1-2. Bakasininkizia bengi bali mukusaakaana ni maavia ki?

MUTUMUA Paulo waamukinkiziizie Timoteo akite maka akue onse eevi abombe miilo ya kusimikila. (2 Tim. 4:5) Pakaako, tukoonkele musoko wakue Paulo, kabili tuli twaikwinda saana kubomba miilo yakue Leeza. Inzi lunge, kili kyasaangua kyakolele. Balupua ni bankazi bengi, bakabiile kusipa saana eevi baviinde kutwalilila mu miilo ya kusimikila. (2 Tim. 4:2) Kwa mufuano, tontonkania palua balupua bekeele mu byalo mukaniiziwe miilo yeetu paleepale ao miilo yonsesie. Bali basimikila anzia kine bamanine nangue kunti bakakua!

² Bantu bakue Yehova bali mukusaanga maavia engi ali ationa mutima. Kwa mufuano, bengi bali mukubomba saana eevi bapate bintu bibakabiile mu lupua lwabo. Kunti baya batonene kukita bingi mu miilo ya kusimikila, inzi ku mpela ya mulungu basaangua batopele saana. Bange, bali ni buviinde bwa kubombasie kaniini mu miilo yakue Yehova juu ya butope, bukote, ao paange bange tebakili na buviinde bwa kufuma pa nsesi. Lingi, bange bali baisaanga nangue te bantu ba mana pa menso akue Yehova. Nkazi umo ali wakuutua Mary * walanda eevi: “Ili yaloomba kwikwinda saana eevi nviinde kuluisia malanga abiipile ali andengia ngie natopele mu maano. Ndi naisaanga naali ni kilubo paantu malanga azo, ali antwamina maka ane ni musita wa kuya nali mu miilo ya kusimikila.”

3. Tuli kulondoluela ki mu leeli lyasi?

³ Anzia kine tuye twali ni maavia a siani, Yehova kunti watupeela maka atukabiile eevi tutwalilile kumubombela kukoonkana ni buviinde bwetu. Ntaanzi ya kulondoluela Yehova vyali watukwasia, tulondoluelenke vyaabapeele maka ba Paulo ni Timoteo eevi baviinde kubomba miilo yabo ya kusimikila anzia maavia.

4. Paulo waapatile maavia ki?

⁴ Paulo waasaakeene ni maavia engi. Waali wakabiile saana kukwasiiwa na Yehova musita baluani bakue lubaali bamuuma, kumupooza mu buloko ni kwezia kumwipaya. (2 Bakor. 11:23-25) Paulo waaitabiile bila kufiika nangue nsita inge waasaakeene ni aali ili yationa mutima. (Bar. 7:18, 19, 24) Waasaakeene ni maavia mu buikazi bwakue aali apaleene ni “munga mu mubili,” kabili waali wakebele Leeza apuisie maavia azo.​—2 Bakor. 12:7, 8.

5. Paulo waakitile ki anzia kine waasaakeene ni maavia?

⁵ Yehova waamupeele Paulo maka eevi atwalilile kusimikila anzia maavia abanga wali nao. Mona bintu byaakitile Paulo. Kwa mufuano, musita Paulo lwabanga wakakilue mu nsesi imo ku Roma, waasimikiile kwa mute ntaanzi ya bantunguluzi Bayuda, paange ni ku bakulu ba mu buteeko. (Miil Bat. 28:17; Baf. 4:21,22) Kabili waasimikiile balinzi bengi ba mu nghanda yakue Likolo ni baalia bonse baali baya kumupempula. (Miil Bat. 28:30, 31; Baf. 1:13) Mu ozo wenka musita, Paulo waaleembele mikanda itungulwilue na mupasi yaakwasiizie Bakristu ba kisinka mu nsita ya kale, kabili ili mukukwasia ni Bakristu mu nsiku yeetu. Kukila pakaako, mufuano wakue Paulo waakoseleziizie bilonghaano mu Roma. Kabili, keekio kyaalengele balupua bakue baye ‘bamuketekeele Mulopue ni kuya basimikila twebo twakua Leeza pasili kutiina.’ (Baf. 1:14) Anzia kine Paulo taali na buviinde bwa kubomba nga vyaali watonene, waakitile maka akue onse kukoonkana ni aali yakue, kabili keekio ‘kyaakwasiizieko miilo ya kusimikila mpunda iweeme kuti ikumane.’​—Baf. 1:12.

