Bukabika bunge bulangiliilue pa eezi karte bwaali bwakitika mu musita umo. Busininkiziizie nangue twikeele mu “nsita ya mpela.”​—Dan. 12:4

• Lileembo Nfy. 11:7; 12:13, 17; 13:1-8, 12

  Bukabika “Kinama kya mu kisonso” tekisyateekele kyalo mu miaka ikilile pa 3000. Mu nsita ya mpela, mutue wakue wa saba wakisiiwa. Kupuako, ozo mutue watuuka ni “kyalo kyonse” kyamukoonka ozo kinama. Sataana wabombia keekio kinama eevi “kukita bului ku basyelepo.”

  Kufikiliziiwa Kisia Kibunda, ma buteeko a bantu ali amuluisia Yehova atendeka. Kisia miaka ikilile pa 3000, musita wa Bului bwa Mambo bwa Kyalo, buteeko bwa Uingereza bwaatopele saana. Bwaatuukile musita lubwaungheene pamo ni Amerika. Sataana ali mukubombia buteeko bwa politike eevi kusaanza bantu bakue Leeza, i nkile mu nsita ya mpela.

• Lileembo Dan. 11:25-45

  Bukabika Mu nsita ya mpela, likolo wa ku nkungua ni likolo wa ku nkungulua baluana.

  Kufikiliziiwa Ujerumani waluana ni buteeko bwa Uingereza ni Amerika. Mu 1945 Buumo bwa Sovieti ni bakwasi bakue baaluka likolo wa ku nkungua. Mu 1991, Buumo bwa Sovieti bwapona, kabili kisia musita kampanda Urusi ni bakwasi bakue baaluka likolo wa ku nkungua.

• Maleembo Is. 61:1; Mal. 3:1; Luk. 4:18

  Bukabika Yehova watuma “mukenzi” wakue eevi ‘ezule nzila’ ntaanzi ya kutendeka kuteeka kwa Bukolo bwa Kimesia. “Mukenzi” waatendeka “kupunda mpunda iweeme ku bekeefiizie.”

  Kufikiliziiwa Kutendekela mu miaka ya 1870 Charles Taze Russell pamo ni benakue baabombele kwa mute eevi kulondolola bisinka bya Bibilia. Mu 1880, baainikile nangue babombi bakue Leeza bapalile saana kusimikila. Baafumiizie maasi nga evelia “Bakasimika 1000 Bakabiilue,” ni “Babiikilue Mafuta Eevi Basimikile.”

• Lileembo Mat. 13:24-30, 36-43

  Bukabika Muluani wamiina ndao mu bukaba bwa nghano, ezio ndao yalekelelua ikulilesie pamo kabili nghano yazeeza mu ndao mpaka musita wa kuzombola ufike; kupuako ndao yafumiiwa mu nghano.

  Kufikiliziiwa Kutendekela mu 1870, Bakristu ba kisinka batendeka kupusaniiwa ni Bakristu ba bufi. Mu nsita ya mpela, Bakristu ba kisinka bakolonghaaniiwa ni kupusaniiwa ni Bakristu ba bufi.

• Lileembo Dan. 2:31-33, 41-43

  Bukabika Makasa a kyuma ni bulongo a ku olia mukisi utengeneziiziwe na mabue paleepale a mutengo.

  Kufikiliziiwa Bulongo bupalaniizie bantu bateekelue na Uingereza ni Amerika, baalia bali mukusaanguka ku bobo buteeko bukwateene. Babo bantu bali mukulengia azo ma buteeko andue kubombia buviinde bwabo bonse.

• Lileembo Mat. 13:30; 24:14, 45; 28:19, 20

  Bukabika “Nghano” yaakolonghaniiwa ni kubiikua ku “butala” kabili “muzia wa kisinka ni wa maano” wasaakulua eevi emanine “babombi ba mu nsesi.” Kusimikilua kwa “mpunda iweeme ya Bukolo” kwasalanghana mu “kyalo kyonse.”

  Kufikiliziiwa Mu 1919 muzia wa kisinka wasaakulua eevi emanine bantu bakue Leeza. Kutendekela pa ozo musita, Basambi ba Bibilia bakila kusimikila. Leenu, Bakasininkizia Bakue Yehova bali mukusimikila mu byalo bikilile pa 200 ni kufumia mpapulo imaniine Bibilia mu ndimi ikilile pa 1000.

