwasia kutwalilila kusimikila mpunda ya Bukolo.

PEPA EEVI UPATE MIBEELE YA KUSIPA

9. Kunti twakita siani eevi kuluisia muenzo wa kutiina bantu ao kutiina kupingua? (Mona ni foto.)

⁹ Nsita inge, kunti twatiina muntu ao kunti twatiina kupingua. Kunti twakita siani eevi kuluisia  bobo buavia? Tontonkania vyaapepele batumua musita ubaakaaniiziwe kusimikila. Te baaunvuile muenzo ni kulekela kusimikila. Inzi baamuloombele Yehova abakwasie eevi “batwalilile kulanda mulandu [wakue] mu kusipa konse.” Yehova waasukile lipepo lyabo bila kukokola. (Miil Bat. 4:18, 29, 31) Kine nsita inge twaunvua muenzo wa kutiina muntu, ni fwefue tupalile kumuloomba Yehova atukwasie. Muloombe Yehova akukwasie kuluisia muenzo wa kutiina muntu kupitila kubatona bantu.

10. Yehova ali watukwasia mu nzila ki eevi tuviinde kusimikila? (Isaya 43:10-12)

¹⁰ Yehova waatusaakuile eevi twaluke Bakasininkizia bakue kabili alaile kutukwasia eevi twaluke ni mibeele ya kusipa. (Soma Isaya 43:10-12.) Tumone nzila ina ili pakati ka nzila yali wabombia eevi kutukwasia. Kya kuanza, Yesu ali wasaangua pamo ni fwefue musita utuli twasimikila mpunda iweeme. (Mat. 28:18-20) Kya bubili, Yehova ali watukwasia kupitila bamalaika. (Nfy. 14:6) Yehova ali watupeela mupasi wakue utakatiifu wa kutukwasia kulanguluka bintu bitwakisambilila. (Yoan. 14:25, 26) Kya buna, Yehova ateaniizie balupua ni bankazi ba kuya twabomba nabo. Kupitila kukwasiiwa na Yehova pamo ni balupua ni bankazi betu bali ni ntono, tukwete kila kintu kitukabiile kya kutukwasia kuya twasipile ni kutwalilila kusimikila.

UYE WAALULUKA KABILI WALI NI MAWAZO AWEEME

11. Kine uli mu kusimikila, kunti wakita siani eevi upate bantu bengi? (Mona ni foto.)

¹¹ Eba uli watioka mutima kine wasaanga sie bantu baniini ku masesi mu kusimikila? Kili buino kwiipuzia eevi: ‘Loonu, baaba bantu ba mu kazonga kane bali ku pi?’ (Miil Bat. 16:13) ‘Eba bali ku miilo ao ku nsoko ku kusita bintu?’ Kine i evio, wamona siani kine wabamba sie kusimikila mu musebo? Paange moomo uli kupata bantu bengi. Lupua umo, olia ali wakuutua Joshua, walanda eevi: “Naabambile kusimikila mu fuasi ya kusisiizia bintu, ni mu fuasi inge ya bantu bengi.” Kabili weene pamo ni Bridget, mukazi wakue, baali basaanga bantu bengi ku masesi musita ubaali babendela teinaaluke kyungulo saana, ni Nsiku ya Saba kisia midi.—Baef. 5:15, 16.

12. Kunti twakita siani eevi tumane beelia bizumiine bantu ao beelia bibali baemena saana?

¹² Kine bantu bauli mukulanda nabo lya  kuanza te bapoozele maano ku mpunda yobe, ezia kukeba kine ni kiki kibazumiine, ao kine ni biki bibali baemena saana. Ba Joshua ni Bridget bali batendekezia bulondolozi kupitila kubombia kiipuzio kili kyasaangua ku ntendeko ya trakti. Kwa mufuano, musita ubali babombia trakti ilandile, Uli Waimona Siani Bibilia? beene bali batendeka eevi: “Bantu bange bali bamona Bibilia kuya yali kitabu kifumine kuli Leeza, inzi bange balipo ni masiaka. Ale weewe, umwene nangue Bibilia yafumine pi?” Keekio kili kyakwasia kubamba bulondolozi pamo ni muntu.

13. Ata sie kine bantu bali mukukaana mpunda ituli twasimikila, juu ya ki te tupalile kwimona nangue twaandua miilo? (Tuswalo ni Mafunde 27:11)

¹³ Ata sie kine bantu te bali mukutuilizia musita utuli mukubasimikila, fwefue tuli mukufikilizia miilo yeetu. Juu ya ki twalanda evio? Paantu tuli mukukita keelia kitonene Yehova ni Muana wakue, i kulanda tuli mukufumia busininkizio. (Miil Bat. 10:42) Ata sie kine te tupatile ata muntu wa kulanda nakue ao mpunda yeetu yakaanua, kunti twasaansamuka paantu tumanine nangue tuli mukulengia Baba weetu wa ku muulu asaansamuke.—Soma Tuswalo ni Mafunde 27:11.