6. Nga vilandile lileembo lya 2 Bakorinto 12:9, 10, ni kiki kyaamukwasiizie Paulo abombe miilo ya kusimikila?

⁶ Paulo waainikile nangue kintu kyonse kyaakitile mu miilo yakue Yehova, waakwaasiiziwe na maka akue Leeza, apana akue muine. Waalandile nangue maka akue Leeza aali ‘amoneka muli weene lwaali munake.’ (Soma 2 Bakorinto 12:9, 10.) Kupitila mupasi wakue utakatiifu, Yehova waamupeele Paulo maka eevi aviinde kubomba miilo ya kusimikila mukupuililika anzia masaanzo, kukakua ni maavia ange aapatile.

7. Zimbula maavia aapatile Timoteo aasiile kulengia kiye kyakolele kufikilizia miilo yakue ya kusimikila.

⁷ Kabili Timoteo, kibuza mulumendo wakue Paulo, waaswapiile maka akue Leeza eevi  aviinde kubomba miilo yakue ya kusimikila. Timoteo waali waenda ni Paulo mu miilo ya bumisionere. Kabili, Paulo waamutumine Timoteo mu bulendo bunge, eevi aye endele bilonghaano ni kubikoselezia. (1 Bakor. 4:17) Paange, Timoteo waaimwene nangue tapalile. Paange keekio i kyaalengele Paulo amulande eevi: “Te kulekelela muntu akuleebule paantu uli mulumendo.” (1 Tim. 4:12) Kukila pakaako, mu ozo wenka musita, Timoteo ni weene waali ni munga wakue mu mubili. ‘Waali walwalilila.’ (1 Tim. 5:23) Inzi, Timoteo waainikile nangue mupasi utakatiifu wakue Yehova uli ni buviinde, wakaba kumupeela maka eevi asimikile mpunda iweeme ni kubombela balupua bakue.​—2 Tim. 1:7.

8. Yehova ali mukubakoselezia siani bantu bakue mu nsiku yeetu?

⁸ Mu nsiku yeetu, Yehova ali wabapeela bantu bakue “maka akata” eevi batwalilile kumubombela mu kisinka. (2 Bakor. 4:7) Kansi, tulondoluele bintu bina biteaniizie Yehova, eevi kutukoselezia ni kutukwasia kutwalilila kuya twali ba kisinka kuli weene: Lipepo, Bibilia, balupua ni bankazi betu Bakristu, ni miilo ya kusimikila.

9. Lipepo kunti lyatukwasia siani?

⁹ Kukoseleziiwa kupitila lipepo. Nga vilandile Baefeso 6:18, Paulo watukinkizia tutwalilile kupepa kuli Leeza mu “kila musita (NWT).” Leeza wakaba kwasuka mapepo etu kupitila kutupeela maka. Jonnie, ali waikala mu kyalo kya Bolivia, waaimweneene Yehova vyaamukwasiizie musita lwaasaakeene ni maavia engi. Mukazi pamo ni baviazi bakue baaluele saana mu nsita imo. Jonnie waaemene saana eevi kukeba bintu byaali byakabiile babo baluele batatu. Mama wakue waafuile, kabili kyaatweme musita waleepele eevi mukazi ni baba wakue bafikiile kukosa. Palua ozo musita waali waaviizie, Jonnie walanda eevi: “Musita unaali mu azo maavia, lyonse naali nakwasiiwa kupitila kupepa kuli Yehova ni kumubuila vinaali naiunvua.” Yehova waamupeele maka aali wakabiile eevi asipikizie. Ronald, mukote umo ali waikala mu kyalo kya Bolivia, waapatile mpunda nangue mama wakue aluele kapopo. Kisia muezi umo, mama wakue waafuile. Ni kiki kyaamukwaasiizie kusipikizia bobo buavia? Walanda eevi: “Lunaali napepa kuli Yehova, naali namubuila aali yonse inaali naiunvua. Manine nangue ali wangunvua kukila muntu unge onse, kabili amanine buino aali yane kukila ni vinasaangua naimanine.” Nsita inge, kunti twaisaanga twatitikiilue na maavia, ni kwandua kumona kintu kitupalile kubiika mu lipepo. Inzi, Yehova atukupile tupepe kuli weene, anzia kine kunti twamona kyakolele kumubuila aali itwiunvuile.​—Bar. 8:26, 27.

10. Nga vilandile lileembo lya Baebrania 4:12, juu ya ki kusoma Bibilia ni kutontonkania palua beelia bitwasoma ni kwa mana saana?