• Maleembo Dan. 12:11; Nfy. 13:11, 14, 15

  Bukabika Kinama kya mu kisonso kya masengo abili kyaimanina kukitua kwa “mukisi wa kinama kya mu kisonso,” kabili kyabiika “mpumuzi ya bukose mu mukisi.”

  Kufikiliziiwa Buteeko Bukata bwa Kyalo bwa Uingereza ni Amerika bwaimanina miilo ya kutendekezia Kwampana kwa Ntundu. Kooko kuteania kukwasiiziwe na ntundu inge. Kupuako, likolo wa ku nkungua ni weene waiunga mu ezio ntundu, inzi wakitasie evio kutendekela mu 1926 mpaka mu 1933. Bantu bazumina nangue Kwampana kwa Ntundu kuli kuleeta mutende mu kyalo, kintu kipalile kuleetuasie na Bukolo Bwakue Leeza. Kabili bantu bazumiine nangue Buumo bwa Ntundu ni bwene kunti bwakita enka evio.

• Lileembo Dan. 8:23, 24

  Bukabika Likolo amwenekele wasasile waleeta “buinooni mu nzila ya kupapia.”

  Kufikiliziiwa Buteeko Bukata bwa Kyalo bwa Uingereza ni Amerika bwaaleetele buinooni bukata. Kyakumuenako, mu Bului bwa Bubili bwa Kyalo, Amerika waaleetele buinooni bukata businakitikepo musita lwaapoozele ma bomba abili a atoomu ku ntundu yaali yaluisia Uingereza ni Amerika.

• Lileembo Dan. 11:31; Nfy. 17:3, 7-11

  Bukabika Kinama “kyakasi” kya masengo likumi kyafuma mu abiso, kabili i likolo wa munaane. Kitabu kya Danieli kili kyamuzimbula ozo likolo kuba “kintu kya nkeni kili kyaleeta buinooni.”

  Kufikiliziiwa Kwampana kwa Ntundu kwainoonua musita wa Bului bwa Bubili bwa Kyalo. Kisia bului, Buumo bwa Ntundu “bwakitua.” Nga vyaakitiilue Kwampana kwa Ntundu, Buumo bwa Ntundu ni bwene bwapeelua bulumba bupalile kupeelua Bukolo Bwakue Leeza. Buumo bwa Ntundu bwakaba kwinoona diini.

• Maleembo 1 Bat. 5:3; Nfy. 17:16

  Bukabika Ntundu yapuunda “mutende ni kuteekamana” kabili “masengo likumi” ni “kinama kya mu kisonso” bamubotokela “mukambue” ni kumwinoona. Kupuako, ntundu yainoonua.

  Kufikiliziiwa Ntundu yakalanda nangue yaleeta mutende ni kuteekamana. Kisia, ntundu ikwasiizie Buumo bwa Ntundu yainoona kuteania kwa ma diini a bufi. Ezio i ntendeko ya lyemo likata. Leelio lyemo lyakapua musita wakenoonua kyalo kyakue Sataana ku Armagedoni.

• Maleembo Ezek. 38:11, 14-17; Mat. 24:31

  Bukabika Gogu wasaukila kyalo kya bantu bakue Leeza. Kupuako, bamalaika babakolonghania baalia “basaakuilue.”

  Kufikiliziiwa Likolo wa ku nkungua, pamo ni ma buteeko ange bakabotokela bantu bakue Leeza. Musita kampanda kisia kutendeka kwa kooko kubotokela, babiikilue mafuta basyelepo bakolonghaniiwa ku muulu.

• Maleembo Ezek. 38:18-23; Dan. 2:34, 35, 44, 45; Nfy. 6:2; 16:14, 16; 17:14; 19:20

  Bukabika “Olia aselele” pa “farasi wasue” wapuilila bului bwakue bwa “kwanzia” kupitila kumwinoona Gogu ni balukale bakue. “Kinama kya mu kisonso” kyene “kyapoozua mu lyezi lya mulilo” ni olia mukisi ukata wavuungua.

  Kufikiliziiwa Yesu, Likolo wa Bukolo Bwakue Leeza, waiza kupususia bantu bakue Leeza. Yesu pamo ni bantu 144000 ni bamalaika, bakaba kwinoona ntundu yonse ili mukuluisia bantu bakue Leeza. Ezio i yakaba mpela ya kyalo kyakue Sataana.