14. Juu ya ki tupalile kusaansamuka kine kasimika unge wapata muntu atonene kutuilizia mpunda yeetu mu kazonga?

¹⁴ Kabili kunti twasekelela kine kasimika unge wapata muntu atonene kutuilizia mpunda mu kazonga keetu. Lupungu Lwakue Kamwenenena lumo, lwapalaniizie miilo ya kusimikila na miilo ya kukeba muana azeezele. Bantu bengi bali baya kumukeba, bapita mu fuasi paleepale. Kine muana wamoneka, kila muntu ali wasekelela, apana sie olia wamupatanga. I vili ni miilo ya kusimikila. Kila muntu mu kilonghaano ali wakwasia kukita muntu aaluke musambi wakue Yesu. Tukabiile kila muntu mu kilonghaano akwasie kusimikila bantu ba mu kazonga keetu, kabili bonse bali basaansamuka kine muntu umo wabamba kuiza ku kulonghaana.

MUTONE SAANA YEHOVA NI BANTU

15. Kubombia masoke ali mu lileembo lya Mateo 22:37-39 kunti kwatukwasia siani kongezia nsaansa yeetu palua miilo ya kusimikila? (Mona ni foto ili ku ya kazeeti.)

¹⁵ Kunti twakila kusaansamukila miilo ya kusimikila kine twakila kumutona Yehova ni bantu. (Soma Mateo 22:37-39.) Ezia kutontonkania Yehova vyali waunvua nsaansa musita  lwali watumona twabomba miilo ya kusimikila. Kabili tontonkania bantu vibali baunvua nsaansa musita ubali batendeka kusambilila Bibilia! Kabili te kulaba nangue baalia bali baitabila mpunda yeetu ni kupingula kumubombela Yehova, bali ni kiswapilo kya kupata bukose bwa loonse.—Yoan. 6:40; 1 Tim. 4:16.

16. Kunti twakita siani eevi tusaansamukile miilo ya kusimikila kine te tuli na buviinde bwa kufuma pa nsesi? Leeta mifuano.

¹⁶ Paange teuli na buviinde bwa kufuma pa nsesi yobe. Kine i evio, pooza maano ku bintu byuli ni buviinde bwa kukita eevi kulangilila ntono yobe kuli Yehova ni ku bantu. Mu kipindi kya buluele bwa korona (COVID-19), Samuel pamo ni Dania te babanga bali na buviinde bwa kufuma ku nsesi yabo. Mu keekio kipindi kyaali kyakolele, lingi baali basimikila kupitila telefone ni kuleemba mikanda. Kabili, babanga batungulula masambilizio a Bibilia kupitila kukuutana ku viideo. Samuel waali wasimikila bantu baalia babanga wamonana nabo ku opitali musita lwaali waya kutunzua buluele bwa kapoopo. Walanda eevi: “Musita utuli mu maavia kunti twaema ni kufikiila kutopa kabili kiketekelo kyetu kunti kyaeziiwa. Tupalile kukeba nsaansa kupitila miilo yakue Yehova.” Mu keekio kipindi, Dania waakitile miezi itatu walisie pa kitanda. Kisia waakitile miezi sita waenda na kakinga ka babilema. Walanda eevi: “Naaikwindile kukita kyonse kinaali ni buviinde bwa kukita kukoonkana ni aali yane. Naaviindile kumusimikila munganga umo mwanakazi olia waizile kuumona, kabili naali nabasimikila baalia baali baleeta bintu ku nsesi. Kabili naali nalondolola kupitila telefone na mukulu olia waali waimaniine keekio kitente kya matunzo.” Anzia kine ba Samuel ni Dania te baali na buviinde bwa kusimikila saana nga vibaali bakita lwa ntanzi, baakitile kukoonkana ni buviinde bwabo. Kabili keekio kyaabaleteele nsaansa.

17. Weewe, kunti wakita siani eevi unoonkele saana mu masoke atwamona mu leeli lyasi?

¹⁷ Ikwinde kubombia masoke onse asano atwamona mu leeli lyasi. Kila musoko, uli nga kintu kimo kya kukolezia mapisi kya kubiika mu mboka. Kine bintu byonse bya kukolezia mapisi byabiikuamo, ezio mboka ili kuwaama saana. Enka evio ni fwefue, kine twabombia azo masoke onse, tuli kwaluka ni biombo byonse bikumeene bya kutukwasia kuluisia kine tetwizi kusaansamukila miilo ya kusimikila, kabili tuli kukila kusekelela ezio miilo.