¹⁰ Kukoseleziiwa kupitila Bibilia. Paulo waali wasoma Maleembo eevi akoseleziiwe ni kuteekiwa mutima. Kansi ni fwefue tupalile kukita evio vyenka. (Bar. 15:4) Musita utuli twasoma ni kutontonkania Mulandu Wakue Leeza, Yehova kunti watukwasia kwinika Bibilia viili kuviinda kutukwasia mu aali yeetu. (Soma Baebrania 4:12.) Ronald, lupua utwazimbulanga lwa ntaanzi, walanda eevi: “Ndi ni nsaansa saana, paantu naaikwindile kuya nasoma Bibilia lyonse nsita ya busiku. Ndi natontonkania saana palua mibeele yakue Yehova ni vyali waemena babombi bakue. Keekio i kili mukunkwasia kupata kabili maka.”

11. Bibilia yaamukoseleziizie siani nkazi waali mu bulanda?

¹¹ Kutontonkania palua Mulandu Wakue Leeza, kunti kwatukwasia kwaluka ni malanga aweeme palua maavia etu. Mona Bibilia  viyaamukwaasiizie mukanfuilua umo abanga wali mu bulanda. Mukote umo waamusokele nangue kunti wapata masomo aweeme kupitila kusoma kitabu kya Yobu. Ozo nkazi lwaatendekele kukita evio, ku ntendeko waamusekele Yobu juu ya malanga akue abiipile. Mu maano akue waali watontonkania kumusoka eevi: “Wee Yobu, apana kuya watontonkaniasie palua maavia obe!” Inzi kisia, waainikile nangue malanga akue aali apaleene saana ni akue Yobu. Keekio kyaamukwasiizie kwalulula malanga akue ni kupata maka a kusipikizia misa ya kuzeezia mulume wakue.

12. Yehova ali watukoselezia siani kupitila balupua ni bankazi mu kilonghaano?

¹² Kukoseleziiwa kupitila balupua ni bankazi Bakristu. Mu nzila inge, Yehova ali wakoselezia Bakristu kupitila bazumizi naabo. Paulo waaleembele nangue, waali watonene saana ‘bakoselezianie’ pamo ni balupua ni bankazi bakue ba kimupasi. (Bar. 1:11, 12) Mary, utwazimbulanganke, ali watona saana kuya wali pamo ni balupua ni bankazi bakue ba kimupasi. Walanda eevi: “Yehova waabombiizie balupua ni bankazi basyaali bamanine maavia ane. Baali balanda ao kundembela milandu ya kukoselezia, keekio i kinaali nakabiile kakiine. Kabili keekio kyaankwasiizie mbabuileko bila kubafiika maavia ane, bankazi bange baasaakeene ni aali ipaleene ni yane. Kabili, naasambiliile kupitila beelia bibaakitile. Kabili lyonse, bakote baali bankwasia kwiunvua nangue ndi wa mana mu kilonghaano.”

13. Kunti twakoseleziana siani ku kulonghaana?

¹³ Kulonghaana kuli pakati ka nkeende ya mana saana ili yatukwasia kukoseleziana. Kine waya ku kulonghaana, ikwinde kubakoselezia bange kupitila kubabuila nangue ubatonene kabili nangue uli mukutasia bintu bibali bakita. Kwa mufuano, ntaanzi ya kutendeka kulonghaana, mukote umo ali wakuutua Peter, waamulandile eevi nkazi umo ali ni mulume asizumiine: “Kakiine tuli twakinkiziiwa saana kukumona paanu. Lyonse, uli wafika mbele pamo ni baana bobe sita, kabili muli mwateania buino byasuko.” Ozo nkazi, waatasiizie ni mensozi aengeleela wali mukulanda eevi: “Kakiine i kintu kingile nakabiile kunvua leelo.”

14. Miilo ya kusimikila ili yatukwasia siani?

¹⁴ Kukoseleziiwa kupitila miilo ya kusimikila. Musita utuli twasimikila bange, tuli twaiunvua buino ibe bali kwitabila ao bakaane. (Tus Maf. 11:25) Nkazi umo ali wakuutua Stacy, waaimweneene miilo ya kusimikila viili yakoseleziana. Musita muntu umo wa mu lupua lwakue lwaatengelue, ozo nkanzi waakisikile saana, kabili waatendekele kwiipuzia eevi: ‘Manake nsyaakimukwasia saana?’ Kyaali kyakolele kuli weene kulekela kutontonkania palua bobo buavia. Ni kiki kyaamukwasiizie kuluisia aali ezio ya kutioka mutima? Kusimikila! Lwaali waya mu kusimikila, waatendekele kupooza saana maano ku bantu ba mu kazonga kakue baali bakabiile kukwasiiwa na weene. Walanda eevi: “Mu ozo musita, Yehova waankwasiizie kupata musambi wa Bibilia waakitile lubilo buyantanzi. Keekio kyaankoseleziizie saana. Miilo ya kusimikila, i kintu kyaankwasiizie saana.”

15. Weewe pa lobe, wasambilila ki kupitila bulondolozi bwakue Mary?

¹⁵ Bange, kunti baimona nangue te bali na buviinde bwa kukita bingi mu miilo ya kusimikila juu ya aali yabo. Kine ni weewe uli waiunvua evio, mana nangue kine wakita maka obe onse, Yehova ali wasekelela. Mona kabili mufuano wakue Mary. Musita lwaakuukiile mu kazonga kali kalanduamo lulimi lunge, waaimwene nangue tapalile saana. Walanda eevi: “Lwa ntaanzi mbanga nakitasie bulondolozi buleengele, kusoma lileembo ao kumupeela muntu trakti.” Keekio kyaalengele emone nangue tapalile saana,  kine waipalania ni baalia bamanine kulanda buino loolo lulimi. Waaluluile malanga akue ni kwinika nangue Yehova kunti wamubombiasie anzia kine taali wamanine kulanda buino loolo lulimi. Walanda eevi: “Beelia bili byalanda Bibilia bileengele, kabili kunti byaalulula buikazi bwa bantu.”

16. Baalia basili na buviinde bwa kufuma ku masesi abo, inzi batonene kusimikila kunti bakwasiiwa na ki eevi bapate maka kabili?

¹⁶ Anzia kine te tuli na buviinde bwa kufuma pa nsesi, Yehova ali wamona ni kutasia nkulu ituli naayo palua miilo ya kusimikila. Kuti watukwasia eevi tusimikile baalia bali batusuunga ao bamunganga. Kine twatendeka kupalania miilo ituli mukubomba leenu, ni eelia itwaali twabomba twakili ni buviinde kunti twatioka mutima. Inzi, kine twainika Yehova vyali mukutukwasia loonu, twakaba kupata maka atukabiile eevi kusipikizia maavia atuli nao twali ni nsaansa.

17. Kukoonkana ni lileembo lya Kasimika 11:6, juu ya ki tupalile kutwaalilila kusimikila anzia kine te tumwene mazabo aweeme paalia penka?

¹⁷ Te tumanine kine ni mbezu ki ya kisinka ituli twabiala ili yakaalukako mizi ni kutendeka kukula. (Soma Kasimika 11:6.) Kwa mufuano, nkazi Barbara ali ni miaka 80 eevi, ali wasimikila lingi kupitila telefone ao mikanda. Mu mukanda umo, waabiikilemo Lupungu Lwakue Kamwenenena lwa pa busiku 01, Muezi wa 03, 2014 lulimo lyasi lilandile “Kintu Kyaatukitiile Leeza.” Taamanine nangue waatumine mukanda ozo ku bamulume ni mukazi baali basyalekeele kumubombela Yehova. Baasomene saana kaako kazeeti. Mulume waaiunvuile nga evelia Yehova ali mukuya wamulanzia, palia penka. Loolo lupua lwaakitile miaka ikilile pa 27 bila lwamubombela Yehova. Inzi, kisia kupeelua kaako kazeeti babambile kulonghaana kabili ni kumubombela Yehova. Lwaamwene mazabo aweeme aafumine mu ozo mukanda waatumine, Barbara waakinkiziiziwe ni kukoseleziiwa saana!

18. Kunti twakita siani eevi tukoseleziiwe na Leeza?

¹⁸ Yehova ateaniizie nkeende ingi ya kutukwasia eevi tupate maka akue engi. Yehova atupeele bintu bingi eevi atukoselezie. Kuli bintu nga evelia lipepo, Bibilia, balupua ni bankazi ni miilo ya kusimikila. Musita utuli twabombia bebio bintu, tuli twalangilila nangue tuswapiile atukwasie kabili atonene kukita evio. Kansi, tupingule lyonse kumuswapila Baba weetu wa ku muulu ali watona saana ‘kulangilila maka ku baalia bali ni mutima upuililikile kuli weene.’​—2 Mil Nsi. 16:9.